Raga̱jma̱ libro ndrígu̱ún Reyes 25:1-30
25 Índo̱ naʼni má mijna gu̱wa̱ʼ tsiguʼ dí xtáa raʼtáñajunʼ Sedequías, dí maʼni gu̱wa̱ʼ igu̱nʼ ga̱jma̱a̱ gu̱wa̱ʼ mbiʼi dí xtáa raʼtáñajunʼ Nabucodonosor rey Babilonia, ni̱ʼkha̱ gajmíi̱n mbá xúgíinʼ soldado ndrígóo mu muxmijná gajmiún xa̱bu̱ Jerusalén. Nigi̱ʼi̱i̱n mu muxmijná gajmiún ga̱jma̱a̱ niʼni mbá xtájtsí mu maruguamáʼáan,
2 niruguama̱ʼa̱a̱n má xúʼko̱ xuajin asndu índo̱ niʼni 11 tsiguʼ dí xtáa raʼtáñajunʼ rey Sedequías.
3 Índo̱ niʼni a̱jkhu̱ igu̱nʼ ga̱jma̱a̱ mijna gu̱wa̱ʼ mbiʼi, ra̱ʼkhá tháán gakhi̱i̱ niʼni ewiʼ náa xuajin, nándáa dí mu̱phu̱ xa̱bu̱.
4 Nijngudiri̱ya̱ʼ xtájtsí dí rígá náa xuajin, mbruʼun mbá xúgíinʼ soldado nigájnún náa xkrugua dí rígá náa ma̱jñu̱u̱ʼ mbá nájma̱ xtájtsí náa mijngii rígá jardín* ndrígóo rey, índo̱ caldeos kúwá ruruguama̱ʼa̱a̱n xuajin. Ga̱jma̱a̱ rey nigájnuu ni̱jkha̱ náa kamba̱a̱ dí na̱jkha̱ náa Arabá.
5 Mú soldado caldeos nigún ruxkáá rey, niʼngu̱u̱n nixkamaa náa ku̱ba̱ʼ mijxooʼ* dí rígá náa Jericó. Mbá xúgíinʼ soldádiu̱u̱ nigadríʼiin.
6 Ikhú nirugua̱a̱ rey, nitsimún kuya̱a̱ náa Riblá, ga̱jma̱a̱ nigún kuya̱a̱ náa inuu rey ndrígóo Babilonia náa nijuiʼtháán dí magíʼnuu.
7 Sedequías ndiʼyoo xígi̱ xóo eradíin e̱ji̱i̱n. Nda̱wa̱á Nabucodonosor niʼni dí magugóo iduu, niroʼóo ga̱jma̱a̱ cadena dí cobre, nda̱wa̱á ni̱jkha̱ kayáa náa Babilonia.
8 Índo̱ naʼni má 19 tsiguʼ, mbá witsu igu̱nʼ ga̱jma̱a̱ juwan mbiʼi dí naʼtáñajunʼ Nabucodonosor rey Babilonia, mbiʼi rúʼko̱ ni̱jkha̱nú Nebuzaradán náa Jerusalén, bi̱ kayá edxu̱u̱ náa bi̱ nuñewa̱a̱n rey, ikhaa nindxu̱u̱ xa̱bi̱i̱ rey ndrígóo Babilonia.
9 Nitsikháa goʼwóo Jeobá, goʼwóo* rey ga̱jma̱a̱ mbá xúgíʼ guʼwá dí rígá náa Jerusalén, ma̱ngaa guʼwún mbá xúgíinʼ xa̱bu̱ bi̱ guáʼdáá numún.
10 Mbá xúgíinʼ soldado caldeos bi̱ ni̱jkha̱ gajmíi̱n bi̱ kayá edxu̱u̱ náa bi̱ nuñewa̱a̱n rey nini̱ gámbáa xtájtsí dí kúgumaʼá ga̱jma̱a̱ xuajin Jerusalén.
