Raga̱jma̱ i̱yi̱i̱ʼ rí niʼnirámáʼ Pedro 3:1-18
3 A̱ngui̱nʼ, rígi̱ nindxu̱u̱ má raga̱jma̱ i̱yi̱i̱ʼ rí naniraʼmáʼ náa inala, ikháá má xóo rí timbá, nindxu̱u̱ mu ma̱ni̱kuma̱a̱ʼla rí gíʼmaa mundxaʼwamíjna̱ májánʼ,
2 mu xúʼko̱ ma̱ni̱ marmáʼáan a̱jkia̱la ajngáa rí nithi* profetas* ndrígio̱o̱ Dios ga̱jma̱a̱ kiʼtáñajunʼ rí nixnúlu Tátá ndrígúlú ga̱jma̱a̱ bi̱ naʼni káwáánʼ náa majñúnʼ apóstoles bi̱ kúwá náa ikháanʼla.
3 Xó má eya̱a̱la, índo̱ gáʼni iwáá mbiʼi makuwá xa̱bu̱ bi̱ mutsijma ga̱jma̱a̱ numuu rí májánʼ ma̱ngaa muni̱ xó má rí ikhiin nandún,
4 muthi: “Náá xtáa bi̱ niʼthí rí ma̱ʼkha̱a̱ mu makuwáánʼ gajmiúlú rá. Numuu rí asndu nákha mbiʼi rí nikháñún wajin xiʼñúxu xtáa rarígá ikháá má xóo nirígá asndu nákha Dios niʼniwíi xúgíʼ dí rígá”.
5 Nuni̱í rí asndu xóo tséyáá rígi̱: Rí nákha wájyúuʼ nirígá mbá mekhu ga̱jma̱a̱ mbá ku̱ba̱ʼ dí nigájnúu náa iyaʼ ga̱jma̱a̱ nigi̱ʼi̱ gújkhúʼ náa tapho̱o̱ iyaʼ xó má Dios niʼthí,
6 ikha jngóo numbaaʼ dí nirígá nákha ikhú, niguma gámbáa índo̱ nijnííʼ iyaʼ.
7 Ikháá má xóo niʼthí Dios, mekhu ga̱jma̱a̱ ku̱ba̱ʼ dí rígá xúgi̱ gíʼthu̱u̱n mu mikha̱a̱ ga̱jma̱a̱ gíʼthu̱u̱n mixtanda̱ʼa̱a̱ cuenta, ma̱ngaa rí maguma gámbíin xa̱bu̱ ra̱míjíinʼ.
8 A̱ngui̱nʼ, xámbumala rígi̱: Dí Jeobá* ndaʼyoo rí xóo mbá mbiʼi nindxu̱u̱ rí mbá mil tsiguʼ ga̱jma̱a̱ mbá mil tsiguʼ nindxu̱u̱ xóo mbóó mbiʼi.
9 Jeobá* tséjyúuʼ mu maʼnimbánúu rí nakudaminaʼ maʼni, raʼkháa xóo eku̱mu̱ún tikhun xa̱bu̱. Ikhaa naʼngo̱o̱ a̱jkiu̱u̱n kaʼyala numuu rí tsíyóo rí nimbáa maguma gámbáa, ikhaa nandoo rí xúgíinʼ maguánú matanga̱a̱ a̱jkiu̱ún.
10 Mbiʼi ndrígóo Jeobá* ma̱ʼkha̱ xóo mbáa kuʼwáʼ. Mbiʼi rúʼko̱ mekhu mandátiga̱a̱ ga̱jma̱a̱ mawáán gakhi̱i̱ wéñuuʼ,* rí niguma ga̱jma̱a̱ mekhu ma̱ngaa ku̱ba̱ʼ magigoo ga̱jma̱a̱ magandáwo̱o̱ʼ, ikhú ku̱ba̱ʼ ga̱jma̱a̱ rí naguma ikhí makujmaa pa̱jnu.
