Raga̱jma̱ libro rí niʼnirámáʼ Samuel 3:1-39
3 Dí nuxmijná bi̱ kúwá náa goʼwóo Saúl gajmiún bi̱ kúwá náa goʼwóo David ndijyúuʼ mba̱yu̱u̱ʼ. Índo̱ David ni̱jkha̱ ragiʼdoo itháan tsiaki̱i̱, bi̱ kúwá náa goʼwóo Saúl ni̱jkha̱ raʼni itháan guabiinʼ.
2 Nákha mbiʼi rúʼko̱, David nigiʼdiin e̱ji̱i̱n náa Hebrón. A̱ʼdióo bi̱ giʼnii nigumbiʼyuu Amnón, a̱ʼdióo Ahinoam a̱ʼgú Jezreel.
3 Bi̱ maʼni raga̱jmi̱i̱n nigumbiʼyuu Kileab, a̱ʼdióo Abigaíl, bi̱ ninindxu̱u̱ a̱ʼgiu̱u̱ Nabal xa̱bu̱ carmelita, bi̱ maʼni ragajtsíin nigumbiʼyuu Absalón, a̱ʼdióo Maacá, wáxióo* Talmái, rey ndrígóo Guesur.
4 Bi̱ maʼni ragajkui̱i̱n nigumbiʼyuu Adonías, a̱ʼdióo Haguit, bi̱ maʼni witsiin nigumbiʼyuu Sefatías, a̱ʼdióo Abital.
5 Bi̱ maʼni majuin e̱ji̱i̱n David nigumbiʼyuu Itream, bi̱ nigiʼdaa ga̱jma̱a̱ Eglá. Bigi̱ nindxu̱ún e̱ji̱i̱n David bi̱ nigumiin náa Hebrón.
6 Índo̱ bi̱ kúwá náa goʼwóo Saúl nixmijná má xúʼko̱ gajmiún bi̱ kúwá náa goʼwóo David, Abner ni̱jkha̱nú nigiʼdoo itháan tsiaki̱i̱ náa goʼwóo Saúl.
7 Saúl nigiʼdaa mbáa a̱ʼgú ñawuun* bi̱ nigumbiʼyuu Rizpá, wáxióo Ayá. Mbóo mbiʼi Is-Bóset niʼthúu̱n Abner: “Náá numuu dí nitabáaʼ ga̱jma̱a̱ʼ a̱ʼgú ñawuun anu̱ʼ ráʼ.”
8 Abner ra̱ʼkhá tháán nikiʼnáa dí xúʼko̱ niʼthúu̱n Is-Bóset, niʼthúu̱n: “Lá ni̱ndxu̱ʼ mbáa xu̱wánʼ* bi̱ xtáa náa Judá ráʼ. Asndu dí mbiʼi xúgi̱ niniu̱u̱n dí májánʼ bi̱ kúwá náa goʼwóo ana̱a̱ʼ* Saúl, a̱ngui̱i̱n ga̱jma̱a̱ bi̱ nambájxu̱u̱ gajmíi̱n. Tániaaʼ dí ra̱májánʼ táxnajxíín náa ñawúunʼ David. Maski ajndu xúʼko̱, narathúnʼ dí raʼkhí ni̱ni̱ ga̱jmu̱ʼ mbáa a̱ʼgu̱.
9 Dios gáʼni rí* mamínuuʼ á mu dí tséni̱ ga̱jma̱a̱ numuu David dí Jeobá nikudaminaʼ:
10 Marígúu dí naʼtáñajunʼ náa goʼwóo Saúl ga̱jma̱a̱ maʼgíiʼ dí naʼtáñajunʼ David náa Israel ga̱jma̱a̱ náa Judá, dí nagi̱ʼdu̱u̱ náa Dan asndu náa Beer-Seba”.
