Raga̱jma̱ libro ndrígu̱ún Reyes 16:1-20
16 Acaz a̱ʼdióo rey Jotán bi̱ xtáa náa Judá ni̱jkha̱nú ninindxu̱u̱ rey, índo̱ naʼni má 17 tsiguʼ dí naʼtáñajunʼ Pécah a̱ʼdióo Remalías.
2 Acaz gíʼdoo 20 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 16 tsiguʼ náa Jerusalén. Na̱nguá niʼni dí májánʼ náa iduu Jeobá Dios ndrígóo, xó má niʼni wajin xiʼñúuʼ David.
3 Ikhaa niʼni xó má nini̱ reyes bi̱ nikúwá náa Israel, asndu nixnájxi̱i̱ a̱ʼdióo náa aguʼ, ndiʼyaridoo xúgíʼ dí xkawiʼ xóo nini̱ xa̱bu̱ bi̱ Jeobá nixkawíin náa inún israelitas.
4 Ma̱ngaa naxnájxi̱ tsigijñaʼ ga̱jma̱a̱ narkúní náa rí mitsídánʼ, náa bíjní, náa mbá xúgíʼ agoo ixi̱ mba̱ʼu̱ rí maxaʼ.
5 Nákha ikhú rey Rezín bi̱ xtáa náa Siria, ga̱jma̱a̱ Pécah a̱ʼdióo Remalías rey bi̱ xtáa náa Israel, nitsimún gúxmijná gajmiún xa̱bu̱ Jerusalén. Niruguama̱ʼa̱a̱n rey Acaz, mú táʼngu̱u̱n gátu̱ʼu̱u̱n náa xuajin.
6 Nákha mbiʼi rúʼko̱ rey Rezín bi̱ xtáa náa Siria nirtanga̱a̱ xuajin Elat mu mbayáa xuajin Edom, nda̱wa̱á nixkawíin xa̱bu̱ judíos* náa Elat. Ikhú xa̱bu̱ edomitas nikúwá náa Elat, ikhí kúwá asndu dí mbiʼi xúgi̱.
7 Ikha jngóo Acaz nikuʼmiin bi̱ magún kuñu̱u̱n ajngáa náa Tiglat-Piléser rey ndrígóo Asiria mu muthán: “Nindxu̱ʼ xa̱bia̱a̱ʼ ga̱jma̱a̱ a̱ʼdiáaʼ. Atatsimaaʼ, atani̱ kríñu̱u̱nʼ náa ñawúunʼ rey bi̱ xtáa náa Siria ga̱jma̱a̱ náa ñawúunʼ rey ndrígóo Israel, bi̱ kúwá ruxmijná ga̱jma̱á nindxu̱ʼ”.
8 Ikhú Acaz niguajthun plata ga̱jma̱a̱ oro dí rígá náa goʼwóo Jeobá ga̱jma̱a̱ dí rígá náa cuarto náa kajti dí gíʼdoo numuu náa goʼwóo* rey, nikuʼma náa rey ndrígóo Asiria xóo regalo.
9 Rey ndrígóo Asiria nindoo, ikha jngóo nitsimuu náa Damasco, nito̱ʼo̱o̱ náa xuajin, ga̱jma̱a̱ xa̱bu̱ bi̱ kúwá ikhí ni̱jkha̱ kagui̱i̱n makuwá náa Quir ga̱jma̱a̱ nixíyáa Rezín.
10 Ikhú rey Acaz ni̱jkha̱ náa Damasco gáʼyoo Tiglat-Piléser rey ndrígóo Asiria. Índo̱ rey Acaz ndiʼyoo náa nakarámáʼ tsigijñaʼ dí rígá náa Damasco, nikuʼma náa ndxajkun Uriya mbá xtiʼkhuu ga̱jma̱a̱ náa nakujmaa xóo niguma.
11 Ndxajkun Uriya niʼni náa nakarámáʼ tsigijñaʼ xó má nakujmaa náa xtiʼkhuu dí rey Acaz nikuʼma índo̱ xtáa náa Damasco. Nákha xóó tséʼkha̱a̱ rey Acaz náa Damasco, ndxajkun Uriya niguámbóo má niʼni.
