Raga̱jma̱ libro ndrígu̱ún Reyes 6:1-33
6 E̱jñu̱ún profetas* nitháán Eliseo: “Natayáá ráʼ. Ra̱ʼkhá tháán xa̱ʼ náa kuwáánʼlú gi̱i̱. Tséʼngo̱o̱ makuwáánʼ.
2 Mbá péñu,* atatsíñuxu muʼguá náa Jordán, mu mámbáa mbayáʼ mbá ixi̱, mu xúʼko̱ muníxu̱ mbá náa makuwáanʼ”. Ikhaa niʼthúún: “Aʼguala má”.
3 Mbáa dí ikhiin niʼthúu̱n: “Mbá péñu, ma̱ndoo mi̱dxa̱ʼ gajmiáanʼ xa̱bia̱a̱ʼ bigi̱ ráʼ.” Ikhaa niriʼña: “Xáʼñuu má, maʼgá”.
4 Ikha jngóo ni̱jkha̱ gajmíi̱n, niguánú náa Jordán ga̱jma̱a̱ ikhí nidi̱i̱ ixi̱.
5 Índo̱ mbáa dí ikhiin xtáa raʼdu̱u̱ ixi̱. Nixpátriya̱ʼ edxu̱u̱ háchóo ga̱jma̱a̱ nixpátuáʼán náa iyaʼ. Ikhú nindxaʼwá: “Ay tátioʼ, nitíʼñu̱ún”.
6 Xa̱bi̱i̱ Dios bi̱ gajkhun nirajxu̱u̱: “Náá minaaʼ nixpátuáʼán”. Ikhú nisngájmuu náá minaaʼ. A̱ʼkhu̱ Eliseo nirujturígú mbá chíʼgíiʼ* ixi̱ ga̱jma̱a̱ nidama̱ʼa̱n náa iyaʼ. Ikhú edxu̱u̱ hacha ni̱jkha̱ kruámuuʼ náa tsu̱du̱u̱ iyaʼ.
7 Ikhú Eliseo niʼthúu̱n: “Atríya̱a̱ʼ”. Ikhaa nikruiya̱ʼ ñawúunʼ ga̱jma̱a̱ niríya̱a̱ʼ.
8 Rey bi̱ xtáa náa Siria ni̱jkha̱ gáxmínaʼ ga̱jma̱a̱ rey ndrígóo Israel. Nirajxu̱u̱n xa̱bi̱i̱ ga̱jma̱a̱ niʼthúún: “Muʼgua̱ ragriguánʼ”.
9 Ikhú xa̱bi̱i̱ Dios bi̱ gajkhun nikuʼma rí mutháán rey ndrígóo Israel: “Tsu̱ma̱á gátani̱, xánujngaaʼ ga̱jma̱a̱ ikhí, numuu dí ikhí naguájthan sirios”.
10 Ikha jngóo rey ndrígóo Israel, nikuʼma ajngáa rí mudxawíín bi̱ kúwá ikhí, rí xa̱bi̱i̱ Dios bi̱ gajkhun niʼthúu̱n. Eliseo niʼthúu̱n má xúʼko̱ rey rí xánújngoo ga̱jma̱a̱ ikhí. Mbaʼa nuthu nirígá rígi̱.
11 Rey* bi̱ xtáa náa Siria ra̱ʼkhá tháán nikásngañu̱u̱ʼ, ikha jngóo nigímbíin xa̱bi̱i̱ ga̱jma̱a̱ niʼthúún: “Gu̱ta̱la, tsáá mbáa dí ikháanʼla nambájxu̱u̱ ga̱jma̱a̱ rey ndrígóo Israel.”
12 Mbáa xa̱bi̱i̱ niriʼñuu: “Nimbáa tátioʼ rey, Eliseo, profeta bi̱ xtáa náa Israel, ikhaa naʼthúu̱n rey ndrígóo Israel xúgíʼ dí ikháán naratáminaʼ náa xiawaaʼ”.
13 Ikhaa niʼthí: “Aʼguala ga̱jma̱a̱ gu̱ya̱a̱ náá mina̱a̱ʼ xtáa, mu makuʼmiin xa̱bu̱ murugua̱a̱”. Nda̱wa̱á nitháán: “Xtáa náa Dotán”.