11 Is-Bóset nándáa dí niʼthúu̱n Abner, numuu dí nimíñuu kaʼyoo.
12 Mbá nacha̱ Abner nikuʼmiin bi̱ magún kuñu̱u̱n ajngáa náa David mu maʼthúu̱n: “Tsáá kaʼyoo xúgíʼ mbaaʼ Israel rá.” Ma̱ngaa mu maʼthúu̱n: “Gamba̱náaʼ ga̱jma̱á ni̱ndxu̱ʼ ga̱jma̱a̱ ikhúún ma̱ni̱ xúgíʼ xó má eʼngo̱o̱,* mu ma̱ni̱ dí xúgíinʼ xa̱bu̱ Israel mumbayáaʼ”.
13 David niʼthúu̱n: “Májánʼ má. Mambanúʼ ga̱jma̱á nindxa̱a̱ʼ. Mú rígá mbóo dí nandoʼ manda̱ʼa̱a̱ʼ, rí índo̱ gídxáʼ, xádxáʼ gáraxnaxíminaʼ náa ikhúún á mu dí na̱nguá edxa̱ʼ jcháa Mical, wáxióo Saúl”.
14 Ikhú David nikuʼmiin bi̱ magún kuñu̱u̱n ajngáa náa Is-Bóset, a̱ʼdióo Saúl, mu maʼthúu̱n: “Araxniáaʼ a̱ʼgiu̱ʼ Mical, bi̱ ninda̱ʼa̱a̱ ga̱jma̱a̱ mbá 100 edxu̱u̱ xtóo xuyuuʼ tsáʼkhún filisteos”.
15 Ikha jngóo Is-Bóset niʼni dí muriguíi a̱ʼgiu̱u̱ Paltiel a̱ʼdióo Lais.
16 Mú ajmbio̱o̱* ni̱jkha̱ ga̱jma̱a̱, ni̱jkha̱ rambi̱ya̱ʼ índo̱ ni̱jkha̱ kidxuuʼ asndu náa Bahurim. Ikhú Abner niʼthúu̱n: “¡Atanga̱án!”. Ikhú ikhaa nitanga̱a̱.
17 Nda̱wa̱á Abner nikuʼma ajngáa rígi̱ náa inún bi̱ kuya̱ edxu̱u̱ náa Israel: “Niʼníí má dí ikháanʼla nindala rí David mani̱ndxu̱u̱ rey ndrígala.
18 Dí xúgi̱, guʼgíiʼla xá, numuu dí Jeobá niʼthúu̱n David: ‹Majmiuʼ xa̱bi̱ʼ David mu ma̱ni̱ kríya̱a̱ʼ xuajñunʼ Israel náa ñawúúnʼ filisteos ga̱jma̱a̱ náa mbá xúgíinʼ xa̱bu̱ sia̱nʼ›”.
19 Ikhú Abner niʼtámíjná gajmíi̱n bi̱ naguwáʼ náa Benjamín. Ma̱ngaa ni̱jkha̱ gáʼtaminaʼ ga̱jma̱a̱ ngu̱ʼwa̱á David náa Hebrón mu maʼthúu̱n dí xa̱bu̱ Israel ga̱jma̱a̱ xúgíinʼ bi̱ naguwáʼ náa Benjamín nimbánúún.
20 Índo̱ Abner ni̱jkha̱ gáʼyoo David náa Hebrón ni̱jkha̱ gajmíi̱n mbá 20 xa̱bekha, ikhú David niʼni mújúunʼ ganitsu mi̱khu̱ Abner gajmíi̱n xa̱bi̱i̱.
21 Abner niʼthúu̱n David: “Atatsíñuʼ maʼgá gágímbíin xúgíinʼ xa̱bu̱ Israel náa inuu tátioʼ rey mu mamba̱náaʼ gajmiáanʼ ga̱jma̱a̱ ikháán mi̱dxu̱ʼnú mani̱ndxa̱a̱ʼ rey náa mbá xúgíʼ rí ikháán gáʼndaaʼ”. Ikhú David niniñuuʼ ni̱jkha̱a̱, ga̱jma̱a̱ Abner ni̱jkha̱a̱ tsímáá.
22 Ikhú má Joab gajmíi̱n xa̱bi̱i̱ David nitangiín dí nigún gúxmijná ga̱jma̱a̱ niguwáánʼ kudúún dí niguanáa. Abner nánguá xtáa ga̱jma̱a̱ David náa Hebrón, numuu dí David má niniñuuʼ maʼga̱a̱ tsímáá.
