Raga̱jma̱ libro ndrígu̱ún Reyes 8:1-29
8 Eliseo niʼthúu̱n ru̱dúu̱* ada̱ bi̱ niʼniga̱bi̱i̱: “Ayuʼ gajmiáanʼ bi̱ kúwá náa guʼwáaʼ náa i̱ʼwáʼ xuajin náa má gándoo mi̱dxu̱ʼ, numuu rí Jeobá niʼthí dí náa xuajin rígi̱ marigá ewiʼ mbá juwan tsiguʼ”.
2 Ikha jngóo a̱ʼgu̱ niʼni xó má niʼthúu̱n xa̱bi̱i̱ Dios bi̱ gajkhun. Nigájnuu gajmíi̱n bi̱ kúwá náa goʼwóo, ga̱jma̱a̱ nigún gákúwá náa ku̱bu̱únʼ filisteos mbá juwan tsiguʼ.
3 Nda̱wa̱á rí ninújngoo mbá juwan tsiguʼ, a̱ʼgu̱ nigájnáa náa mbañúúnʼ filisteos ga̱jma̱a̱ ni̱jkha̱a̱ gándo̱ʼo̱o̱ rey dí muxna̱a̱ goʼwóo ga̱jma̱a̱ mbayuuʼ.
4 Rey xtáa raʼtámíjná ga̱jma̱a̱ Guehazí bi̱ nambáyúu xa̱bi̱i̱ Dios bi̱ gajkhun, niʼthúu̱n: “Mbá péñu, arathúnʼ xúgíʼ dí mba̱ʼu̱ rí niʼni Eliseo”.
5 Índo̱ xtáa raʼtámíjná ga̱jma̱a̱ rey xú káʼnii Eliseo niʼniga̱bi̱i̱ mbáa bi̱ nikháñúu, ni̱ʼkha̱nú ru̱dúu̱ ada̱ bi̱ ni̱ga̱bi̱i̱ a̱ʼdióo mu mando̱ʼo̱o̱ rey dí muxna̱a̱ goʼwóo ga̱jma̱a̱ mbayuuʼ. Mbá nacha̱ Guehazí niʼthí: “Ikhaa a̱ʼgu̱ bugi̱ bi̱ Eliseo niʼniga̱bi̱i̱ a̱ʼdióo”.
6 Ikhú Eliseo nirajxu̱u̱ a̱ʼgu̱ xóo nirígá ga̱jma̱a̱ ikhaa niʼthúu̱n. Ikhú rey nigíiʼ mbáa bi̱ kayá edxu̱u̱ náa bi̱ nuñewa̱a̱n ga̱jma̱a̱ niʼthúu̱n: “Araxnáa xúgíʼ rí kaʼyoo ga̱jma̱a̱ xúgíʼ rí nijma̱a̱ náa mbayuuʼ asndu nákha mbiʼi rí nigájnuu náa xuajñuu asndu xúgi̱”.
7 Eliseo ni̱jkha̱ náa Damasco ga̱jma̱a̱ nákha mbiʼi rúʼko̱, Ben-Hadad rey bi̱ xtáa náa Siria, xtáa nandoo kháñuu. Ikha jngóo nitháán rey: “Ni̱ʼkha̱ xa̱bi̱i̱ Dios bi̱ gajkhun”.
8 Ikhú rey niʼthúu̱n Hazael: “Ayuʼ gáta̱ya̱a̱ xa̱bi̱i̱ Dios bi̱ gajkhun ga̱jma̱a̱ ayuʼ jcháaʼ mbá regalo. Atanda̱ʼa̱a̱ dí marajxu̱u̱ Jeobá á mu dí maʼni̱i̱ a̱jkiu̱nʼ”.