11 Nebuzaradán bi̱ kayá edxu̱u̱ náa bi̱ nuñewa̱a̱n rey, ni̱jkha̱ kagui̱i̱n xa̱bu̱ bi̱ xóó naguanún náa xuajin, xa̱bu̱ bi̱ ninújnga̱án náa ñawúunʼ rey ndrígóo Babilonia ga̱jma̱a̱ xa̱bu̱ xuajin bi̱ xóó niguanún.
12 Mú bi̱ kayá edxu̱u̱ náa bi̱ nuñewa̱a̱n rey niniñúúnʼ ikhí tikhuun xa̱bu̱ bi̱ itháan ngíníi, mu muñewa̱a̱n náa kiʼdu ixi̱ uva ga̱jma̱a̱ mu muñejunʼ gakhi̱i̱.
13 Caldeos nirujku̱u̱ rajkhúu goʼwóo Jeobá dí niguma ga̱jma̱a̱ cobre, xó má carritos ma̱ngaa Lamáa* dí niguma ga̱jma̱a̱ cobre dí rígá náa goʼwóo Jeobá, nigúun kudúún cobre náa Babilonia.
14 Ma̱ngaa nigúun kudúún cubeta, pala, dí najuíyu̱u̱ʼ ga̱jma̱a̱ aguʼ, copa, ga̱jma̱a̱ mbá xúgíʼ dí niguma ga̱jma̱a̱ cobre dí najmaa náa guʼwá rí nduyamajkuíí Dios.
15 Bi̱ kayá edxu̱u̱ náa bi̱ nuñewa̱a̱n rey niguéjkha̱ náa nagi̱wa̱nʼ chámbúʼ, xua̱a̱ dí niguma ga̱jma̱a̱ mbawíí oro ma̱ngaa plata.
16 Mú mbá nájma̱ rajkhúu guʼwá, Lamáa ga̱jma̱a̱ carritos dí Salomón niʼni mu majmaa náa goʼwóo Jeobá, cobre dí niguma ga̱jma̱a̱ xúgíʼ rígi̱ ra̱ʼkhá tháán mba̱a̱ dí xáʼngo̱o̱ mixtagiawan.
17 Mámbá rajkhúu guʼwá naʼni mbá migiñuʼ metro* dí mbi̱jua̱, ga̱jma̱a̱ dí trámáʼ náa edxu̱u̱ niguma ga̱jma̱a̱ cobre naʼni mbá metro* dí mitsídánʼ. Amuuʼ dí kúgoo ga̱jma̱a̱, ma̱ngaa granadas dí tima náa mbájndi dí trámáʼ náa edxu̱u̱ dí wájun, xúgíʼ niguma ga̱jma̱a̱ cobre. Mbríguu má nindxu̱u̱ mbá nájma̱ rajkhúu guʼwá.
18 Bi̱ kayá edxu̱u̱ náa bi̱ nuñewa̱a̱n rey, ma̱ngaa ni̱jkha̱ kayáa Seraya ndxajkun bi̱ kayá edxu̱u̱, ga̱jma̱a̱ Sofonías raga̱jmi̱i̱n ndxajkun, ma̱ngaa mbá nájtsíin bi̱ naguájun náa xkrugua.
19 Ga̱jma̱a̱ ni̱jkha̱ kayáa mbáa bi̱ naʼtáñajúúnʼ bi̱ nuñewa̱a̱n rey, bi̱ naʼtáñajúúnʼ soldado, ga̱jma̱a̱ mbá witsiin bi̱ nuxnáá consejo rey, bi̱ kúwá náa xuajin, xó má ma̱ngaa secretáriu̱u̱ bi̱ naʼtáñajúúnʼ soldado, ga̱jma̱a̱ mbá 60 xa̱bu̱ ngíníi bi̱ xóó naguanún náa xuajin.
20 Nebuzaradán bi̱ kayá edxu̱u̱ náa bi̱ nuñewa̱a̱n rey, ni̱jkha̱ kagui̱i̱n náa inuu rey ndrígóo Babilonia náa Riblá.
21 Rey ndrígóo Babilonia nigudíin náa Riblá, náa ku̱ba̱ʼ Hamat. Xúʼko̱ kaʼnii niʼni rí nirawíin xa̱bu̱ Judá náa ku̱bu̱únʼ.
