Raga̱jma̱ libro ndrígu̱ún Reyes 20:1-21
20 Nákha mbiʼi rúʼko̱, Ezequías niʼniuu nandii ga̱jma̱a̱ inu makhañúu. Ikhú profeta* Isaías a̱ʼdióo Amoz ni̱ʼkha̱ gáʼyoo, niʼthúu̱n: “Rígi̱ dí naʼthí Jeobá: ‹Araxnún ikha bi̱ kúwá náa guʼwáaʼ, numuu rí makhañáaʼ, xáʼni̱i̱ a̱jkia̱a̱nʼ›”.
2 Índo̱ niʼdxawuun rígi̱ nitangayii náa pared ga̱jma̱a̱ nigíʼdu̱u̱ niʼtákáñuu Jeobá:
3 “Tátá Jeobá, mbá péñu,* natakáñaaʼ dí marmáʼáan a̱jkia̱a̱nʼ dí nijngruigo̱ʼ jmbu náa kamba̱a̱ʼ ga̱jma̱a̱ xúgíʼ a̱jkiu̱nʼ, ma̱ngaa dí ni̱ni̱ rí májánʼ náa idaaʼ”. Ikhú Ezequías nigíʼdu̱u̱ nimbiya gínúu.
4 Isaías xóó tségájnaa náa rexo̱o̱ guʼwá dí awúún índo̱ nigruigú ajngóo Jeobá rígi̱:
5 “Ayu̱u̱ʼ gáratha̱a̱n Ezequías, bi̱ kayá edxu̱u̱ náa xuajñunʼ: ‹Rígi̱ dí naʼthí Jeobá Dios ndrígóo wajin xiʼñáaʼ David: “Nidxawuun dí naratájkáan, ndi̱yo̱o̱ xóo natambi̱ya̱ʼ ga̱jma̱a̱ ma̱ni̱ rí maʼni̱i̱ a̱jkia̱a̱nʼ. Índo̱ gáʼni ajtsú mbiʼi matatsima̱a̱ʼ mbu̱júu̱ náa goʼwóo Jeobá.
6 Maniraʼmaaʼ i̱mbá 15 tsiguʼ dí maraxtaa,* ma̱ni̱ kríña̱a̱nʼ ikháán ga̱jma̱a̱ ma̱ni̱ kríya̱a̱ʼ xuajin rígi̱ náa ñawúunʼ rey ndrígóo Asiria. Ga̱jma̱a̱ ma̱ni̱ kríya̱a̱ʼ xuajin rígi̱ ga̱jma̱a̱ numuʼ ma̱ngaa ga̱jma̱a̱ numuu xa̱bi̱ʼ David”›”.
7 Ikhú Isaías niʼthí: “Aguwaʼ kuyala xówóoʼ higo nijndooʼ”.* Ikhú niguwáʼ kuñu̱u̱n ga̱jma̱a̱ nigiʼmáá náa ska. Nda̱wa̱á mañu mañúú ni̱jkha̱ ra̱ʼni̱i̱ a̱jkiu̱u̱n.
8 Ezequías nirajxu̱u̱ Isaías: “Xú káʼnii gáyóo dí Jeobá maʼni rí maʼni̱i̱ a̱jkiu̱nʼ, ga̱jma̱a̱ rí índo̱ gáʼni ajtsú mbiʼi matsima̱a̱ʼ mbu̱júu̱ náa goʼwóo Jeobá rá.”
9 Isaías niriʼñuu: “Xígi̱ kaʼnii Jeobá masngájmaaʼ dí Jeobá maʼnimbánuu ajngóo. Nandaaʼ rí ndájkhoo escalera* maʼga mbá gu̱wa̱ʼ escalón o nandaaʼ rí matanga̱a̱ mbá gu̱wa̱ʼ escalón dxe̱ʼ.”
10 Ezequías niʼthí: “Ragákhíi rí ndájkua maʼga mbá gu̱wa̱ʼ escalón, mú xándoo rí matanga̱a̱ mbá gu̱wa̱ʼ escalón”.
11 Ikha jngóo profeta Isaías niʼtákáñuu Jeobá ga̱jma̱a̱ ikhaa niʼni rí ndájkua rí nigajtaa má náa escalera dí mbiʼyuu Acaz matanga̱a̱ mbá gu̱wa̱ʼ escalón.