12 Índo̱ rey ni̱ʼkha̱a̱ náa Damasco, ndiʼyoo náa nakarámáʼ tsigijñaʼ, ikhú nikuʼmaminaʼ ga̱jma̱a̱ nixnájxi̱ tsigijñaʼ.
13 Nirkúní má xúʼko̱ ikhí, nixnájxi̱ tsigijñaʼ dí nakarámáʼ ga̱jma̱a̱ tsigijñaʼ rí tsígáʼ. Ma̱ngaa nixnájxi̱ tsigijñaʼ dí nagadirámuuʼ, nixtíjyooʼ ga̱jma̱a̱ eʼdiuu tsigijñaʼ dí tsímáá.*
14 Ikhú náa nakarámáʼ tsigijñaʼ dí niguma ga̱jma̱a̱ cobre dí rígá náa inuu Jeobá, niyéjxingaa náa gíʼ náa inuu guʼwá, náa majñuuʼ dí nakarámáʼ tsigijñaʼ ga̱jma̱a̱ náa goʼwóo Jeobá, nigíʼ xígií náa norte náa gíʼ dí nakarámáʼ tsigijñaʼ dí ikhaa niʼni.
15 Rey Acaz nikuʼmaa maʼni rígi̱ ndxajkun Uriya: “Atarkúní náa nakarámáʼ tsigijñaʼ dí itháan mba̱a̱, araxnájxi̱ tsigijñaʼ dí nakarámáʼ dí najuixnájxi̱ miʼcha̱ xó má tsigijñaʼ rí tsígáʼ dí najuixnájxi̱ wakíʼ, tsigijñaʼ dí nakarámáʼ ga̱jma̱a̱ tsigijñaʼ rí tsígáʼ ndrígóo rey. Ma̱ngaa tsigijñaʼ dí nakarámáʼ, tsigijñaʼ rí tsígáʼ ga̱jma̱a̱ tsigijñaʼ dí nagadirámuuʼ dí nuxnajxi̱ xa̱bu̱ xuajin. Ataxtíjyááʼ ga̱jma̱a̱ eʼdiuu tsigijñaʼ dí nakarámáʼ ga̱jma̱a̱ i̱ʼwáʼ tsigijñaʼ. Mú náa nakarámáʼ tsigijñaʼ dí niguma ga̱jma̱a̱ cobre mba̱yo̱o̱ má ikhúún ndiéjunʼ gáni̱ ga̱jma̱a̱”.
16 Ndxajkun Uriya niʼni xúgíʼ dí rey Acaz nikuʼmaa maʼni.
17 Ma̱ngaa rey Acaz nirujtu majkhaʼ cobre dí paska dí ngújma náa carritos ga̱jma̱a̱ nigruigúu pájxua̱a̱ dí cobre. Ma̱ngaa nirígúu Lamáa* dí grígu náa tsu̱du̱ún xedi̱ bi̱ nigumiin ga̱jma̱a̱ cobre nigíʼ mbayííʼ náa tsu̱du̱u̱ itsí.
18 Ma̱ngaa nirígú náa goʼwóo Jeobá dí kúgoo ga̱jma̱a̱ dí najmaa mbiʼi sábado dí niguma náa guʼwá, xó má ma̱ngaa náa nato̱ʼo̱o̱ ga̱jma̱a̱ rey. Niʼni rígi̱ ga̱jma̱a̱ numuu rey ndrígóo Asiria.
19 Dí naʼthí xóó itháan ga̱jma̱a̱ numuu Acaz, dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
20 Ikhú Acaz ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ náa Xuajñuu David náa nijuiʼdi̱ín wajin xiʼñúuʼ, ikhú a̱ʼdióo Ezequías* ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “xa̱bu̱ Judá”.
^ O “náa naʼtáñajunʼ”.
^ O “Mar”.
^ Rí nandoo gáʼthúu̱n ‹Jeobá naxná tsiaki̱i̱›.
