Raga̱jma̱ libro rí niʼnirámáʼ Samuel 14:1-33
14 Joab a̱ʼdióo Zeruyá niʼdxawuun dí rey ndayáaʼ Absalón.
2 Ikhú Joab nikuʼma rí mbuyáaʼ mbáa a̱ʼgu̱ bi̱ lístíi, bi̱ na̱ʼkha̱ náa Tecoa, ga̱jma̱a̱ niʼthúu̱n: “Nandoʼ dí matani̱ xóo najmáaʼ. Atagúwáanʼ xtíin rí natagíʼ índo̱ xtaa ngíná, ga̱jma̱a̱ xátaʼgímina̱a̱ʼ aceite. Atani̱ xóo eʼni mbáa a̱ʼgu̱ bi̱ mba̱yu̱u̱ʼ mbiʼi ejkha̱ ragi̱ʼi̱ rambi̱ya̱ʼ ga̱jma̱a̱ numuu mbáa bi̱ nikháñúu.
3 Nda̱wa̱á, ayuʼ náa rey, ga̱jma̱a̱ aratháán xúgíʼ dí ikhúún gátháanʼ”. Ga̱jma̱a̱ Joab niʼthúu̱n ndiéjunʼ gáʼthí.*
4 A̱ʼgu̱ bi̱ na̱ʼkha̱ Tecoa ni̱jkha̱ náa rey, nigiʼnduti̱ga̱* mbayííʼ ga̱jma̱a̱ nismbáti̱go̱o̱, ikhú niʼtákáñuu: “Mbá péñu,* tátá rey, atambáyúʼ”.
5 Rey niʼthúu̱n: “Dí nitagíʼníí”. A̱ʼgu̱ niʼthí: “Gínúnlá ikhúún, a̱ʼgú xuáʼa nindxu̱ʼ, nikháñúu a̱jmbio̱ʼ.*
6 Ikhúún nigúʼdiin a̱jmi̱i̱n e̱ji̱nʼ. Índo̱ ikhiin kúwá xanáá, nixmijná. Numuu dí ndawa̱a̱ tsáa markuájíinʼ. Ikha jngóo mbáa niʼni gawúunʼ ndxájuu ga̱jma̱a̱ nixíyáa.
7 Dí xúgi̱, mbá xúgíinʼ bi̱ ka̱ñu̱u̱n nakiʼníin kuyoʼ, ga̱jma̱a̱ jngruigu̱u̱n ruthi: ‹¡Araxnájxi̱i̱ bi̱ nixíyáa ndxájuu mu dí muxíyáaxu̱, xúʼko̱ maʼni numa̱a̱ dí nixíyáa ndxájuu! Tséʼñuu á mu dí mbawíí buʼko̱ a̱ʼdiáaʼ guanúu›. Muxiyáa a̱ʼdióʼ bi̱ naguanúu iwáá, bi̱ nindxu̱u̱ xóo iwáá xa̱mbu̱ʼ dí gíʼdoo agiuuʼ. Muni̱ mbáti̱ga̱a̱ mbiʼyuu a̱jmbio̱ʼ, ni xákúwá bi̱ naguwáʼ náa ikhaa náa tsu̱du̱u̱ ku̱ba̱ʼ”.
8 Ikhú rey niʼthúu̱n a̱ʼgu̱: “Ayu̱u̱ʼ guʼwáaʼ, ikhúún ma̱ni̱ rí mambanúu numaaʼ”.
9 A̱ʼgu̱ niʼthúu̱n rey: “Tátioʼ rey, gagrigu̱u̱ náa tsu̱du̱ʼ ikhúún dí nirígá ga̱jma̱a̱ bi̱ kúwá náa goʼwóo anu̱ʼ.* Mú rey ga̱jma̱a̱ xíliu̱u̱* xáguáʼdáá aʼkhúún”.
10 Ikhú rey niʼthúu̱n: “Á mu mbáa natanga̱a̱ naʼtháanʼ mbu̱júu̱, ayi̱ jcháa gi̱i̱ ga̱jma̱a̱ ni xátanga̱a̱ maʼni xkájkia̱a̱nʼ”.*
11 Mú a̱ʼgu̱ niʼthúu̱n xóó: “Mbá péñu, tátá rey, garmáʼáan a̱jkia̱a̱nʼ xtayáá Jeobá Dios ndrígáaʼ mu xúʼko̱ bi̱ kaʼyoo maru̱ma̱a̱ eʼdiuu bi̱ nikháñuu xáʼni marigá itháan gamiéjunʼ ga̱jma̱a̱ maxíyáa a̱ʼdióʼ”. Ikhú rey niʼthúu̱n: “Na̱xna̱ ajngóʼ ga̱jma̱a̱ numuu mbiʼyuu Jeobá, rí a̱ʼdiáaʼ xáxtugua̱ nimbá tátsu̱u̱n edxu̱u̱”.
