Raga̱jma̱ libro rí niʼnirámáʼ Samuel 11:1-27
11 Índo̱ nagi̱ʼdu̱u̱ tsiguʼ,* índo̱ reyes nagájnún mu muxmijná, David nikuʼmaa Joab gajmíi̱n xa̱bi̱i̱, ma̱ngaa xúgíinʼ soldado israelitas mu muxmijná gajmiún ammonitas. Niruguama̱ʼa̱a̱n xuajin Rabá, mú David niguánúu náa Jerusalén.
2 Mbá miʼtsú índo̱ na̱jkha̱ rakína, David nitu̱jxu̱u̱ ga̱jma̱a̱ ni̱jkha̱ kruámuuʼ náa tsu̱du̱u̱ guʼwá rí naʼtáñajunʼ. Asndu ikhí ndiʼyoo mbáa a̱ʼgu̱ dí xtáa rawan ga̱jma̱a̱ ikhaa ra̱ʼkhá tháán mitsiʼyáa.
3 David nikuʼmaa mbáa mu mbaʼyoo tsáá nindxu̱u̱ a̱ʼgu̱, ga̱jma̱a̱ nitháán: “Ikhaa nindxu̱u̱ Bat-Seba wáxióo* Eliam a̱ʼgiu̱u̱ Urías xa̱bu̱ hitita”.
4 Ikhú David nikuʼmiin xa̱bu̱ mu maguwáʼ kuya̱a̱. A̱ʼgu̱ nito̱ʼo̱o̱ náa David ikhú nibóoʼ ga̱jma̱a̱, rígi̱ nirígá índo̱ xtáa raʼni kaʼwumina̱a̱ʼ,* nda̱wa̱á ikhaa ni̱jkha̱a̱ náa goʼwóo.
5 Bat-Seba niguewáan ada̱,* ikha jngóo nikuʼma rí majuiʼtháán David: “Kaguewáan ada̱ jún”.
6 Índo̱ niʼdxawuun rígi̱ David, ikhú nikuʼma ajngáa náa Joab: “Ataxúʼmaa Urías xa̱bu̱ hitita ma̱ʼkha̱ náa ikhúún”. Ikha jngóo Joab nikuʼmaa maʼga Urías.
7 Índo̱ Urías ni̱ʼkha̱nú, David nirajxu̱u̱ xú káʼnii xtáa Joab, mangiin soldado ga̱jma̱a̱ xú káʼnii egún náa nuxmijná.
8 Nda̱wa̱á David niʼthúu̱n Urías: “Ayu̱u̱ʼ guʼwáaʼ ga̱jma̱a̱ ayáa jxa̱a̱ʼ”.* Índo̱ Urías nigájnáa náa naʼtáñajunʼ David, nigún kidxuuʼ mu muxnáá regalo dí nikuʼma rey.*
9 Mú Urías niguanúu niʼgu náa riejuun goʼwóo rey gajmíi̱n xúgíinʼ eʼwíinʼ xa̱bi̱i̱ tátióo, na̱nguá nigajta̱a̱ náa goʼwóo.
10 Ikhú nijuiʼtháán rígi̱ David: “Urías na̱nguá ni̱jkha̱a̱ goʼwóo”. Ikha jngóo David nirajxu̱u̱ Urías: “Lá raʼkháa ndiʼkhún etangaán náa nidxu̱ʼ ráʼ. Ndíjkha rí na̱nguá nidxu̱u̱ʼ guʼwáaʼ rá.”
11 Urías niriʼñuu David: “Xó má Arca,* xa̱bu̱ Israel mangiin xa̱bu̱ Judá kúwá raguanún náa guʼwá xtíin, ma̱ngaa tátioʼ Joab gajmíi̱n xa̱bi̱i̱ kúwá raguanún náa xkua̱. Xú káʼnii gáʼgáaʼ náa goʼwóʼ makuíʼtsú, ma̱ga̱nʼ ma̱ngaa mabo̱ʼ ga̱jmu̱ʼ a̱ʼgiu̱ʼ rá. ¡Na̱xna̱ ajngóʼ náa ikháán xó má xtaa nataya dí xáni rúʼko̱!”.
12 Ikhú David niʼthúu̱n Urías: “Aguanáaʼ gi̱i̱ xúgi̱ ga̱jma̱a̱ gájtsíí gániʼñááʼ midxu̱u̱ʼ”. Ikha jngóo Urías niguanúu náa Jerusalén mbiʼi rúʼko̱ ga̱jma̱a̱ i̱mba̱ néjtsuu.
13 Nda̱wa̱á David nikuʼma ajngáa rí maguwáʼ kuya̱a̱ Urías mu makuiʼtsu ma̱ngaa maga̱a̱n ga̱jma̱a̱, ikhú niʼni majnga̱a̱. Mú índo̱ na̱jkha̱ raʼni kína Urías na̱nguá ni̱jkha̱a̱ goʼwóo, rí phú niʼni ni̱jkha̱ gígú gajmíi̱n xa̱bi̱i̱ tátióo.
14 Miʼcha̱ David niʼnirámáʼ mbá carta rí maʼga̱ inuu Joab, nixnúu mayéʼga Urías.
15 Náa carta niʼnirámáʼ ajngáa rígi̱: “Gutsijiila ginii Urías náa inún soldado náa dí nuxmijná itháán gakhi̱i̱. Nda̱wa̱á guʼgua̱a̱ʼla, guniʼñááʼ mbáwíí mu maxmínaʼ gajmíi̱n ga̱jma̱a̱ makhañúu”.