23 Índo̱ Joab ni̱ʼkha̱núu̱ gajmíi̱n mbá xúgíinʼ soldado, nitháán: “Abner a̱ʼdióo Ner ni̱ʼkha̱ gáʼyoo rey. David niniñuuʼ maʼga̱a̱ ga̱jma̱a̱ Abner ni̱jkha̱a̱ tsímáá”.
24 Ikha jngóo Joab nito̱ʼo̱o̱ náa xtáa rey ga̱jma̱a̱ niʼthúu̱n: “Dí nitani̱. Abner ni̱ʼkha̱ gáʼyaaʼ ga̱jma̱a̱ ikháán nitatsíñánʼ maʼga̱a̱, dí xúgi̱ nikríya̱a̱ʼ xá. Ndíjkha xúʼko̱ nitani̱.
25 ¡Ikháán má natayáá xú káʼnii nindxu̱u̱ Abner a̱ʼdióo Ner! Ikhaa ni̱ʼkha̱ gi̱i̱ mu maʼni nduwáánʼ, mu mbaʼyoo mámbá rí na̱dxu̱ʼ ratani̱ ga̱jma̱a̱ mbá xúgíʼ dí xtaa ratani̱”.
26 Ikhú Joab nigájnáa náa David, nikuʼmiin xa̱bi̱i̱ mu magún gúyáaʼ Abner náa iñáʼ dí najnu̱ʼ iyaʼ dí rígá náa Sirá. Mu maguwáanʼ kuya̱a̱, mú David nditháan táʼyoo rígi̱.
27 Índo̱ Abner nitanga̱a̱ Hebrón, Joab ni̱jkha̱ kayáa kaníí náa awúu̱n xkrugoo xuajin, mu maʼtámíjná ngu̱ʼwa̱á ga̱jma̱a̱. Mú índo̱ xtáa ga̱jma̱a̱ ikhí, nixkrua̱ʼa̱ espada náa awúu̱n ga̱jma̱a̱ Abner nikháñúu. Niʼñuu rúʼko̱, numuu dí ikhaa nixíyáa* Asahel bi̱ nindxu̱u̱ giʼtio̱o̱.
28 Nda̱wa̱á índo̱ David niʼdxuun rígi̱, niʼthí: “Náa inuu Jeobá, ikhúún ga̱jma̱a̱ dí natañájunʼ xáguáʼdáá aʼkhúxu̱ asndu kámuu ga̱jma̱a̱ numuu eʼdiuu Abner a̱ʼdióo Ner.
29 Náa edxu̱u̱ má Joab gátanga̱a̱ dí niʼni ga̱jma̱a̱ náa mbá xúgíinʼ bi̱ kúwá náa goʼwóo anu̱u̱.* ¡Mbá xúgíinʼ xa̱bekha bi̱ gákúwá náa goʼwóo Joab gagajtaa eʼdi náa tsáʼkhún, gaguaʼdáá nandii lepra,* o guñajunʼ, guxmí xtíin ga̱jma̱a̱ itsu̱,* o bi̱ makhañún ga̱jma̱a̱ espada, o maxkidxu̱u̱n!”.
30 Xúʼko̱ niʼni dí Joab ga̱jma̱a̱ Abisái bi̱ nindxu̱u̱ ndxájuu nixiyáa Abner, numuu dí ikhaa nixíyáa Asahel bi̱ nindxu̱u̱ gi̱ʼtiu̱ún, índo̱ nixmijná náa Gabaón.
31 Ikhú David niʼthúu̱n Joab gajmíi̱n mbá xúgíinʼ xa̱bi̱i̱ bi̱ xtáa gajmíi̱n: “Guxkuʼtu xtíñálá, guʼgíʼ xtíin mi̱du̱,* gumbi̱ya̱ʼ ga̱jma̱a̱ numuu Abner”. Asndu rey David ma̱ngaa ni̱jkha̱ rawi̱ji̱ náa kidxuuʼ xiawoo rí kaʼmáaʼ bi̱ nikháñúu.
