Raga̱jma̱ libro ndrígu̱ún Reyes 15:1-38
15 Azarías* a̱ʼdióo rey Amasías bi̱ xtáa náa Judá ni̱jkha̱nú ninindxu̱u̱ rey índo̱ naʼni má 27 tsiguʼ dí naʼtáñajunʼ Jeroboán* náa Israel.
2 Gíʼdoo 16 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 52 tsiguʼ náa Jerusalén. Ru̱dúu̱* nigumbiʼyuu Jecolías bi̱ na̱ʼkha̱ náa Jerusalén.
3 Ikhaa niʼni dí májánʼ náa iduu Jeobá, xó má niʼni anu̱u̱* Amasías.
4 Mú táguma gámbáa náa rí mitsídánʼ ga̱jma̱a̱ xa̱bu̱ nuxnajxi̱ má xúʼko̱ tsigijñaʼ ga̱jma̱a̱ nurkuní ikhí.
5 Jeobá niʼni dí magiʼdoo nandii lepra* ga̱jma̱a̱ nigiʼdoo nandii lepra asndu mbiʼi rí nikháñuu. Nixtáa náa mbá guʼwá wajíiʼ ga̱jma̱a̱ a̱ʼdióo Jotán ni̱jkuáa ñawúunʼ dí mañewu̱u̱n guʼwá* ga̱jma̱a̱ naʼnimbánuu numún xa̱bu̱ xuajin.
6 Dí naʼthí xóó itháan ga̱jma̱a̱ numuu Azarías, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
7 Ikhú Azarías ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ náa Xuajñuu David náa nijuiʼdíín wajin xiʼñúuʼ, ikhú a̱ʼdióo Jotán ni̱jkha̱nú ninindxu̱u̱ nuxi̱i̱ʼ rey.
8 Zacarías a̱ʼdióo Jeroboán ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria, índo̱ naʼni má 38 tsiguʼ dí naʼtáñajunʼ Azarías náa Judá ga̱jma̱a̱ Zacarías niʼtáñajunʼ mbá majun igu̱nʼ.
9 Niʼni dí ra̱májánʼ náa iduu Jeobá xó má nini̱ wajin xiʼñúuʼ. Na̱nguá niniñuuʼ rakudaminaʼ aʼkhá xó má niʼni Jeroboán a̱ʼdióo Nebat dí niʼni dí xa̱bu̱ Israel muxudamíjna aʼkhá.
10 Ikhú Salum a̱ʼdióo Jabés niriyaʼ awan dí maʼniuu ga̱jma̱a̱ nixíyáa náa Ibleam. Nda̱wa̱á dí nixíyáa, ikhaa ni̱jkha̱nú ninindxu̱u̱ nuxi̱i̱ʼ rey.
11 Dí naʼthí xóó itháan ga̱jma̱a̱ numuu Zacarías, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
12 Xúʼko̱ nimbánuu ajngóo Jeobá dí niʼthúu̱n Jehú: “Mbá a̱jkhui̱i̱n bi̱ gáguwáʼ náa e̱jña̱a̱ʼ matri̱gi̱i̱n náa xílí* dí naʼtáñajunʼ náa Israel”. Ga̱jma̱a̱ xúʼko̱ má nirígá.
13 Salum a̱ʼdióo Jabés ni̱jkha̱nú ninindxu̱u̱ rey índo̱ naʼni má 39 tsiguʼ dí naʼtáñajunʼ Uzías náa Judá, Salum nigidaʼ niʼtáñajunʼ mbá gu̱nʼ náa Samaria.
14 Ikhú Menahem a̱ʼdióo Gadí nigájnuu náa Tirzá ni̱jkha̱ náa Samaria ga̱jma̱a̱ nixíyáa Salum a̱ʼdióo Jabés bi̱ xtáa náa Samaria. Nda̱wa̱á rí nixíyáa ikhú ikhaa ni̱jkha̱nú ninindxu̱u̱ nuxi̱i̱ʼ rey.
