Raga̱jma̱ libro rí niʼnirámáʼ Samuel 18:1-33
18 Ikhú David niguxniin xa̱bu̱ bi̱ xtáa gajmíi̱n, nirui̱ʼti̱i̱n ga̱jma̱a̱ nigruigi̱i̱n bi̱ mbuya̱ edxu̱u̱ náa mbá mil ga̱jma̱a̱ náa mbá cien soldado.
2 David nikuʼmiin xa̱bu̱ bi̱ xtáa gajmíi̱n náa mbá ajtsú grupo, mbá grupo ni̱jkha̱ gajmíi̱n* Joab, mbá grupo ni̱jkha̱ gajmíi̱n Abisái a̱ʼdióo Zeruyá, ndxájuu Joab, ga̱jma̱a̱ i̱mba̱ grupo ni̱jkha̱ gajmíi̱n Ittái xa̱bu̱ guitita. Nda̱wa̱á rey niʼthúún xa̱bekha: “Mangúún maʼgá ga̱jma̱á nindxa̱la”.
3 Mú ikhiin nitháán: “Xádxúʼ, numuu dí á mu ikháanʼ nagayúxu xáxmiéjúúnʼ,* á mu nakáñunxu̱ mbá tapáanʼxu dí ikháanʼ xáxmiéjúúnʼ má, ikháán xtaʼdáá numaaʼ ki xóo mbá 10,000 dí ikháanʼxu̱. Ikha jngóo itháan májánʼ gáʼni dí maguanáaʼ náa xuajin ga̱jma̱a̱ mataxuʼmíin bi̱ mumbayúxu”.
4 Ikhú rey niʼthún: “Ma̱ni̱ dí májánʼ má gúya̱a̱la ikháanʼ”. Ikha jngóo rey niguanúu náa xkrugoo xuajin, ga̱jma̱a̱ mbá xúgíinʼ xa̱bekha nigájnún náa mbá grupo dí cien ga̱jma̱a̱ mil.
5 Nda̱wa̱á rey niʼtáñajuunʼ Joab, Abisái ga̱jma̱a̱ Ittái dí muni̱ rígi̱: “Gu̱ni̱i̱ dí májánʼ dxámá Absalón. Gu̱ni̱ ga̱jma̱a̱ numuʼ ikhúún”. Xúgíinʼ xa̱bekha nidxawíín índo̱ rey niʼthúún rígi̱ bi̱ nutañajúúnʼ soldado ga̱jma̱a̱ numuu Absalón.
6 Ikhú xa̱bi̱i̱ David nigún xanáá mu muxkamamijná gajmiún xa̱bu̱ Israel, ikhí nigiʼdu̱u̱n náa xaxi̱ Efraín.
7 Xa̱bi̱i̱ David niradíin xa̱bu̱ Israel, mbiʼi rúʼko̱ nikháñún mbá 20,000 xa̱bekha.
8 Nixmijná náa xúgíʼ mbaaʼ. Mbiʼi rúʼko̱ itháan má mbaʼin nikháñún náa xaxi̱ ki xóo bi̱ nikháñún ga̱jma̱a̱ espada.
9 Absalón nixkamaminaʼ gajmíi̱n xa̱bi̱i̱ David. Ikhaa gríguii ejkha̱ mbáa mula, múlióo nito̱ʼo̱o̱ náa mbá agoo ixi̱ mba̱a̱ dí gíʼdoo wéñuuʼ ñawúunʼ, ikhí nimbróʼoo edxu̱u̱ Absalón. Mula ni̱jkha̱ má xúʼko̱, ikha jngóo Absalón kááʼ frájkhaa niguanúu.
10 Mú mbáa ndiʼyoo ga̱jma̱a̱ ni̱jkha̱ gáʼthúu̱n Joab: “¡Natayáá ráʼ! Ndi̱yo̱o̱ Absalón frájkhaa náa mbá ixi̱ mba̱a̱”.
11 Joab niriʼñuu xa̱bu̱ bi̱ niʼthúu̱n: “Á mu dí nitayáá, náá numuu dí tátaxíyáa má ikhí. Á mu dí nitaxíyáa, ikhúún maxna̱a̱ mbá gu̱wa̱ʼ mbújkha̱a̱ plata ga̱jma̱a̱ mbá cinturón”.
12 Mú xa̱bu̱ niʼthúu̱n Joab: “Maski ajndu muxnuʼ* mbá 1,000 mbújkha̱a̱ plata xáxíyáa a̱ʼdióo rey jún. Numuu dí nidxáwíínʼxu̱ dí rey niʼtáñajuaanʼ ikháán, Abisái ga̱jma̱a̱ Ittái: ‹Gu̱ya̱a̱ dí nimbáa xáʼniuu mbá dí ra̱májánʼ dxámá Absalón›.