9 Hazael ni̱jkha̱ gáʼyoo rey ga̱jma̱a̱ ni̱jkha̱ kayóo mbá regalo: Nixiéʼdún mbá 40 camellos mu muda̱ xúgíʼ eni̱ rí májánʼ dí rígá náa Damasco. Índo̱ ni̱jkha̱nú niwi̱ji̱ náa inuu Eliseo ga̱jma̱a̱ niʼthúu̱n: “A̱ʼdiáaʼ Ben-Hadad rey bi̱ xtáa náa Siria nikuʼmún mu marajxa̱a̱ʼ, ‹Lá magajta̱a̱ nandii dí gúʼdoo ráʼ.›”
10 Eliseo niriʼñuu: “Ayu̱u̱ʼ ga̱jma̱a̱ aratháán ‹Maʼni̱i̱ a̱jkia̱a̱nʼ›, maski ajndu Jeobá niʼthúnʼ má rí makhañúu”.
11 Eliseo ndiʼyoo má xúʼko̱ Hazael rí asndu niʼni xkájkiu̱u̱n. Ikhú xa̱bi̱i̱ Dios bi̱ gajkhun nigíʼdu̱u̱ nimbi̱ya̱ʼ.
12 Hazael nirajxu̱u̱: “Tátioʼ ndíjkha rí natambi̱ya̱ʼ rá.” Ga̱jma̱a̱ Eliseo niriʼñuu: “Numuu rí nda̱yo̱o̱ dí ra̱ʼkhá tháán gátani̱ gíníin xa̱bu̱ Israel. Matatsika̱a̱ xuajin rí kúgumaʼá, maradíin ga̱jma̱a̱ espada xa̱bu̱ bi̱ najmañún nuxmijná, matani gawúúnʼ e̱jñu̱ún rí asndu matrujtu ri̱gi̱i̱n, matrujtu awúún gu̱ʼu̱ bi̱ kuda ewíin e̱ji̱n”.*
13 Hazael niʼthúu̱n: “Xú káʼnii gándoo maʼni xa̱bia̱a̱ʼ bugi̱, bi̱ nindxu̱u̱ káaʼ i̱ndó mbáa xuwáanʼ dí maʼni xúʼko̱ kaʼnii rá.” Mú Eliseo niʼthúu̱n: “Jeobá niʼthúnʼ dí ikháán gánindxa̱a̱ʼ rey náa Siria”.
14 Nda̱wa̱á Hazael niniñuuʼ Eliseo ga̱jma̱a̱ nitanga̱a̱ gáʼyoo tátióo, bi̱ nirajxu̱u̱: “Ndiéjunʼ niʼtháanʼ Eliseo rá.” Hazael niriʼñuu: “Niʼthúnʼ rí maʼni̱i̱ má a̱jkia̱a̱nʼ”.
15 Mú i̱mba̱ néjtsuu, Hazael niguajtuun cobija rí mi̱du̱ nikumááʼ náa iyaʼ ga̱jma̱a̱ nikuʼdujma náa inuu rey asndu nikháñuu. Xúʼko̱ Hazael ni̱jkha̱nú ninindxu̱u̱ i̱mba̱a̱ nuxi̱i̱ʼ rey.
16 Jehoram a̱ʼdióo rey Jehosafat bi̱ xtáa náa Judá ni̱jkha̱nú ninindxu̱u̱ rey índo̱ naʼni witsu tsiguʼ dí naʼtáñajunʼ Jehoram a̱ʼdióo Acab rey bi̱ xtáa náa Israel, nákha Jehosafat xóó nindxu̱u̱ rey náa Judá.
17 Gíʼdoo 32 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 8 tsiguʼ náa Jerusalén.
18 Niʼni ikháá má xóo nini̱ reyes bi̱ nikúwá náa Israel, xó má nini̱ bi̱ nikúwá náa goʼwóo Acab, numuu rí ndiyáa wáxióo* Acab. Niʼni dí ra̱májánʼ náa iduu Jeobá.
19 Mú Jeobá na̱nguá nindoo gáʼni gámbáa Judá ga̱jma̱a̱ numuu rí nikudaminaʼ náa xa̱bi̱i̱ David, numuu dí nixná ajngóo náa David dí marigá má xúʼko̱ mbá lámpara náa ikhaa, ma̱ngaa náa e̱ji̱i̱n asndu kámuu.