12 Ikhú a̱ʼgu̱ niʼthí: “Mbá péñu, tátioʼ rey, rígá mbá dí maʼtháanʼ xa̱bia̱a̱ʼ, atatsíñáánʼ dí maʼtháanʼ”. “Arathá”. Niʼthúu̱n ikhaa.
13 A̱ʼgu̱ niʼthí: “Á mu dí xúʼko̱, náá numuu dí nitani̱ dí raʼkhí xígi̱ kaʼnii náa xuajñuu Dios rá. Numuu dí niraxkáá a̱ʼdiáaʼ ga̱jma̱a̱ na̱nguá eʼnga̱a̱ʼ gídxa̱a̱ʼ jcháa. Dí niguámbáaʼ niratá naʼni dí maraʼdáá aʼkháanʼ.
14 Xúgiáánʼ makañúlú, ga̱jma̱a̱ manindxu̱lú xóo iyaʼ dí nagadíí mbayííʼ rí nánguá gáʼnga̱a̱ʼ gíyáa. Mú Dios xáxíyáa nimbáa, ga̱jma̱a̱ ikhaa ndaʼyoo náá numuu dí bi̱ nijuixkáá ragíʼmaa dí maxtáa wájíʼ má xúʼko̱ kámuu náa ikhaa.
15 Ikhúún ni̱ʼkhá mu mathu̱u̱n rígi̱ tátioʼ rey numuu dí xa̱bu̱ ninimiñúʼ. Ikha jngóo xa̱bia̱a̱ʼ niʼthí. ‹Mbá péñu, guniʼñúʼ matamíjná ga̱jmu̱ʼ rey. Mbáa rey maʼnimbánuu rí na̱nda̱ʼa̱ ñumbáá ndrígóo.
16 Mbáa rey maʼdxuun dí gáʼthí ñumbáá ndrígóo, ga̱jma̱a̱ maʼni káwáanʼxu náa ñawúunʼ xa̱bu̱ bi̱ nandoo marígú káʼyúʼ ikhúún ga̱jma̱a̱ a̱ʼdióʼ bi̱ mbáwíí, rí nixnúxu Dios›.
17 Ikhú xa̱bia̱a̱ʼ niʼthí: ‹Ajngóo tátioʼ gáʼni dí maʼni̱i̱ a̱jkiu̱nʼ, mbá péñu›. Numuu dí tátioʼ rey najmaa ndaʼyoo ndiéjunʼ dí májánʼ ga̱jma̱a̱ dí ra̱májánʼ, nindxu̱u̱ xóo mbáa ángel ndrígióo Dios bi̱ gajkhun. Jeobá Dios ndrígáaʼ gáxtáa ga̱jma̱á nindxa̱a̱ʼ”.
18 Ikhú rey niriʼñuu a̱ʼgu̱: “Rígá mbá dí nandoʼ marajxa̱a̱, ga̱jma̱a̱ na̱nda̱ʼa̱a̱ dí xátarkaʼumaʼáanʼ nimbá”. A̱ʼgu̱ niʼthí: “Tátioʼ rey, mbá péñu, aratá”.
19 Ikhú rey nirajxu̱u̱: “Joab niʼtháanʼ matani̱ xúgíʼ rígi̱ ráʼ.” A̱ʼgu̱ niriʼña: “Na̱xna̱ ajngóʼ náa ikháán xó má xtaa nataya, tátioʼ rey, xó má eʼthí tátioʼ rey, xa̱bia̱a̱ʼ Joab niʼthúnʼ xúgíʼ dí ma̱ni̱, ga̱jma̱a̱ niʼthúu̱n xa̱bia̱a̱ʼ bugi̱ xúgíʼ dí gíʼmaa maʼthí.
20 Xa̱bia̱a̱ʼ Joab niʼni rígi̱, mu xúʼko̱ ikháán matriʼkhu̱u̱ xóo etandxaʼwáá edxa̱a̱ʼ ga̱jma̱a̱ numuu Absalón, mú tátioʼ ra̱ʼkhá tháán ejmañuu nindxu̱u̱ xóo mbáa ángel ndrígióo Dios bi̱ gajkhun, ga̱jma̱a̱ ndaʼyoo xúgíʼ dí xtáa rarígá náa mbayulú”.
21 Ikhú rey niʼthúu̱n Joab: “Májánʼ má, ma̱ni̱. Ayuʼ gíyáa dxámá Absalón”.
22 Mbá nacha̱ Joab nigiʼnduti̱ga̱ mbayííʼ ga̱jma̱a̱ nismbáti̱go̱o̱, ikhú nigíʼdúu niʼni mba̱a̱ rey. Ga̱jma̱a̱ niʼthúu̱n: “Dí xúgi̱ xa̱bia̱a̱ʼ ndaʼyoo dí naʼni a̱jkia̱a̱nʼ xtayáá, tátioʼ rey, numuu dí nitanimbaníí dí ninda̱ʼa̱a̱ xa̱bia̱a̱ʼ bigi̱”.
