Raga̱jma̱ libro rí niʼnirámáʼ Samuel 22:1-51
22 David niʼni ajmúú rígi̱ náa inuu Jeobá, mbiʼi dí Jeobá niʼni kríya̱a̱ʼ náa ñawúúnʼ xúgíinʼ xa̱bu̱ sia̱nʼ ndrígio̱o̱ ga̱jma̱a̱ náa Saúl.
2 Niʼthí:
“Jeobá nindxu̱u̱ tsíñu ndrígóʼ, xóo mbá xuajin dí kúgumaʼá, bi̱ naʼni kríñu̱u̱nʼ.
3 Dios ndrígóʼ nindxu̱u̱ tsíñu, náa ma̱ndoo mambáyuminaʼ,escudo ndrígóʼ, bi̱ gíʼdoo tsiaki̱i̱ maʼni kríñu̱u̱nʼ,* náa nda̱a̱ gamíi mambáyuminaʼ,náa magayútoʼoʼ, naʼni kríñu̱u̱nʼ, ikháán natani̱ kríñu̱u̱nʼ náa dí ra̱májánʼ.
4 Ikhúún nandxa̱ʼo̱o̱ Jeobá, bi̱ kaʼyoo magruigú gamajkhu,ikhaa maʼni kríñu̱u̱nʼ náa xa̱bu̱ sia̱nʼ.
5 Dí nakháñún rígá mbájndi náa ikhúún, rí nindxu̱u̱ xóo lamáa* dí nambajxu̱u̱ dí gíʼdoo tsiaki̱i̱,dí nuni̱ xa̱bu̱ bi̱ raguáʼdáá numún naʼnimíñúʼ, bi̱ nindxu̱ún xóo ñambo̱o̱.
6 Ñuñuu Iñá wajinʼ* naxtambrúʼún,ga̱jma̱a̱ tsáʼkhá dí nakháñún naguájun náa inuʼ mu munimiñúʼ.
7 Índo̱ nixtáá ngíná nindxa̱ʼo̱o̱ Jeobá,nindxa̱ʼo̱o̱ má xúʼko̱ Dios ndrígóʼ.
Ikhú asndu náa goʼwóo dí mitsúʼkháan niʼdxaun aʼwóʼ,dí nindxa̱ʼwa̱ská mu mambáyuʼ ni̱jkha̱nú náa cháʼwuun.
8 Ku̱ba̱ʼ nigíʼdúu niʼba̱a̱n ga̱jma̱a̱ niʼbajngaa,niʼxma náa gíʼ mekhu,niʼbajngañiin numuu dí ikhaa nikásngañu̱u̱ʼ.
9 Náa rakhóo nagájnuu gúníga̱jma̱a̱ náa rawuunʼ nagájnuu aguʼ dí natsiká,asndu gíʼdoo agiuuʼ chámbuʼ egájnuu náa ikhaa.
10 Ikhaa niʼni dí mekhu maginduti̱ga̱ índo̱ nigajtaa,ga̱jma̱a̱ asndu skuniʼ du̱u̱n tri̱ga̱ náa rajkhúu.
11 Nikujmaa náa tsu̱du̱u̱ mbáa ángel, nigajtaa ragáyúu
ga̱jma̱a̱ grígu ni̱ʼkha̱ náa tsu̱du̱u̱ querubín.
12 Ikhú nigíʼ mbá guʼwá xtíin, dí nirúgoo ga̱jma̱a̱ kríná,ma̱ngaa du̱u̱n skuniʼ dí mi̱du̱ dí gíʼdoo iyaʼ.
13 Dí naxpíbiʼ náa ikhaa ningujuíi chámbuʼ dí gíʼdoo agiuuʼ.
14 Ikhú Jeobá niʼni dí majmidá asndu mekhuíí,bi̱ phú mba̱a̱ niʼni dí mawán aʼwóo.
15 Nidaʼ flechas dí kagu̱ ga̱jma̱a̱ niʼni dí majuidáriʼiin,rúʼko̱ niʼni dí mamiñún ga̱jma̱a̱ xúyáá dí muni̱.
16 Dí itháan mi̱jnu̱ʼ lamáa nikujmaa,náa gíʼ ku̱ba̱ʼ nimbaʼtatiga̱a̱ ga̱jma̱a̱ numuu dí Jeobá nindxaʼwájmaa,ma̱ngaa dí nandiyuuʼ rakhóo.
