Raga̱jma̱ libro rí niʼnirámáʼ Samuel 23:1-39
23 Rígi̱ ninindxu̱u̱ iwáá ajngáa ndrígóo David:
“Ajngóo David a̱ʼdióo Jesé,ajngóo xa̱bu̱ bi̱ niguma mba̱a̱,bi̱ niraʼwíi Dios ndrígóo Jacob,bi̱ niʼni ajmúú mitsaanʼ* ga̱jma̱a̱ numuu Israel.
2 Espíritu ndrígóo Jeobá nixnuʼ ikha mu ma̱ta̱,ajngóo nirígá náa ra̱ju̱nʼ.
3 Dios ndrígóo Israel niʼthí,tsíñu ndrígóo Israel niʼthúnʼ:
‹Índo̱ bi̱ naʼtáñajúúnʼ xa̱bu̱ numbaaʼ nindxu̱u̱ májáanʼma̱ngaa naʼtáñajunʼ ga̱jma̱a̱ gamíi ndrígóo Dios,
4 rí naʼtáñajunʼ nindxu̱u̱ xóo aguʼ rí nambiʼi miʼcha̱,índo̱ nagájnuu a̱jkha̱ʼ, xóo mbá miʼcha̱ índo̱ nda̱a̱ du̱u̱n.
Xóo índo̱ nagri̱ya̱a̱ʼ a̱jkha̱ʼ índo̱ natujxi̱i̱ ruʼwadí naʼni makraʼáan iná náa ku̱ba̱ʼ›.
5 Lá raʼkháa xúʼko̱ nindxu̱u̱ goʼwóʼ náa inuu Dios ráʼ.
Numuu rí nimbánuʼ ga̱jmu̱ʼ ndajyúuʼ asndu kámuu,rí naʼthí kuduun ga̱jma̱a̱ dí gajkhun maʼga̱nú mambanúu.
Dí nimbánuʼ ga̱jmu̱ʼ rígi̱ nandoo gáʼthúu̱n dí makríñu̱u̱n mbájkhu ga̱jma̱a̱ mbá xúgíʼ rí nanigu̱ʼ,lá raʼkháa numuu rúʼko̱ jngóo dí ikhaa naʼni mba̱ja̱a̱ xáʼ.
6 Mú xa̱bu̱ bi̱ tsíñún gúñún nuxidíin xóo mbá xtáʼdu̱u̱ iná tsuwanʼ,rí xándoo marajtun ga̱jma̱a̱ ñawáanʼ.
7 Mu mbáa xa̱bu̱ ma̱ndoo magugua,mbaʼyóoʼ rí magíʼ ajua̱nʼ dí hierro ga̱jma̱a̱ majmuu mbá ixu̱u̱ kudú,*ma̱ngaa gíʼmaa matsikáa mbá xúgíʼ ga̱jma̱a̱ aguʼ náa gíʼ”.
8 Xígi̱ kaʼnii mbiʼñún soldado xkujiinʼ bi̱ gíʼdiin David: Joseb-Basébet, mbáa tahkemonita, bi̱ kayá edxu̱u̱ náa mbá ajtsíin. Mbá miʼtsú nigudíin mbá 800 xa̱bekha ga̱jma̱a̱ mbá kudú.
9 Nda̱wa̱á dí ikhaa na̱jkha̱ Eleazar a̱ʼdióo Dodó, a̱ʼdióo Ahohí. Ma̱ngaa nindxu̱u̱ mbáa bi̱ ajtsíin soldado bi̱ mixkujiinʼ bi̱ nixtáa ga̱jma̱a̱ David índo̱ nitsijmiin filisteos. Filisteos nigimbíin ikhí mu muxmijná gajmiún, índo̱ xa̱bu̱ Israel nigúun,
10 ikhaa niwi̱ji̱ má náa kaʼyoo ga̱jma̱a̱ nigudíin filisteos asndu índo̱ nigaaʼ ñawúunʼ ga̱jma̱a̱ niʼni jxa̱ʼ ñawúunʼ dí kuajtuun ga̱jma̱a̱ espada. Jeobá niʼni dí maʼngu̱u̱n* mbiʼi rúʼko̱, ga̱jma̱a̱ soldado bi̱ nagún kidxuuʼ, nagún rurajxi̱i̱ dí gíʼdoo numuu dí kuda bi̱ nikháñún.
