Raga̱jma̱ libro ndrígu̱ún Reyes 1:1-18
-
Elías naʼtáriyaʼ dí makhañúu Ocozías (1-18)
1 Nda̱wa̱á dí Acab nikháñúu, moabitas nixujximíjna̱ náa israelitas.
2 Nákha mbiʼi rúʼko̱, Ocozías nixpátuáʼáan náa iñúuʼ goʼwóo rí kúgoo ga̱jma̱a̱ ixi̱ dí grígu rijma̱a̱, dí rígá náa Samaria ga̱jma̱a̱ nigawúunʼ wéñuuʼ. Ikha jngóo nikuʼmiin bi̱ nagún kuñu̱u̱n ajngáa, niʼthún: “Aʼguala gúrajxi̱i̱ Baal-Zebub, dios ndrígu̱ún xa̱bu̱ Ecrón, mu mba̱yo̱o̱ á mu maʼni̱i̱ náa nigawúnʼ”.
3 Mú ángel ndrígióo Jeobá niʼthúu̱n Elías* xa̱bu̱ tisbita: “Ayuʼ, atatsimaaʼ mu matraʼnuminaʼ gajmiáanʼ, bi̱ nagún kuñu̱u̱n ajngáa bi̱ rey ndrígóo Samaria nikuʼmiin ga̱jma̱a̱ arathún: ‹Lá ndawa̱a̱ Dios náa Israel ikha jngóo dí ndayóoʼ muʼgua gúrajxi̱i̱ Baal-Zebub, dios ndrígu̱ún xa̱bu̱ Ecrón ráʼ.
4 Rígi̱ dí naʼthí Jeobá: “Xárajta̱a̱ʼ náa xiawoo dí kaʼmáánʼ, numuu rí makhañáaʼ má tsiaki̱i̱”›”. Ikhú Elías ni̱jkha̱a̱.
5 Índo̱ bi̱ nagún kuñu̱u̱n ajngáa nitangiín, mbá nacha̱ Ocozías nirajxu̱u̱n: “Náá numuu dí naguwa̱a̱ʼla.”
6 Ikhiin niriʼñáán: “Mbáa xa̱bu̱ nitsimuu gátsijnuxuʼ ga̱jma̱a̱ niʼthúxu: ‹Aʼgua̱a̱ʼla gútha̱a̱n rey bi̱ nikuʼmáanʼla maguwa̱ʼ: “Rígi̱ dí naʼthí Jeobá: ‹Lá ndawa̱a̱ Dios náa Israel ikha jngóo nataxúʼma dí murajxi̱i̱ Baal-Zebub, dios ndrígu̱ún xa̱bu̱ Ecrón ráʼ. Ga̱jma̱a̱ numuu rígi̱ dí ikháán, xárajta̱a̱ʼ náa xiawoo dí kaʼmáánʼ, numuu dí makhañáaʼ má tsiaki̱i̱›”›”.
7 Índo̱ Ocozías niʼdxawuun rígi̱, nirajxu̱u̱n: “Xú káʼnii nindxu̱u̱ xa̱bu̱ bi̱ nitsimuu gátsijnala ga̱jma̱a̱ niʼtála ajngáa rígi̱ rá.”
8 Ikhiin nitháán: “Nindxu̱u̱ mbáa xa̱bu̱ bi̱ kagíʼ mbá xtíin dí niguma ga̱jma̱a̱ xtátsiu̱ún xujkhúʼ, ga̱jma̱a̱ náa smídúu kua̱ʼa̱n mbá cinturón dí niguma ga̱jma̱a̱ xtá”. Mbá nacha̱ ikhaa niʼthí: “Nindxu̱u̱ Elías xa̱bu̱ tisbita”.
9 Rey nikuʼmaa mbáa bi̱ naʼtáñajúúnʼ mbá 50 xa̱bu̱, ikhaa ni̱jkha̱ gajmíi̱n mbá 50 xa̱bi̱i̱ mu maʼga gáyáaʼ Elías. Índo̱ nitsimuu, nixkamaa Elías grígu náa inuu kúbá, niʼthúu̱n: “Xa̱bi̱i̱ Dios bi̱ gajkhun, rey naʼthí: ‹Ayi̱›”.