20 Nákha mbiʼi dí niʼtáñajunʼ Jehoram, xa̱bu̱ Edom nixujximíjna̱ náa inún xa̱bu̱ Judá, ga̱jma̱a̱ nithi dí nandiún mbáa rey.
21 Ikha jngóo Jehoram nikidaa náa Zaír ga̱jma̱a̱ mbá xúgíʼ cárriu̱u̱. Nitu̱jxu̱u̱ mbruʼun ga̱jma̱a̱ niʼngo̱o̱ niʼni gajmíi̱n xa̱bu̱ Edom bi̱ niruguama̱ʼa̱a̱n ikhaa gajmíi̱n bi̱ nutañajúúnʼ bi̱ nagún kudúún carros, ga̱jma̱a̱ soldado nigáñún nigúun náa guʼwá xtíin ndrígu̱ún.
22 Mú dí nikujximínáʼ Edom náa Judá xúʼko̱ má eni̱ asndu dí mbiʼi xúgi̱. Ma̱ngaa nákha mbiʼi rúʼko̱ Libná nikujximínáʼ.
23 Dí naʼthí xóó itháan ga̱jma̱a̱ numuu Jehoram, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá.
24 Nda̱wa̱á Jehoram ndiyáa jxu̱u̱ʼ gajmíi̱n wajin xiʼñúuʼ, ga̱jma̱a̱ nijuiʼdi̱i̱ náa Xuajñuu David náa nijuiʼdi̱ín wajin xiʼñúuʼ. Ga̱jma̱a̱ a̱ʼdióo Ocozías ni̱jkha̱nú ninindxu̱u̱ nuxi̱i̱ʼ rey.
25 Ocozías a̱ʼdióo rey Jehoram bi̱ xtáa náa Judá ni̱jkha̱nú ninindxu̱u̱ rey índo̱ naʼni má 12 tsiguʼ dí naʼtáñajunʼ Jehoram a̱ʼdióo Acab, rey bi̱ xtáa náa Israel.
26 Ocozías gíʼdoo 22 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá tsiguʼ náa Jerusalén. Ru̱dúu̱ nigumbiʼyuu Atalía, a̱ʼdá xíñíiʼ* rey Omrí bi̱ xtáa náa Israel.
27 Ocozías niʼni xó má nini̱ bi̱ nikúwá náa goʼwóo Acab, niʼni dí ra̱májánʼ náa iduu Jeobá, xó má nini̱ bi̱ nikúwá náa goʼwóo Acab, numuu rí anu̱u̱* ndiyáa mbáa a̱ʼgu̱ bi̱ na̱ʼkha̱ náa goʼwóo Acab.
28 Ikhaa ni̱jkha̱ ga̱jma̱a̱ Jehoram a̱ʼdióo Acab mu maxmína̱ʼ ga̱jma̱a̱ Hazael rey bi̱ xtáa náa Siria náa Ramot-Galaad, mú sirios nini̱ gawíínʼ Jehoram.
29 Rey Jehoram nitanga̱a̱ náa Jezreel mu maʼni̱i̱ náa dí nini̱ gawíínʼ xa̱bu̱ sirios náa Ramá, índo̱ ni̱jkha̱ gáxmína̱ʼ ga̱jma̱a̱ rey Hazael bi̱ xtáa náa Siria. Numuu dí Jehoram a̱ʼdióo Acab nigawúunʼ, Ocozías a̱ʼdióo Jehoram, rey bi̱ xtáa náa Judá, nigajtaa gáʼyoo náa Jezreel.
Mbaʼa nota
^ O “nánée”.
^ O “endi̱i̱n”.
^ O “a̱ʼdée dxáʼgú”.
^ Náa ajngáa hebreo naʼthí, “wáxióo”.
^ O “tátée”.
