Raga̱jma̱ libro ndrígu̱ún Reyes 22:1-20
22 Josías gíʼdoo 8 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 31 tsiguʼ náa Jerusalén. Ru̱dúu̱* nigumbiʼyuu Jedidá wáxióo* Adaya bi̱ na̱ʼkha̱ náa Bozcat.
2 Ikhaa niʼni dí májánʼ náa iduu Jeobá, niʼni xó má niʼni wajin xiʼñúuʼ David. Tágájnuriyo̱o̱ʼ náa ñawún májánʼ ni má náa ñawún xti̱ʼ.
3 Índo̱ naʼni má 18 tsiguʼ dí naʼtáñajunʼ Josías, ikhaa nikuʼmaa náa goʼwóo Jeobá secretario Safán, a̱ʼdióo Azalías, a̱ʼdióo Mesulam. Niʼthúu̱n:
4 “Atatsimaaʼ gáta̱ya̱a̱ Hilquías ndxajkun bi̱ phú kayá edxu̱u̱, aratháán dí ikhaa magujxi̱i̱ xúgíʼ mbújkha̱a̱ dí na̱jkha̱ ki̱ʼda̱ náa goʼwóo Jeobá, dí nugimbóó bi̱ wájun náa xkrugua dí naguwáʼ kudúún xa̱bu̱ xuajin.
5 Atayáá dí mbújkha̱a̱ rúʼko̱ mudrigú bi̱ nduyáá xóo ejkha̱ ñajunʼ náa goʼwóo Jeobá, ga̱jma̱a̱ dí ikhiin muxnún bi̱ nuñejunʼ bi̱ nuni̱ májáanʼ goʼwóo Jeobá náa nichúu:*
6 Bi̱ nuñejunʼ ga̱jma̱a̱ ixi̱, ñumbáá ga̱jma̱a̱ bi̱ nuni̱ guʼwá. Ikhiin majmúún mu mutsi̱ ga̱jma̱a̱ ixi̱, ma̱ngaa itsí dí niwiʼtá mu majmúún muni̱ májáanʼ guʼwá.
7 Mú ragíʼmaa mixtandi̱ʼi̱i̱n cuenta ga̱jma̱a̱ numuu mbújkha̱a̱ dí nundrigú, numuu dí ikhiin nindxu̱ún xa̱bekha bi̱ kaʼnii maku̱ma̱a̱ʼ xtañún”.
8 Nda̱wa̱á Hilquías ndxajkun bi̱ phú kayá edxu̱u̱ niʼthúu̱n secretario Safán: “Nixka̱ma̱a̱ náa goʼwóo Jeobá mbá libro náa na̱ʼkha̱ Xtángoo”. Ikha jngóo Hilquías nixnúu libro Safán, ga̱jma̱a̱ ikhaa nigíʼdu̱u̱ niguxnuu.
9 Ikhú secretario Safán ni̱jkha̱ gáʼyoo rey, niʼthúu̱n: “Xa̱bia̱a̱ʼ nirajxi̱i̱ mbújkha̱a̱ dí rígá náa guʼwá, ga̱jma̱a̱ nixnún bi̱ nduyáá xóo ejkha̱ ñajunʼ náa goʼwóo Jeobá”.
10 Secretario Safán xóó niʼthúu̱n rey: “Ndxajkun Hilquías nixnúʼ mbá libro”. Ikhú Safán nigíʼdu̱u̱ niguxnuu náa inuu rey.
11 Índo̱ rey niʼdxawun ajngáa dí na̱ʼkha̱ náa libro náa kiʼniraʼmáʼ Xtángoo, nixkuʼtu xtíñuu.
