Raga̱jma̱ libro rí niʼnirámáʼ Samuel 1:1-27
1 Nda̱wa̱á dí nikháñuu Saúl, índo̱ David nitanga̱a̱ dí ni̱jkha̱ gáxmijná gajmíi̱n amalequitas, niguanúu a̱jma̱ mbiʼi náa Ziclag.
2 Índo̱ niʼni ajtsú mbiʼi, náa nigi̱ʼi̱i̱n soldado ndrígóo Saúl nigájnuu mbáa xa̱bu̱ mbá nitu̱u̱ xtíñuu ga̱jma̱a̱ mbá ku̱ba̱áʼ edxu̱u̱. Índo̱ nikuʼmaminaʼ náa David, nigiʼnduti̱ga̱* ga̱jma̱a̱ nismbáti̱go̱o̱ mbayííʼ.
3 David nirajxu̱u̱: “Náá edxa̱ʼ rá.” Ikhaa niriʼña: “Nigayúʼ náa gíi̱nʼ soldado Israel”.
4 Ikhú David niʼthúu̱n: “Mbá péñu,* arathúnʼ, ndiéjunʼ nirígá.” Xa̱bu̱ niriʼña: “Soldado nigáñún náa nuxmijná ga̱jma̱a̱ mbaʼin nikháñún. Asndu Saúl ga̱jma̱a̱ Jonatán nikháñún”.
5 Ikhú David nirajxu̱u̱ dxámá bi̱ ni̱ʼkha̱a̱ kayóo ajngáa: “Xú káʼnii tayáá dí Saúl ga̱jma̱a̱ Jonatán nikháñún rá.”
6 Dxámá niʼthí: “Ikhú mbiʼi ni̱jkhá mangúún náa kúbá Guilboa ga̱jma̱a̱ ndi̱yo̱o̱ rí Saúl xtáa rambáyuminaʼ náa kudú* ndrígóo. Carro dí nuxmijná ga̱jma̱a̱ ma̱ngaa bi̱ kudrúwíin wáyú kúwá raguwaʼ mijngii.
7 Índo̱ nitangayii ga̱jma̱a̱ ndiʼyoʼ. Ikhú nindxa̱ʼóʼ ga̱jma̱a̱ ikhúún ni̱thu̱u̱n: ‹¡Gi̱i̱ xtáá!›
8 Ikhaa nirajxu̱ʼ, tsáá nindxa̱a̱ʼ. ‹Nindxu̱ʼ amalequita›, ni̱thu̱u̱n.
9 Ikhú niʼthúnʼ: ‹Mbá péñu, ayi̱ gátaxíñu̱u̱n numuu dí káʼníí nda̱ya̱, ga̱jma̱a̱ ra̱ʼkhá tháán e̱ʼkhu̱›.
10 Ikha jngóo nikuʼmáminaʼ ga̱jma̱a̱ nixíyáa, numuu dí ra̱ʼkhá tháán nigawúunʼ ga̱jma̱a̱ nánguá kaʼnii maʼni̱i̱ a̱jkiu̱u̱n. Ikhú nirígúu corona dí grígu náa edxu̱u̱ ga̱jma̱a̱ ajua̱nʼ dí tra̱ʼa̱ ñawúunʼ mu maʼkháaʼ ka̱gu̱ʼ gi̱i̱ náa tátioʼ”.
11 Índo̱ niʼdxuun rígi̱ David, nixkuʼtu xtíñuu, ga̱jma̱a̱ mbá xúgíinʼ xa̱bekha bi̱ xtáa gajmíi̱n xúʼko̱ má nini̱ mangiin.
12 Nigi̱ʼdi̱i̱ nindxa̱ʼwa̱ ga̱jma̱a̱ nimbi̱ya̱ʼ. Túphu nimbá asndu wakíʼ. Ga̱jma̱a̱ numuu Saúl, Jonatán, ma̱ngaa numuu xuajñuu Jeobá, ga̱jma̱a̱ goʼwóo Israel. Numuu dí nikháñún ga̱jma̱a̱ espada.
13 Ikhú David nirajxu̱u̱ dxámá bi̱ ni̱ʼkha̱ kayóo ajngáa: “Náá edxa̱ʼ”. Ikhaa niriʼña: “Nindxu̱ʼ a̱ʼdióo mbáa xa̱bu̱ na̱ʼkha̱á, mbáa amalequita”.
