Raga̱jma̱ libro ndrígu̱ún Reyes 14:1-29
14 Amasías a̱ʼdióo Jehoás rey ndrígóo Judá, ni̱jkha̱nú ninindxu̱u̱ rey índo̱ naʼni má a̱jma̱ tsiguʼ dí naʼtáñajunʼ Jehoás a̱ʼdióo Jehoacaz rey ndrígóo Israel.
2 Gíʼdoo 25 tsiguuʼ índo̱ ni̱jkha̱nú ninindxu̱u̱ rey, ga̱jma̱a̱ niʼtáñajunʼ mbá 29 tsiguʼ náa Jerusalén. Ru̱dúu̱* nigumbiʼyuu Jehoadín bi̱ na̱ʼkha̱ náa Jerusalén.
3 Ikhaa niʼni dí májánʼ náa iduu Jeobá, maski ajndu táʼni xóo wajin xiʼñúuʼ David, Amasías niʼni xó má niʼni anu̱u̱* Jehoás.
4 Mú táguma gámbáa náa rí mitsídánʼ, xa̱bu̱ nuxnajxi̱ má xúʼko̱ tsigijñaʼ ga̱jma̱a̱ nurkuní ikhí.
5 Índo̱ nigiʼdoo mbá kayuuʼ náa ñawúunʼ rí maʼtáñajunʼ, nigudíin xa̱bi̱i̱ bi̱ nixiyáa anu̱u̱, bi̱ ninindxu̱u̱ rey.
6 Mú tágudíin e̱jñu̱ún bi̱ nixiyáa anu̱u̱, xó má eʼthí náa kiʼtáñajunʼ ndrígóo Jeobá dí kiʼniraʼmáʼ náa libro náa na̱ʼkha̱ Xtángoo ndrígóo Moisés: “Xabuanii ragíʼmaa makhañún ga̱jma̱a̱ numuu aʼkhúún e̱ji̱n, ni má e̱ji̱n ragíʼmaa makhañún ga̱jma̱a̱ numuu aʼkhúún xabuanii, mámbáa gíʼmaa makhañúu ga̱jma̱a̱ numuu aʼkhúun”.
7 Ikhaa niʼni gámbíin edomitas bi̱ kúwá náa mata* rí mbiʼyuu Idú,* mbá 10,000 xa̱bekha. Ga̱jma̱a̱ índo̱ nixmínaʼ nito̱ʼo̱o̱ náa xuajin dí mbiʼyuu Sela. Dí nda̱wa̱á ni̱jkha̱nú nigumbiʼyuu Jocteel ga̱jma̱a̱ xúʼko̱ mbiʼyuu asndu rí mbiʼi xúgi̱.
8 Ikhú Amasías nikuʼmiin bi̱ magún kuñu̱u̱n ajngáa rígi̱ náa inuu Jehoás, a̱ʼdióo Jehoacaz, a̱ʼdióo Jehú rey ndrígóo Israel ajngáa rígi̱: “Ayi̱ muxmíjnálú”.*
9 Rey Jehoás bi̱ xtáa náa Israel nikuʼma ajngáa rígi̱ náa Amasías rey ndrígóo Judá: “Iná tsuwanʼ dí rígá náa Líbano nikuʼma ajngáa rígi̱ náa ixi̱ cedro dí rígá náa Líbano: ‹Araxniáá wáxiaaʼ mbayáa a̱ʼdióʼ›. Mú ni̱jka̱tíyaaʼ mbáa xujkhú xáná náa Líbano ga̱jma̱a̱ nikujmbi̱ri̱ga̱ iná tsuwanʼ.
10 Gajkhun má dí niʼnga̱a̱ʼ nitani̱ ga̱jma̱a̱ʼ Edom, ikha jngóo a̱jkia̱a̱nʼ naʼnimbamínáʼ. Gaʼdxaaʼ má ga̱jma̱a̱ gamajkhu rí xtaʼdáá, mú aguanáaʼ má náa guʼwáaʼ.* Náá numuu dí matani̱ marigá mbá gamiéjunʼ, ga̱jma̱a̱ asndu Judá mataxmajtáa índo̱ gáxpatri̱ga̱a̱n rá.”
11 Mú Amasías táʼdxawun rí niʼthúu̱n.
Ikha jngóo Jehoás rey ndrígóo Israel nitsimuu. Ikhaa ga̱jma̱a̱ Amasías rey ndrígóo Judá nixmijná náa Bet-Semes rí kaʼyoo Judá.
12 Israel niʼngo̱o̱ nixmínaʼ gajmíi̱n xa̱bu̱ Judá. Ikha jngóo mbá xúgíinʼ nigáñún, mámbáa ni̱jkha̱a̱ goʼwóo.*
13 Jeohás rey bi̱ xtáa náa Israel nigutuwiin rey ndrígóo Judá bi̱ mbiʼyuu Amasías náa Bet-Semes, a̱ʼdióo Jehoás, a̱ʼdióo Ocozías. Nda̱wa̱á niguwáʼ náa Jerusalén, ga̱jma̱a̱ ikhaa niʼni gámbóo mbá chíʼgíiʼ* xtájtsí ndrígóo xuajin Jerusalén. Nagi̱ʼdu̱u̱ náa Xkrugoo Efraín,* asndu náa Xkrugua dí rígá náa Esquina,* nimbáʼtoo xóo mbá 178 metro.*
14 Ni̱jkha̱ kagu̱u̱ xúgíʼ oro, plata, ga̱jma̱a̱ xúgíʼ dí najmaa dí rígá náa goʼwóo Jeobá. Ga̱jma̱a̱ dí rígá náa cuarto rí kajti rí gíʼdoo numuu náa goʼwóo rey, xúʼko̱ má ni̱jkha̱ kagui̱i̱n e̱jñu̱ún príncipes. Nda̱wa̱á nitanga̱a̱ Samaria.