11 Nda̱wa̱á dí ikhaa na̱jkha̱ Samá a̱ʼdióo Agué xa̱bu̱ hararita. Índo̱ filisteos nigimbíin náa Lehí, náa rígá mbá mbaaʼ náa kiʼdu lentejas, soldado israelitas nigáñún nini̱ filisteos.
12 Mú ikhaa niwi̱ji̱ má xúʼko̱ náa ta̱pho̱o̱ mbaaʼ, ikhaa nimbáyúu ga̱jma̱a̱ nigudíin filisteos, xúʼko̱ niʼni dí maʼngo̱o̱ Jeobá.
13 Náa mbá 30 bi̱ kuya̱ edxu̱u̱, mbá ajtsíin niguájtaan gúyáá David náa tsíñu dí rígá náa Adulam, mbiʼi dí nagijxi̱i̱ dí nudu. Mbá grupo soldado filisteos gíwi̱i̱nʼ náa mata* Refaím.
14 David xtáa rambáyuminaʼ ikhí ga̱jma̱a̱ mbá grupo soldado filisteos kúwá náa Belén.
15 Ikhú David niʼthí rígi̱: “¡Á mu xúʼko̱ gága̱nʼ mbá chíʼgíiʼ* iyaʼ dí ga̱jnu̱ʼ náa puzu* dí rígá náa mijngii xkrugoo Belén jnu rá!”.
16 Ikhú mbá ajtsíin soldado mixkujiinʼ nitu̱ʼu̱u̱n ga̱jma̱a̱ tsiaki̱i̱ náa gíi̱nʼ filisteos, niri̱ya̱ʼ iyaʼ náa puzu dí rígá náa mijngii xkrugoo xuajin Belén, ga̱jma̱a̱ nigúun kuñu̱u̱n náa David mu maga̱a̱n. Mú ikhaa tándoo gágáan ga̱jma̱a̱ nixídiri̱ga̱ náa inuu Jeobá.
17 Niʼthí: “¡Tátá Jeobá, nditháan xáni̱ rígi̱! Xú káʼnii lá gándoo gágánʼ eʼdiún xa̱bu̱ bugi̱ bi̱ nigún ga̱jma̱a̱ rí asndu migamíi makhañún rá.” Ikha jngóo nditháan tándoo gágáan. Rígi̱ nindxu̱u̱ dí nini̱ bi̱ mbá ajtsíin soldádiu̱u̱ bi̱ xkujiinʼ.
18 Abisái ndxájuu Joab a̱ʼdióo Zeruyá, ninindxu̱u̱ bi̱ ndiyá edxu̱u̱ náa bi̱ mbá ajtsíin. Ikhaa nigudíin mbá 300 soldado ga̱jma̱a̱ kudú, ma̱ngaa nijmaʼniiʼ xó má eʼwíinʼ bi̱ i̱mbá gijtsi̱i̱n.
19 Náa bi̱ mbá ajtsíin bugi̱, ikhaa nindxu̱u̱ bi̱ najmaʼniiʼ itháán ga̱jma̱a̱ bi̱ ndiyá edxu̱u̱, mú na̱nguá ni̱jkha̱nú ninindxu̱u̱ xóo bi̱ mbá ajtsíin bi̱ ginii.
20 Benaya a̱ʼdióo Jehoiadá ninindxu̱u̱ mbáa xa̱bu̱ bi̱ támiñuu* ga̱jma̱a̱ niʼni mbaʼa rí gakhi̱i̱ náa Cabzeel. Nigudíin a̱jmi̱i̱n e̱ji̱i̱n Ariel náa Moab, ga̱jma̱a̱ mbá mbiʼi índo̱ nagajtaa idiʼ nijngúun náa mbá puzu ga̱jma̱a̱ ikhí nixíyáa mbáa león.