15 Dí naʼthí xóó itháan ga̱jma̱a̱ numuu Salum ga̱jma̱a̱ awan dí niríya̱ʼ, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
16 Ikhú Menahem nigájnuu náa Tirzá ga̱jma̱a̱ niʼni gámbóo Tifsá ga̱jma̱a̱ mbá xúgíinʼ xa̱bu̱ bi̱ kúwá ikhí ma̱ngaa náa mbayuuʼ. Numuu rí na̱nguá nirmbaʼtáá xkrugoo xuajin, ikha jngóo niʼni gámbáa ga̱jma̱a̱ nirujtu awúún mbá xúgíinʼ gu̱ʼu̱ bi̱ kuda ewíin e̱ji̱n.*
17 Menahem a̱ʼdióo Gadí ni̱jkha̱nú ninindxu̱u̱ rey náa Israel, índo̱ naʼni 39 tsiguʼ dí naʼtáñajunʼ Azarías náa Judá, Menahem nigidaʼ niʼtáñajunʼ mbá gu̱wa̱ʼ tsiguʼ náa Samaria.
18 Niʼni dí raʼkhí náa iduu Jeobá. Nditháan tániñuuʼ raʼni xúgíʼ enii aʼkhá dí Jeroboán a̱ʼdióo Nebat niʼni rí xa̱bu̱ Israel muxudamíjna.
19 Rey Pul bi̱ xtáa náa Siria nito̱ʼo̱o̱ náa xuajin ga̱jma̱a̱ Menahem nixnúu mbá 34,200 kilo* plata mu xúʼko̱ mambáyúu magiʼdoo tsiaki̱i̱ rí naʼtáñajunʼ.
20 Menahem nindoo nigiʼdoo plata numuu dí nirumii xa̱bu̱ bi̱ guáʼdáá ga̱jma̱a̱ bi̱ guáʼdáá numún náa Israel. Nixnúu rey Asiria mbá 50 siclos* ga̱jma̱a̱ numuu mámbáa xa̱bu̱. Ikhú rey ndrígóo Asiria ni̱jkha̱a̱ ga̱jma̱a̱ táguanúu náa xuajin.
21 Dí naʼthí xóó itháan ga̱jma̱a̱ numuu Menahem, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
22 Ikhú Menahem ndiyáa jxu̱u̱ʼ gajmíi̱nʼ wajin xiʼñúuʼ ga̱jma̱a̱ a̱ʼdióo Pecahías ni̱jkha̱nú ninindxu̱u̱ nuxi̱i̱ʼ rey.
23 Pecahías a̱ʼdióo Menahem ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria índo̱ naʼni má 50 tsiguʼ dí naʼtáñajunʼ Azarías náa Judá, Pecahías niʼtáñajunʼ a̱jma̱ tsiguʼ.
24 Niʼni dí ra̱májánʼ náa iduu Jeobá. Na̱nguá niniñuuʼ raʼni aʼkhá dí Jeroboán a̱ʼdióo Nebat niʼni dí xa̱bu̱ Israel muxudamíjna̱.
25 Ikhú Soldádiu̱u̱ bi̱ mbiʼyuu Pécah a̱ʼdióo Remalías niríya̱ʼ awan dí maʼniuu ga̱jma̱a̱ nixíyáa náa Samaria, náa torre dí wíji̱ gújkhúʼ náa goʼwóo rey náa mijngii Argob ga̱jma̱a̱ Arié. Ni̱jkha̱ gajmíi̱n mbá 50 xa̱bu̱ Galaad. Nda̱wa̱á dí nixíyáa ikhú ikhaa ni̱jkha̱nú ninindxu̱u̱ nuxi̱i̱ʼ rey.
26 Dí naʼthí xóó itháan ga̱jma̱a̱ numuu Pecahías, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
27 Pécah a̱ʼdióo Remalías ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria índo̱ naʼni má 52 tsiguʼ dí Azarías nindxu̱u̱ rey náa Judá, Pécah niʼtáñajunʼ mbá 20 tsiguʼ.
