Raga̱jma̱ libro ndrígu̱ún Reyes 2:1-25
2 Índo̱ Jeobá inu maʼga̱a̱ kayáa Elías mekhuíí ga̱jma̱a̱ mbá giñánʼ, Elías ga̱jma̱a̱ Eliseo nigájnún náa Guilgal.
2 Elías niʼthúu̱n Eliseo: “Aguanáaʼ gi̱i̱ mbá péñu, numuu rí Jeobá nikuʼmún maʼgá náa Betel”. Mú Eliseo niriʼñuu: “Dí natha̱a̱nʼ ikháán ga̱jma̱a̱ Jeobá nindxu̱u̱ gajkhun, dí ikhúún xániʼñáánʼ”. Ikha jngóo niguájtaa náa Betel.
3 Ikhú e̱jñu̱ún profetas* bi̱ kúwá náa Betel nigájnún gútsijníín Eliseo ga̱jma̱a̱ nirajxi̱i̱: “Natayáá má dí xúgi̱ Jeobá maʼga̱a̱ kayáa tátiáaʼ ga̱jma̱a̱ rí maniñuuʼ ranindxu̱u̱ maestriaaʼ án”. Ikhaa niʼthúún: “Aan nda̱yo̱o̱ má. Xútha rúʼko̱ xúgi̱”.
4 Rí xúgi̱ Elías niʼthúu̱n: “Eliseo aguanáaʼ gi̱i̱ mbá péñu, numuu rí Jeobá nikuʼmún maʼgá náa Jericó”. Mú Eliseo niriʼñuu: “Dí natha̱a̱nʼ ikháán ga̱jma̱a̱ Jeobá nindxu̱u̱ gajkhun, dí ikhúún xániʼñáánʼ”. Ikha jngóo nigún náa Jericó.
5 Ikhú e̱jñu̱ún profetas* bi̱ kúwá náa Jericó nixuʼmamijná náa Eliseo ga̱jma̱a̱ nirajxi̱i̱: “Natayáá má dí xúgi̱ Jeobá maʼga̱a̱ kayáa tátiáaʼ ga̱jma̱a̱ rí maniñuuʼ ranindxu̱u̱ maestriaaʼ án”. Ikhaa niʼthúún: “Aan nda̱yo̱o̱ má. Xútha rúʼko̱ xúgi̱”.
6 Rí xúgi̱ Elías niʼthúu̱n: “Aguanáaʼ gi̱i̱ mbá péñu, numuu rí Jeobá nikuʼmún maʼgá náa Jordán”. Mú Eliseo niriʼñuu: “Dí natha̱a̱nʼ ikháán ga̱jma̱a̱ Jeobá nindxu̱u̱ gajkhun, dí ikhúún xániʼñáánʼ”. Ikha jngóo mbá nájmi̱i̱n nigún má xúʼko̱.
7 Ma̱ngaa nigún mbá 50 e̱jñu̱ún profetas, mitsínguáʼ niguanún niyejxu̱u̱n índo̱ guájun náa rawuunʼ mañu Jordán.
8 Ikhú Elías nirmbújxi̱ xtíñuu rí kiejuunʼ* ga̱jma̱a̱ nixnúu iyaʼ, ikhú niwiʼtáa a̱jma̱ níʼkhóo, xúʼko̱ nindoo nikidiin mbá nájmi̱i̱n náa ku̱ba̱ʼ mijxooʼ.
9 Índo̱ niguámbu̱u̱n nikidiin, Elías niʼthúu̱n Eliseo: “Arathúnʼ ndiéjunʼ rí nandaaʼ ma̱ni̱ ga̱jma̱á numaaʼ nákha xóó tséniʼñááʼ”. Eliseo niʼthúu̱n: “Mbá péñu,* lá ma̱ndoo magruígú a̱jma̱ espíritu dí xóo nixnáaʼ Dios ráʼ.”
10 Elías niriʼñuu: “Nitando̱ʼo̱ʼ mbá rí gakhi̱i̱. Á mu rí natayoʼ índo̱ gániʼñááʼ, matandrígú rí nitanda̱ʼa̱, mú á mu na̱nguá, xátandrígú”.
11 Índo̱ kúwá ragún ga̱jma̱a̱ nutamijná, nda̱a̱ tsu̱ma̱ niʼni wájíinʼ carro dí aguʼ ga̱jma̱a̱ wáyú aguʼ, ikhú Elías nitsimuu kayáa mekhuíí giñánʼ dí gakhi̱i̱.
12 Eliseo xtáa raʼyoo ga̱jma̱a̱ niʼthúu̱n gakhi̱i̱: “¡Anu̱ʼ,* anu̱ʼ! ¡Carro ndrígóo Israel ga̱jma̱a̱ bi̱ nudrúwíin wáyú!”. Índo̱ nánguá niʼngo̱o̱ gáʼyoo, ikhú nigujtuun xtíñuu ga̱jma̱a̱ nixkuʼtungaa.
