Raga̱jma̱ libro rí niʼnirámáʼ Samuel 4:1-12
4 Índo̱ Is-Bóset a̱ʼdióo Saúl, niʼdxawuun dí nikháñúu Abner náa Hebrón, nimíñuu,* ga̱jma̱a̱ mbá xúgíinʼ israelitas ra̱ʼkhá tháán nixmiéjúúnʼ.
2 Kúwá a̱jmi̱i̱n xa̱bekha bi̱ nutañajúúnʼ mbá grupo kuʼwáʼ bi̱ gíʼdiin e̱ji̱i̱n Saúl: Mbáa mbiʼyuu Baaná ga̱jma̱a̱ i̱mba̱a̱ mbiʼyuu Recab. Nindxu̱ún e̱ji̱i̱n Rimón xa̱bu̱ bi̱ na̱ʼkha̱ náa Beerot, náa xuajin chíʼgíiʼ* ndrígóo Benjamín. (Beerot ma̱ngaa rígá náa xuajin chíʼgíiʼ* ndrígóo Benjamín.
3 Xa̱bu̱ bi̱ kúwá náa Beerot nigún gákúwá náa Guitaim, ikhí kúwá asndu dí mbiʼi xúgi̱ xóo xa̱bu̱ naguwaáʼ).
4 Jonatán a̱ʼdióo Saúl gíʼdaa mbáa a̱ʼdióo bi̱ mbiʼyuu Mefibóset. Ikhaa gúʼxíiʼ. Índo̱ ikhaa gíʼdoo witsu tsiguuʼ, xa̱bu̱ Jezreel nidxawíín dí Saúl ga̱jma̱a̱ Jonatán nikháñún. Ikhú a̱ʼgu̱ bi̱ nañewu̱u̱n ndiyáraʼaa, índo̱ ikhaa xtáa ragáyúu niniña míndíi,* ikha jngóo niguanúu gúʼxíiʼ.
5 Recab ga̱jma̱a̱ Baaná, e̱ji̱i̱n Rimón xa̱bu̱ Beerot nigún náa goʼwóo Is-Bóset xóo ta̱pha̱ mbiʼi índo̱ ikhaa xtáa raʼgu.
6 Recab ga̱jma̱a̱ ndxájuu Baaná nitu̱ʼu̱u̱n náa guʼwá rí xóo trigo egún gúyáaʼ eni̱, ikhú nixkruaʼa espada náa awúu̱n Is-Bóset. Ga̱jma̱a̱ ikhiin nigájnún ragáñúún.
7 Índo̱ ikhiin nitu̱ʼu̱u̱n náa guʼwá, Is-Bóset kaʼmáaʼ raʼgu náa xia̱wuu. Nixkruaʼaa espada ga̱jma̱a̱ nixiyáa, nda̱wa̱á nirujturígú edxu̱u̱ ga̱jma̱a̱ nigúun kuñu̱u̱n. Kañiiʼ mbruʼun nigúun náa kamba̱a̱ dí na̱jkha̱ xígií náa Arabá.
8 Niguánúu náa Hebrón kuñu̱u̱n edxu̱u̱ Is-Bóset ga̱jma̱a̱ nitháán rey David: “Gi̱i̱ rígá edxu̱u̱ Is-Bóset a̱ʼdióo Saúl, xa̱bu̱ sia̱nʼ ndrígia̱a̱ʼ bi̱ nindoo maxíña̱a̱n. Xúgi̱ Jeobá niniñuuʼ dí tátioʼ rey maʼniuu Saúl gajmíi̱n bi̱ naguwáʼ náa ikhaa xó má ikhiin nini̱i̱”.
9 Mú David niriʼñuu Recab ga̱jma̱a̱ ndxájuu Baaná, e̱ji̱i̱n Rimón xa̱bu̱ Beerot: “Na̱xna̱ ajngóʼ ga̱jma̱a̱ numuu mbiʼyuu Jeobá, bi̱ niʼni kríñu̱u̱nʼ náa mbá xúgíʼ gamiéjunʼ dí gúʼdoo,
10 xa̱bu̱ bi̱ ni̱ʼkha̱a̱ gáʼthúnʼ ‹Saúl nikháñúu› nikumu̱u̱ dí na̱ʼkha̱a̱ kayóo mbá ajngáa májánʼ, mú ikhúún niguajtúwiin ga̱jma̱a̱ nixíyáa náa Ziclag. ¡Rúʼko̱ ni̱xnu̱u̱ mada̱a̱ʼ ga̱jma̱a̱ numuu ajngáa dí ni̱ʼkha̱a̱ kayóo!
11 ¡Xúʼko̱ má gániu̱u̱n xa̱bu̱ xkawi̱i̱nʼ bi̱ nixiyáa xa̱bu̱ bi̱ ragíʼdoo aʼkhúun bi̱ kraʼaa raʼgu náa xia̱wuu! Lá xáʼyóoʼ ma̱ni̱ gínáanʼla ga̱jma̱a̱ numuu dí nixidíí eʼdiuu, ga̱jma̱a̱ dí magúdiáanʼla ráʼ.”
12 David niʼtáñajúúnʼ xa̱bi̱i̱ dí muradíin. Nirujturígú ñawúúnʼ ga̱jma̱a̱ rajkhúún, nijngriguíin náa mijngii tanque dí rígá náa Hebrón. Mú edxu̱u̱ Is-Bóset nigúun kuñu̱u̱n ga̱jma̱a̱ nidu̱u̱ náa nijuiʼdi̱i̱ Abner, náa Hebrón.
Mbaʼa nota
^ Náa ajngáa hebreo naʼthí, “nikáguabaaʼ ñawúunʼ”.
^ O “tribu”.
^ O “lajuíin”.
^ O “niniñatiyáaʼ”.
