Raga̱jma̱ libro ndrígu̱ún Reyes 3:1-27
3 Jehoram a̱ʼdióo Acab ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria, índo̱ naʼni má 18 tsiguʼ rí naʼtáñajunʼ rey Jehosafat náa Judá, Jehoram niʼtáñajunʼ mbá 12 tsiguʼ.
2 Niʼni dí ra̱májánʼ náa iduu Jeobá, maski má táʼni wéñuuʼ xóo niʼni anu̱u̱ ga̱jma̱a̱ ru̱dúu̱,* numuu rí niʼni gámbáa poste rí mitsúʼkháan* náa nduyamajkuíí Baal dí anu̱u̱ niʼni.
3 Mú nikudaminaʼ ikháá má aʼkhá rí Jeroboán a̱ʼdióo Nebat niʼni rí xa̱bu̱ Israel muxudamíjna̱. Tániñuuʼ raʼni.
4 Mesá rey bi̱ xtáa náa Moab nakuíʼthíin mugu̱ ga̱jma̱a̱ naʼni numa náa inuu rey ndrígóo Israel mbá 100,000 mugu̱ ga̱jma̱a̱ mbá 100,000 mugu̱ e̱jmba̱a̱ bi̱ xóó tséjuiʼdu̱u̱n.
5 Táʼni mba̱yu̱u̱ʼ dí nikháñúu Acab, rey bi̱ xtáa náa Moab nikujximínáʼ náa rey ndrígóo Israel.
6 Ikha jngóo Jehoram nigájnuu náa Samaria mbiʼi rúʼko̱, ga̱jma̱a̱ nigímbíin xúgíinʼ soldado Israel.
7 Ma̱ngaa nikuʼma ajngáa rígi̱ náa Jehosafat rey ndrígóo Judá: “Rey bi̱ xtáa náa Moab nikujximínáʼ náa inuʼ. Mi̱dxu̱ʼ ga̱jma̱á nindxu̱ʼ mu̱ʼgua̱ gúxmíjná gajmiúlú Moab ráʼ.” Ikhaa niriʼñuu: “Ikhúún maʼgá ga̱jma̱á nindxa̱a̱ʼ, xa̱bu̱ xuajñunʼ magún gajmiún xa̱bu̱ xuajñanʼ ga̱jma̱a̱ wáyíʼ magún gajmiún wáyáaʼ”.
8 Jehosafat nirajxu̱u̱ Jehoram: “Náá kamba̱a̱ gúʼgualú ga̱jma̱a̱ rá.” Ikhaa niriʼñuu: “Muʼgua̱lú ga̱jma̱a̱ kamba̱a̱ rí na̱jkha̱ náa ku̱ba̱ʼ mijxooʼ* náa Edom”.
9 Rey ndrígóo Israel nigájnuu ga̱jma̱a̱ rey ndrígóo Judá, ma̱ngaa rey bi̱ xtáa náa Edom. Nda̱wa̱á dí nigún tuáʼán mbá juwan mbiʼi nándáa iyaʼ náa gíi̱nʼ, ni má dí muwa̱a̱n xujkiún bi̱ nagún gajmiún.
10 Rey ndrígóo Israel niʼthí: “¡Ra̱ʼkhá tháán ngíná! ¡Jeobá nigímbáánʼlú mbá nájtsáánʼ, i̱ndó mu maxnájxáánʼlú náa ñawúunʼ rey bi̱ xtáa náa Moab!”.
11 Jehosafat nirajxi̱: “Ndawa̱a̱ gi̱i̱ mbáa profeta* ndrígóo Jeobá bi̱ ma̱ndoo murajxi̱i̱ mbuʼyáá ndiéjunʼ eʼthí Jeobá ráʼ.” Mbáa xa̱bi̱i̱ rey ndrígóo Israel niriʼña: “Xtáa Eliseo, a̱ʼdióo Safat, bi̱ nisngátrámuuʼ iyaʼ ñawúunʼ Elías”.*
12 Ikhú Jehosafat niʼthí: “Ikhaa ma̱ndoo maʼthúlú dí eʼthí Jeobá”. Ikha jngóo rey ndrígóo Israel, Jehosafat ga̱jma̱a̱ rey bi̱ xtáa náa Edom niguájthan gúyáá.
13 Eliseo niʼthúu̱n rey ndrígóo Israel: “Ndíjkha dí ikhúún* edxa̱ʼ gátayoʼ rá. Ayuʼ gátrajxu̱u̱n profetas ndrígóo ana̱a̱ʼ ga̱jma̱a̱ ru̱dáaʼ”. Mú rey ndrígóo Israel niʼthí: “Na̱nguá, numuu dí Jeobá nigímbáanʼxu mbá nájtsáanʼ mu maxnájxáanʼxu náa ñawúunʼ rey bi̱ xtáa náa Moab”.
14 Ikhú Eliseo niʼthí: “Na̱xna̱ ajngóʼ ga̱jma̱a̱ numuu mbiʼyuu Jeobá, bi̱ naʼtáñajúúnʼ ángeles, bi̱ ikhúún na̱ni̱ ñajuunʼ.* Á mu raʼkháa ga̱jma̱a̱ numuu Jehosafat, rey ndrígóo Judá, xáyejxa̱a̱ʼ ni má xádxawaanʼ.
