Raga̱jma̱ libro rí niʼnirámáʼ Samuel 6:1-23
6 David nitanga̱a̱ nigímbíin soldado Israel bi̱ najmañún nuxmijná, nindxu̱ún mbá 30,000 xa̱bekha.
2 Ikhú David gajmíi̱n xúgíinʼ xa̱bekha bi̱ xtáa gajmíi̱n nigájnún náa Baale-Judá mu matsimún kuñu̱u̱n Arca* ndrígóo Dios bi̱ gajkhun. Náa inuu nagún xa̱bu̱ rugri̱ga̱a̱* mbiʼyuu Jeobá bi̱ naʼtáñajúúnʼ ángeles, bi̱ grígu xíliu̱u̱* náa tsu̱du̱ún* querubines.
3 Mu ma̱ndoo maguwáanʼ kuñu̱u̱n Arca ndrígóo Dios bi̱ gajkhun dí rígá náa goʼwóo Abinadab dí grígu náa bíjní, nirajkua̱a̱ náa carreta dí nuxi̱ʼ. Uzá ga̱jma̱a̱ Ahió e̱ji̱i̱n Abinadab nagún kuñu̱u̱n carreta dí nuxi̱ʼ.
4 Ikha jngóo niriya̱a̱ʼ Arca ndrígóo Dios bi̱ gajkhun dí rígá náa goʼwóo Abinadab dí rígá náa bíjní ga̱jma̱a̱ Ahió frígu ra̱jkha̱ ginii náa inuu Arca.
5 David gajmíi̱n xúgíinʼ bi̱ kúwá náa goʼwóo Israel kúwá runi̱ ndxa̱a̱ náa inuu Jeobá ga̱jma̱a̱ mbá xúgíʼ ajua̱nʼ dí najmún mu mudi̱i̱ dí niguma ga̱jma̱a̱ ixi̱ enebro, arpa ga̱jma̱a̱ i̱ʼwáʼ ajua̱nʼ dí gíʼdoo cuérdóo, xóo panderetas, sistros ga̱jma̱a̱ címbalos.
6 Mú índo̱ niguánú náa mbayuuʼ Nacón, Uzá nikrui̱ya̱ʼ ñawúunʼ ga̱jma̱a̱ niguajtuun Arca ndrígóo Dios bi̱ gajkhun, numuu rí nigíʼ magutaxi̱ nini̱ xedi̱.
7 Ikhú Jeobá ra̱ʼkhá tháán nikiʼnáa kaʼyoo Uzá. Dios bi̱ gajkhun ikhí má nixíyáa numuu rí tágiʼdoo gamajkuu, nikháñuu náa níjniúu Arca ndrígóo Dios bi̱ gajkhun.
8 Mú David nikiʼnáa,* numuu rí Jeobá nikásngañu̱u̱ʼ kaʼyoo* Uzá, mbaaʼ rúʼko̱ mbiʼyuu Pérez-Uzá* asndu rí mbiʼi xúgi̱.
9 David ra̱ʼkhá tháán nimíñuu kaʼyoo Jeobá mbiʼi rúʼko̱, ikhaa niʼthí: “Xú káʼnii gáʼkháaʼ ka̱yo̱ʼ Arca ndrígóo Jeobá rá.”
10 David na̱nguá nindoo gáʼga̱a̱ kayóo Arca ndrígóo Jeobá náa ikhaa xtáa, Xuajñuu David. Nikuʼma dí magúun kuñu̱u̱n náa Obed-Edom xa̱bu̱ guitita.
11 Arca ndrígóo Jeobá nirígá mbá ajtsú igu̱nʼ náa goʼwóo Obed-Edom xa̱bu̱ guitita ga̱jma̱a̱ Jeobá niʼni tsajkurámaaʼ má xúʼko̱ Obed-Edom ga̱jma̱a̱ mbá xúgíinʼ bi̱ kúwá náa goʼwóo.
12 Ikhú nitháán rey David: “Ga̱jma̱a̱ numuu Arca ndrígóo Dios bi̱ gajkhun, Jeobá naʼni tsajkurámiinʼ bi̱ kúwá náa goʼwóo Obed-Edom ga̱jma̱a̱ mbá xúgíʼ dí gíʼdoo”. Ikha jngóo asndu nadxuu David nitsimuu gáyáa Arca ndrígóo Dios bi̱ gajkhun náa goʼwóo Obed-Edom mu maʼga̱a̱ kayóo náa Xuajñuu David.
13 Índo̱ bi̱ nagún kuñu̱u̱n Arca ndrígóo Jeobá nixnáá má mbá majun paso, ikhú David nixnájxi̱i̱ xóo tsigijñaʼ mbáa xedi̱ ga̱jma̱a̱ mbáa xujkhúʼ bi̱ gíʼdoo xtangoo.
