Raga̱jma̱ libro rí niʼnirámáʼ Samuel 21:1-22
21 Nákhá mbiʼi rí nixtáa David nirígá mbá ewiʼ rí ndijyúuʼ ajtsú tsiguʼ. Ikha jngóo David nirajxu̱u̱ Jeobá ga̱jma̱a̱ Jeobá niriʼñuu: “Saúl gajmíi̱n bi̱ kúwá náa goʼwóo guáʼdáá aʼkhúún dí nixidíí eʼdi, numuu dí ikhaa nigudíin gabaonitas”.
2 (Gabaonitas na̱nguá ninindxu̱ún israelitas ikhiin ninindxu̱ún amorreos bi̱ xóó naguanún. Israelitas nixna ajngún dí xúradíin, mú Saúl ndiyáʼ xóo maʼnigámbíin, numuu dí nindoo mambáñún xa̱bu̱ xuajin Israel ga̱jma̱a̱ Judá). Ikha jngóo rey nindxaʼwún gabaonitas mu maʼtáminaʼ gajmíi̱n.
3 David niʼthúún gabaonitas: “Ndiéjunʼ gándoo gáni̱ ga̱jma̱a̱ numala, xú káʼnii gándoo gáni̱ numa̱a̱ʼla ga̱jma̱a̱ numuu rí nikiéʼkuxu̱, mu xúʼko̱ ikháanʼla mu̱ni̱ tsajkurámaaʼ xuajñuu* Jeobá rá.”
4 Gabaonitas niriʼñáán: “Ni má plata ni má oro xáʼngo̱o̱ gáʼni numa̱a̱ xúgíʼ dí niʼniuxu̱ Saúl gajmíi̱n bi̱ kúwá náa goʼwóo, ni má ikháanʼxu̱ xándoo muxíyáa nimbáa náa Israel”. Ikha jngóo rey David niʼthúún: “Gundo̱ʼo̱ʼ má dí gáʼndala, ikhúún ma̱ni̱”.
5 Ikhiin nitháán rey: “Xa̱bu̱ buʼko̱, niʼni gámbíin a̱ngiu̱xu̱ ga̱jma̱a̱ nigíʼ maʼni gámbíin mbá kayuuʼ náa Israel.
6 Ikha jngóo nanduxuʼ dí maraxniu̱xu̱ mbá juwiin e̱ji̱i̱n, mujngríguíinxu̱* náa inuu Jeobá náa Guibeá, xuajñuu Saúl, bi̱ Jeobá niraʼwíi”. Ikhú rey niʼthí: “Maxnajxiála”.
7 Mú rey nigáwíinʼ a̱jkiu̱u̱n kaʼyoo Mefibóset a̱ʼdióo Jonatán, a̱ʼdióo Saúl. Ga̱jma̱a̱ numuu rí David ga̱jma̱a̱ Jonatán a̱ʼdióo Saúl nixna ajngún náa inuu Jeobá.
8 Rey niríya̱a̱ʼ Armoní ga̱jma̱a̱ Mefibóset a̱jmi̱i̱n e̱ji̱i̱n Rizpá, wáxióo* Ayá, bi̱ nigiʼdiin ga̱jma̱a̱ Saúl, ga̱jma̱a̱ mbá witsiin e̱ji̱i̱n Mical* wáxióo Saúl bi̱ nigiʼdiin ga̱jma̱a̱ Adriel, a̱ʼdióo Barzilái xa̱bu̱ meholatita.
9 Ikhú nixnájxiu̱u̱n xa̱bu̱ gabaonitas, ga̱jma̱a̱ ikhiin nijngri̱guíin náa kúbá náa inuu Jeobá, mbóó nikháñún mbá juwiin. Niradíin nákhá nagi̱ʼdu̱u̱ naxtagijxi̱i̱ cebada.
10 Nda̱wa̱á, Rizpá wáxióo Ayá, ndiyá mbá xtíin mi̱du̱* ga̱jma̱a̱ nixtrámáʼ náa tsu̱du̱u̱ itsí, ikhí nigrigu asndu nákhá mbiʼi dí nagi̱ʼdu̱u̱ naxtagijxi̱i̱ dí najuiʼdu asndu índo̱ nixpátrígúu ruʼwa dí nirmajan xuñúúnʼ bi̱ jngríguíin. Tániñuuʼ dí ñu̱ʼu̱ bi̱ jngruigu̱u̱n rijma̱a̱ matrámiiʼ náa tsu̱du̱ún dí mbiʼi, ni má dí xujkhú xáná muxuʼmamijná dí mbruʼun.
