Raga̱jma̱ libro ndrígu̱ún Reyes 21:1-26
21 Manasés gíʼdoo 12 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 55 tsiguʼ náa Jerusalén. Ru̱dúu̱* nigumbiʼyuu Hefziba.
2 Ikhaa niʼni dí ra̱májánʼ náa iduu Jeobá, ndiʼyaridoo dí xkawiʼ dí nuni̱ xa̱bu̱ bi̱ Jeobá nixkawíin náa inún xa̱bu̱ Israel.
3 Niʼni májáanʼ xúgíʼ náa rí mitsídánʼ náa rí Ezequías bi̱ ninindxu̱u̱ anu̱u̱* niʼni gámbáa, niʼni náa rí mikarámáʼ tsigijñaʼ náa Baal ga̱jma̱a̱ mbá poste rí mitsúʼkháan,* xó má niʼni Acab rey ndrígóo Israel. Nismbáti̱go̱o̱ inuu xúgíʼ dí rígá mekhuíí ga̱jma̱a̱ niʼni ñajuunʼ.
4 Ma̱ngaa niʼni náa mikarámáʼ tsigijñaʼ náa goʼwóo Jeobá náa rí Jeobá niʼthí “Marigá mbiʼyuʼ náa Jerusalén”.
5 Ma̱ngaa niʼni náa mikarámáʼ tsigijñaʼ náa inuu xúgíʼ dí rígá mekhuíí náa mbá nájma̱ rexo̱o̱ goʼwóo Jeobá.
6 Ga̱jma̱a̱ nixnájxi̱i̱ a̱ʼdióo náa aguʼ, niʼni magia, nirajxi̱ numuu, nigruigi̱i̱n bi̱ nurajxu̱u̱n wajinʼ ga̱jma̱a̱ bi̱ nuni̱ xawan. Niʼni mbaʼa dí ra̱májánʼ náa iduu Jeobá mu maʼni dí makásngañu̱u̱ʼ.
7 Ma̱ngaa nikudaaʼ xándú bi̱ nigumaa ga̱jma̱a̱ itsí ma̱ngaa poste rí mitsúʼkháan náa guʼwá rí Jeobá niʼthúu̱n David ga̱jma̱a̱ a̱ʼdióo Salomón: “Náa guʼwá rígi̱ ma̱ngaa náa Jerusalén, náa dí ikhúún niraʼwi̱i̱ dí náa mbá xúgíʼ xuajin majkhaʼ* ndrígóo Israel ma̱ni̱ dí marigá mbiʼyuʼ asndu kámuu.
8 Nditháan xátangu̱ún ma̱ni̱ dí rajkúún xa̱bu̱ Israel matsíngu̱u̱nʼ náa xuajin dí nixnu̱u̱n wajin xiʼñúúnʼ, á mu ikhiin nunimbu̱ún ga̱jma̱a̱ tsu̱máá xúgíʼ kiʼtáñajunʼ ga̱jma̱a̱ xúgíʼ Xtángoo rí xa̱bi̱ʼ Moisés niʼtáñajúúnʼ muni̱”.
9 Mú túnimbu̱u̱n ga̱jma̱a̱ Manasés niʼni dí magajnúriñu̱u̱ʼ, niʼni rí muni̱ itháán dí ra̱májánʼ ki xóo rí nini̱ xa̱bu̱ xuajin bi̱ Jeobá niʼni gámbíin náa inún israelitas.
10 Jeobá nijmiuu profetas* bi̱ nindxu̱ún xa̱bi̱i̱ mu maʼthúún:
11 “Manasés rey ndrígóo Judá, niʼni xúgíʼ enii rí xkawiʼ rígi̱, niʼni itháán xkawiʼ ki xóo xúgíinʼ xa̱bu̱ amorreos bi̱ nikúwá nákha ikhaa xóó tséxtáa, ga̱jma̱a̱ xándú bi̱ xkawi̱i̱nʼ nini̱ dí xa̱bu̱ Judá muxudamíjna̱ aʼkhá.
12 Ikha jngóo rígi̱ dí naʼthí Jeobá Dios ndrígóo Israel: ‹Maʼkhá ka̱yo̱ʼ mbá gamiéjunʼ náa Jerusalén ga̱jma̱a̱ náa Judá rí maʼni dí mamiñúu asndu tsáá bi̱ gaʼdxawun.
