Raga̱jma̱ libro ndrígu̱ún Reyes 12:1-21
12 Jehoás ni̱jkha̱nú ninindxu̱u̱ rey índo̱ naʼni má juwan tsiguʼ rí naʼtáñajunʼ Jehú ga̱jma̱a̱ niʼtáñajunʼ mbá 40 tsiguʼ náa Jerusalén. Ru̱dúu̱* nigumbiʼyuu Zibíah bi̱ na̱ʼkha̱ náa Beer-Seba.
2 Jehoás niʼni dí májánʼ náa iduu Jeobá mbá xúgíʼ mbiʼi dí ndxajkun Jehoiadá nixnúu ikha.
3 Mú táguma gámbáa náa rí mitsídánʼ, xa̱bu̱ nuxnajxi̱ má xúʼko̱ tsigijñaʼ ga̱jma̱a̱ nurkuní ikhí.
4 Jehoás niʼthúún ndxajkun: “Gundrígúla mbá xúgíʼ mbújkha̱a̱ dí naguwáʼ kudúún náa goʼwóo Jeobá, xóo tsigijñaʼ dí kaʼwu, mbújkha̱a̱ dí mámbáa gíʼmaa maʼni numa ga̱jma̱a̱ mbújkha̱a̱ dí xóo numuu mámbáa xa̱bu̱. Ma̱ngaa mbá xúgíʼ mbújkha̱a̱ rí nandoo maxná ga̱jma̱a̱ mbá xúgíʼ a̱jkiu̱u̱n mbáa xa̱bu̱ mu majmaa náa goʼwóo Jeobá.
5 Míjníi ndxajkun gágún gúrawíi̱ mbújkha̱a̱ dí gúxna xa̱bu̱ ga̱jma̱a̱ majmúún mu dí muni̱ májáanʼ guʼwá asndu náá má nichúu”.*
6 Índo̱ niʼni 23 tsiguʼ dí naʼtáñajunʼ rey Jehoás, ndxajkun xóó tséni̱ májáanʼ guʼwá náa nichúu.
7 Ikha jngóo rey Jehoás nindxaʼwóo ndxajkun Jehoiadá gajmíi̱n eʼwíinʼ ndxajkun ga̱jma̱a̱ niʼthúún: “Náá numuu dí tséni̱ májáanʼla guʼwá rá. Dí xúgi̱, guniʼñánʼla rundrígú mbá xúgíʼ mbújkha̱a̱ dí nuxna xa̱bu̱, i̱ndó á mu najmaa mu maguma májáanʼ guʼwá”.
8 Ikha jngóo ndxajkun niniña̱a̱nʼ rundrigú mbújkha̱a̱ rí nuxna xa̱bu̱ xuajin, numuu rí ikhiin tsíñún gútsiji inún náa maguma májáanʼ guʼwá.
9 Ndxajkun Jehoiadá ndiyá mbá caja, niʼni iñúuʼ náa nagúgua̱a̱ ga̱jma̱a̱, nigrígu náa mijngii nakarámáʼ tsigijñaʼ náa ñawún májánʼ náa dí natu̱ʼu̱u̱n ga̱jma̱a̱ náa goʼwóo Jeobá. Ndxajkun bi̱ wájun náa xkrugua nundri̱ya̱ʼ ikhí xúgíʼ mbújkha̱a̱ dí naguwáʼ kudúún náa goʼwóo Jeobá.
10 Índo̱ nduyáá dí ra̱ʼkhá tháán mba̱a̱ mbújkha̱a̱ kajti náa caja, secretáriu̱u̱ rey ga̱jma̱a̱ ndxajkun bi̱ phú kayá edxu̱u̱, natsimún ga̱jma̱a̱ nurawíi,* ma̱ngaa nuraxnuu mbújkha̱a̱ rí niguwáʼ kudúún náa goʼwóo Jeobá.
11 Mbújkha̱a̱ rúʼko̱ dí niguámbá nigixnuu, nuxnajxu̱u̱n bi̱ nduyáá xóo ejkha̱ ñajunʼ rí naguma náa goʼwóo Jeobá. Ikhiin gájmún mbújkha̱a̱ rúʼko̱ mu muni̱ numún bi̱ nutáá ixi̱ ga̱jma̱a̱ bi̱ nuñajunʼ náa goʼwóo Jeobá.