11 Nitháán David dí niʼni a̱ʼgú ñawuun* Saúl, bi̱ mbiʼyuu Rizpá wáxióo Ayá.
12 Ikha jngóo David ni̱jkha̱ gáyaaʼ itsu̱u̱ Saúl ga̱jma̱a̱ Jonatán dí guáʼdáá xa̱bu̱ bi̱ kuya̱ edxu̱u̱* bi̱ kúwá náa xuajin Jabés-Galaad, bi̱ nini̱ kuʼwáʼ náa xuáá Bet-San náa filisteos nijngriguíin mbiʼi dí nixiyáa Saúl náa Guilboa.
13 Ikhaa ni̱ʼkha̱a̱ kagu̱u̱ itsu̱u̱ Saúl ga̱jma̱a̱ itsu̱u̱ a̱ʼdióo, Jonatán. Ma̱ngaa nirajxi̱i̱ i̱tsu̱ún xa̱bekha bi̱ nijngriguíin ikhí.
14 Ikhú nidu̱u̱ itsu̱u̱ Saúl ga̱jma̱a̱ a̱ʼdióo Jonatán náa ku̱bo̱o̱ʼ Benjamín náa Zelá náa nijnguáanʼ anu̱u̱* bi̱ mbiʼyuu Quis. Índo̱ niguámbúun nini̱ mbá xúgíʼ dí rey nikuʼmiin muni̱, Dios niʼdxawuun rí nitajkháan ga̱jma̱a̱ numuu xuajñún.
15 Mbu̱júu̱ má filisteos nixmijná gajmiún xa̱bu̱ Israel, ikha jngóo David nigajtaa gajmíi̱n xa̱bi̱i̱. Nixmijná gajmiún filisteos, mú ikhú nigi̱ʼdu̱u̱ niʼni néʼngo̱o̱.
16 Mbáa bi̱ na̱ʼkha̱ náa refaím bi̱ mbiʼyuu Isbí-Benob, gíʼdoo mbá kudú* dí cobre dí ki̱wu̱n 300 siclos,* ga̱jma̱a̱ mbá espada nuxi̱ʼ, nindoo maxíyáa David.
17 Mbá nacha̱ Abisái a̱ʼdióo Zeruyá, ni̱ʼkha̱ gáʼni kríya̱a̱ʼ, nixnúu filisteo ga̱jma̱a̱ nixíyáa. Ikhú xa̱bi̱i̱ David nitháán: “¡Naxágajnáaʼ ga̱jma̱á nindxu̱xu̱ náa muʼguá gúxmijná, numuu dí á mu nakháñaaʼ mani̱ndxu̱u̱ xóo majuiʼyuuʼ lámpara náa Israel!”.
18 Nda̱wa̱á, mbu̱júu̱ nitangiín nixmijná gajmiún filisteos náa Gob. Mbiʼi rúʼko̱ Sibecái xa̱bu̱ husatita nixíyáa Saf mbáa bi̱ na̱ʼkha̱ náa refaím.
19 Mbu̱júu̱ má nixmijná gajmiún filisteos náa Gob. Elhanán a̱ʼdióo Jaaré-Oreguim xa̱bu̱ betlemita, nixíyáa Goliat xa̱bu̱ guitita, bi̱ kayá kudú dí nindxu̱u̱ xóo xi̱gu̱ dí najmún bi̱ nuxmí.
20 Mbu̱júu̱ má nixmijná. Nixmijná náa Gat náa xtáa mbáa xa̱bu̱ bi̱ ra̱ʼkhá tháán mba̱yi̱i̱ʼ, bi̱ majun e̱ji̱i̱n ñawúunʼ ga̱jma̱a̱ majun e̱ji̱i̱n rajkhúu, mbá 24 dí mbá xúgíʼ. Xa̱bu̱ bigi̱ ma̱ngaa na̱ʼkha̱ náa refaím.
21 Numuu dí tséniñuuʼ ratsíjmiin xa̱bu̱ Israel, ikha jngóo Jonatán a̱ʼdióo Simeí ndxájuu David nixíyáa.
22 Mbá nájkui̱i̱n xa̱bu̱ bigi̱ naguwáʼ náa refaím bi̱ kúwá náa Gat, nikháñún náa ñawúunʼ David gajmíi̱n xa̱bi̱i̱.
Mbaʼa nota
^ Náa ajngáa hebreo naʼthí, “herencia”.
^ Náa ajngáa hebreo naʼthí, “mujngríguíin mbuñún. Xóo muʼthá, ga̱jma̱a̱ ñawúúnʼ ma̱ngaa xtiñún nijmigaʼ”.
^ O “a̱ʼdée dxáʼgú”.
^ O mbáa “Merab”.
^ O “mbáa xa̱bu̱ bi̱ mbañúúnʼ ikhí”.
^ O “tátée”.
^ O “lanza”.