21 Ma̱ngaa nixíyáa mbáa xa̱bu̱ egipcio bi̱ ra̱ʼkhá tháán mba̱yi̱i̱ʼ. Ikhaa i̱ndó mbá ixi̱ kayá, mú xa̱bu̱ egipcio kayá mbá kudú. Maski ajndu xúʼko̱ nixmínaʼ ga̱jma̱a̱ xa̱bu̱ egipcio, niríya kaʼyuuʼ kudú ndrígóo ga̱jma̱a̱ rúʼko̱ má nixíyáa ga̱jma̱a̱.
22 Rígi̱ ninindxu̱u̱ dí niʼni Benaya a̱ʼdióo Jehoiadá, rí nijmaʼniiʼ ninindxu̱u̱ ikháá má xóo nijmaʼniúnʼ mbá ajtsíin soldado bi̱ mixkujiinʼ.
23 Ikhaa nijmaʼniiʼ itháán ki xóo bi̱ mbá 30, mú na̱nguá ni̱jkha̱nú ninindxu̱u̱ xóo bi̱ mbá ajtsíin soldado. Maski ajndu xúʼko̱ David nigíiʼ mu mayéʼga edxu̱u̱ náa bi̱ nuñewa̱a̱n.
24 Bugi̱ nindxu̱ún tikhuun bi̱ mbá 30 soldado: Asahel, giʼtio̱o̱ Joab, ikháá má xóo Elhanán a̱ʼdióo Dodó xa̱bu̱ Belén,
25 Samá xa̱bu̱ harodita, Elicá xa̱bu̱ harodita,
26 Hélez xa̱bu̱ paltita, Irá a̱ʼdióo Iqués xa̱bu̱ tecoíta,
27 Abí-Ézer xa̱bu̱ anatotita, Mebunái xa̱bu̱ husatita,
28 Zalmón xa̱bu̱ ahohíta, Maharái xa̱bu̱ netofatita,
29 Héleb a̱ʼdióo Baaná xa̱bu̱ netofatita, Ittái a̱ʼdióo Ribái xa̱bu̱ Guibeá bi̱ na̱ʼkha̱ náa benjaminitas,
30 Benaya xa̱bu̱ piratonita, Hidái bi̱ na̱ʼkha̱ náa mata dí mbiʼyuu Gaas,
31 Abí-Albón xa̱bu̱ arbatita, Azmávet xa̱bu̱ bar-humita,
32 Eliahbá xa̱bu̱ saalbonita, e̱ji̱i̱n Jasén, Jonatán,
33 Samá xa̱bu̱ hararita, Ahiam a̱ʼdióo Sarar xa̱bu̱ hararita,
34 Elifélet a̱ʼdióo Ahasbái, a̱ʼdióo maacatita, Eliam a̱ʼdióo Ahitofel xa̱bu̱ guilonita,
35 Hezró xa̱bu̱ carmelita, Paarái xa̱bu̱ arbita,
36 Igal a̱ʼdióo Natán bi̱ na̱ʼkha̱ náa Zobá, Baní xa̱bu̱ gadita,
37 Zélec xa̱bu̱ ammonita, Naharái xa̱bu̱ beerotita, bi̱ kayá escudo ndrígóo Joab a̱ʼdióo Zeruyá,
38 Irá xa̱bu̱ itrita, Gareb xa̱bu̱ itrita
39 ga̱jma̱a̱ Urías xa̱bu̱ hitita, rí mbá xúgíinʼ ninindxu̱ún mbá 37.
Mbaʼa nota
^ O “nagui̱i̱”.
^ O “lanza”.
^ O “niʼni káwíin”.
^ O “bóo”.
^ O “lajuíin”.
^ Náa ajngáa hebreo naʼthí, “a̱ʼdióo mbáa xa̱bu̱ bi̱ tsémíñuuʼ”.