12 Nákha mbiʼi rúʼko̱, rey ndrígóo Babilonia bi̱ mbiʼyuu Berodac-Baladán a̱ʼdióo Baladán, nikuʼma i̱yi̱i̱ʼ ga̱jma̱a̱ mbá regalo náa inuu Ezequías numuu rí niʼdxawuun dí Ezequías niʼñuu nandii.
13 Ezequías nigruiguíin májánʼ* bi̱ niguwáʼ kuñu̱u̱n ajngáa, ga̱jma̱a̱ nisngájmúún mbá xúgíʼ rí gíʼdoo numuu dí rígá náa guʼwá:* Xóo plata, oro, aceite rí ndataun ga̱jma̱a̱ i̱ʼwáʼ aceite rí numuu ga̱jma̱a̱ ajua̱nʼ rí naxmínaʼ ga̱jma̱a̱, ma̱ngaa mbá xúgíʼ dí rígá náa cuarto náa kajti rí gíʼdoo numuu. Tárígá nimbá rí Ezequías tásngájmún dí rígá náa goʼwóo ga̱jma̱a̱ náa mbá xúgíʼ rí naʼtáñajunʼ.
14 Nda̱wa̱á, profeta Isaías nito̱ʼo̱o̱ náa xtáa rey Ezequías ga̱jma̱a̱ nirajxu̱u̱: “Dí nithaanʼ xa̱bu̱ buʼko̱ rá. Ga̱jma̱a̱ náá eguwáʼ xá.” Ezequías niriʼñuu: “Naguwáʼ náa mbá xuajin tsínguáʼ, náa Babilonia”.
15 Ikhú nirajxu̱u̱: “Ndiéjunʼ ndiyáá náa guʼwáaʼ xá.” Ezequías niriʼñuu: “Ndiyáá mbá xúgíʼ dí rígá náa goʼwóʼ, tárígá nimbá rí gíʼdoo numuu rí gúʼdoo rí túyáá”.
16 Isaías niʼthúu̱n Ezequías: “Atadxawíín dí naʼthí Jeobá:
17 ‹¡Natayáá ráʼ! Nartumuu mbiʼi dí xúgíʼ dí rígá náa guʼwáaʼ ga̱jma̱a̱ xúgíʼ dí wajin xiʼñáaʼ nirajxi̱i̱ asndu rí mbiʼi xúgi̱ maʼga kiʼda náa Babilonia, ni xáguanúu nimbá, eʼthí Jeobá.
18 Ga̱jma̱a̱ tikhuiin ejña̱a̱nʼ bi̱ ikháán maraʼdiin magún kudiin ga̱jma̱a̱ ikhí mani̱ndxu̱ún bi̱ makuwá ruñajunʼ náa naʼtáñajunʼ rey ndrígóo Babilonia›”.
19 Índo̱ Ezequías niʼdxuun rúʼko̱, ikhú niʼthúu̱n Isaías: “Ajngáa rí Jeobá niʼthí nindxu̱u̱ májánʼ”. Ga̱jma̱a̱ niʼthí xóó: “Májánʼ numuu dí marigá tsímáá ga̱jma̱a̱ nda̱a̱ gamíi mbiʼi rí ikhúún gáxtáá”.
20 Dí naʼthí xóó itháan ga̱jma̱a̱ numuu Ezequías, xúgíʼ tsiaki̱i̱ rí nigiʼdoo ga̱jma̱a̱ xú káʼnii niʼni tanque, ma̱ngaa riyaʼ dí ni̱jkha̱ kayóo ga̱jma̱a̱ iyaʼ asndu náa xuajin, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
21 Nda̱wa̱á, Ezequías ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ a̱ʼdióo Manasés ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “gaʼyee, bi̱ naʼthí dí marigá”.
^ O “ataniu̱ʼ mbá rí májánʼ”.
^ Náa ajngáa hebreo naʼthí, “mbiʼi ndrígáaʼ”.
^ O “pan dí niguma ga̱jma̱a̱ higo nijndooʼ dí nigixmbi̱i̱”.
^ Mbáa escalera rígi̱ najmún mu mbuyáá xóo enújngoo hora, xóo reloj dí nañajunʼ ga̱jma̱a̱ ajkha̱ʼ.
^ O “niʼdxawún”.
^ O “náa naʼtáñajunʼ”.
