Raga̱jma̱ libro rí niʼnirámáʼ Samuel 5:1-25
5 Mbiʼi nda̱wa̱á, mbá xúgíʼ xuajin majkhaʼ* dí rígá náa Israel niguwáʼ gúyáá David náa Hebrón, ga̱jma̱a̱ nitháán: “¡Gi̱i̱ kuwáanʼxu̱! Mbóó eʼdiulú.*
2 Asndu má nákhá Saúl nindxu̱u̱ rey ndrígu̱xu̱, ikháán má niraxnúún ikha xa̱bu̱ Israel náa nagún gúxmijná,* ga̱jma̱a̱ Jeobá niʼtháanʼ: ‹Ikháán matiewa̱a̱n xuajñunʼ ga̱jma̱a̱ ikháán mbi̱ya̱ edxu̱u̱ náa Israel›”.
3 Mbá xúgíinʼ bi̱ kuya̱ edxu̱u̱ náa Israel niguwáʼ gúyáá rey David náa Hebrón, ga̱jma̱a̱ ikhaa nimbánuminaʼ gajmíi̱n náa Hebrón, náa inuu Jeobá. Nda̱wa̱á nigi̱i̱ʼ David xóo rey náa Israel.
4 David gíʼdoo 30 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 40 tsiguʼ.
5 Índo̱ nixtáa náa Hebrón, niʼtáñajunʼ náa Judá mbá juwan tsiguʼ tikhu. Ga̱jma̱a̱ índo̱ nixtáa náa Jerusalén, niʼtáñajunʼ náa mbá xúgíʼ Israel ga̱jma̱a̱ náa Judá mbá 33 tsiguʼ.
6 Rey David gajmíi̱n xa̱bi̱i̱ nigún náa Jerusalén gúxmijná gajmiún jebuseos bi̱ kúwá náa mbaaʼ rúʼko̱. Mú jebuseos nitsijmaa David, nitháán: “¡Nditháan xáʼnga̱a̱ʼ gátaʼa̱a̱ʼ gi̱i̱! Asndu bi̱ tsékruigu̱u̱n ga̱jma̱a̱ bi̱ gúʼxíinʼ muxkaaʼ”. Ikhiin nindxaʼwamíjna̱: “David nditháan xáʼngo̱o̱ gáto̱ʼo̱o̱ gi̱i̱”.
7 Mú David nito̱ʼo̱o̱ náa Sion, xuajin dí kúgumaʼá, dí náa xúgi̱ nindxu̱u̱ Xuajñuu David.
8 Mbiʼi rúʼko̱, David niʼthí: “¡Bi̱ gúxmijná gajmiún jebuseo, gatu̱ʼu̱u̱n ga̱jma̱a̱ náa iñáʼ dí na̱jkha̱ iyaʼ mu muradíin ‹bi̱ gúʼxíinʼ ga̱jma̱a̱ bi̱ tsékrui̱gu̱u̱n› bi̱ David tsíyoo gáʼñún!”. Ikha jngóo dí najuiʼthá. “Bi̱ tsékruigu̱u̱n ga̱jma̱a̱ bi̱ gúʼxíinʼ nditháan xátu̱ʼu̱u̱n náa guʼwá”.
9 Ikhú David niguanúu nixtáa náa xuajin rí kúgumaʼá, dí nigumbiʼyuu* Xuajñuu David. Ga̱jma̱a̱ nigíʼdu̱u̱ niʼni guʼwá asndu náá, nigíʼdu̱u̱ náa Bíjní* asndu awúún.
10 Xúʼko̱ niʼni rí David ni̱jkha̱ ragiʼdoo itháan tsiaki̱i̱ ga̱jma̱a̱ Jeobá Dios bi̱ naʼtáñajúúnʼ ángeles nixtáa ga̱jma̱á nindxu̱u̱.
11 Rey ndrígóo Hiram bi̱ xtáa náa Tiro nikuʼmiin bi̱ magún kuñu̱u̱n ajngáa náa David, ma̱ngaa nikuʼma ixi̱ cedro, xúʼko̱ má bi̱ nutháá ixi̱, bi̱ nuni̱ guʼwá mu muxujxi̱ xtájtsí ga̱jma̱a̱ nigiʼdi̱i̱ nini̱ goʼwóo* David.
12 David ni̱jkha̱nú ndiʼyoo dí Jeobá nigíiʼ mani̱ndxu̱u̱ rey náa Israel, ma̱ngaa dí niʼni maʼni mba̱a̱ dí naʼtáñajunʼ ga̱jma̱a̱ numuu xuajñuu* Israel.
