Raga̱jma̱ libro ndrígu̱ún Reyes 7:1-20
7 Ikhú Eliseo niʼthí: “Gudxawíín ajngóo Jeobá. Rígi̱ nindxu̱u̱ dí naʼthí Jeobá: ‹Gájtsíí ikhaa má hora rígi̱, náa xkrugoo* xuajin Samaria, dí mbá juwan litro* harina maʼni numuu mbá siclo* ga̱jma̱a̱ mbá 14 litro* cebada maʼni numuu mbá siclo›”.
2 Índo̱ mbáa xa̱bi̱i̱ rey bi̱ naku̱mu̱u̱ kaʼyoo niʼdxawuun rígi̱, ikhú niriʼñuu xa̱bi̱i̱ Dios bi̱ gajkhun: “Maski ajndu Jeobá gámbáʼtoo xkrugoo mekhu, xú káʼnii gándoo gárígá rígi̱* rá.” Eliseo niriʼñuu: “Ma̱ta̱ya̱a̱ ga̱jma̱a̱ idaaʼ, mú xátsu nimbá”.
3 Náa riejuun xkrugoo xuajin kúwá mbá a̱jkhui̱i̱n xa̱bu̱ bi̱ guáʼdáá nandii lepra,* nitamijná kaníkiin: “Dí e̱ʼni̱ trigáánʼ gi̱i̱ i̱ndó kua̱ʼthi̱i̱n makañúlú rá.
4 Á mu dí nata̱ʼa̱álú náa xuajin makañúlú gáʼni ewiʼ. Ga̱jma̱a̱ á mu naguanúlúʼ má gi̱i̱, makañúlú má. Ikha jngóo, guʼgua̱ náa gríguiin sirios. Á mu dí nuradiáánʼ makañúlú má. Mú, á mu tséradiáánʼlú makuwáánʼ xóó”.
5 Ikha jngóo, nitujxu̱u̱n índo̱ na̱jkha̱ raʼni kína, nigún náa gríguiin sirios. Índo̱ niguánú náa mijngii gríguiin ndiyáá dí ndawa̱a̱ nimbáa.
6 Jeobá má niʼni dí náa gríguiin sirios mudxawíín dí nawáán e̱ʼkha̱ carro dí nuxmijná ga̱jma̱a̱, ma̱ngaa dí nawáán xóo eguwáʼ wáyú ga̱jma̱a̱ nawáán eguwáʼ mbaʼin soldado. Ikhú sirios nitamijná kaníkiin: “¡Ndu̱ya̱a̱ ráʼ! ¡Rey ndrígóo Israel niriji̱i̱n reyes ndrígu̱ún hititas ga̱jma̱a̱ reyes bi̱ kúwá náa Egipto mu maguwáʼ gúradiáánʼlú!”.
7 Mbá nacha̱ índo̱ na̱jkha̱ raʼni kína, nitujxu̱u̱n ga̱jma̱a̱ nigáñún. Niniña̱a̱nʼ guʼwá xtíin, wáyú ga̱jma̱a̱ búrru. Niniña̱a̱nʼ xúgíʼ náa nigriguiin, nigáñún numuu dí tsíñún makhañún.
8 Índo̱ xa̱bu̱ bi̱ guáʼdáá nandii lepra niguánú náa nigriguiin sirios, nitu̱ʼu̱u̱n náa mbá guʼwá xtíin, nigi̱ʼdi̱i̱ nipiʼtsu ga̱jma̱a̱ niʼwa̱a̱n. Nigún gúrkaʼwu plata, oro ga̱jma̱a̱ xtíin. Nda̱wa̱á nitangiín nitu̱ʼu̱u̱n náa i̱mba̱ guʼwá xtíin, xúʼko̱ má nini̱ ga̱jma̱a̱ dí rígá ikhí, nigún gúrkaʼwu.
9 Nda̱wa̱á nitamijná kaníkiin: “Raʼkhí dí kuwáánʼlú ru̱ʼni̱. ¡Xúgi̱ nindxu̱u̱ mbá mbiʼi gagi, ndayóoʼ dí muʼthúún eʼwíinʼ ajngáa dí májánʼ! Á mu dí tséʼthá ga̱jma̱a̱ nuguaʼthi̱i̱n dí majtsi, ikháánʼ má eʼyáʼ dí maguma gínáánʼlú. Itháan májánʼ gáʼni dí muʼgua gúʼthá rígi̱ náa goʼwóo rey”.
10 Ikha jngóo nigún, nindxa̱ʼwu̱u̱n bi̱ wájun náa xkrugoo xuajin ga̱jma̱a̱ nithúún: “Nitu̱ʼu̱xu náa gríguiin sirios, túya̱a̱xu nimbá ni má túdxawíínxu nimbáa. I̱ndó wáyú ga̱jma̱a̱ búrru kaxtúʼún ga̱jma̱a̱ xó má tri̱ga̱á guʼwá xtíin”.