10 Mú Elías niriʼñuu bi̱ naʼtáñajúúnʼ mbá 50 xa̱bu̱: “Á mu dí nindxu̱ʼ xa̱bi̱i̱ Dios bi̱ gajkhun, gagajtaa aguʼ mekhuíí, gatsikaríga̱a̱n ikháán gajmiáanʼ mbá 50 xa̱bia̱a̱ʼ”. Ikhú mekhuíí nigajtaa aguʼ nitsikaríga̱a̱ ikhaa gajmíi̱n mbá 50 xa̱bi̱i̱.
11 Rey nikuʼmaa i̱mba̱a̱ bi̱ naʼtáñajúúnʼ mbá 50 xa̱bu̱. Ikhaa ni̱jkha̱ ga̱jma̱a̱ niʼthúu̱n: “Xa̱bi̱i̱ Dios bi̱ gajkhun, rígi̱ dí naʼthí rey: ‹Ayi̱ mbá nacha̱›”.
12 Mú Elías niriʼñuu: “Á mu dí nindxu̱ʼ xa̱bi̱i̱ Dios bi̱ gajkhun, gagajtaa aguʼ mekhuíí, gatsikaríga̱a̱n ikháán gajmiáanʼ mbá 50 xa̱bia̱a̱ʼ”. Ikhú mekhuíí nigajtaa aguʼ ndrígóo Dios nitsikaríga̱a̱ ikhaa gajmíi̱n mbá 50 xa̱bi̱i̱.
13 Ikhú rey nikuʼmaa bi̱ maʼni ragajtsíin bi̱ naʼtáñajúúnʼ mbá 50 xa̱bu̱. Nitsimuu gajmíi̱n mbá 50 xa̱bi̱i̱, índo̱ ikhaa nitsimuu nismbáti̱go̱o̱ náa inuu Elías, niʼtákáñuu ga̱jma̱a̱ niʼthúu̱n: “Xa̱bi̱i̱ Dios bi̱ gajkhun, natakáñaaʼ, rí ma̱ta̱ya̱a̱ dí vida ndrígóʼ ga̱jma̱a̱ vida ndrígu̱ún bi̱ mbá 50 xa̱bia̱a̱ʼ bugi̱ gíʼdoo numuu.
14 Nigajtaa má aguʼ mekhuíí nitsikarígi̱i̱n a̱jmi̱i̱n bi̱ nutañajúúnʼ mbá 50 xa̱bu̱, nikarigi̱i̱n gajmiún xa̱biu̱ún, mú nanda̱ʼa̱a̱ʼ dí ma̱ta̱ya̱a̱ dí vida ndrígóʼ gíʼdoo numuu”.
15 Ikhú ángel ndrígióo Jeobá niʼthúu̱n Elías: “Arajtaa ga̱jma̱a̱ʼ. Xámíñáaʼ xtayáá”. Ikhú Elías nitu̱jxu̱u̱ nigajtaa ga̱jma̱a̱ gáʼyoo rey.
16 Elías niʼthúu̱n rey: “Rígi̱ dí naʼthí Jeobá: ‹Nitaxúʼmiin bi̱ nagún kuñu̱u̱n ajngáa mu murajxi̱i̱ Baal-Zebub, dios ndrígu̱ún xa̱bu̱ Ecrón. Lá ndawa̱a̱ Dios náa Israel ráʼ. Náá numuu dí na̱nguá nitrajxi̱i̱ ikhaa xá.* Ga̱jma̱a̱ numuu rúʼko̱ dí ikháán xárajta̱a̱ʼ náa xiawoo dí kaʼmáánʼ, numuu dí makhañáaʼ má tsiaki̱i̱›”.
17 Ikhú Ocozías nikháñuu, xó má ajngóo Jeobá dí niʼthí Elías. Ikhaa na̱nguá nigiʼdaa nimbáa a̱ʼdióo, ikha jngóo Jehoram* ni̱jkha̱nú ninindxu̱u̱ nuxi̱i̱ʼ rey, índo̱ naʼni má a̱jma̱ tsiguʼ dí rey Jehoram a̱ʼdióo Jehosafat, xtáa raʼtáñajunʼ náa Judá.
18 Dí naʼthí xóó itháan ga̱jma̱a̱ numuu Ocozías, rí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
Mbaʼa nota
^ Rí nandoo gáʼthúu̱n ‹Dios ndrígóʼ nindxu̱u̱ Jeobá›.
^ O “ndíjkha tátaʼyaʼ ma̱ta̱ya̱a̱ dí eʼthí”.
^ Xóo muʼthá, ndxájuu Ocozías.
