Raga̱jma̱ libro rí niʼnirámáʼ Samuel 7:1-29
7 Índo̱ rey xtáa má náa goʼwóo* ga̱jma̱a̱ Jeobá nixnúu dí mbayáa jxu̱u̱ʼ náa mbá xúgíinʼ xa̱bu̱ sia̱nʼ bi̱ kúwá náa mbájndi xtáa,
2 rey niʼthúu̱n profeta* Natán: “Ikhúún xtáá náa mbá guʼwá ixi̱ cedro, mú Arca* dí nimbánuu ndrígóo Dios bi̱ gajkhun kraʼa náa guʼwá xtíin”.
3 Natán niʼthúu̱n rey: “Atani̱ má dí egájnuu náa a̱jkia̱a̱nʼ, numuu dí Jeobá xtáa ga̱jma̱á nindxa̱a̱ʼ”.
4 Mbruʼun má rúʼko̱, Jeobá niʼthúu̱n ajngáa rígi̱ Natán:
5 “Ayuʼ ga̱jma̱a̱ aratháán rígi̱ xa̱bi̱ʼ David: ‹Rígi̱ dí naʼthí Jeobá: “Náá numuu dí ikháán gátani̱ mbá guʼwá náa maxtáá rá.
6 Asndu má nákha mbiʼi dí nigúwíin náa Egipto xa̱bu̱ Israel asndu dí mbiʼi xúgi̱, ikhúún na̱nguá nixtáá náa nimbá guʼwá, nijngruigo̱ʼ gi̱i̱ ñuʼún náa mbá guʼwá xtíin.*
7 Náa mbá xúgíʼ mbiʼi rí nijngruigo̱ʼ gajmíʼ israelitas,* lá mbá miʼtsú ni̱thu̱u̱n ajngáa rígi̱ tikhuun bi̱ kuya̱ edxu̱u̱ náa xuajin majkhaʼ* ndrígóo Israel, bi̱ nigruígi̱i̱n mu muñewa̱a̱n xuajñunʼ Israel ráʼ. Lá nirajxu̱u̱n mbá miʼtsú, ‹Ndíjkha rí na̱nguá ni̱nila goʼwóʼ ga̱jma̱a̱ ixi̱ cedro rá.›”›
8 Dí xúgi̱, aratháán xa̱bi̱ʼ David: ‹Rígi̱ dí naʼthí Jeobá bi̱ naʼtáñajúúnʼ ángeles: “Ikhúún niríña̱a̱nʼ náa mbaaʼ dí rígá ra̱jxa̱, náa nitiewu̱u̱n mugia̱a̱ʼ, mu xúʼko̱ mi̱dxu̱ʼnú mbi̱ya̱ edxu̱u̱ náa xuajñunʼ Israel.
9 Maxtáá ga̱jma̱á nindxa̱a̱ʼ asndu náá má gídxúʼ. Ma̱ni̱ gámbíin xa̱bu̱ sia̱nʼ ndrígáaʼ náa inaaʼ ga̱jma̱a̱ ma̱ni̱ mba̱a̱ mbiʼyaaʼ. Xó má xa̱bu̱ bi̱ guáʼdáá numún náa tsu̱du̱u̱ ku̱ba̱ʼ.
10 Maraʼwi̱i̱ mbá mbaaʼ náa maxtáa xuajñunʼ Israel. Ikhí gáʼgá kagui̱i̱n ga̱jma̱a̱ makuwá rí asndu nimbá miʼtsú nimbáa ni xáʼni xkájkiu̱ún.* Xa̱bu̱ xkawi̱i̱nʼ xátangi̱ín muni̱ ngíníi xó má nákha ginii.
11 Asndu má nákha mbiʼi rí nigruígi̱i̱n bi̱ munimbaníí xkujndu ndrígu̱ún xa̱bu̱ xuajñunʼ Israel. Ma̱ni̱ rí mbi̱ya̱a̱ jxa̱a̱ʼ náa xúgíinʼ xa̱bu̱ sia̱nʼ ndrígáaʼ.
Ma̱ngaa Jeobá niʼtháanʼ rí Jeobá má gáʼni mbá guʼwáaʼ.*
12 Índo̱ gáʼga̱nú mbiʼi rí makhañáaʼ ga̱jma̱a̱ mbi̱ya̱a̱ jxa̱a̱ʼ gajmiáanʼ wajin xiʼñáaʼ. Ma̱ni̱ rí bi̱ gáʼkha̱ náa ikháán, a̱ʼdiáaʼ maʼtáñajunʼ nda̱wa̱á rí ikháán, ga̱jma̱a̱ ma̱ni̱ rí naʼtáñajunʼ mbajyúuʼ.
13 Ikhaa nindxu̱u̱ bi̱ maʼni mbá guʼwá náa marigá mbiʼyuʼ ga̱jma̱a̱ ikhúún ma̱ni̱ rí maʼtáñajunʼ mbajyúuʼ asndu kámuu.
14 Ikhúún mani̱ndxu̱ʼ anu̱u̱,* ikhaa mani̱ndxu̱u̱ a̱ʼdióʼ. Índo̱ ikhaa gáʼni mbá dí ra̱májánʼ, ikhúún maxprígúu ga̱jma̱a̱ xkuíyá ndrígu̱ún xa̱bu̱. Xó má índo̱ xa̱bu̱ nuxnún e̱jñu̱ún.*
15 Xárígúu rí nandoʼ ka̱yo̱o̱* xó má nirígúu dí nindoʼ ka̱yo̱o̱ Saúl. Nákhá ginii nindoʼ ka̱yo̱o̱ Saúl, mú rí xúgi̱ nánguá. Niyejxíngayii Saúl náa ikháán.
