Raga̱jma̱ libro rí niʼnirámáʼ Samuel 24:1-25
24 Jeobá nitanga̱a̱ nikásnga̱ñu̱u̱nʼ kaʼñún israelitas índo̱ mbáa niʼni dí David maʼñún dí raʼkhí xa̱bu̱ Israel, índo̱ niʼthúu̱n: “Atani̱ mbá censo náa Israel ga̱jma̱a̱ náa Judá”.
2 Ikha jngóo rey niʼthúu̱n Joab, bi̱ naʼtáñajúúnʼ soldado bi̱ xtáa ikhí: “Mbá péñu,* ayuʼ náa mbá xúgíʼ xuajin majkhaʼ* dí rígá náa Israel. Atagíʼdi̱i̱ náa Dan asndu náa Beer-Seba, ga̱jma̱a̱ ataniraʼmáʼ mbiʼñún xa̱bu̱ xuajin, mu mba̱yo̱o̱ nguáthi̱i̱n xa̱bu̱ kúwá”.
3 Mú Joab niʼthúu̱n rey: “Jeobá Dios ndrígáaʼ gáʼni dí xa̱bu̱ xuajin maʼni mbá 100 nuthu itháan mbaʼin, ga̱jma̱a̱ dí tátioʼ rey gáʼyoo ga̱jma̱a̱ iduu. Mú ndíjkha dí tátioʼ rey nandoo gáʼni mbá dí xígi̱ kaʼnii rá.”
4 Mú dí niʼthí rey niʼngo̱o̱ itháan ki xóo dí niʼthí Joab gajmíi̱n bi̱ nutañajúúnʼ soldado. Ikha jngóo Joab gajmíi̱n bi̱ nutañajúúnʼ soldado nigájnún náa xtáa rey mu magún gúndra̱ma̱ʼ mbiʼñún xa̱bu̱ Israel.
5 Nikidiin náa mañu Jordán ga̱jma̱a̱ nigi̱ʼi̱i̱n náa Aroer, xuajin dí rígá náa ta̱pho̱o̱ mata* dí naguanúu náa ñawún májánʼ,* ga̱jma̱a̱ nigún náa jmbuu ku̱bu̱únʼ gaditas, nda̱wa̱á náa Jazer.
6 Nda̱wa̱á nigún náa Galaad ga̱jma̱a̱ náa ku̱ba̱ʼ Tahtim-Hodsí, ikhú nigún asndu náa Dan-Jaán ga̱jma̱a̱ nitangiín xígií náa Sidón.
7 Ikhú nigún náa xuajin dí kúgumaʼá náa Tiro ga̱jma̱a̱ náa mbá xúgíʼ xuajñún heveos, cananeos ga̱jma̱a̱ nda̱wa̱á kayuuʼ nigún náa Négueb dí rígá náa Judá, náa Beer-Seba.
8 Xúʼko̱ kaʼnii nigún ranújngún náa xúgíʼ xuajin ga̱jma̱a̱ niguánú náa Jerusalén índo̱ niʼni mijna gu̱wa̱ʼ igu̱nʼ ga̱jma̱a̱ 20 mbiʼi.
9 Ikhú Joab nixnúu rey náa nigumarámáʼ mbiʼñún, náa Israel kúwá mbá 800,000 soldado bi̱ najmañún nuxmijná,* ga̱jma̱a̱ náa Judá kúwá mbá 500,000.
10 Mú, nda̱wa̱á dí niguámbóo niguxniin xa̱bu̱ xuajin, David ra̱ʼkhá tháán niʼni gawúunʼ ku̱ma̱ ndrígóo ga̱jma̱a̱ niʼthúu̱n Jeobá: “Nikiéʼkhúnʼ dí xígi̱ kaʼnii ni̱ni̱. Dí xúgi̱, mbá péñu Jeobá. Atani̱ mba̱a̱ a̱jkia̱a̱nʼ dí nikiéʼkúun xa̱bia̱a̱ʼ, ni̱ni̱ xóo mbáa xa̱bu̱ skágunʼ”.
11 Índo̱ David nitujxi̱i̱ miʼcha̱, profeta* Gad xa̱bu̱ bi̱ ndaʼyoo rí nawasngájmáá* nigruigú ajngóo Jeobá rígi̱:
12 “Ayuʼ gáratha̱a̱n David: ‹Rígi̱ dí naʼthí Jeobá: “Rígá mbá ajtsú dí ma̱ndoo matraʼwi̱i̱. Atraʼwíí náá guaʼyaa má gáʼndaaʼ ikháán dí magumán”›”.
13 Ikha jngóo Gad ni̱jkha̱ gáʼyoo David ga̱jma̱a̱ niʼthúu̱n: “Ndiéjunʼ dí gáʼndaaʼ, juwan tsiguʼ dí marigá ewiʼ náa mbá xúgíʼ Israel, ajtsú igu̱nʼ dí majngruiga̱a̱ʼ ratagáyaaʼ gúni̱ xa̱bu̱ sia̱nʼ, o ajtsú mbiʼi dí marigá nandii dxe̱ʼ. Atatsaʼwáminaʼ májánʼ ga̱jma̱a̱ arathúnʼ ndiéjunʼ gáthúu̱n bi̱ nikuʼmún ma̱ʼkhá”.
14 David niriʼñuu Gad: “Gakhi̱i̱ rígi̱ e̱yo̱o̱ ikhúún. Itháan má nandoʼ dí mumíniiʼxu̱ náa ñawúunʼ Jeobá, numuu dí nagáwíinʼ a̱jkiu̱u̱n. Mú tsíyóʼ dí mumíniiʼxu̱ náa ñawúunʼ mbáa xa̱bu̱ú”.
