Raga̱jma̱ libro rí niʼnirámáʼ Samuel 20:1-26
20 Ikhí xtáa mbáa xa̱bu̱ bi̱ nanigu̱u̱ʼ maʼni xkujndu, bi̱ mbiʼyuu Seba a̱ʼdióo Bicrí, mbáa xa̱bu̱ benjaminita. Nindiyuu chi̱ji̱ʼ ga̱jma̱a̱ niʼthí: “Ikháanʼxu̱ nda̱a̱ rí kaʼyuxu̱ náa David, ga̱jma̱a̱ na̱nguá nindrígúuxu nimbá náa a̱ʼdióo Jesé. ¡Xa̱bu̱ Israel! ¡Mámbáa gáʼga̱a̱ gáʼyoo dios* ndrígóo!”.
2 Ikha jngóo mbá xúgíinʼ xa̱bu̱ Israel niniña̱a̱nʼ ragún kidxuuʼ David ga̱jma̱a̱ nigún kidxuuʼ Seba a̱ʼdióo Bicrí. Mú xa̱bu̱ Judá, bi̱ kúwá náa Jordán asndu náa Jerusalén, na̱nguá niniña̱a̱nʼ rey ndrígu̱ún.
3 Índo̱ rey David ni̱jkha̱nú náa goʼwóo* dí rígá náa Jerusalén, nikuʼma dí bi̱ mbá gu̱wi̱i̱nʼ gu̱ʼú ñawiin* bi̱ niniñúúnʼ muñewa̱a̱n goʼwóo makuwá náa guʼwá náa kúwíin bi̱ nuñewa̱a̱n. Ikhaa má ndaʼyoo xóo maguáʼdáá ganitsu, mú nánguá nitanga̱a̱ nibóoʼ gajmíi̱n. Nikúwá náa guʼwá rúʼko̱ asndu índo̱ nikháñún, nikúwá xóo gu̱ʼú xuáʼa maski ajndu xtáa ndaʼya ajmbiu̱ún.
4 Ikhú rey niʼthúu̱n Amasá: “Arathún xa̱bu̱ bi̱ kúwá náa Judá dí índo̱ gáʼni ajtsú mbiʼi maguwáʼ gúyoʼ, ayi̱ gajmiáanʼ”.
5 Ikha jngóo Amasá ni̱jkha̱ gáʼyoo maʼthúún xa̱bu̱ Judá, mú táʼkha̱ mbiʼi dí nijuiʼtháán ma̱ʼkha̱.
6 Ikhú David niʼthúu̱n Abisái: “Seba a̱ʼdióo Bicrí ma̱ndoo maʼniulú itháan dí ra̱májánʼ ki xóo Absalón. Ayuʼ gajmiáanʼ xa̱bi̱i̱ tátiáaʼ ga̱jma̱a̱ araxkáá, raʼkháa gáʼni dí markaʼwuminaʼ náa xuajin dí kúgumaʼá ga̱jma̱a̱ makríyáaʼ”.
7 Ikha jngóo xa̱bi̱i̱ Joab, keretitas, peletitas ga̱jma̱a̱ mbá xúgíinʼ xa̱bu̱ bi̱ xkujiinʼ nigún kidxuuʼ, nigájnún náa Jerusalén mu magún ruxkáá Seba a̱ʼdióo Bicrí.
8 Índo̱ niguánú náa mijngii gíʼ itsí mba̱a̱ Gabaón, ikhí Amasá ni̱ʼkha̱ gátsijnuu. Joab kagíʼ xtíin dí naxmínaʼ ga̱jma̱a̱, ma̱ngaa kayá mbá espada náa smídúu. Índo̱ nikuʼmaminaʼ nixpátri̱ya̱ʼ espada náa xtóo nixpátrígú mbayííʼ.
9 Joab niʼthúu̱n Amasá: “Xtaa májánʼ ráʼ ndxájuʼ.” Ikhú nikrui̱ya̱ʼ ñawún mújúunʼ niguajthun stawuunʼ Amasá, xóo dí nandoo maxnúu beso.
10 Amasá na̱nguá ndiʼyoo á mu Joab kayá espada náa ñawúunʼ. Joab nixkruaʼa espada náa awúu̱n, ikhú nixpáwíi chámbóo ga̱jma̱a̱ nigi̱ʼi̱ mbayííʼ. Kááʼ mbóó má nixkruaʼaa asndu nixíyáa. Nda̱wa̱á dí rígi̱, Joab ga̱jma̱a̱ ndxájuu Abisái nigún ruxkáá Seba a̱ʼdióo Bicrí.
11 Mbáa xa̱bi̱i̱ Joab niwi̱ji̱ náa kri̱ga̱a̱ Amasá ga̱jma̱a̱ niʼthí: “¡Bi̱ nambáyúu Joab ga̱jma̱a̱ David, gaʼga kidxuuʼ Joab!”.
12 Amasá kri̱ga̱a̱ rambíjximinaʼ náa eʼdiuu náa ta̱pha̱ kamba̱a̱. Índo̱ xa̱bu̱ bugi̱ ndiʼyoo dí xúgíinʼ bi̱ nanújngúún ikhí naguájun, ikhú niyéjxi̱ jngayii Amasá náa kamba̱a̱ ni̱jkha̱ gátíga̱a̱ náa xaná. Ma̱ngaa nixtrámaaʼ mbá xtíin, numuu dí xúgíinʼ bi̱ nanújngúún ikhí naguájun nduyáá.