12 Bi̱ nuni̱ guʼwá ga̱jma̱a̱ bi̱ nuxuiʼta itsí, ma̱ngaa nijmún mbújkha̱a̱ rúʼko̱ mu mutsi̱ ixi̱ ga̱jma̱a̱ itsí rí niwiʼtá má, mu majmaa náa naguma̱a̱ goʼwóo Jeobá. Ma̱ngaa mbújkha̱a̱ rúʼko̱ nijmún mu mutsi̱ xúgíʼ rí najmaa náa naguma̱a̱ guʼwá.
13 Mbújkha̱a̱ dí na̱ʼkha̱ kiʼda náa goʼwóo Jeobá, tájmún mu muni̱ dí naguma ga̱jma̱a̱ plata, dí najuíyuuʼ ga̱jma̱a̱ aguʼ, xua̱a̱, trompeta, ni má i̱ʼwáʼ dí naguma ga̱jma̱a̱ oro, o plata dí majmaa náa goʼwóo Jeobá.
14 I̱ndó nuxnún bi̱ nuñajunʼ, ga̱jma̱a̱ mbújkha̱a̱ rúʼko̱ najmún náa naguma̱a̱ goʼwóo Jeobá.
15 Xa̱bekha bi̱ nundrigú mbújkha̱a̱ mu muni̱ numún bi̱ nuñajunʼ, na̱nguá ndi̱ʼi̱i̱n cuenta, numuu rí nindxu̱ún xa̱bekha bi̱ nakumu̱ún kuñúún.
16 Mú mbújkho̱o̱ tsigijñaʼ dí nakiéʼkhún ga̱jma̱a̱ mbújkho̱o̱ tsigijñaʼ ga̱jma̱a̱ numuu aʼkhúún, tséjuixnájxi̱ náa goʼwóo Jeobá, mbújkha̱a̱ rúʼko̱ nuda̱a̱ ndxajkun.
17 Ikhú Hazael rey bi̱ xtáa náa Siria, nitsimuu gáxmína̱ʼ ga̱jma̱a̱ Gat, ga̱jma̱a̱ nito̱ʼo̱o̱. Nda̱wa̱á, nindoo maʼga gáxminaʼ* gajmíi̱n xa̱bu̱ Jerusalén.
18 Ikhú Jehoás rey bi̱ xtáa náa Judá nigímbóó mbá xúgíʼ tsigijñaʼ kaʼwu dí nini̱ ka̱ʼwi̱i̱ wajin xiʼñúuʼ, Jehosafat, Jehoram ga̱jma̱a̱ Ocozías, reyes bi̱ nikúwá náa Judá, ga̱jma̱a̱ xúʼko̱ má tsigijñaʼ kaʼwu dí ikhaa nixnájxi̱, ma̱ngaa mbá xúgíʼ oro dí kajti náa cuartu náa kajti rí gíʼdoo numuu dí rígá náa goʼwóo Jeobá ga̱jma̱a̱ náa goʼwóo rey. Ikhú nikuʼma náa inuu Hazael rey ndrígóo Siria ga̱jma̱a̱ ikhú ikhaa nigájna̱a̱ náa Jerusalén.
19 Dí naʼthí xóó itháan ga̱jma̱a̱ numuu Jehoás ga̱jma̱a̱ xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
20 Xa̱bi̱i̱ niriya̱ʼ awan rí muni̱i̱ ga̱jma̱a̱ nixiyáa náa guʼwá dí rígá náa Bíjní náa kamba̱a̱ rí nagajtaa Silá.
21 Xa̱bi̱i̱ bi̱ mbiʼyuu Jozacar a̱ʼdióo Simeat ga̱jma̱a̱ Jehozabad a̱ʼdióo Somer nixnáá ga̱jma̱a̱ nixiyáa. Nidi̱i̱ náa nijuiʼdi̱ín wajin xiʼñúuʼ náa Xuajñuu David, ga̱jma̱a̱ a̱ʼdióo bi̱ mbiʼyuu Amasías ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “nánée”.
^ O “náa gíʼdoo tsúwáʼ”.
^ O “nundriya̱ʼ náa bolsa”. Náa ajngáa hebreo naʼthí, “nuruʼwa̱a̱”.
^ Náa ajngáa hebreo naʼthí, “niʼni jmbuu inuu matsimuu”.
