Raga̱jma̱ libro ndrígu̱ún Reyes 11:1-21
11 Índo̱ Atalía ru̱dúu̱* Ocozías ndiʼyoo rí nikháñuu a̱ʼdióo, ikhú niʼni gámbíin mbá xúgíinʼ bi̱ naguwáʼ náa goʼwóoʼ rey.*
2 Mú Jehoseba wáxióo* rey Jehoram, ndxájuu Ocozías, ni̱jkha̱ kayáa ngu̱ʼwa̱á Jehoás a̱ʼdióo Ocozías ga̱jma̱a̱ niʼni wájíiʼ náa eʼwíinʼ e̱ji̱i̱n rey bi̱ muradíin. Nirkaʼwii ga̱jma̱a̱ a̱ʼgu̱ bi̱ nañewu̱u̱n náa cuarto dí nunuʼ. Xúʼko̱ kaʼnii niʼni dí táʼngo̱o̱ gáxkamaa Atalía. Ga̱jma̱a̱ na̱nguá nixíyáa.
3 Jehoás nixtáa ngo̱ʼo̱o̱ ga̱jma̱a̱ a̱ʼgu̱ bi̱ nañewu̱u̱n náa goʼwóo Jeobá mbá majun tsiguʼ, índo̱ Atalía xtáa naʼtáñajunʼ náa xuajin.
4 Índo̱ niʼni juwan tsiguʼ, Jehoiadá nikuʼma rí muthúún maguwáʼ bi̱ kuya̱ edxu̱u̱ náa mbá cien soldado* bi̱ nuñewa̱a̱n rey ga̱jma̱a̱ bi̱ nuñewa̱a̱n náa naʼtáñajunʼ,* nigímbíin náa goʼwóo Jeobá. Nimbánuminaʼ gajmíi̱n ga̱jma̱a̱ niʼni rí muxna ajngún náa goʼwóo Jeobá rí munimbáníí, ikhú nisngájmiún a̱ʼdióo rey.
5 Ikhaa niʼtáñajúúnʼ: “Rígi̱ dí gíʼmaa mu̱nila: Grupo bi̱ muñejunʼ mbiʼi sábado, mawiʼtáa mbá ajtsú, timbíin muñewa̱a̱n májánʼ goʼwóo rey.*
6 Bi̱ maʼni raga̱jmi̱i̱n muñewa̱a̱n Xkrugoo guʼwá náa nduyamajkuíí Dios,* ga̱jma̱a̱ bi̱ maʼni ragajtsíin muñewa̱a̱n náa kidxuuʼ xkrugua náa kúwá bi̱ nuñewa̱a̱n dí naʼtáñajunʼ rey. Muriʼkhúún mu muñewa̱a̱n.
7 A̱jma̱ grupo bi̱ tsíñejunʼ dí mbiʼi sábado, mbaʼyóoʼ dí muñewa̱a̱n májánʼ goʼwóo Jeobá mu muñewa̱a̱n rey.
8 Guruguama̱ʼa̱nla rey, mámbáa gáyá aju̱u̱nʼ. Asndu tsáá xa̱bií bi̱ gáʼniminaʼ mato̱ʼo̱o̱ náa ikháanʼla mbaʼyóoʼ dí makhañúu. Gaʼgua gajmiála rey asndu náá má gáʼga”.*
9 Bi̱ kuya̱ edxu̱u̱ náa mbá cien soldado nini̱ ikháá kayuuʼ xó má niʼtáñajúúnʼ ndxajkun Jehoiadá. Mámbáa nigímbíin xa̱bi̱i̱, bi̱ nuñejunʼ mbiʼi sábado xúʼko̱ má bi̱ tsíñajunʼ dí mbiʼi sábado ga̱jma̱a̱ nitu̱ʼu̱u̱n náa xtáa ndxajkun Jehoiadá.
10 Ndxajkun nixnún bi̱ kuya̱ edxu̱u̱ náa mbá cien soldado, kudú* ga̱jma̱a̱ escudo rí dijndi dí nigiʼdoo David dí rígá náa goʼwóo Jeobá.
11 Bi̱ nuñewa̱a̱n náa naʼtáñajunʼ niguájun náa kaʼñúún, mámbáa niguajthun aju̱u̱nʼ, nigi̱ʼdi̱i̱ niguájun náa ñawún májánʼ asndu náa ñawún xti̱ʼ náa mijngii nutsikarámáʼ tsigijñaʼ, náa mijngii guʼwá, niruguama̱ʼa̱a̱n mbá kayuuʼ rey.
12 Ikhú ndxajkun Jehoiadá niríyaaʼ a̱ʼdióo rey ga̱jma̱a̱ nigrígu corona edxu̱u̱ ma̱ngaa nikujxi̱ náa edxu̱u̱ rollo náa na̱ʼkha̱ Xtángoo. Nigíiʼ rey ga̱jma̱a̱ nisngátrámáʼ aceite náa edxu̱u̱ ga̱jma̱a̱ nigi̱ʼdi̱i̱ nixná ñawúúnʼ nithi̱: “¡Gaguma mba̱a̱ rey!”.