28 Niʼni dí ra̱májánʼ náa iduu Jeobá. Na̱nguá niniñuuʼ raʼni aʼkhá dí Jeroboán a̱ʼdióo Nebat niʼni dí xa̱bu̱ Israel muxudamíjna.
29 Nákha mbiʼi dí Pécah ninindxu̱u̱ rey náa Israel, rey ndrígóo Asiria bi̱ mbiʼyuu Tiglat-Piléser nito̱ʼo̱o̱ ga̱jma̱a̱ niʼni gámbáa Ijón, Abel-Bet-Maacá, Janóah, Quedes, Hazor, Galaad ga̱jma̱a̱ Galilea, náa mbá xúgíʼ mbayuuʼ Neftalí, ga̱jma̱a̱ ni̱jkha̱ kagui̱i̱n xa̱bu̱ náa Asiria.
30 Ikhú Hosea a̱ʼdióo Elá niríya̱ʼ awan dí maʼniuu Pécah a̱ʼdióo Remalías, nixnúu ga̱jma̱a̱ nixíyáa. Ikhú ikhaa ni̱jkha̱nú ninindxu̱u̱ nuxi̱i̱ʼ rey índo̱ naʼni má 20 tsiguʼ dí naʼtáñajunʼ Jotán a̱ʼdióo Uzías.
31 Dí naʼthí xóó itháan ga̱jma̱a̱ numuu Pécah, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
32 Jotán a̱ʼdióo rey Uzías bi̱ xtáa náa Judá ni̱jkha̱nú ninindxu̱u̱ rey, índo̱ naʼni má a̱jma̱ tsiguʼ dí Pécah a̱ʼdióo Remalías nindxu̱u̱ rey náa Israel.
33 Gíʼdoo 25 tsiguuʼ índo̱ ni̱jkha̱nú ninindxu̱u̱ rey, ga̱jma̱a̱ niʼtáñajunʼ mbá 16 tsiguʼ náa Jerusalén. Ru̱dúu̱ nigumbiʼyuu Jerusá, wáxióo* Sadoc.
34 Ikhaa niʼni dí májánʼ náa iduu Jeobá xó má niʼni anu̱u̱ Uzías.
35 Mú táguma gámbáa náa rí mitsídánʼ ga̱jma̱a̱ xa̱bu̱ nuxnajxi̱ má xúʼko̱ tsigijñaʼ ga̱jma̱a̱ nurkuní ikhí. Ikhaa nindxu̱u̱ bi̱ niʼni xkrugua dí rijma̱a̱ náa goʼwóo Jeobá.
36 Dí naʼthí xóó itháan ga̱jma̱a̱ numuu Jotán, dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
37 Nákha mbiʼi rúʼko̱, Jeobá nigíʼdúu nikuʼmaa Rezín, rey ndrígóo Siria, ga̱jma̱a̱ Pécah a̱ʼdióo Remalías mu muxmijná gajmiún xa̱bu̱ Judá.
38 Ikhú Jotán ndiyáa jxu̱u̱ʼ gajmíi̱n wajin xiʼñúuʼ, nidi̱i̱ náa Xuajñuu David, náa nijuiʼdi̱ín wajin xiʼñúuʼ. Ikhú a̱ʼdióo bi̱ mbiʼyuu Acaz ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ Rí nandoo gáʼthúu̱n ‹Jeobá niñambáá›. Náa textos rígi̱ nagumbiʼyuu Uzías, 2Re 15:13, 2Cr 26:1-23, Is 6:1 ga̱jma̱a̱ Zac 14:5.
^ Xóo muʼthá, Jeroboán ll.
^ O “nánée”.
^ O “tátée”.
^ O “náa naʼtáñajunʼ”.
^ O “trono”.
^ O “endi̱i̱n”.
^ O “a̱ʼdée dxáʼgú”.
