Raga̱jma̱ libro ndrígu̱ún Reyes 24:1-20
24 Índo̱ nixtáa raʼtáñajunʼ Jehoiaquim, Nabucodonosor rey bi̱ xtáa náa Babilonia, ni̱ʼkha̱ gáxmína̱ʼ ga̱jma̱a̱, Jehoiaquim ni̱jkha̱nú ninindxu̱u̱ xa̱bi̱i̱ mbá ajtsú tsiguʼ. Mú nda̱wa̱á nikujximínáʼ náa ikhaa.
2 Ikhú Jeobá nigíʼdu̱u̱ nikuʼmiin kuʼwáʼ caldeos, sirios, moabitas ga̱jma̱a̱ ammonitas náa Jehoiaquim. Nakuʼmiin mu muni̱ gámbáa Judá, xó má ajngóo Jeobá dí nithi xa̱bi̱i̱ bi̱ nindxu̱ún profetas.*
3 Nakujmaa kaʼwu dí Jeobá ekuʼma dí magíʼnuu Judá, bi̱ nánguá eyoo gáʼñúún ga̱jma̱a̱ numuu aʼkhá dí nikudaminaʼ Manasés.
4 Ma̱ngaa ga̱jma̱a̱ numuu eʼdiún xa̱bu̱ bi̱ nda̱a̱ aʼkhúún dí ikhaa nixídíí, numuu dí náa Jerusalén nijnííʼ eʼdiún xa̱bu̱ bi̱ nda̱a̱ aʼkhúún ga̱jma̱a̱ Jeobá tsíyoo gáʼni mba̱a̱ a̱jkiu̱u̱n.
5 Dí naʼthí xóó itháan ga̱jma̱a̱ numuu Jehoiaquim, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
6 Ikhú Jehoiaquim ndiyáa jxu̱u̱ʼ gajmíi̱n wajin xiʼñúuʼ, ga̱jma̱a̱ a̱ʼdióo Joaquín ni̱jkha̱nú ninindxu̱u̱ nuxi̱i̱ʼ rey.
7 Rey ndrígóo Egipto nánguá nindoo gágajnúu itháan náa xuajñuu, numuu dí rey bi̱ xtáa náa Babilonia nigruigú káyuuʼ xúgíʼ, nagi̱ʼdu̱u̱ náa mata Egipto asndu náa mañu Éufrates.
8 Joaquín gíʼdoo 18 tsiguuʼ índo̱ ni̱jkha̱nú ninindxu̱u̱ rey, ga̱jma̱a̱ niʼtáñajunʼ náa Jerusalén mbá ajtsú igu̱nʼ. Ru̱dúu̱* nigumbiʼyuu Nehustá wáxióo* Elnatán bi̱ na̱ʼkha̱ náa Jerusalén.
9 Ikhaa niʼni dí ra̱májánʼ náa iduu Jeobá, xó má niʼni anu̱u̱.*
10 Mbiʼi rúʼko̱, xa̱bi̱i̱ Nabucodonosor rey Babilonia nitsimún gúxmijná gajmiún xa̱bu̱ Jerusalén ga̱jma̱a̱ niruguama̱ʼa̱a̱n xuajin.
11 Índo̱ xa̱bi̱i̱ kúwá ruruguama̱ʼa̱a̱n xuajin, Nabucodonosor rey Babilonia ni̱ʼkha̱ náa xuajin.
12 Joaquín rey Judá nigájnuu ga̱jma̱a̱ nixnáximinaʼ náa ñawúunʼ rey bi̱ xtáa náa Babilonia, ga̱jma̱a̱ ru̱dúu̱, gajmíi̱n xa̱bi̱i̱, príncipes ndrígóo ga̱jma̱a̱ bi̱ kuya̱ edxu̱u̱ náa nuñewa̱a̱n. Rey ndrígóo Babilonia ni̱jkha̱ kayáa guʼwá e̱jua̱nʼ índo̱ naʼni migiñuʼ tsiguʼ rí naʼtáñajunʼ.
13 Ma̱ngaa niguwíi ikhí mbá xúgíʼ dí gíʼdoo numuu dí rígá náa goʼwóo Jeobá, ga̱jma̱a̱ dí rígá náa goʼwóo* rey, ma̱ngaa nijkúmigu̱u̱ mbá xúgíʼ dí niguma ga̱jma̱a̱ oro dí Salomón rey Israel niʼni mu majmaa náa goʼwóo Jeobá. Nirígá mbá xúgíʼ rígi̱ xó má Jeobá niʼtáriyaʼ marigá.
14 Ni̱jkha̱ kagui̱i̱n mbá xúgíinʼ xa̱bu̱ Jerusalén, mbá xúgíinʼ príncipes, soldado bi̱ najmañún nuxmijná ga̱jma̱a̱ mbá xúgíinʼ ñumbáá, ma̱ngaa bi̱ nuñajunʼ ga̱jma̱a̱ ajua̱nʼ.* Ni̱jkha̱ kagui̱i̱n mbá 10,000 xa̱bu̱. Tániñuuʼ nimbáa, i̱ndó niniñúúnʼ xa̱bu̱ bi̱ itháan gíníi.
15 Xúʼko̱ kaʼnii ni̱jkha̱ kayáa Joaquín náa Babilonia, ma̱ngaa ni̱jkha̱ kayáa ru̱dúu̱ ga̱jma̱a̱ gu̱ʼwi̱i̱ rey, bi̱ kuya̱ edxu̱u̱ náa nuñewa̱a̱n, xa̱bekha bi̱ guáʼdáá numún náa xuajin, niguwíin náa Jerusalén ga̱jma̱a̱ ni̱jkha̱ kagui̱i̱n náa Babilonia.
16 Ma̱ngaa rey Babilonia ni̱jkha̱ kagui̱i̱n mbá 7,000 soldado, ga̱jma̱a̱ mbá 1,000 ñumbáá, ma̱ngaa bi̱ nuñajunʼ ga̱jma̱a̱ ajua̱nʼ. Mbá xúgíinʼ ikhiin nindxu̱ún xa̱bu̱ xkujiinʼ ga̱jma̱a̱ kijmaratiin mu muxmijná.
17 Rey bi̱ xtáa náa Babilonia nigíiʼ Matanías a̱muu Joaquín xóo rey, mu mariʼkuriya̱a̱ʼ Joaquín, ga̱jma̱a̱ niriʼkhu̱u̱ mbiʼyuu, nixná mbiʼyuu Sedequías.
18 Sedequías gíʼdoo 21 tsiguuʼ índo̱ ni̱jkha̱nú ninindxu̱u̱ rey, ga̱jma̱a̱ niʼtáñajunʼ mbá 11 tsiguʼ náa Jerusalén. Ru̱dúu̱ nigumbiʼyuu Hamutal wáxióo Jeremías bi̱ na̱ʼkha̱ náa Libná.
19 Ikhaa niʼni dí ra̱májánʼ náa iduu Jeobá, xó má niʼni Jehoiaquim.
20 Nirígá rígi̱ náa Jerusalén ga̱jma̱a̱ náa Judá numuu rí Jeobá nikásngañu̱u̱ʼ, nánguá nindoo gáʼñúún, ga̱jma̱a̱ Sedequías nikujximínáʼ náa rey bi̱ xtáa náa Babilonia.
Mbaʼa nota
^ O “gaʼyee, bi nuthi dí marigá”.
^ O “nánée”.
^ O “a̱ʼdée dxáʼgú”.
^ O “tátée”.
^ O “náa naʼtáñajunʼ”.
^ O mbáa “bi̱ nuni̱ xtájtsí ndrígóo xuajin”.