14 Mbá nacha̱ nikuʼmiin wáyú, carro dí nuxmijná ga̱jma̱a̱, ma̱ngaa ra̱ʼkhá tháán mbaʼin soldado. Niguánú mbruʼun ga̱jma̱a̱ niruguama̱ʼa̱a̱n xuajin.
15 Índo̱ bi̱ nambáyúu xa̱bi̱i̱ Dios bi̱ gajkhun, ndijui̱i̱ miʼcha̱ ga̱jma̱a̱ nigájnuu. Ndiʼñún soldado, wáyú, carro dí nuxmijná ga̱jma̱a̱ dí nuruguama̱ʼa̱a̱n xuajin. Mbá nacha̱ bi̱ nambáyúu ni̱jkha̱a̱ gáʼthúu̱n Eliseo: “Ay tátioʼ, dí gúʼni̱ rá.”
16 Mú ikhaa niʼthúu̱n: “Xámiñaaʼ, itháan mbaʼin bi̱ kuwáánʼ gajmiúlú ikháánʼ ki xóo bi̱ gajmiún ikhiin”.
17 Ikhú Eliseo niʼtájkháan ga̱jma̱a̱ niʼthí: “Tátá Jeobá, natakáñaaʼ dí matarmbáʼtáá iduu mu mbaʼyoo”. Mbá nacha̱ Jeobá nirmbáʼtoo iduu bi̱ nambáyúu ga̱jma̱a̱ ndiʼyoo... ¡Náa kúbá kajthíinʼ wáyú ga̱jma̱a̱ carro aguʼ rígá náa mbájndi wíji̱ Eliseo!
18 Índo̱ sirios kúwá raguájthan náa wíji̱ Eliseo, ikhaa niʼtákáñuu Jeobá: “Mbá péñu, atani̱ rí soldado bugi̱ xákruigu̱u̱n”. Ikha jngóo ikhaa niʼni rí xákruigu̱u̱n xó má Eliseo nindo̱ʼo̱o̱.
19 Eliseo niʼthúún: “Raʼkháa gi̱i̱, raʼkháa xuajin rígi̱, guniʼñúʼla rí maʼgá kaguáanʼ náa xa̱bu̱ bi̱ nduʼyáaʼla”. Mú ni̱jkha̱ kagui̱i̱n náa Samaria.
20 Índo̱ niguánú náa Samaria, Eliseo niʼthí: “Tátá Jeobá, atani̱ rí makruigu̱u̱n mu mbuyáá”. Ikha jngóo Jeobá niʼni rí makruigu̱u̱n, ga̱jma̱a̱ ikhiin ndiyáá rí náa ta̱pho̱o̱ Samaria kúwíin.
21 Índo̱ rey ndrígóo Israel ndiʼñúún, niʼthúu̱n Eliseo: “Magúdíin xáʼ. Anu̱ʼ,* magúdíin xáʼ.”
22 Mú ikhaa niʼthúu̱n: “Xáradíin, lá naradíin ikháán bi̱ na̱dxu̱ʼ xtiin guʼwá e̱jua̱nʼ ga̱jma̱a̱ bi̱ natrugui̱i̱n índo̱ nataxmínaʼ* ráʼ. Araxnún pan mu̱phu̱ ga̱jma̱a̱ iyaʼ muwa̱a̱n mu maguáan náa tátiu̱ún”.
23 Ikha jngóo ikhaa niʼni mbá ndxa̱a̱, ga̱jma̱a̱ ikhiin nipiʼtsu ga̱jma̱a̱ niʼwa̱a̱n. Nda̱wa̱á nikuʼmiin maguáan náa tátiu̱ún. Mbá grupo kuʼwáʼ sirios nánguá nitangi̱ín matu̱ʼu̱u̱n náa ku̱ba̱ʼ Israel.
24 Nda̱wa̱á Ben-Hadad rey bi̱ xtáa náa Siria nigímbíin mbá xúgíinʼ soldádiu̱u̱, nitsimún Samaria ga̱jma̱a̱ niruguama̱ʼa̱a̱n.