14 David niʼthúu̱n: “Ndíjkha rí támíñáaʼ nitaxíyáa bi̱ Jeobá niraʼwíi rá.”
15 Ikhú David nindxa̱ʼóo mbáa xa̱bi̱i̱ ga̱jma̱a̱ niʼthúu̱n: “Ayi̱ gátaxíyáa”, ikhú ikhaa nixíyáa.
16 David niʼthúu̱n dxámá: “Aʼkháanʼ má ikháán dí nikháñaʼ, numuu dí rawaanʼ má nixíña̱a̱ índo̱ niratá: ‹Ikhúún mínuuʼ nixíyáa bi̱ Jeobá niraʼwíi›”.
17 Ikhú David niʼni mbá ajmúú ngíná ga̱jma̱a̱ numuu Saúl, ma̱ngaa ga̱jma̱a̱ numuu Jonatán bi̱ nindxu̱u̱ a̱ʼdióo,
18 ga̱jma̱a̱ niʼthí rí mbaʼyóoʼ miʼsngúún xa̱bu̱ Judá. Ajmúú ngíná rígi̱ dí mbiʼyuu “Xkamídá” kiʼniraʼmáʼ náa libro dí mbiʼyuu Jasar, ga̱jma̱a̱ naʼthí:
19 “¡Gínáálá ikháán Israel! Dí mitsiʼyá nikháñúu náa mitsídánʼ.
¡Nikáñún xa̱bu̱ bi̱ guáʼdáá tsiaki̱i̱ náa nuxmijná!
20 Xútala náa Gat,xájngruigala ru̱ta̱ náa kamba̱a̱ ndrígóo Asquelón,mu dí wa̱ʼxiúnʼ filisteos xáʼdxún,mu dí wa̱ʼxiúnʼ bi̱ tútu xtóo xuyuuʼ tsáʼkhún xúni̱ ndxa̱a̱ ga̱jma̱a̱ numuu rúʼko̱.
21 Ikháanʼla kúbá dí rígá náa Guilboa,xárígá xuájyaʼ ni má ruʼwa náa ikháanʼla,ni má mbaaʼ rí najma̱a̱ tsigijñaʼ rí kaʼwu,numuu rí ikhí escudo ndrígu̱ún bi̱ guáʼdáá tsiaki̱i̱ niguma tsagáá,escudo ndrígóo Saúl nánguá kaxtaʼwíí ga̱jma̱a̱ aceite.
22 Xkamídoo Jonatán ga̱jma̱a̱ espádóo Saúlnawa̱a̱n mbá kayuuʼ náa eʼdiún xa̱bu̱ sia̱nʼ,nifraʼa jngaa náa xtangún bi̱ guáʼdáá tsiaki̱i̱, nditháan táʼni tígu̱u̱n.
23 Saúl ga̱jma̱a̱ Jonatán ninindxu̱ún míjíinʼ xa̱bu̱ ga̱jma̱a̱ ra̱ʼkhá tháán nindúún kuñúún,asndu índo̱ nikháñún túni̱ wájímíjná.
Nagáñún itháan nacha̱ ki xóo bi̱yú,ga̱jma̱a̱ itháan xkujiinʼ ki xóo león.
24 Ikháanʼla waʼxiinʼ Israel, gumbi̱ya̱ʼ ga̱jma̱a̱ numuu Saúl,bi̱ nixnála maguʼwánla xtíin rí maña̱ʼ xngeʼdi ga̱jma̱a̱ rí mitsaanʼ,*bi̱ niguma oro náa xtíñala.
25 ¡Nikáñún bi̱ guáʼdáá tsiaki̱i̱ náa nuxmijná!
¡Jonatán nikháñuu náa rí mitsídánʼ!
26 Ra̱ʼkhá tháán emínuuʼ ga̱jma̱a̱ numaaʼ, dxájuʼ Jonatán,ra̱ʼkhá tháán nindoʼ ka̱ya̱a̱ʼ.
Ndi̱yo̱o̱ rí itháan nindaaʼ xtayoʼ ki xóo nandún kuyoʼ gu̱ʼu̱.
27 ¡Nikháñún bi̱ guáʼdáá tsiaki̱i̱ga̱jma̱a̱ niguámbáa ajua̱nʼ rí najmún náa nuxmijná!”.