15 Ikhú Jeobá nikuʼma mbá nandii náa Israel, nigi̱ʼdu̱u̱ miʼcha̱ asndu índo̱ nirámuuʼ mbiʼi ga̱jma̱a̱ nikháñún mbá 70,000 xa̱bu̱ bi̱ kúwá náa Dan asndu náa Beer-Seba.
16 Índo̱ ángel nikrui̱ya̱ʼ ñawúunʼ xígií náa Jerusalén mu maʼni gámbáa, Jeobá nigáwíinʼ a̱jkiu̱u̱n dí nakuʼma gamiéjunʼ rúʼko̱, ikhú niʼthúu̱n ángel bi̱ xtáa raʼni gámbóo xuajin: “¡Ikhí rá! Ataxruígúu ñawáanʼ”. Ángel ndrígióo Jeobá wíji̱ náa mijngii mbayuuʼ Arauna xa̱bu̱ jebuseo.
17 Índo̱ David ndiʼyoo ángel bi̱ xtáa raʼni gawúúnʼ xa̱bu̱ xuajin, niʼthúu̱n Jeobá: “Ikhúún nikuʼdáminaʼ aʼkhá, ikhúún nikiéʼkhúnʼ, dí lá nini̱ mugu̱ bigi̱ rá. Mbá péñu, atani̱ dí ñawáanʼ maʼni mamínuuʼ ikhúún ga̱jma̱a̱ bi̱ kúwá náa goʼwóo anu̱ʼ”.*
18 Ikha jngóo mbiʼi rúʼko̱ Gad ni̱jkha̱ gáʼyoo David ga̱jma̱a̱ niʼthúu̱n: “Atatsimaaʼ ga̱jma̱a̱ atani̱ mbá náa mikarámáʼ tsigijñaʼ náa inuu Jeobá, náa mbayuuʼ Arauna xa̱bu̱ jebuseo”.
19 Ikhú David nitsimuu xó má Gad niʼthúu̱n ga̱jma̱a̱ xó má niʼtáñajuunʼ Jeobá maʼni.
20 Índo̱ Arauna nijngutigú kawáá, ndiʼyoo dí na̱ʼkha̱ rey gajmíi̱n xa̱bi̱i̱. Mbá nacha̱ nigájnuu náa mbayuuʼ ga̱jma̱a̱ nigiʼnduti̱ga̱* asndu mbayííʼ náa inuu rey.
21 Arauna nirajxu̱u̱: “Ndíjkha e̱ʼkha̱ tátioʼ rey gáʼyoo xa̱bi̱i̱ rá.” David niʼthúu̱n: “Na̱ʼkhá gáyóo ma̱tsi̱ mbayaaʼ mu ma̱ni̱ ikhí mbá náa mikarámáʼ tsigijñaʼ náa inuu Jeobá. Mu xúʼko̱ mawi̱ji̱i̱ dí naʼni numíniiʼ xa̱bu̱ xuajin”.
22 Mú Arauna niʼthúu̱n David: “Gawanuu má ga̱jma̱a̱ mbaaʼ, tátioʼ rey ga̱jma̱a̱ gaxnájxi̱ ndiéjunʼ má gáʼndoo ikhaa.* Gi̱i̱ kúwá xedi̱ mu maraxnajxíin xóo tsigijñaʼ dí nakarámáʼ ga̱jma̱a̱ xajpha náa najui̱ʼnu̱ tsígáʼ ga̱jma̱a̱ yoko rí nuda xedi̱ gajmaaʼ mu matatsikha̱.
23 Ikhúún naxna̱a̱ʼ* xúgíʼ rígi̱ tátá rey”. Ga̱jma̱a̱ niʼthúu̱n xóó: “Jeobá gáʼni tsajkurámáánʼ”.
24 Mú rey niʼthúu̱n Arauna: “Na̱nguá, ikhúún ma̱tsi̱, xáxnajxí náa inuu Jeobá Dios ndrígóʼ mbá tsigijñaʼ dí nakarámáʼ dí na̱nguá ni̱tsi̱”. Ikha jngóo David ni̱ʼtsi̱ mbayuuʼ ga̱jma̱a̱ xedi̱, nixnúu mbá 50 siclos* plata.
25 Ikhú David niʼni mbá náa mikarámáʼ tsigijñaʼ náa inuu Jeobá. Ma̱ngaa nixnájxi̱ tsigijñaʼ dí nakarámáʼ ga̱jma̱a̱ tsigijñaʼ dí tsímáá.* Ikhú Jeobá niʼdxawuun dí nitajkháan ga̱jma̱a̱ numuu xuajin ga̱jma̱a̱ niwi̱ji̱i̱ dí numíniiʼ xa̱bu̱ Israel.
Mbaʼa nota
^ O “ataniu̱ʼ mbá rí májánʼ”.
^ O “tribu”.
^ O “bóo”.
^ O “náa sur”.
^ O “bi̱ najmiin nurajtun espada”.
^ O “gaʼyee, bi̱ naʼthí dí marigá”.
^ O “visión”.
^ O “táteʼ”.
^ O “nixngutigamínáʼ”.
^ Náa ajngáa hebreo naʼthí, “dí májánʼ má gáʼyoo iduu”.
^ Náa ajngáa hebreo naʼthí, “Arauna naxná”.