23 Ikhú Joab ni̱jkha̱ Guesur gáyáa Absalón mu ma̱ʼkha̱a̱ Jerusalén.
24 Rey niʼthí: “Gatanga̱a̱ náa goʼwóo, mú xándoo ma̱ʼkha̱ gáʼyoʼ”. Ikha jngóo Absalón nitanga̱a̱ náa goʼwóo ga̱jma̱a̱ táʼga gáʼyoo rey.
25 Náa mbá xúgíʼ Israel ndawa̱a̱ nimbáa xa̱bu̱ bi̱ ra̱ʼkhá tháán eguma mba̱a̱ ga̱jma̱a̱ numuu dí mitsiʼyáa xóo Absalón. Nagi̱ʼdu̱u̱ náa rajkhúu asndu náa nuʼwu̱u̱n, májáanʼ kri̱ga̱a̱.
26 Mámbá índo̱ naguámbáa tsiguʼ ndayóoʼ dí marujtu xtátsúun edxu̱u̱, numuu dí ra̱ʼkhá tháán ki̱wu̱n. Dí nuthu ki̱wu̱n xóo 200 siclos* xó má ki̱wu̱n dí najmún rey.*
27 Absalón nigiʼdiin ajtsíin jiámá, ga̱jma̱a̱ mbáa dxáʼgú bi̱ mbiʼyuu Tamar bi̱ ra̱ʼkhá tháán mitsiʼyáa.
28 A̱jma̱ tsiguʼ kañiiʼ nixtáa Absalón náa Jerusalén, mú táʼkha̱ gáʼyoo rey.
29 Absalón nindxa̱ʼóo Joab mu makuʼmaa maʼga náa rey, mú Joab tándoo gáʼkha̱. Nindxa̱ʼóo dí maʼni a̱jma̱ nuthu, mú táʼga má mbu̱júu̱.
30 Nda̱wa̱á kayuuʼ Absalón niʼthún xa̱bi̱i̱: “Náa níjniúu mbayuʼ, gíʼdoo mbayuuʼ Joab, ikhí gíʼdoo cebada. Aʼguala gúgídaaʼ agiuuʼ”. Ikha jngóo xa̱bi̱i̱ Absalón nigi̱da̱a̱ʼ agiuuʼ mbaaʼ.
31 Ikhú Joab ni̱jkha̱ náa goʼwóo Absalón ga̱jma̱a̱ niʼthúu̱n: “Náá numuu dí xa̱bia̱a̱ʼ nigi̱da̱a̱ʼ aguʼ mbayuʼ ráʼ.”
32 Absalón niriʼñuu Joab: “Natayáá ráʼ, nikuʼmá ajngáa rígi̱ náa inaaʼ: ‹Ayi̱ ga̱jma̱a̱ atatsíñúnʼ dí makuʼmán mi̱dxu̱ʼ náa rey, mu matrajxi̱i̱ ga̱jma̱a̱ numuʼ: “Náá numuu dí niʼkháaʼ, itháan má májánʼ gáʼni á mu dí niguanúʼ náa Guesur. Dí xúgi̱ ganiñuʼ rey dí maʼgá gáyóo, á mu ndaʼyoo dí gúʼdoo aʼkhúnʼ gaxíñu̱u̱n má”›”.
33 Ikha jngóo Joab nixnáximinaʼ náa rey ga̱jma̱a̱ niʼthúu̱n. Ikhú rey nindxa̱ʼóo Absalón, ga̱jma̱a̱ Absalón ni̱ʼkha̱, nigiʼnduti̱ga̱ ga̱jma̱a̱ nismbáti̱go̱o̱ mbayííʼ náa inuu. Nda̱wa̱á rey nixnúu beso Absalón.
Mbaʼa nota
^ Náa ajngáa hebreo naʼthí, “nigruiʼyáʼ ajngáa náa rawuunʼ”. Atayáá ma̱ngaa versículo 19.
^ O “nixngutigamínáʼ”.
^ O “ataniu̱ʼ mbá rí májánʼ”.
^ O “jmbayi̱ʼ”.
^ O “táteʼ”.
^ O “trono”.
^ O “maʼni gajmáaʼ”.
^ Ma̱ndoo mani̱ndxu̱u̱ xóo ki̱wu̱n dí najmún reyes o mbá siclo mixtiʼkhu ki xóo dí najmún xúgíinʼ xa̱bu̱.