14 David asndu naxnúu tsingaa* ejkha̱ ra̱ʼtsia̱ ga̱jma̱a̱ xúgíʼ tsiaki̱i̱ ndrígóo náa inuu Jeobá ga̱jma̱a̱ kagíʼ mbá efod* dí niguma ga̱jma̱a̱ lino.
15 David gajmíi̱n mbá xúgíinʼ xa̱bu̱ Israel naguwáanʼ ratsimií kuñu̱u̱n Arca ndrígóo Jeobá, nundxa̱ʼwa̱ rí nadxún ga̱jma̱a̱ nundiyííʼ chi̱ji̱ʼ.
16 Mú índo̱ nitaʼaán kuñu̱u̱n Arca ndrígóo Jeobá náa Xuajñuu David, Mical wáxióo* Saúl, niyejxirigú náa ventanúu, ndiʼyoo dí rey David nakijxi̱i̱ ga̱jma̱a̱ asndu naxnúu tsingaa dí naʼtsia náa inuu Jeobá, ikhú nigíʼdúu niwiyu̱u̱ʼ kaʼyoo.
17 David niʼni mbá guʼwá xtíin náa marigá Arca ndrígóo Jeobá. Ikha jngóo nixuda̱ʼ ikhí ga̱jma̱a̱ nigrígu náa kaʼyoo. David nixnájxi̱ mbá tsigijñaʼ gamajkhu dí nakarámáʼ ga̱jma̱a̱ tsigijñaʼ dí tsímáá* náa inuu Jeobá.
18 Índo̱ David niguámbóo nixnájxi̱ tsigijñaʼ dí nakarámáʼ ga̱jma̱a̱ tsigijñaʼ dí tsímáá, niʼni tsajkurámiinʼ xa̱bu̱ xuajin ga̱jma̱a̱ mbiʼyuu Jeobá bi̱ naʼtáñajúúnʼ ángeles.
19 Ma̱ngaa nixnúún xúgíinʼ xa̱bu̱ xuajin, xúgíinʼ xa̱bu̱ Israel, mámbáa xa̱biya̱ ga̱jma̱a̱ a̱ʼgu̱ nixnúu mbá pan dijndi, mbá pan dí niguma ga̱jma̱a̱ dátiles ga̱jma̱a̱ mbá pan dí niguma ga̱jma̱a̱ uva nijndooʼ, nda̱wa̱á xa̱bu̱ nigúun, mámbáa ni̱jkha̱a̱ náa goʼwóo.
20 Índo̱ David nitanga̱a̱ mu maʼni tsajkurámiinʼ bi̱ kúwá náa goʼwóo, Mical wáxióo Saúl nigájnuu gátsijnuu ga̱jma̱a̱ niʼthúu̱n: “¡Mba̱a̱ wáa gamajkhu nigruigú rey ndrígóo Israel mbiʼi rígi̱! ¡Asndu nikujmaa tsaʼtsaaʼ náa inún gu̱ʼú ñumbáá ndrígiu̱ún xa̱bi̱i̱, xóo eʼni mbáa xa̱bu̱ skágunʼ índo̱ naguwíi xtíñuu náa inún mbaʼin xa̱bu̱!”.
21 Ikhú David niʼthúu̱n Mical: “Na̱ni̱ ndxa̱a̱ náa inuu Jeobá, ikhaa niraʼwún ikhúún raʼkháa ana̱a̱ʼ* ni má bi̱ kúwá náa goʼwóo, ikhaa nigiúunʼ mu mbaya̱ edxu̱u̱ náa Israel xuajñuu Jeobá. Ikha jngóo ma̱ni̱ ndxa̱a̱ náa inuu Jeobá
22 ga̱jma̱a̱ makruígúminaʼ itháán ki xóo ni̱ni̱. Makruigúminaʼ asndu náa inuʼ ikhúún. Mú gu̱ʼú ñumbáá bi̱ ikháán niratá numún ikhiin muni̱ mbu̱u̱n”.
23 Mical wáxióo Saúl, tágiʼdiin e̱ji̱i̱n asndu índo̱ nikháñuu.
Mbaʼa nota
^ O “E̱jna̱”.
^ O “najmúún”.
^ O “trono ndrígóo”.
^ O mbáa “náa majñu̱únʼ”.
^ O “nigawúun”.
^ Náa ajngáa hebreo naʼthí, “nirujturígú kamba̱a̱”.
^ Rí nandoo gáʼthúu̱n, ‹kambo̱o̱ Uzá›.
^ O “xngaa”.
^ O “a̱ʼdée dxáʼgú”.
^ O “tátiáaʼ”.