25 Ikha jngóo náa Samaria ra̱ʼkhá tháán gakhi̱i̱ niʼni ewiʼ. Mba̱yu̱u̱ʼ niruguama̱ʼa̱a̱n rí asndu mbá edxu̱u̱ búrru ni̱jkha̱nú niʼni numuu 80 mbújkha̱a̱ plata, ga̱jma̱a̱ mbá chíʼgíiʼ* ambóo paloma numuu witsu mbújkha̱a̱ plata.
26 Índo̱ rey ndrígóo Israel xtáa ra̱jkha̱ kruámuuʼ náa tsu̱du̱u̱ xtájtsí, mbáa a̱ʼgu̱ nindxaʼwájmaa: “Ay tátioʼ rey, atambáyuxu”.
27 Ikhaa niʼthúu̱n: “Á mu dí Jeobá tsémbáyaaʼ, náá gíyóʼ rí mambáyaaʼ ga̱jma̱a̱ ikhúún rá. Náa mbaaʼ rí nuñajunʼ xáʼ. Náa nuxujmbi̱i̱ uva o náa nagájnuu aceite dxe̱ʼ.”
28 Ga̱jma̱a̱ rey nirajxu̱u̱: “Dí gíʼdaaʼ rá.” A̱ʼgu̱ niriʼña: “A̱ʼgu̱ bugi̱ niʼthúnʼ: ‹Araxnájxi̱i̱ a̱ʼdiáaʼ mu muʼphíí xúgi̱ ga̱jma̱a̱ gájtsíí gúʼphíí a̱ʼdióʼ ikhúún›.
29 Ikha jngóo ni̱ni̱ májáanʼxu a̱ʼdióʼ ikhúún ga̱jma̱a̱ niphííxu. Imbo̱o̱ mbiʼi ikhúún ni̱thu̱u̱n: ‹Araxnájxi̱i̱ a̱ʼdiáaʼ ikháán mu muʼphíí rá›, mú ikhaa nirkaʼwii”.
30 Índo̱ rey niʼdxawuun rí niʼthí a̱ʼgu̱ nixkuʼtu xtíñuu, ni̱jkha̱ kruámuuʼ náa tsu̱du̱u̱ xtájtsí ga̱jma̱a̱ xa̱bu̱ ndiyáá rí kagíʼ xtíin mi̱du̱* náa agoo xtíñuu.*
31 Ikhú rey niʼthí: “Dios gáʼni rí mamínuuʼ á mu tsérígú edxu̱u̱ Eliseo a̱ʼdióo Safat”.
32 Eliseo gíʼ náa goʼwóo gajmíi̱n bi̱ kuya̱ edxu̱u̱, rey nikuʼmaa mbáa bi̱ maʼga kayóo ajngáa ginii, mú nákhá ikhaa xóó tséjkha̱nú, Eliseo niʼthúún bi̱ kuya̱ edxu̱u̱: “Ndi̱ya̱a̱la a̱ʼdióo xa̱bu̱ bi̱ nagudíin a̱ngui̱i̱n buʼko̱ bi̱ nikuʼma rí murigú edxu̱ʼ xáʼ. Gakuwáanʼla xawii índo̱ gáʼkha̱nú bi̱ na̱ʼkha̱ kayóo ajngáa. Guruguáala xkrugua ga̱jma̱a̱ guxuʼdújma mu xámbáʼtoo, lá tséwáán xóo e̱ʼkha̱ tátióo bi̱ na̱ʼkha̱ kidxuuʼ xáʼ.”
33 Kaʼníí xtáa raʼtáminaʼ gajmíi̱n índo̱ ni̱ʼkha̱nú bi̱ na̱ʼkha̱ kayóo ajngáa ga̱jma̱a̱ rey niʼthí: “Náa Jeobá e̱ʼkha̱ gamiéjunʼ rígi̱, ndíjkha xóó gágúʼthu̱u̱n mbá rí maʼni Jeobá rá.”
Mbaʼa nota
^ O “gaʼyee, bi̱ nuthi dí marigá”.
^ O “atani̱ mbá rí májánʼ”.
^ O “lajuíin”.
^ Náa ajngáa hebreo naʼthí, “a̱jkiu̱u̱n rey”.
^ O “táteʼ”.
^ Náa ajngáa hebreo naʼthí, “espada ga̱jma̱a̱ xkamídá”.
^ O “agoo náa xuyuuʼ”.