13 Matíga̱ náa Jerusalén mbá ñuñuu dí naxtagiéwan dí nijmaa má náa Samaria ma̱ngaa majmuʼ nivel* dí nijmaa náa goʼwóo Acab, ma̱ni̱ kaʼwi̱i̱ Jerusalén xóo naguma ka̱ʼwi̱i̱ mbá xua̱a̱, majñáa ga̱jma̱a̱ masmbri̱ga̱a̱ mbayíʼ.
14 Maniʼñúuʼ xuajñunʼ rí xóó naguanúu, maniʼñúunʼ náa ñawúúnʼ xa̱bu̱ sia̱nʼ ndrígu̱ún, mani̱ndxu̱ún xóo rí naguanáa ga̱jma̱a̱ magún kudúún xa̱bu̱ sia̱nʼ,
15 numuu rí nini̱ dí ra̱májánʼ náa iduʼ ga̱jma̱a̱ túniña̱nʼ runi̱ dí makásngañuʼ asndu nákha mbiʼi rí nigúwíin wajin xiʼñúúnʼ náa Egipto asndu rí mbiʼi xúgi̱›”.
16 Manasés ra̱ʼkhá tháán mba̱ji̱nʼ eʼdiún xa̱bu̱ bi̱ nda̱a̱ aʼkhúún nixídíí, dí náa Jerusalén nijnííʼ gi̱i̱ asndu ñuʼún. Ma̱ngaa nikiéʼkúun índo̱ niʼni rí xa̱bu̱ Judá muni̱ dí ra̱májánʼ náa iduu Jeobá dí muxudamíjna̱ aʼkhá.
17 Dí naʼthí xóó itháan ga̱jma̱a̱ numuu Manasés ga̱jma̱a̱ xúgíʼ dí niʼni ma̱ngaa aʼkhá rí nikudaminaʼ, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
18 Ikhú Manasés ndiyáa jxu̱u̱ʼ gajmíi̱n wajin xiʼñúuʼ, nijuiʼdi̱i̱ náa jardín* dí rígá náa goʼwóo, náa ixi̱ ri̱ʼi̱ ndrígóo Uzá ga̱jma̱a̱ a̱ʼdióo Amón ni̱jkha̱nú ninindxu̱u̱ nuxi̱i̱ʼ rey.
19 Amón gíʼdoo 22 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ a̱jma̱ tsiguʼ náa Jerusalén. Ru̱dúu̱ nigumbiʼyuu Mesulémet wáxióo* Haruz bi̱ na̱ʼkha̱ náa Jotbá.
20 Ikhaa niʼni dí ra̱májánʼ náa iduu Jeobá xó má niʼni Manasés bi̱ nindxu̱u̱ anu̱u̱.
21 Niʼni ikháá má xóo niʼni anu̱u̱ ndiʼyamajkhún ikhíín má xándú bi̱ xkawi̱i̱nʼ bi̱ ndiʼyamajkhún anu̱u̱ ga̱jma̱a̱ nismbáti̱go̱o̱ náa inún.
22 Niniñuuʼ Jeobá, Dios ndrígu̱ún wajin xiʼñúuʼ, na̱nguá nijngruigo̱o̱ náa kambo̱o̱ Jeobá.
23 Nda̱wa̱á kayuuʼ xa̱bi̱i̱ rey Amón niri̱ya̱ʼ awan dí muni̱i̱ ga̱jma̱a̱ nixiyáa má náa goʼwóo.
24 Mú xa̱bu̱ xuajin niradíin xúgíinʼ bi̱ niri̱ya̱ʼ awan dí muni̱i̱ rey Amón ga̱jma̱a̱ nigi̱i̱ʼ Josías bi̱ nindxu̱u̱ a̱ʼdióo mu mani̱ndxu̱u̱ nuxi̱i̱ʼ rey.
25 Dí naʼthí xóó itháan ga̱jma̱a̱ numuu Amón, dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
26 Ikhú nidi̱i̱ náa ixi̱ ri̱ʼi̱ ndrígóo Uzá, ga̱jma̱a̱ a̱ʼdióo Josías ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “nánée”.
^ O “tátée”.
^ O “tribu”.
^ O “gaʼyee, bi̱ nuthi dí marigá”.
^ O “plomada”.
^ O “ixi̱ ri̱ʼi̱”.
^ O “a̱ʼdée dxáʼgú”.