16 Joab ndiʼyoo májánʼ náa xuajin kúwá soldado bi̱ xkujiinʼ bi̱ nindxu̱ún xa̱bu̱ sia̱nʼ, ga̱jma̱a̱ ikhí nitsijii Urías.
17 Índo̱ soldado bi̱ kúwá náa xuajin nigájnún ga̱jma̱a̱ nigiʼdu̱u̱n gajmiún Joab, tikhuun xa̱bi̱i̱ David nikháñún, mbáa dí ikhaa ninindxu̱u̱ Urías xa̱bu̱ hitita.
18 Ikhú Joab niʼthúu̱n David xúgíʼ dí nirígá náa nixmijná.
19 Niʼthúu̱n rígi̱ bi̱ na̱jkha̱ kayóo ajngáa: “Índo̱ gámbáa raratáán xúgíʼ rey dí nirígá náa nixmijná,
20 mbáa rey makiʼnáa ga̱jma̱a̱ maʼtháanʼ: ‹Ndíjkha rí nijkua itháán mijngii náa xuajin mu muxmijnála ráʼ. Lá na̱nguá e̱ya̱a̱ dí ikhiin muda̱ʼ kudú* asndu náa inuu xtájtsí xáʼ.
21 Tsáá lá nixíyáa Abimélec a̱ʼdióo Jerubéset rá. Lá raʼkháa mbáa a̱ʼgu̱ú bi̱ nindatigú tsíndoʼ náa inuu xtájtsí ga̱jma̱a̱ xúʼko̱ nixíyáa náa xuajin Tebez xáʼ. Ndíjkha rí nijkua kanuu itháán náa xtájtsí rá.› Á mu xúʼko̱ eʼtháanʼ, aratháán: ‹Ma̱ngaa xa̱bia̱a̱ʼ Urías xa̱bu̱ hitita nikháñúu›”.
22 Ikha jngóo bi̱ na̱jkha̱ kayóo ajngáa ni̱jkha̱a̱ ga̱jma̱a̱ niʼthúu̱n David xúgíʼ rí Joab nikuʼmaa maʼthí.
23 Nda̱wa̱á bi̱ na̱jkha̱ kayóo ajngáa niʼthúu̱n David. “Soldado bi̱ sia̱nʼ niʼngu̱u̱n itháán ga̱jma̱a̱ nigájnún gúxmijná ga̱jma̱á nindxu̱xu̱ náa xanáá, mú ikháanʼxu̱ nijkua̱a̱ʼ kudíínxu skidiʼ asndu náa xkrugoo xuajin.
24 Ga̱jma̱a̱ bi̱ kuda xkamídá nidaʼ asndu náa inuu xtájtsí mu muxnúún xa̱bia̱a̱ʼ, ikha jngóo tikhuun xa̱bi̱i̱ rey nikháñún. Ma̱ngaa xa̱bia̱a̱ʼ Urías xa̱bu̱ hitita nikháñuu”.
25 Índo̱ niʼdxawuun rígi̱ David ikhú niʼthúu̱n bi̱ na̱jkha̱ kayóo ajngáa: “Aratháán Joab: ‹Xátatsiʼñáá dí rúʼko̱ maʼni majmáaʼ, asndu tsáá má ma̱ndoo makhañúu ga̱jma̱a̱ espada. Guxmijná ga̱jma̱a̱ xúgíʼ tsiaki̱i̱ ndrígala ga̱jma̱a̱ gata̱ʼa̱la náa xuajin›. Ma̱ngaa araxnáá tsiaki̱i̱”.
26 Índo̱ a̱ʼgiu̱u̱ Urías niʼdxawuun rí nikháñúu ajmbio̱o̱,* ikhú nixtáa ngíná.
27 Índo̱ nijngoo rí nixtáa ngíná, ikhú David nikuʼma rí maguwáʼ kuya̱a̱ náa goʼwóo. Bat-Seba ni̱jkha̱nú ninindxu̱u̱ a̱ʼgiu̱u̱ ma̱ngaa nigiʼdaa ga̱jma̱a̱ mbáa ada̱. Rí niʼni David tánigu̱u̱ʼ kayuuʼ* Jeobá.
Mbaʼa nota
^ Xóo muʼthá, primavera mbáa rígi̱ nindxu̱u̱ gu̱nʼ marzo ga̱jma̱a̱ abril.
^ O “a̱ʼdée dxáʼgú”.
^ Mbáa índo̱ xtáa raʼni kaʼwuminaʼ rí nagajtaa eʼdiuu.
^ O “niʼni endi̱i̱”.
^ Náa ajngáa hebreo naʼthí, “arajñáa rajkuáaʼ”.
^ O “ganitsu ndrígóo rey”, mbáa rígi̱ nindxu̱u̱ ganitsu rí naxnúu bi̱ naʼthúu̱n maʼga náa goʼwóo.
^ O “E̱jna̱”.
^ O “lanza”.
^ O “jmba̱yi̱i̱”.
^ Náa ajngáa hebreo naʼthí, “ninindxu̱u̱ ra̱májánʼ náa iduu”.