13 Á mu dí tánimbo̱ʼ ga̱jma̱a̱ nixíyáa, xájmúún gárkaʼwuʼ rígi̱ náa inuu rey ga̱jma̱a̱ ikháán xáʼngaʼ gátiewu̱nʼ”.
14 Índo̱ Joab niʼdxuun rígi̱, niʼthúu̱n: “¡Xánimbátiga̱ mbiʼi ga̱jma̱á nindxa̱a̱ʼ!”. Ikhú niguajtuun mbá ajtsú ixi̱ kúdú, nixkruaʼa náa a̱jkiu̱u̱n Absalón índo̱ ikhaa kaʼníí ndaʼya frájkhaa náa ñawúunʼ ixi̱ mba̱a̱.
15 Ikhú niguáʼnú mbá gu̱wi̱i̱nʼ bi̱ numbayíí Joab bi̱ kuda aju̱u̱nʼ, nixnáá Absalón asndu nixiyáa.
16 Joab nindiyuu chi̱ji̱ʼ, ikhú xa̱bu̱ niniña̱a̱nʼ ruxkúún xa̱bu̱ Israel, xúʼko̱ kaʼnii niʼni dí Joab nirikhún.
17 Niriguíi Absalón, nidama̱ʼa̱a̱n náa mbá iñáʼ mi̱jnu̱ʼ dí rígá náa xaxi̱ ga̱jma̱a̱ nisnguta̱ma̱a̱ mbá ru̱tsu̱u̱ itsí náa tsu̱du̱u̱. Ikhú mbá xúgíinʼ xa̱bu̱ Israel nigáñún nigúun náa guʼwún.
18 Índo̱ Absalón xtáa ndaʼya, nirngujxi̱ itsí náa mata* ndrígóo Rey, numuu dí niʼthí: “Na̱nguá gúʼdaa nimbáa a̱ʼdióʼ bi̱ mayéxi̱i̱ mbiʼyuʼ”. Itsí rúʼko̱ nixnúu mbiʼyuu ikhaa, ikha jngóo asndu mbiʼi xúgi̱ nuxna mbiʼíí Itsí Absalón.
19 Ahimáaz a̱ʼdióo Sadoc niʼthúu̱n: “Mbá péñu,* atatsíñúnʼ maʼgá ragayúʼ gáthúu̱n rey rígi̱, numuu dí Jeobá niʼniuu dí májánʼ índo̱ niʼni kríya̱a̱ʼ náa xa̱bu̱ sia̱nʼ ndrígio̱o̱”.
20 Mú Joab niʼthúu̱n: “Xándoo gídxúʼ jcháaʼ nimbá ajngáa xúgi̱. Ma̱ndoo mi̱dxu̱ʼ jcháaʼ imbo̱o̱ mbiʼi, mú xúgi̱ na̱nguá, numuu dí mina̱a̱ʼ a̱ʼdióo rey nikháñúu”.
21 Joab niʼthúu̱n mbáa xa̱bu̱ Cus: “Ayuʼ, aratháán rey xúgíʼ dí nitayáá”. Ikhú xa̱bu̱ Cus nismbáti̱go̱o̱ náa inuu Joab ga̱jma̱a̱ nigájnuu ni̱jkha̱ ragáyúu.
22 Ahimáaz a̱ʼdióo Sadoc niʼthúu̱n mbu̱júu̱ Joab: “Mbá péñu, tséʼniuu má ndiéjunʼ gárígá, atatsíñúnʼ maʼgá ragayúʼ náa kidxuuʼ xa̱bu̱ Cus”. Mú Joab niʼthúu̱n: “Náá numuu dí mi̱dxu̱ʼ mangáán rá a̱ʼdióʼ. Nándáa má ajngáa dí mi̱dxu̱ʼ jcháaʼ ikháán”.
23 Maski ajndu xúʼko̱, ikhaa niʼtákáñuu: “Tséʼniuu má ndiéjunʼ gárígá, atatsíñúnʼ maʼgá”. Ikhú Joab niʼthúu̱n: “¡Ayuʼ!”. Ahimáaz nigájnuu ragáyúu ni̱jkha̱ náa kamba̱a̱ dí na̱jkha̱ náa Jordán ga̱jma̱a̱ niʼngo̱o̱ nixprígú jngayii xa̱bu̱ Cus.
24 David gíʼ náa ta̱pho̱o̱ mbá a̱jma̱ xkrugoo xuajin. Índo̱ bi̱ nayejngoo nitsimuu náa tsu̱du̱u̱ guʼwá dí rígá náa tsu̱du̱u̱ xkrugua, náa mijngii xtájtsí, índo̱ nikujxi̱i̱ edxu̱u̱ ndiʼyoo dí na̱ʼkha̱ ragáyúu mbáa xa̱bu̱.