17 Ikhaa nikrui̱ya̱ʼ ñawúunʼ asndu mitsídánʼ,niguajtuwún ga̱jma̱a̱ niríñu̱u̱nʼ náa iyaʼ dí mi̱jnu̱ʼ.
18 Niʼni kríñu̱u̱nʼ náa xa̱bu̱ sia̱nʼ ndrígóʼ bi̱ itháan xkujiiʼ,náa bi̱ nawiñu̱u̱nʼ kuyoʼ, bi̱ itháan xkujiinʼ ki xóo ikhúún.
19 Ikhiin nini̱ ngínún mbiʼi dí xtáá ramínúuʼ,mú Jeobá nimbáyúʼ.
20 Ni̱jkha̱a̱ kañún náa gáʼchú,niʼni kríñu̱u̱nʼ, numuu dí nadxuu kaʼyoʼ.
21 Jeobá naʼni numa̱a̱ʼ xó má májánʼ e̱ni̱,naʼni numa̱a̱ʼ, numuu dí kaʼwu ñawúnʼ.
22 Numuu dí na̱jkhá má xúʼko̱ náa kambo̱o̱ Jeobága̱jma̱a̱ na̱nguá ni̱ni̱ mbá dí ra̱májánʼ dí maniʼñúuʼ Dios ndrígóʼ.
23 Magiwa̱nʼ má xúʼko̱ a̱jkiu̱nʼ xtángoo ndrígóo,ga̱jma̱a̱ manimbánuu kiʼtáñajunʼ ndrígóo.
24 Mani̱ndxu̱ʼ má xúʼko̱ xa̱bu̱ májáanʼ náa ikhaa,mañewumínáʼ mu xáni̱ nimbá dí ra̱májánʼ.
25 Jeobá gáʼni numa̱a̱ʼ xó má dí májánʼ e̱ni̱,xó má dí kaʼwún náa inuu ikhaa.
26 Bi̱ tséniñaaʼ, tsétatsíñáánʼ má mangáán,xa̱bu̱* bi̱ naʼni dí májánʼ, natani̱i̱ dí májánʼ,
27 ikháán natani̱ tsajkurámáanʼ bi̱ nindxu̱u̱ kaʼwii,mú bi̱ nduwaaʼ, natani̱ nduwaaʼ.*
28 Numuu dí natani̱ káwíin xa̱bu̱ guabiinʼ,mú tsíyaaʼ gátañu̱u̱n bi̱ nuni̱ mbaʼumíjna̱, ga̱jma̱a̱ natani̱ majti̱i̱nʼ.
29 Numuu dí ikháán Jeobá nindxa̱a̱ʼ xóo lámpara ndrígóʼ,Jeobá naʼni dí mambiʼi náa kríná.
30 Á mu dí natambáyúʼ maʼngo̱ʼ ma̱ni̱ gajmíʼ kuʼwáʼ,ga̱jma̱a̱ tsiaki̱i̱ ndrígóo Dios, maʼngo̱ʼ matsimuʼ náa xtájtsí.
31 Xúgíʼ dí naʼni Dios bi̱ gajkhun nindxu̱u̱ májánʼ,ajngóo Jeobá nindxu̱u̱ kaʼwu.
Ikhaa nindxu̱u̱ xóo mbá escudo náa mbá xúgíinʼ bi̱ numbayúmíjná náa ikhaa.
32 Tsáá i̱mba̱a̱ Dios xóo Jeobá rá.
Tsáá i̱mba̱a̱ xóo Dios ndrígúlú, bi̱ nindxu̱u̱ xóo mbá tsíñu rá.
