Raga̱jma̱ libro rí niʼnirámáʼ Samuel 2:1-32
2 Nda̱wa̱á dí nirígá rúʼko̱, David nirajxu̱u̱ Jeobá: “Lá gíʼmúún maʼgá náa mbá xuajin dí rígá náa Judá ráʼ.” Jeobá niʼthúu̱n: “Aan, atatsimaaʼ”. Mbu̱júu̱ David nirajxu̱u̱: “Náá gáʼgá rá.” Ikhaa niʼthúu̱n: “Náa Hebrón”.
2 Ikha jngóo David nitsimuu náa xuajin rúʼko̱ gajmíi̱n a̱jmi̱i̱n gu̱ʼwi̱i̱, Ahinoam bi̱ na̱ʼkha̱ náa Jezreel, ga̱jma̱a̱ Abigaíl bi̱ ninindxu̱u̱ a̱ʼgiu̱u̱ Nabal xa̱bu̱ carmelita.
3 David ma̱ngaa ni̱jkha̱ gajmíi̱n xa̱bi̱i̱, mámbíin dí ikhiin nigún gajmiún bi̱ kúwá náa guʼwún, niguanún nikúwá náa xuajin dí rígá náa ku̱ba̱ʼ Hebrón.
4 Ikhú niguwáʼ xa̱bekha bi̱ kúwá náa Judá, ga̱jma̱a̱ ikhí niraʼwi̱i̱ David mu mani̱ndxu̱u̱ rey náa goʼwóo Judá.
Ga̱jma̱a̱ nitháán David: “Xa̱bekha bi̱ kúwá náa Jabés-Galaad nindxu̱ún bi̱ nidi̱i̱ Saúl”.
5 Ikhú David nikuʼmiin xa̱bu̱ mu magún kuñu̱u̱n ajngáa náa xa̱bu̱ Jabés-Galaad mu muthún: “Jeobá gáʼni tsajkurámáanʼla, numuu dí nisngajmá dí májáanʼ a̱jkia̱la índo̱ nidi̱i̱ tátialaʼ Saúl.
6 Jeobá gásngájmala rí májáanʼ a̱jkiu̱u̱n* ga̱jma̱a̱ xániñala. Ikhúún ma̱ngaa ma̱niala dí májánʼ ga̱jma̱a̱ numuu dí ni̱nila.
7 Dí xúgi̱ rá guguaʼdáála tsiaki̱i̱ ga̱jma̱a̱ xámíñalaʼ, numuu dí nikháñúu tátialaʼ Saúl, ga̱jma̱a̱ bi̱ kúwá náa goʼwóo Judá niraʼwu̱u̱n ikhúún mu mani̱ndxu̱ʼ rey”.
8 Mú Abner a̱ʼdióo Ner, bi̱ naʼtáñajúúnʼ soldado ndrígóo Saúl, ni̱jkha̱ kayáa Is-Bóset a̱ʼdióo Saúl náa i̱mba̱ ridoo mañu, náa Mahanaim.
9 Nigíiʼ mu mani̱ndxu̱u̱ rey náa Galaad, náa xa̱bu̱ asuritas, náa Jezreel, náa Efraín, náa Benjamín ga̱jma̱a̱ náa mbá xúgíʼ Israel.
10 Is-Bóset a̱ʼdióo Saúl, gíʼdoo 40 tsiguuʼ índo̱ ni̱jkha̱nú ninindxu̱u̱ rey náa Israel, niʼtáñajunʼ mbá a̱jma̱ tsiguʼ. Mú bi̱ kúwá náa goʼwóo Judá nimbayíí David.
11 David niʼtáñajúúnʼ bi̱ kúwá náa goʼwóo Judá náa Hebrón mbá juwan tsiguʼ tikhu.
12 Mbá nguáthá mbiʼi nda̱wa̱á, Abner a̱ʼdióo Ner gajmíi̱n xa̱bi̱i̱ Is-Bóset, a̱ʼdióo Saúl, nigájnún náa Mahanaim nigún náa Gabaón.
13 Joab a̱ʼdióo Zeruyá gajmíi̱n xa̱bi̱i̱ David nigájnún nigún mangiin, ga̱jma̱a̱ nixkamamijnáá gajmiún náa laguna dí rígá náa Gabaón. Mbá grupo nigi̱ʼi̱i̱n náa mbá níjniúu laguna, ga̱jma̱a̱ i̱mba̱ grupo nigi̱ʼi̱i̱n náa i̱mba̱ níjniúu.
14 Ikhú Abner niʼthúu̱n Joab: “Gatujxu̱u̱n jiámá muxmijná náa inulú”. Ikhú Joab niʼthí: “Gatujxu̱u̱n má”.
15 Ikha jngóo niguájxu̱ ga̱jma̱a̱ niguájun náa inún. Mbríguu má mbaʼin: Mbá 12 xa̱bi̱i̱ Benjamín ga̱jma̱a̱ Is-Bóset a̱ʼdióo Saúl, ga̱jma̱a̱ mbá 12 xa̱bi̱i̱ David.
16 Nigi̱ʼdi̱i̱ nirajtuun edxu̱ún, ga̱jma̱a̱ mámbáa nixkrua̱ʼa̱ espada náa tsoxto̱o̱ ndxájuu, mbá xúgíinʼ nikháñún. Ikha jngóo mbaaʼ rúʼko̱ nixna mbiʼíí Helcat-Hazurim* dí rígá náa Gabaón.