13 Nda̱wa̱á dí rúʼko̱, niyéjxi̱i̱ xtíñuu Elías dí nixpatrígú, ga̱jma̱a̱ kayá ni̱jkha̱a̱ náa rawuunʼ mañu Jordán.
14 Ikhú, ga̱jma̱a̱ xtíñuu Elías dí nixpátrígú nixnúu ga̱jma̱a̱ iyaʼ, niʼthí: “Náá xtáa Jeobá Dios ndrígóo Elías rá.” Ikhú Eliseo nixnúu iyaʼ ga̱jma̱a̱ niwiʼtáa a̱jma̱ níʼkhóo, ikhú nindoo nikidaa.
15 Índo̱ e̱jñu̱ún profetas bi̱ kúwá náa Jericó ndiyáá asndu mitsínguánʼ, nithi: “Rí xúgi̱ espíritu ndrígóo Elías rígá náa Eliseo”. Ikha jngóo nigún gútsijníín ga̱jma̱a̱ nismbati̱gu̱u̱n asndu mbayííʼ náa inuu.
16 Nitháán: “Kúwáanʼ gajmiúxu mbá 50 xa̱bu̱ bi̱ tsímíñúún. Mbá péñu, atatsiñúún rí ikhiin magún gúyáaʼ tátiáaʼ. Mbáa espíritu* ndrígóo Jeobá nikujxi̱i̱ ga̱jma̱a̱ nda̱wa̱á nida̱a̱ʼ náa mbá kúbá o náa mata”.* Mú, Eliseo niʼthúún: “Xúxuʼminla”.
17 Nitháán má xúʼko̱ rí asndu niskoo nini̱, nda̱wa̱á niʼthúún: “Guxuʼmíinla má”. Ikhiin nixuʼmiin mbá 50 xa̱bekha ga̱jma̱a̱ nikúwá ruya̱a̱ʼ mbá ajtsú mbiʼi, mú túxkama̱a̱.
18 Índo̱ nitangiín náa xtáa Eliseo, ikhaa xtáa raguanúu náa Jericó. Ikhaa niʼthúún: “Lá tátala rí xúʼguala ráʼ.”
19 Nda̱wa̱á xa̱bu̱ bi̱ kúwá náa xuajin nitháán Eliseo: “Tátá xó má natayáá, xuajin rígá náa mbaaʼ májánʼ, mú na̱nguá májánʼ iyaʼ ga̱jma̱a̱ náa ku̱ba̱ʼ nda̱a̱ rí ejma̱a̱”.*
20 Ikhú ikhaa niʼthúún: “Gaguwa̱ʼ kuya̱la mbá xua̱a̱ nuxi̱ʼ ga̱jma̱a̱ gugíwanʼla idú”. Ikha jngóo niguwáʼ kuñu̱u̱n xua̱a̱.
21 Ikhú ni̱jkha̱ náa iduu iyaʼ ga̱jma̱a̱ nirajkuáa idú, niʼthí: “Rígi̱ dí naʼthí Jeobá: ‹Ni̱ni̱ kaʼwi̱i̱ iyaʼ rígi̱, nánguá maʼni rí makhañún itháán xa̱bu̱ ga̱jma̱a̱ nánguá maʼni rí gu̱ʼu̱ xáguaʼdiin e̱jñu̱ún›”.*
22 Iyaʼ niguma kaʼwi̱i̱ asndu rí mbiʼi xúgi̱, xó má niʼthí Eliseo.
23 Ikhí nigájnuu ni̱jkha̱ náa Betel. Índo̱ xtáa ratsimuu náa kamba̱a̱, mbá nguáthi̱i̱n e̱ji̱n nigájnún náa xuajin ga̱jma̱a̱ nigi̱ʼdi̱i̱ nitsijmaa, nitháán: “¡Edxu̱ tsaʼtsaʼ, atatsimaaʼ, edxu̱ tsaʼtsaʼ, atatsimaaʼ!”.
24 Nda̱wa̱á, ikhaa nitanga̱a̱ niyejxu̱u̱n ga̱jma̱a̱ niʼtátsríguiin ga̱jma̱a̱ mbiʼyuu Jeobá. Ikhú a̱jmi̱i̱n osas nigájnún náa xanáá ga̱jma̱a̱ ni̱ʼphu̱ jnga̱wu̱u̱n mbá 42 e̱ji̱n.
25 Ikhaa ni̱jkha̱ má xúʼko̱ náa kúbá Carmelo, nda̱wa̱á nitanga̱a̱ xígií náa Samaria.
Mbaʼa nota
^ Nakujmaa dí ajngáa e̱jñu̱ún profetas nandoo gáʼthúu̱n mbá escuela náa nuniga̱jma̱a̱ profetas, o mbá náa nagimbíi̱n profetas.
^ O “gaʼyee, bi̱ nuthi dí marigá”.
^ O “xtíin rí nugíʼ profetas”.
^ O “atani̱ mbá rí májánʼ”.
^ O “táteʼ”.
^ O “giñánʼ”.
^ O “bóo”.
^ O mbáa “naʼni magrájkíin e̱ji̱n”.
^ O mbáa “xurajki̱i̱n e̱jñu̱ún”.