11 Xúgi̱ kaʼnii gágandawo̱o̱ʼ xúgíʼ rígi̱, ¡gundxaʼwa̱míjna̱ xú káʼnii xa̱bu̱ gíʼmaa manindxa̱la! Gíʼmaa manindxu̱u̱ kaʼwu rí gúnila ga̱jma̱a̱ rí maxnúu gamajkhu Dios.
12 Índo̱ kuwáanʼla ruguaʼthi̱i̱n ga̱jma̱a̱ kuwáanʼla xawii mu mbu̱ya̱a̱ índo̱ gáʼkha̱ mbiʼi ndrígóo Jeobá,* rígi̱ maʼnigámbo̱o̱ mekhu ga̱jma̱a̱ riʼyu̱u̱ aguʼ, ma̱ngaa rí niguma ga̱jma̱a̱ mekhu ga̱jma̱a̱ ku̱ba̱ʼ majuiya̱a̱ʼ gáʼni rí mijkha.
13 Mú rígá mbá nuxi̱ʼ mekhu ga̱jma̱a̱ mbá nuxi̱ʼ ku̱ba̱ʼ rí kua̱ʼthi̱i̱n rí ikhaa nikudaminaʼ maxnúlú ga̱jma̱a̱ ikhí makuwíi̱n bi̱ muni̱ rí jmbu.
14 Ikha jngóo a̱ngui̱nʼ, xúgi̱ rí kuwáanʼla rugua̱ʼthi̱i̱n xúgíʼ rígi̱, gu̱ni̱ asndu xó má eʼnga̱la mu índo̱ ikhaa gáʼkha̱a̱ maxkamáanʼla mikaʼwáanʼ, nda̱a̱ a̱ʼkhála ga̱jma̱a̱ kuwáanʼla tsímáá.
15 Ma̱ngaa gundxaʼwa̱míjna̱ rí naʼngo̱o̱ a̱jkiu̱u̱n Tátá nandoo gáʼthúu̱n rí makáwáanʼla, xó má niʼnirámáʼ Pablo ndxájulú bi̱ nandulú kuʼyáá, bi̱ niʼnirámáʼ ga̱jma̱a̱ ku̱ma̱ rí nigruigú.
16 Náa xúgíʼ i̱yi̱i̱ʼ rí ikhaa niʼnirámáʼ niʼthí ga̱jma̱a̱ numuu rígi̱. Ikhí rígá tikhuu rí naʼni mingíjyúuʼ makrua̱ʼa̱a̱ʼ, náa bi̱ tséjmañún ga̱jma̱a̱ bi̱ rambáa fe ndrígu̱ún nurtajxi̱i̱la, xó má eni̱ ga̱jma̱a̱ i̱ʼwáʼ rí Kiʼniraʼmáʼ, dí nuni̱ xígi̱ kaʼnii na̱jkha̱ kagui̱i̱n mu maguma gámbíin.
17 Ikha jngóo a̱ngui̱nʼ, xúgi̱ rí ndu̱ya̱a̱ wapháá, gakuwáanʼla xawii mu xájngutíguáanʼ xó má ikhiin, náa dí raʼkhí rí nuni̱ bi̱ ra̱míjíinʼ ga̱jma̱a̱ gu̱ni̱ rí fe ndrígála maʼni gújkhúʼ má xúʼko̱.
18 Gagajáanʼla má xúʼko̱ náa rí májánʼ wéñuuʼ a̱jkiu̱u̱n ga̱jma̱a̱ náa ku̱ma̱ ndrígóo Jesucristo Tátá ndrígúlú bi̱ naʼni káwáánʼlú. Náa ikhaa gáʼga gamajkhu xúgi̱ ga̱jma̱a̱ asndu kámuu mbiʼi. Xúʼko̱ gáʼni.*
Mbaʼa nota
^ O “nitariya̱ʼ”
^ O “gaʼyee”, “bi̱ nuthi dí marigá”.
^ Xóo muʼthá, aʼwá ndrígóo mbá rí nanújngoo nacha̱.
^ O “Amén”.