25 Ikhú bi̱ nayejngoo niʼthúu̱n rey. Ga̱jma̱a̱ rey niʼthí: “Á mu dí mbáwíí e̱ʼkha̱, rígá ajngáa dí na̱ʼkha̱ kayóo”. Índo̱ Ahimáaz xtáa rakuʼmaminaʼ mijngii,
26 bi̱ nayejngoo ndiʼyoo dí na̱ʼkha̱ ragáyúu i̱mba̱a̱ xa̱bu̱ ga̱jma̱a̱ niʼthúu̱n bi̱ nañewu̱u̱n xkrugua: “¡Na̱ʼkha̱ i̱mba̱a̱ xa̱bu̱ ragáyúu!”. Ikhú rey niʼthí: “Ikhaa ma̱ngaa rígá ajngáa dí na̱ʼkha̱ kayóo”.
27 Bi̱ nayejngoo niʼthúu̱n rey: “Bi̱ na̱ʼkha̱ ragáyúu ginii xóo Ahimáaz a̱ʼdióo Sadoc kaʼnii”. Ikhú rey niʼthúu̱n: “Nindxu̱u̱ mbáa májáanʼ xa̱bu̱. Mbáa ajngáa májánʼ e̱ʼkha̱ kayóo”.
28 Ikhú Ahimáaz niʼthúu̱n gakhi̱i̱ rey: “¡Nda̱a̱ má dí rígá!”. Nda̱wa̱á nismbáti̱go̱o̱ mbayííʼ náa inuu rey ga̱jma̱a̱ niʼthúu̱n: “¡Gaguma mba̱a̱ Jeobá Dios ndrígáaʼ, bi̱ nixnájxi̱i̱n náa tátioʼ rey xa̱bekha bi̱ nixujximíjna̱* náa ikhaa!”.
29 Ikhú rey nirajxu̱u̱: “Xtáa májánʼ dxámá Absalón ráʼ.” Ahimáaz niriʼñuu: “Ndi̱yo̱o̱ dí ra̱ʼkhá tháán endxa̱ʼwa̱ xa̱bu̱ índo̱ Joab nikuʼmún ikhúún ga̱jma̱a̱ imba̱a̱ xa̱bi̱i̱ rey, mú na̱nguá ndi̱yo̱o̱ ndiéjunʼ xtáa rarígá”.
30 Rey niʼthúu̱n: “Añajún níjni”. Ikhú ikhaa niwi̱ji̱ níjni ga̱jma̱a̱ ikhí má niwi̱ji̱.
31 Ikhú ni̱ʼkha̱nú xa̱bu̱ Cus, niʼthúu̱n rey: “Na̱ʼkhá ka̱yo̱ʼ ajngáa dí maʼdxaun tátioʼ rey: Xúgi̱ Jeobá niʼniáanʼ dí májánʼ, niʼni kríña̱a̱nʼ náa ñawúúnʼ xúgíinʼ xa̱bu̱ bi̱ nixujximíjna̱ náa ikháán”.
32 Mú rey nirajxu̱u̱ xa̱bu̱ Cus: “Xtáa májánʼ dxámá Absalón ráʼ.” Ikhú xa̱bu̱ Cus niriʼñuu: “¡Xúgíinʼ xa̱bu̱ sia̱nʼ ndrígóo tátioʼ rey, ga̱jma̱a̱ mbá xúgíinʼ bi̱ nixujximíjna̱ náa ikhaa bi̱ nandún munii dí ra̱májánʼ gúgíʼníín xó má nigíʼnuu dxámá!”.
33 Rígi̱ niʼni dí rey maxtáa ngíná, nitsimuu náa guʼwá dí grígu rijma̱a̱, dí grígu náa tsu̱du̱u̱ xkrugua ga̱jma̱a̱ nigíʼdúu nimbi̱ya̱ʼ. Índo̱ na̱jkha̱ kruámuuʼ naʼthí: “¡A̱ʼdióʼ, Absalón! ¡A̱ʼdióʼ! ¡Absalón, a̱ʼdióʼ! ¡Májánʼ gáʼni á mu ikhúún nikháñuʼ jnu rá! ¡Absalón, a̱ʼdióʼ, a̱ʼdióʼ!”.
Mbaʼa nota
^ Náa ajngáa hebreo naʼthí, “nijxnáxi̱i̱n náa ñawúunʼ”.
^ Náa ajngáa hebreo naʼthí, “xúgiwa̱nʼ a̱jkiu̱ún náa ikháanʼxu̱”.
^ Náa ajngáa hebreo naʼthí, “maski ajndu mixtagiéwan ga̱jma̱a̱ ñawún wajpoʼ”.
^ O “bóo”.
^ O “ataniu̱ʼ mbá rí májánʼ”.
^ Náa ajngáa hebreo naʼthí, “nixujxi̱ ñawúúnʼ”.