15 Aguwa̱ʼ kuya̱a̱la mbáa bi̱ naʼdu̱u̱ arpa”. Índo̱ xa̱bu̱ nigíʼdu̱u̱ ni̱ʼdu̱u̱ arpa, ñawúunʼ Jeobá ni̱ʼkha̱ náa Eliseo.
16 Ikhaa niʼthí: “Rígi̱ dí naʼthí Jeobá: ‹Gundiila má xúʼko̱ mbá riyaʼ náa mata* rígi̱.
17 Numuu dí rígi̱ dí naʼthí Jeobá: “Ikháanʼla xúyaa giñánʼ ni má ruʼwa, mú náa mata rígi̱ majnííʼ iyaʼ, ga̱jma̱a̱ ikháanʼla muwan ga̱jma̱a̱ muwa̱a̱n xúgíinʼ xujkiála”›.
18 Nda̱a̱ dí káʼníí rígi̱ eʼyoo Jeobá. Numuu dí ma̱ngaa maxnájxi̱ xuajin Moab náa ñawánla.
19 Gu̱ni̱ gámbáa xúgíʼ xuajin rí kúgumaʼá, ga̱jma̱a̱ xúgíʼ xuajin rí gíʼdoo numuu, gudi̱i̱ xúgíʼ ixi̱ rí májánʼ, guruguáá xúgíʼ iduu iyaʼ, ga̱jma̱a̱ gu̱ni̱ gámbáa ga̱jma̱a̱ itsí náa xúgíʼ ku̱ba̱ʼ rí najma̱a̱”.
20 Miʼcha̱, hora dí nuxnajxi̱ tsigijñaʼ dí tsígáʼ dí miʼcha̱, mbá nacha̱ ni̱ʼkha̱nú iyaʼ dí na̱ʼkha̱ náa Edom ga̱jma̱a̱ nijnííʼ mbá xúgíʼ.
21 Xúgíinʼ xa̱bu̱ Moab nidxawíín dí reyes nitsimún mu muxmijná gajmiún, ikha jngóo nigimbíin mbá xúgíinʼ xa̱bekha bi̱ najmiin nuda ajua̱nʼ* ga̱jma̱a̱ niwájun náa ndawaa.
22 Índo̱ nitujxu̱u̱n miʼcha̱ rí i̱mba̱ néjtsuu, agiuuʼ a̱jkha̱ʼ nambiʼimaʼán náa iyaʼ. Ga̱jma̱a̱ asndu náa i̱mba̱ ridoo xa̱bu̱ Moab nduyáá rí asndu maña̱ʼ xóo eʼdi kaʼnii.
23 Nithi: “¡Nindxu̱u̱ eʼdi! Mbáa reyes niradímíjná kaníkiin ga̱jma̱a̱ espada. ¡Xa̱bu̱ Moab, guʼgua̱ gúʼda̱a̱ dí niguanáa!”.
24 Índo̱ nitu̱ʼu̱u̱n náa dí gríguiin israelitas, ikhú nigájnún ruxmijná gajmiún. Xa̱bu̱ Moab nigájnún ragáñúún, israelitas nitu̱ʼu̱u̱n náa xuajin Moab, ga̱jma̱a̱ nigún ruradíin má xúʼko̱ xa̱bu̱.
25 Nini̱ gámbáa xuajin ga̱jma̱a̱ mámbáa xa̱bu̱ nida̱ʼ itsí náa mbaaʼ rí najma̱a̱, xúʼko̱ ninimajtííʼ itsí ikhí. Niruguáá xúgíʼ iduu iyaʼ, ga̱jma̱a̱ nidi̱i̱ xúgíʼ ixi̱ rí májánʼ. I̱ndó rí niguanúu nindxu̱u̱ rajkhúu xtájtsí rí niguma ga̱jma̱a̱ itsí dí rígá náa Quir-Haréset. Ikhú bi̱ kuda xkrájtsí niruguama̱ʼa̱a̱n xuajin ga̱jma̱a̱ nini̱ gámbáa.
26 Índo̱ rey bi̱ xtáa náa Moab ndiʼyoo rí na̱jkha̱ randátigo̱o̱, ikhú ni̱jkha̱ kagui̱i̱n mbá 700 xa̱bekha bi̱ kuda espada mu xúʼko̱ maʼngo̱o̱ manújngoo, rí maʼga asndu náa rey bi̱ xtáa náa Edom, mú táʼngo̱o̱.
27 Ikhú nigutuwiin a̱ʼdióo bi̱ giʼnii, bi̱ mariʼkuriya̱a̱ʼ náa maʼtáñajunʼ ga̱jma̱a̱ nixnájxi̱i̱ xóo tsigijñaʼ dí nakarámáʼ náa xtájtsí. Ikhú nikiʼníin kuñúún israelitas ga̱jma̱a̱ niniña̱a̱nʼ ruxmijná gajmiún. Xúʼko̱ nitangiín náa xuajñún.
Mbaʼa nota
^ O “tátée ga̱jma̱a̱ nánée”.
^ O “desierto”.
^ O “gaʼyee, bi̱ naʼthí dí marigá”.
^ O “bi̱ ninindxu̱u̱ xa̱bi̱i̱ Elías”.
^ Náa ajngáa hebreo naʼthí, “dí rígá náa ikhúún ga̱jma̱a̱ dí rígá náa ikháán rá.”
^ Náa ajngáa hebreo naʼthí, “bi̱ gújuan náa inuu”.
^ O “bóo”.
^ O “xúgíinʼ bi̱ najmún cinturón”.