17 Nigi̱ʼdi̱i̱ nixmijná gakhi̱i̱ wéñuuʼ mbiʼi rúʼko̱, nda̱wa̱á xa̱bi̱i̱ David niʼngu̱u̱n nini̱ gajmiún Abner ga̱jma̱a̱ xa̱bekha Israel.
18 Ikhí kúwá ajtsíin e̱ji̱i̱n Zeruyá: Joab, Abisái ga̱jma̱a̱ Asahel. Asahel naʼngo̱o̱ nagáyúu nacha̱ xóo egáyúu mbáa gacela* náa xkua̱ mba̱a̱.
19 Asahel ni̱jkha̱ raxkoo Abner. Nixkoo má xúʼko̱, tágájnuriyo̱o̱ʼ náa ñawún mújúunʼ ni má náa ñawún xti̱yu̱u̱ʼ.
20 Índo̱ Abner nitanga̱a̱ niyejxi̱ kidííʼ, nirajxu̱u̱: “Ikháán ráʼ. Asahel”. Ikhaa niriʼñuu, “Aan, ikhúún”.
21 Ikhú Abner niʼthúu̱n: “Ayuʼ náa ñawún májáanʼ o ñawún xti̱ya̱a̱ʼ, atrajtuwiin mbáa soldado aguanáaʼ ga̱jma̱a̱ xúgíʼ dí gádrígú káyííʼ”. Mú Asahel ni̱jkha̱ raxkoo má xúʼko̱.
22 Mbu̱júu̱ Abner nitanga̱a̱ niʼthúu̱n Asahel: “Ní xádxáʼ raraxkoʼ. Numuu dí á mu naxíña̱a̱n, ra̱ʼkhá tháán gátiyu̱ʼ índo̱ gátangu̱ún mbayamináʼ ga̱jmu̱ʼ ndxájuaaʼ Joab”.
23 Mú Asahel ni̱jkha̱ raxkoo má xúʼko̱, ikhú Abner niʼni gawúunʼ ga̱jma̱a̱ ixu̱u̱ kudú* náa awúu̱n, ga̱jma̱a̱ kudú nigájnuu náa tsu̱du̱u̱. Ikhí má nismbri̱ga̱a̱ ga̱jma̱a̱ nikháñúu. Xúgíinʼ bi̱ nanújngúún náa kri̱ga̱a̱ nikháñúu, naguájun mbá xngaa.
24 Joab ga̱jma̱a̱ Abisái nigún ruxkáá Abner. Índo̱ na̱jkha̱ marámáaʼ a̱jkha̱ʼ niguánú náa bíjní Amá, dí rígá náa ridoo Guíah, náa kamba̱a̱ dí na̱jkha̱ náa ku̱ba̱ʼ mijxooʼ* Gabaón.
25 Benjaminitas nigimbúmíjná magún kidxuuʼ Abner, nini̱ mbóó grupo soldado ga̱jma̱a̱ niguájun náa kaʼyoo náa inuu bíjní.
26 Ikhú Abner nindxaʼwájmaa Joab: “Lá nditháan xágiʼmuu espadulú ráʼ. Lá tsétayáá dí rígi̱ i̱ndó naʼni dí makásngañulú ráʼ. Ndiéjunʼ xtaʼti̱i̱n dí tsératún xa̱bia̱a̱ʼ rí muniña̱a̱ʼ ruxkúún a̱ngiu̱ún rá.”
27 Ikhú Joab niʼthí: “Na̱xna̱ ajngóʼ ga̱jma̱a̱ numuu mbiʼyuu Dios bi̱ gajkhun, á mu dí tárata nimbá, xa̱bu̱ magún ruxkúún a̱ngiu̱ún asndu miʼcha̱ dí i̱mba̱ néjtsuu”.
28 Ikha jngóo Joab nindiyuu chi̱ji̱ʼ ga̱jma̱a̱ xa̱bi̱i̱ niniña̱a̱nʼ ruxkúún xa̱bu̱ Israel, ikhú niniña̱a̱nʼ ruxmijná.
29 Abner gajmíi̱n xa̱bi̱i̱ nigún xígií náa Arabá mbá xúgíʼ mbruʼun, nikidiin náa Jordán, nigún ranújngún náa mbá xúgíʼ mata, nda̱wa̱á niguánú asndu náa Mahanaim.
30 Nda̱wa̱á dí Joab niniñuuʼ raxkoo Abner, nigímbíin mbá xúgíinʼ xa̱bi̱i̱. Dí náa xa̱bi̱i̱ David, ndáwi̱i̱n mbá 19, ma̱ngaa ndawa̱a̱ Asahel.
31 Mú xa̱bi̱i̱ David niʼngu̱u̱n niradíin benjaminitas ga̱jma̱a̱ xa̱bi̱i̱ Abner, nikháñún mbá 360 xa̱biu̱ún.
32 Nigúun kuya̱a̱ Asahel ga̱jma̱a̱ nidi̱i̱ náa iñáʼ dí nijuiʼdi̱i̱ anu̱u̱,* dí rígá náa Belén. Nda̱wa̱á Joab gajmíi̱n xa̱bi̱i̱ nigúun mbá mbruʼun ga̱jma̱a̱ niguánú náa Hebrón índo̱ na̱jkha̱ rajtsi.
Mbaʼa nota
^ Rí nandoo gáʼthúu̱n ‹mbaaʼ chílú itsí›.
^ Nindxu̱u̱ mbáa aña̱ʼ bi̱ nagáyúu itháan nacha̱.
^ O “lanza”.
^ O “desierto”.
^ O “tátée”.