11 Mbá nacha̱ bi̱ wájun náa xkrugoo xuajin nithúún mbá xúgíinʼ, dí asndu ni̱jkha̱nú niwán náa goʼwóo rey.
12 Mbá nacha̱ rey nitu̱jxu̱u̱ mbruʼun, niʼthún xa̱bi̱i̱: “Guniʼñúʼ ma̱ta̱la dí nandún muni̱ sirios. Ikhiin nduyáá dí gi̱i̱ rígá ewiʼ, ikha jngóo nigájnún náa gríguiin mu murkaʼwumijná xanáá, nindxa̱ʼwa̱míjna̱: ‹Magajnún náa xuajñún, ikhú muruʼgui̱i̱n nduya nda̱wa̱á matu̱ʼu̱lú náa xuajñún›”.
13 Mbáa xa̱bi̱i̱ niʼthúu̱n: “Mbá péñu,* atatsíñúúnʼ dí tikhuun xa̱bu̱ magajnún magún gajmiún mbá witsiin wáyú bi̱ xóó naguanún náa xuajin. ¡Dí lá gáʼniuu! Ikhiin makhañún xó má gákháñún xúgíinʼ xa̱bu̱ Israel bi̱ xóó naguanún, ga̱jma̱a̱ xóo mbá xúgíinʼ xa̱bu̱ Israel bi̱ nikháñún má. Guxuʼmíinʼ magún mu mbuʼyáá ndiéjunʼ gárígá”.
14 Ikha jngóo nigún kudúún a̱jma̱ carro dí nuxmajtaa wáyú. Rey nikuʼmiin magún náa gríguiin sirios ga̱jma̱a̱ niʼthún: “Aʼguala gúya̱a̱”.
15 Nigún ruñíinʼ sirios asndu náa mañu Jordán, náa mbá kañiiʼ kamba̱a̱ gajthííʼ xtíin ga̱jma̱a̱ i̱ʼwáʼ dí nigún runiña̱a̱nʼ índo̱ nigáñún. Bi̱ nagún kuñu̱u̱n ajngáa nitangiín gútháán rey rí ndiyáá.
16 Ikhú xa̱bu̱ xuajin nigájnún nigún gúda̱a̱ dí niguanáa náa nigriguiin sirios. Xó má niʼthí Jeobá, mbá juwan litro* harina niʼni numuu mbá siclo, ga̱jma̱a̱ mbá 14 litro* cebada niʼni numuu mbá siclo.
17 Rey nigíiʼ mbáa xa̱bi̱i̱ bi̱ naku̱mu̱u̱ kaʼyoo mu mawi̱ji̱ náa xkrugoo xuajin. Mú xa̱bu̱ nixujmbi̱i̱ náa xkrugoo xuajin ga̱jma̱a̱ ikhí má nikháñúu, xó má niʼthí xa̱bi̱i̱ Dios bi̱ gajkhun índo̱ rey nigajtaa gáʼyoo.
18 Nirígá xó má xa̱bi̱i̱ Dios bi̱ gajkhun niʼthúu̱n rey: “Gájtsíí ikhaa má hora rígi̱, náa xkrugoo xuajin Samaria, dí mbá juwan litro* harina maʼni numuu mbá siclo, ga̱jma̱a̱ mbá 14 litro* cebada maʼni numuu mbá siclo”.
19 Mú xa̱bi̱i̱ rey niʼthúu̱n xa̱bi̱i̱ Dios bi̱ gajkhun: “Maski ajndu Jeobá gámbáʼtoo xkrugoo mekhu, xú káʼnii gándoo gárígá rígi̱* rá.” Mú Eliseo niriʼñuu: “Ma̱ta̱ya̱a̱ ga̱jma̱a̱ idaaʼ, mú xátsu nimbá”.
20 Xúʼko̱ má nigíʼnuu, numuu dí xa̱bu̱ nixujmbi̱i̱ ga̱jma̱a̱ nixiyáa náa xkrugua.
Mbaʼa nota
^ O “xua dí rígá náa”.
^ Náa ajngáa hebreo naʼthí, “a̱jma̱ sea”.
^ Náa ajngáa hebreo naʼthí, “ajngáa rígi̱”.
^ O “atani̱ mbá rí májánʼ”.
^ Náa ajngáa hebreo naʼthí, “mbá sea”.
^ Náa ajngáa hebreo naʼthí, “a̱jma̱ sea”.
^ Náa ajngáa hebreo naʼthí, “mbá sea”.
^ Náa ajngáa hebreo naʼthí, “a̱jma̱ sea”.
^ Náa ajngáa hebreo naʼthí, “mbá ajngáa xóo rígi̱”.