13 Nda̱wa̱á dí ni̱ʼkha̱a̱ náa Hebrón, David nigiʼdiin itháan gu̱ʼú ñawiin* ga̱jma̱a̱ gu̱ʼwi̱i̱ náa Jerusalén. Bi̱ nigiʼdiin itháan gajmíi̱n e̱ji̱i̱n jiámá ga̱jma̱a̱ wa̱ʼxa̱ʼ.*
14 Xígi̱ mbiʼñún e̱ji̱i̱n bi̱ nigiʼdiin náa Jerusalén: Samúa, Sobab, Natán, Salomón,
15 Ibhar, Elisúa, Néfeg, Jafía,
16 Elisamá, Eliadá ga̱jma̱a̱ Elifélet.
17 Índo̱ filisteo nidxawíín rí David nigi̱ʼi̱ʼ xóo rey náa Israel, xúgíinʼ nitsimún gúyáaʼ. Ga̱jma̱a̱ David niʼdxawuun rígi̱, ikhú ikhaa nigajtaa gárkaʼwuminaʼ.
18 Filisteos niguánú ga̱jma̱a̱ nigi̱wi̱i̱nʼ náa mata* Refaím.
19 David nirajxu̱u̱ Jeobá: “Matsimuʼ gáxmijná gajmíʼ filisteos ráʼ. Maraxnajxíin náa ñawúnʼ xáʼ.” Jeobá niriʼñuu: “Atatsimaaʼ, numuu dí maxnajxíin filisteos náa ñawáanʼ”.
20 Ikha jngóo David ni̱jkha̱ náa Baal-Perazim ga̱jma̱a̱ ikhí nixmínaʼ gajmíi̱n. Niʼthí: “Jeobá nimbáʼtoo mbá kamba̱a̱ náa maʼgá gáxmijná gajmíʼ bi̱ sia̱nʼ, xóo mbá kamba̱a̱ rí nambáʼtoo iyaʼ”. Ikha jngóo nixná mbiʼyuu mbaaʼ rúʼko̱ Baal-Perazim.*
21 Filisteos niniñu̱u̱nʼ ikhí xándiu̱ún, ikhú David gajmíi̱n xa̱bi̱i̱ niguáan kudiin.
22 Nda̱wa̱á, filisteos nitsima̱án mbu̱júu̱ ga̱jma̱a̱ nigi̱wi̱i̱nʼ náa mata Refaím.
23 David nirajxu̱u̱ Jeobá, mú ikhaa niriʼñuu: “Xátatsimaaʼ gátaxmíjná gajmiáanʼ náa jmbuu eguwáʼ, ayuʼ tuíʼiin, ga̱jma̱a̱ tsu̱du̱ún gídxúʼ gátaxmíjná gajmiáanʼ, náa ridoo xtáʼdu̱u̱ iná bacá.
24 Ga̱jma̱a̱ índo̱ gátadxawíín rí xóo ewán egún xa̱bu̱ náa inu̱ú xtáʼdu̱u̱ iná bacá. Ikhú xámíñáaʼ mataxmíjná, numuu dí Jeobá nigájnuu maʼga ginii maʼni gámbíin soldado filisteos”.
25 Ikha jngóo David niʼni xó má nikuʼmaa maʼni Jeobá, ga̱jma̱a̱ niʼni gámbíin filisteos. Nigíʼdu̱u̱ náa Gueba asndu náa Guézer.
Mbaʼa nota
^ O “tribu”.
^ Náa ajngáa hebreo naʼthí, “nindxu̱xu̱ itsa̱a̱ʼ ga̱jma̱a̱ xuyaaʼ”.
^ Náa ajngáa hebreo naʼthí, “bi̱ naʼni magajnún ga̱jma̱a̱ bi̱ naʼni mataʼa̱án xa̱bu̱ Israel”.
^ O “ikhaa nixná mbiʼyuu”.
^ O “Montículo”. Náa ajngáa hebreo, ajngáa rígi̱ nandoo gáʼthúu̱n ‹nigumamajtííʼ›.
^ O “náa naʼtáñajunʼ”.
^ Xóo muʼthá, xuajñuu Jeobá.
^ O “i̱jín go̱ʼo̱”.
^ O “bóo”.
^ Rí nandoo gáʼthúu̱n ‹bi̱ naʼtáñajuunʼ kamba̱a̱›.