33 Dios bi̱ gajkhun nindxu̱u̱ náa mambáyuminaʼ,ikhaa maʼni jmbi̱i̱ kambo̱ʼ.
34 Ikhaa naʼni dí rajkúʼ mani̱ndxu̱u̱ xóo rajkhúu aña̱ʼ,naʼni dí magújun gújkhúʼ náa mitsídánʼ.
35 Ikhaa naʼniratún mu maxmína̱ʼ,ñawúnʼ maʼngo̱o̱ markumi̱i̱ xkamídá dí cobre.
36 Ikháán naraxnúʼ escudo ndrígáaʼ mu maʼni kríñu̱u̱nʼ,dí natani̱ guabaminaʼ naʼni dí magúʼdoo numuʼ.
37 Natani̱ dí maʼni ma̱ja̱nʼ kamba̱a̱ náa najngríga̱,rajkúʼ xáxkanundiuuʼ.
38 Maʼgá raxkhúún xa̱bu̱ sia̱nʼ ndrígóʼ, ga̱jma̱a̱ ma̱ni̱ gámbíin,xátangu̱ún asndu índo̱ gámbóʼ ragúdíin.
39 Ma̱ni̱ mbátígi̱i̱n ga̱jma̱a̱ majnguprígi̱i̱n mu ní xáguájxu̱u̱n,majnguti̱gi̱i̱n náa rajkúʼ.
40 Ikháán maraxnu̱ʼ tsiaki̱i̱ mu maxmína̱ʼ,matani̱ dí xa̱bu̱ sia̱nʼ masmbri̱gi̱i̱n náa inuʼ.
41 Matani̱ dí xa̱bu̱ sia̱nʼ mangujuíin ragáñúún mu maʼgá ragúdíin,ma̱ni̱ gámbíin bi̱ nawiñu̱u̱nʼ kuyoʼ.
42 Ikhiin mundxa̱ʼwa̱ská dí mumbañún, mú ndawa̱a̱ nimbáa bi̱ maʼni káwíin,asndu nutháán Jeobá, mú ikhaa tsériʼñún.
43 Makumíguiin asndu maʼni nandaʼ xóo yujndaʼ,ma̱ni̱ dí maguanúu i̱ndó idiúnʼ ga̱jma̱a̱ majnguprígi̱i̱n xóo ku̱ba̱ʼ xngaʼchaʼ náa kamba̱a̱.
44 Ikháán matani̱ kríñu̱u̱nʼ náa dí nuta numuʼ xa̱bu̱ xuajñunʼ.
Matie̱wu̱nʼ mu xúʼko̱ mbaya̱ edxu̱u̱ náa mbaʼa xuajin,mbá xuajin dí tséniʼnúuʼ maʼni ñajunʼ.
45 Maguwáʼ ruxmajtamijná xa̱bu̱ bi̱ naguwaáʼ náa inuʼ,dí gúdxawíín ga̱jma̱a̱ numuʼ maʼni dí munimbu̱ún kuyoʼ.
46 Xa̱bu̱ naguwaáʼ mamiñún,magajnún náa xuajñún dí kúgumaʼá, asndu naguíʼiin gáguwáʼ.
47 ¡Jeobá ndaʼya! ¡Gagruigú gamajkhu tsíñu ndrígóʼ!
¡Gaguma mba̱a̱ Dios ndrígóʼ, tsíñu náa dí na̱ni̱ kríyamínáʼ!
48 Dios bi̱ gajkhun naʼni numi̱ín xa̱bu̱ sia̱nʼ ndrígóʼ,nagrui̱ga̱ mbaʼa xuajin mu matañájuunʼ,
49 natani̱ kríñu̱u̱nʼ náa xa̱bu̱ sia̱nʼ ndrígóʼ.
Ikháán nataxújxu̱u̱n tsídánʼ náa bi̱ nuni̱ ngínún,ikháán natani̱ kríñu̱u̱nʼ náa xa̱bu̱ bi̱ najmangu̱u̱ʼ.
50 Ikha jngóo, Jeobá maxna̱a̱ʼ núma̱a̱ʼ náa majñuuʼ mbaʼa xuajin,madu̱u̱ ga̱jma̱a̱ ma̱ni̱ ajmúú náa mbiʼyaaʼ:
51 Ikhaa naʼni dí mitsaanʼ* mu maʼni kríya̱a̱ʼ rey ndrígóo,nasngájmuu dí nandoo kaʼyoo* bi̱ niraʼwíi,náa David ma̱ngaa bi̱ naguwáʼ náa ikhaa asndu kámuu”.
Mbaʼa nota
^ O “mar”.
^ Náa ajngáa hebreo naʼthí, “xa̱bu̱ xkujiiʼ”.
^ O mbáa “natani̱ xóo eʼni mbáa xa̱bu̱ skágu̱nʼ”.
^ O “nagui̱i̱”.