13 Índo̱ ikhaa niguámbóo niyéjxi̱ jngayii náa kamba̱a̱, mbá xúgíinʼ xa̱bekha nigún gajmiún Joab mu magún ruxkáá Seba a̱ʼdióo Bicrí.
14 Seba ni̱jkha̱ ranújngoo náa mbá xúgíʼ xuajin majkhaʼ* dí rígá náa Israel asndu ni̱jkha̱nú náa Abel-Bet-Maacá. Ga̱jma̱a̱ xa̱bu̱ bicritas nigimbúmíjná mu magún gajmiún náa xuajin.
15 Índo̱ Joab gajmíi̱n xa̱bi̱i̱ niguánú, niruguama̱ʼa̱a̱n Abel-Bet-Maacá, ga̱jma̱a̱ nirngujxi̱ ku̱ba̱ʼ mu maʼngu̱u̱n matu̱ʼu̱u̱n náa xuajin, numuu dí xuajin kúgumaʼá. Xa̱bi̱i̱ Joab nigíʼdi̱i̱ nindii náa agoo xtájtsí mu mangajxi̱i̱.
16 Mbáa a̱ʼgu̱ bi̱ najmañuu niʼthúún gakhi̱i̱ náa xuajin: “¡Gudxawíín, gudxawíín! Mbá péñu, guta̱a̱nla Joab dí ma̱ʼkha̱, nandoʼ matamíjná gajmuʼ”.
17 Ikhú Joab nikuʼmaminaʼ ga̱jma̱a̱ a̱ʼgu̱ nirajxu̱u̱: “Nindxa̱a̱ʼ Joab ráʼ.” Ikhaa niriʼñuu: “Aan, nindxu̱ʼ Joab”. Ikhú a̱ʼgu̱ niʼthúu̱n: “Atadxawíín dí naʼthí xa̱bia̱a̱ʼ”. “Madxawanʼ”, niʼthúu̱n.
18 A̱ʼgu̱ niʼthí xóó: “Nákha ginii nuthi má xúʼko̱, ‹Gura̱jxi̱ náa Abel, ikhú nambánuu›.
19 Ikhúún na̱tha̱ ga̱jma̱a̱ numún bi̱ nuni̱ marigá dí tsímáá ga̱jma̱a̱ bi̱ kúwá jmbu náa Israel. Ikháán nandaaʼ matani̱ gámbáa mbá xuajin dí nindxu̱u̱ xóo ru̱dúu̱* Israel. Náá numuu dí nandaaʼ matani̱ gámbáa xuajñuu* Jeobá rá.”
20 Joab niʼthúu̱n: “Nditháan xáʼkha̱ a̱jkiu̱nʼ ma̱ni̱ gámbáa.
21 Na̱nguá, raʼkháa rúʼko̱. Mbáa xa̱bu̱ bi̱ na̱ʼkha̱ náa kúbá Efraín bi̱ mbiʼyuu Seba a̱ʼdióo Bicrí nikujximínáʼ* náa inuu rey David. Á mu dí nuxnajxiúʼ xa̱bu̱ buʼko̱, maʼgáaʼ”. Ikhú a̱ʼgu̱ niʼthúu̱n Joab: “¡Mu̱da̱ʼxu edxu̱u̱ náa tsu̱du̱u̱ xtájtsí!”.
22 Mbá nacha̱ a̱ʼgu̱ bi̱ najmañuu bugi̱ ni̱jkha̱ gáʼtámíjná gajmíi̱n xa̱bu̱ xuajin, ikhiin nirujturígú edxu̱u̱ Seba a̱ʼdióo Bicrí ga̱jma̱a̱ nidaʼ náa Joab. Ikhú Joab nindiyuu chi̱ji̱ʼ ga̱jma̱a̱ xúgíinʼ xa̱bu̱ nigúun, mámbáa ni̱jkha̱a̱ náa goʼwóo. Joab nitanga̱a̱ náa Jerusalén náa xtáa rey.
23 Joab nindxu̱u̱ bi̱ naxná ikhúún xúgíinʼ soldado Israel, Benaya a̱ʼdióo Jehoiadá naxná ikhúún xa̱bu̱ keretitas ga̱jma̱a̱ peletitas.
24 Adoram naxná ikhúún bi̱ nuñajunʼ gakhi̱i̱, ga̱jma̱a̱ Jehosafat a̱ʼdióo Ahilud nindxu̱u̱ bi̱ naʼnirámáʼ dí naʼni rey.
25 Sevá nindxu̱u̱ secretario, Sadoc ga̱jma̱a̱ Abiatar nindxu̱ún ndxajkun.
26 Irá xa̱bu̱ jairita ma̱ngaa ni̱jkha̱nú ninindxu̱u̱ mbáa bi̱ ndiyá edxu̱u̱* bi̱ nixtáa náa David.
Mbaʼa nota
^ O mbáa “náa guʼwúún xtíin”.
^ O “náa naʼtáñajunʼ”.
^ O “tribu”.
^ O “nánée”.
^ Náa ajngáa hebreo naʼthí, “herencia”.
^ Náa ajngáa hebreo naʼthí, “nikujxi̱ ñawúunʼ”.
^ Náa ajngáa hebreo naʼthí, “ndxajkun”.