12 Ikhú rey niʼtáñajuunʼ maʼni rígi̱ ndxajkun Hilquías, Ahicam a̱ʼdióo Safán, Acbor a̱ʼdióo Micaya, secretario Safán ga̱jma̱a̱ Asaya, bi̱ nindxu̱u̱ xa̱bi̱i̱ rey:
13 “Aʼguala gúra̱jxi̱i̱ Jeobá ga̱jma̱a̱ numuʼ, ga̱jma̱a̱ numuu xuajin ma̱ngaa ga̱jma̱a̱ numún xúgíinʼ xa̱bu̱ Judá, gura̱jxi̱i̱ ga̱jma̱a̱ numuu dí naʼthí náa libro rígi̱ dí nixka̱ma̱a̱la, Jeobá nakásngañu̱u̱ʼ kaʼyulú numuu dí wajin xiʼñúlú na̱nguá ninimbu̱u̱n ajngáa dí na̱ʼkha̱ náa libro rígi̱, na̱nguá ninimbaníí mbá xúgíʼ dí nigumaraʼmáʼ ga̱jma̱a̱ numulú”.
14 Ikha jngóo ndxajkun Hilquías, Ahicam, Acbor, Safán ga̱jma̱a̱ Asaya nigún gúyáá profetisa* Huldá. Ikhaa nindxu̱u̱ a̱ʼgiu̱u̱ Salum, a̱ʼdióo Ticvá, a̱ʼdióo Harhás, bi̱ nagujxi̱i̱ xtíin. Ikhaa xtáa náa xuajin nuxi̱ʼ dí rígá náa Jerusalén, ikhí nitamijná gajmiún.
15 Huldá niʼthún: “Rígi̱ dí naʼthí Jeobá, Dios ndrígóo Israel: ‹Gutha̱a̱n xa̱bu̱ bi̱ nikuʼmáanʼla maguwa̱ʼ gúyoʼ:
16 “Rígi̱ dí naʼthí Jeobá: ‹Makuʼmá mbá gamiéjunʼ náa xuajin rígi̱ ga̱jma̱a̱ náa xa̱bu̱ bi̱ kúwá ikhí, xúgíʼ dí na̱ʼkha̱ raʼthí náa libro dí niguxnuu rey ndrígóo Judá.
17 Ga̱jma̱a̱ numuu dí nini̱ñu̱nʼ, ma̱ngaa dí nurkuní tsigijñaʼ ndrígu̱ún náa eʼwíinʼ dioses mu muni̱ dí makásnga̱ñu̱ʼ ga̱jma̱a̱ xúgíʼ dí nuni̱, dí nakásngañu̱ʼ mikatiyo̱o̱ náa xuajin rígi̱ ga̱jma̱a̱ xájuíyuuʼ›”.
18 Mú guta̱a̱nla rey ndrígóo Judá, bi̱ nikuʼmáanʼla murajxi̱i̱ Jeobá: “Rígi̱ dí naʼthí Jeobá, Dios ndrígóo Israel: ‹Ga̱jma̱a̱ numuu ajngáa dí nitadxawíín,
19 dí ra̱ʼkhá tháán gámíñúún ga̱jma̱a̱ majuiʼtátsríguiin, numuu dí a̱jkia̱a̱nʼ niʼni gua̱ba̱ʼ ga̱jma̱a̱ nitaxruíguminaʼ náa inuʼ ikhúún bi̱ nindxu̱ʼ Jeobá índo̱ nitadxawíín dí magíʼnuu xuajin rígi̱ ga̱jma̱a̱ xa̱bu̱ bi̱ kúwá ikhí, ga̱jma̱a̱ numuu dí nitaxkuʼtu xtíñaaʼ ma̱ngaa dí nitambi̱ya̱ʼ náa inuʼ, ikhúún ma̱ngaa nidxawaanʼ, eʼthí Jeobá.
20 Ikha jngóo maʼgáaʼ ka̱ña̱a̱n náa nijuiʼdi̱ín wajin xiʼñáaʼ,* tsímáá gájuiʼdi̱ín, xáta̱ya̱a̱ xúgíʼ gamiéjunʼ dí ma̱ʼkhá ka̱yo̱ʼ náa xuajin rígi̱›”›”. Ikhú nigúun gútháán rígi̱ rey.
Mbaʼa nota
^ O “nánée”.
^ O “a̱ʼdée dxáʼgú”.
^ O “náa gíʼdoo tsúwáʼ”.
^ O “gaʼyee, bi̱ naʼthí dí marigá”.
^ Ajngáa mitsaanʼ rígi̱ najmún índo̱ mbáa nakáñuu.