32 Nidi̱i̱ Abner náa Hebrón. Rey nimbi̱ya̱ʼ xígu náa nijnguáan Abner, ga̱jma̱a̱ mbá xúgíinʼ xa̱bu̱ xuajin nimbi̱ya̱ʼ.
33 Rey niʼni ajmúú rígi̱ ga̱jma̱a̱ numuu Abner:
“Lá ndiyóoʼ makhañúu Abner xóo mbáa xa̱bu̱ skágunʼ ráʼ.
34 Ñawáanʼ na̱nguá kaxtoʼóoni má rajkuáaʼ na̱nguá kaxtoʼóo ga̱jma̱a̱ cadena.*
Nikháñaʼ xóo ekháñúu mbáa náa ñawúúnʼ xa̱bu̱ bi̱ nuradíin a̱ngiu̱ún”.*
Ikhú mbá xúgíinʼ xa̱bu̱ xuajin nitangiín nimbi̱ya̱ʼ ga̱jma̱a̱ numuu Abner.
35 Nda̱wa̱á, mbá xúgíinʼ xa̱bu̱ niguwáʼ gútháán David dí makuiʼtsu* nákha xóó mbiʼíí, mú David nixná ajngóo: “¡Dios gáʼni dí mamínuuʼ á mu dí nakhu pan o asndu ndiéjunʼ má nákha xóó tsérámaaʼ a̱jkha̱ʼ!”.
36 Mbá xúgíinʼ xa̱bu̱ xuajin ndiyáá rígi̱ ga̱jma̱a̱ ndiyáá dí májánʼ. Xúʼko̱ má nini̱ ga̱jma̱a̱ xúgíʼ dí rey naʼni, xa̱bu̱ xuajin ndiyáá dí májánʼ.
37 Xígi̱ kaʼnii niʼni dí mbá xúgíinʼ xa̱bu̱ ga̱jma̱a̱ mbá xúgíinʼ xa̱bu̱ Israel ndiyáá mbiʼi rúʼko̱ dí rey ragíʼdoo aʼkhúun dí nikháñúu Abner a̱ʼdióo Ner.
38 Ikhú rey niʼthún xa̱bi̱i̱: “Lá tséya̱a̱ dí xúgi̱ nikháñúu náa Israel mbáa príncipe ga̱jma̱a̱ mbáa xa̱bu̱ bi̱ gíʼdoo numuu ráʼ.
39 Maski ajndu nixtaʼwún mu mani̱ndxu̱ʼ rey, mú dí xúgi̱ nánguá gúʼdoo tsiaki̱i̱. Xa̱bekha bigi̱, e̱ji̱i̱n Zeruyá, ra̱míjíinʼ kayuuʼ e̱yo̱o̱ jún. Jeobá gáʼni numa̱a̱ bi̱ naʼni dí ra̱májánʼ”.
Mbaʼa nota
^ O “a̱ʼdée dxáʼgú”.
^ Náa ajngáa hebreo naʼthí, “edxu̱u̱ xu̱wánʼ”.
^ O “tátiáaʼ”.
^ Náa ajngáa hebreo naʼthí, “Abner”.
^ Náa ajngáa hebreo naʼthí, “¡atayáá! Ñawúnʼ rígá ga̱jma̱á nindxa̱a̱ʼ”.
^ O “jmba̱yi̱i̱”.
^ Náa ajngáa hebreo naʼthí, “ga̱jma̱a̱ numuu eʼdiuu”.
^ O “tátée”.
^ Mbáa nandoo gáʼthúu̱n dí mbáa xa̱biya̱ bi̱ gúʼxíiʼ maʼni ñajunʼ dí naʼni a̱ʼgu̱.
^ Náa ajngáa hebreo naʼthí, “cobre”.
^ Náa ajngáa hebreo naʼthí, “e̱jñu̱ún bi̱ nuni̱ dí ra̱májánʼ”.
^ O “muxnáá David pan mi̱khu̱ mu maʼni̱i̱ a̱jkiu̱u̱n”.