22 Nabucodonosor rey Babilonia nigíiʼ Guedalías, a̱ʼdióo Ahicam, a̱ʼdióo Safán, mu maʼtáñajúúnʼ xa̱bu̱ bi̱ niniñúúnʼ náa ku̱ba̱ʼ Judá.
23 Índo̱ mbá xúgíinʼ bi̱ nutañajúúnʼ soldado gajmiún xa̱biu̱ún, nidxawíín dí rey ndrígóo Babilonia nigíiʼ Guedalías mu maʼtáñajúúnʼ, mbá nacha̱ nigún gúyáá Guedalías náa Mizpá. Ni̱jkha̱ Ismael a̱ʼdióo Netanías, Johanán a̱ʼdióo Caréah, Seraya a̱ʼdióo Tanhúmet xa̱bu̱ netofatita ga̱jma̱a̱ Jaazanías a̱ʼdióo maacatita, nigún gajmiún xa̱biu̱ún.
24 Guedalías nixná ajngóo náa ikhiin ga̱jma̱a̱ náa xa̱biu̱ún. Niʼthúún: “Xámíñalaʼ dí mani̱ndxa̱la xa̱biu̱ún caldeos. Gakuwáanʼla má gi̱i̱, gu̱ni̱ ñajuunʼ rey ndrígóo Babilonia ga̱jma̱a̱ makuwáanʼla májánʼ”.
25 Índo̱ niʼni juwan igu̱nʼ, Ismael a̱ʼdióo Netanías, a̱ʼdióo Elisamá, bi̱ na̱ʼkha̱ náa goʼwóo rey,* ni̱jkha̱nú gajmíi̱n mbá gu̱wi̱i̱nʼ xa̱bekha. Nixnáá Guedalías ga̱jma̱a̱ nixiyáa, judíos ga̱jma̱a̱ caldeos bi̱ xtáa gajmíi̱n náa Mizpá nikháñún mangiin.
26 Nda̱wa̱á dí rúʼko̱, mbá xúgíinʼ xa̱bu̱ nigún náa Egipto, bi̱ guanii ga̱jma̱a̱ bi̱ majkhiinʼ, mangiin bi̱ nutañajúúnʼ soldado, numuu dí nimíñúún kuñúún caldeos.
27 Índo̱ naʼni má 37 tsiguʼ dí ni̱jkha̱ kiʼyáa Joaquín rey Judá, índo̱ naʼni 12 igu̱nʼ ga̱jma̱a̱ 27 mbiʼi, tsiguʼ dí nigi̱ʼi̱ maʼtáñajunʼ Evil-Merodac rey Babilonia, niríya̱a̱ʼ* Joaquín rey ndrígóo Judá náa guʼwá e̱jua̱nʼ.
28 Niʼniuu dí májánʼ, ga̱jma̱a̱ niʼni itháan mba̱a̱ ikhaa ki xóo mbá xúgíinʼ reyes bi̱ xtáa gajmíi̱n náa Babilonia.
29 Joaquín niríya̱a̱ʼ xtíin dí nigíʼ índo̱ nixtáa náa guʼwá e̱jua̱nʼ, ga̱jma̱a̱ náa mbá xúgíʼ mbiʼi dí xóó nixtáa, nikuiʼtsu náa mésóo rey.
30 Nigrui̱gú má xúʼko̱ ganitsu ndrígóo rey, tsejtsíí mbiʼi, xúʼko̱ mbá xúgíʼ mbiʼi dí xóó nixtáa.
Mbaʼa nota
^ O “ixi̱ ri̱ʼi̱”.
^ O “desierto”.
^ O “náa naʼtáñajunʼ”.
^ O “Mar”.
^ Náa ajngáa hebreo naʼthí, “ajtsú gúʼxúʼ”.
^ Náa ajngáa hebreo naʼthí, “mbá xúgíinʼ bi̱ kaʼñúún mutañajunʼ”.
^ Náa ajngáa hebreo naʼthí, “nikujxi̱i̱ edxu̱u̱ náa”.