15 Dí naʼthí xóó itháan ga̱jma̱a̱ numuu Jehoás, dí niʼni, tsiaki̱i̱ rí nigiʼdoo ga̱jma̱a̱ xú káʼnii nixmínaʼ ga̱jma̱a̱ Amasías rey ndrígóo Judá, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
16 Ikhú Jeohás ndiyáa jxu̱u̱ʼ gajmíi̱n wajin xiʼñúuʼ, nijuiʼdi̱i̱ náa Samaria náa nijuiʼdi̱ín reyes bi̱ nikúwá náa Israel. Ga̱jma̱a̱ a̱ʼdióo bi̱ mbiʼyuu Jeroboán* ni̱jkha̱nú ninindxu̱u̱ nuxi̱i̱ʼ rey.
17 Amasías a̱ʼdióo Jeohás rey ndrígóo Judá, nixtáa xóó i̱mbá 15 tsiguʼ nda̱wa̱á dí nikháñuu Jehoás a̱ʼdióo Jehoacaz rey ndrígóo Israel.
18 Dí naʼthí xóó itháan ga̱jma̱a̱ numuu Amasías, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
19 Nda̱wa̱á, niri̱ya̱ʼ awan dí muni̱i̱ náa Jerusalén ga̱jma̱a̱ ikhaa nigáyúu náa Lakís, mú nixuʼmiin xa̱bekha magún ruxkáá náa Lakís, ikhí má nixiyáa.
20 Nda̱wa̱á, niguáan kuya̱a̱ ga̱jma̱a̱ wáyú, nidi̱i̱ gajmíi̱n wajin xiʼñúuʼ náa Jerusalén, náa Xuajñuu David.
21 Ikhú xúgíinʼ xa̱bu̱ xuajin Judá nigi̱i̱ʼ rey Azarías* nákhá ikhaa gíʼdoo 16 tsiguuʼ, mu maʼtáñajunʼ xtiʼkhuu anu̱u̱, Amasías.
22 Ikhaa niʼni̱i̱ xuajin Elat, ga̱jma̱a̱ nirtanga̱a̱ xuajin Judá, nda̱wa̱á dí rey* ndiyáa jxu̱u̱ʼ gajmíi̱n wajin xiʼñúuʼ.
23 Jeroboán a̱ʼdióo Jehoás rey ndrígóo Israel, ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria, índo̱ naʼni má 15 tsiguʼ dí Amasías, a̱ʼdióo Jehoás ninindxu̱u̱ rey náa Judá. Ga̱jma̱a̱ niʼtáñajunʼ mbá 41 tsiguʼ.
24 Niʼni dí ra̱májánʼ náa iduu Jeobá, tániñuuʼ rakudaminaʼ xúgíʼ aʼkhá dí Jeroboán a̱ʼdióo Nebat niʼni rí xa̱bu̱ Israel muxudamíjna̱.
25 Ikhaa niʼni májáanʼ ndawoo Israel. Nigíʼdu̱u̱ náa Lebó-Hamat* asndu náa lamáa dí mbiʼyuu Arabá.* Xó má ajngóo Jeobá, Dios ndrígóo Israel. Dí niʼthí náa xa̱bi̱i̱ Jonás a̱ʼdióo Amitái, profeta* bi̱ na̱ʼkha̱ náa Gat-Héfer.
26 Numuu dí Jeobá ndiʼyoo dí ra̱ʼkhá tháán emínuuʼ Israel, ndawa̱a̱ nimbáa tsáa mambáyúu Israel, ni má ndawi̱i̱n bi̱ tséjmiin gúmbayimijná o bi̱ guabiinʼ.
27 Mú Jeobá nikudaminaʼ rí xáʼni jngudi̱i̱ mbiʼyuu Israel náa agoo mekhu. Ikha jngóo nijmiuu Jeroboán a̱ʼdióo Jeohás mu maʼni káwíin.
28 Dí naʼthí xóó itháan ga̱jma̱a̱ numuu Jeroboán, xúgíʼ dí niʼni, tsiaki̱i̱ rí nigiʼdoo, dí xóo nixmínaʼ ga̱jma̱a̱ xú káʼnii nirtanga̱a̱ mbayáa Judá, xuajin Damasco ga̱jma̱a̱ Hamat dí rígá náa Israel, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
29 Ikhú Jeroboán ndiyáa jxu̱u̱ʼ gajmíi̱n wajin xiʼñúuʼ náa nijuiʼdi̱ín reyes ndrígóo Israel ga̱jma̱a̱ a̱ʼdióo bi̱ mbiʼyuu Zacarías ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “nánée”.
^ O “tátée”.
^ O “bóo”.
^ O “Sal”.
^ O “muraʼnumijnálú”.
^ O “náa naratáñajunʼ”.
^ Náa ajngáa hebreo naʼthí, “guʼwá xtíin”.
^ O “Puerta de Efraín”.
^ O “Puerta de la Esquina”.
^ O “lajuíin”.
^ Xóo muʼthá, Jeroboán II.
^ Rí nandoo gáʼthúu̱n ‹Jeobá niñambáá›. Náa textos rígi̱ nagumbiʼyuu Uzías, 2Re 15:13, 2Cr 26:1-23, Is 6:1 ga̱jma̱a̱ Zac 14:5.
^ Xóo muʼthá, anu̱u̱ Amasías.
^ O “índo nadxu̱ʼ mata̱ʼa̱a̱ʼ náa Hamat”.
^ Xóo muʼthá, Mar Salado o Mar Muerto.
^ O “gaʼyee, bi̱ naʼthí dí marigá”.