13 Índo̱ Atalía niʼdxawuun dí nagáñún xa̱bu̱, ikhú mbá nacha̱ ni̱jkha̱ gáʼñúún xa̱bu̱ bi̱ kúwá náa goʼwóo Jeobá.
14 Índo̱ ndiʼyoo dí wíji̱ rey náa mijngii rajkhúu guʼwá, xó má naguʼwún nuni̱. Bi̱ kuya̱ edxu̱u̱ ga̱jma̱a̱ bi̱ nundiyííʼ trompeta wájun gajmiún rey, mbá xúgíinʼ xa̱bu̱ xuajin kúwá gagi ga̱jma̱a̱ nundiyííʼ trompeta. Ikhú mbá nacha̱ Atalía nixkuʼtu xtíñuu ga̱jma̱a̱ nindxa̱ʼwá: “¡Nininduwúnla! ¡Nininduwúnla!”.
15 Mú ndxajkun Jehoiadá niʼtáñajúúnʼ bi̱ kuya̱ edxu̱u̱ náa mbá cien, bi̱ nutañajúúnʼ soldado: “¡Gúríya̱a̱la náa kuajún, á mu mbáa na̱jkha̱ kidxuuʼ, guxíyala ga̱jma̱a̱ espada!”. Numuu rí ndxajkun niʼthí: “Xúxíyáa náa goʼwóo Jeobá”.
16 Ikha jngóo nirugua̱a̱, ga̱jma̱a̱ índo̱ niguáʼnú náa rí natu̱ʼu̱u̱n wáyú náa goʼwóo rey, ikhí nixiyáa.
17 Ikhú Jehoiadá nimbánuminaʼ ga̱jma̱a̱ Jeobá ma̱ngaa xúgíinʼ xa̱bu̱ xuajin ga̱jma̱a̱ rey, náa rí nixudamíjna̱ dí mani̱ndxu̱ún má xúʼko̱ xuajñuu Jeobá. Ma̱ngaa nimbánuminaʼ ga̱jma̱a̱ rey, mangiin xa̱bu̱ xuajin.
18 Nda̱wa̱á dí rúʼko̱, xúgíinʼ xa̱bu̱ xuajin nigún náa guʼwá rí nduyamajkuíí Baal. Nini̱ gámbáa náa nutsikarámáʼ tsigijñaʼ ma̱ngaa nini̱ gámbíin xándú bi̱ kúwá ikhí, ga̱jma̱a̱ náa inuu dí nutsikarámáʼ tsigijñaʼ, nixiyáa Matán, ndxajkiun Baal.
Nda̱wa̱á ndxajkun nigruigi̱i̱n bi̱ muñewa̱a̱n goʼwóo Jeobá.
19 Ma̱ngaa nigímbíin bi̱ kuya̱ edxu̱u̱ náa mbá cien soldado bi̱ nuñewa̱a̱n rey, bi̱ nuñewa̱a̱n náa naʼtáñajunʼ. Ga̱jma̱a̱ mbá xúgíinʼ xa̱bu̱ xuajin, mu magún gajmiún rey ga̱jma̱a̱ niguájtaa gajmiún. Asndu náa goʼwóo Jeobá. Niguáʼnú náa goʼwóo rey, náa kamba̱a̱ rí nato̱ʼo̱o̱ náa xkrugua, náa guájun bi̱ nuñewa̱a̱n guʼwá náa naʼtáñajunʼ. Ikhú rey nigi̱ʼi̱ náa xílí* rí nutañajunʼ reyes.
20 Xúgíinʼ xa̱bu̱ xuajin ra̱ʼkhá tháán nidxúún ga̱jma̱a̱ nirígá dí tsímáá náa xuajin, numuu dí nixiyáa Atalía ga̱jma̱a̱ espada, náa mijngii goʼwóo rey.
21 Jehoás gíʼdoo juwan tsiguuʼ índo̱ ni̱jkha̱nú ninindxu̱u̱ rey.
Mbaʼa nota
^ O “nánée”.
^ Náa ajngáa hebreo naʼthí, “mbá xúgíinʼ bi̱ kaʼñúún mutañajunʼ”.
^ O “a̱ʼdée dxáʼgú”.
^ Náa ajngáa hebreo naʼthí, “soldado carios”.
^ Náa ajngáa hebreo naʼthí, “bi̱ nagáñún”.
^ O “náa naʼtáñajunʼ”.
^ O “Puerta del Fundamento”.
^ Náa ajngáa hebreo naʼthí, “índo̱ nagájnuu ga̱jma̱a̱ índo̱ nato̱ʼo̱o̱”.
^ O “lanza”.
^ O “trono”.