16 Guʼwáaʼ ga̱jma̱a̱ dí naratáñajunʼ marigá má xúʼko̱ asndu kámuu náa ikháán. Ga̱jma̱a̱ xília̱a̱ʼ marigá má xúʼko̱ asndu kámuu”›”.
17 Natán niʼthúu̱n xúgíʼ ajngáa rígi̱ David ga̱jma̱a̱ xúgíʼ rí niwasngájmáá.*
18 Ikhú rey David ni̱jkha̱ ga̱jma̱a̱ nigi̱ʼi̱ náa inuu Jeobá, niʼthúu̱n: “Tátá Jeobá bi̱ itháán mba̱a̱, tsáá lá nindxu̱ʼ ikhúún rá. Tsíín lá nindxu̱ún bi̱ naguwáʼ náa goʼwóʼ mu mi̱dxa̱ʼ jchúún asndu gi̱i̱ rá.
19 Tátá Jeobá bi̱ itháán mba̱a̱, xóo nda̱a̱ rí kaʼníí rígi̱ tayáá ikháán, numuu rí ma̱ngaa narathúnʼ dí goʼwóo xa̱bia̱a̱ʼ mbajyúuʼ asndu kámuu. Ga̱jma̱a̱ rígi̱ nindxu̱u̱ mbá xtángoo náa xúgíinʼ xa̱bu̱ numbaaʼ, Tátá Jeobá bi̱ itháán mba̱a̱.
20 Ndiéjunʼ lá xóó gándoo gátháanʼ ikhúún bi̱ nindxu̱ʼ xa̱bia̱a̱ʼ David dí ikháán má natatsiniúnʼ májánʼ rá. Tátá Jeobá bi̱ itháán mba̱a̱.
21 Xó má nirathúnʼ ga̱jma̱a̱ xóo dí gíwánʼ náa a̱jkia̱a̱nʼ, nitani̱ xúgíʼ dí mba̱ʼu̱ rígi̱ ga̱jma̱a̱ nitasngájmáá mbaʼyoo xa̱bia̱a̱ʼ.
22 Ikha jngóo gajkhun dí mba̱a̱n, Tátá Jeobá bi̱ itháán mba̱a̱. Ndawa̱a̱ nimbáa xóo ikháán ga̱jma̱a̱ ndawa̱a̱ i̱mba̱a̱ Dios xóo ikháán, xúgíʼ rí nidxawíínxu gajkhun nindxu̱u̱.
23 Lá rígá i̱mba̱ xuajin náa tsu̱du̱u̱ ku̱ba̱ʼ xóo xuajñaanʼ Israel ráʼ. Dios ndrígóʼ, ikháán nidxu̱ʼ ga̱jma̱a̱ nitani̱ káwíin xa̱bu̱ xuajñaanʼ, nitani̱ majmaʼnuuʼ mbiʼyaaʼ índo̱ nitani̱ rí mba̱ʼu̱ ma̱ngaa rí mitsaanʼ* ga̱jma̱a̱ numún ikhiin. Ga̱jma̱a̱ numuu xuajñaanʼ bi̱ nitani̱ kríyaaʼ náa Egipto, mu mani̱ndxu̱u̱ xuajñaanʼ nitaxkawíin xa̱bu̱ ga̱jma̱a̱ dioses ndrígu̱ún.
24 Nitani̱ rí xuajin Israel mani̱ndxu̱u̱ xuajñanʼ asndu kámuu. Ga̱jma̱a̱ ikháán, Tátá Jeobá ni̱dxu̱ʼnú ninindxa̱a̱ʼ Dios ndrígóo.
25 Dí xúgi̱, Jeobá Dios, atani̱ dí mbajyúuʼ asndu kámuu dí nitaxúdaminaʼ náa xa̱bia̱a̱ʼ ga̱jma̱a̱ náa goʼwóo, ma̱ngaa atanimbáníí dí nitaxúdaminaʼ.
26 Mbiʼyaaʼ maʼni mba̱a̱ asndu kámuu, mu xúʼko̱ xa̱bu̱ muthi: ‹Jeobá bi̱ naʼtáñajúúnʼ ángeles nindxu̱u̱ Dios ndrígóo Israel›. Ga̱jma̱a̱ dí mbáa bi̱ gáʼkha̱ náa xa̱bia̱a̱ʼ David maxtáa asndu kámuu náa inaaʼ.
27 Numuu dí ikháán Jeobá, bi̱ naʼtáñajúúnʼ ángeles, Dios ndrígóo Israel, nitasngájmáá xa̱bia̱a̱ʼ índo̱ niratháán: ‹Ma̱ni̱ mbá guʼwáaʼ›.* Ikha jngóo xa̱bia̱a̱ʼ naʼngo̱o̱ a̱jkiu̱u̱n* maʼtákáñaaʼ xígi̱ kaʼnii.
28 Tátá Jeobá bi̱ itháán mba̱a̱, ikháán nindxa̱a̱ʼ Dios bi̱ gajkhun ga̱jma̱a̱ ajngáa’ nindxu̱u̱ gajkhun. Nitaxúdaminaʼ dí májánʼ rígi̱ náa xa̱bia̱a̱ʼ.
29 Ikha jngóo, mbá péñu,* atani̱ tsajkurámááʼ goʼwóo xa̱bia̱a̱ʼ, ga̱jma̱a̱ dí marigá má xúʼko̱ asndu kámuu náa ikháán. Numuu rí ikháán Tátá Jeobá bi̱ itháán mba̱a̱, nitaxúdaminaʼ. Ga̱jma̱a̱ dí ikháán gátani̱ tsajkurámááʼ goʼwóo xa̱bia̱a̱ʼ asndu kámuu”.
Mbaʼa nota
^ O “náa naʼtáñajunʼ”.
^ O “gaʼyee, bi̱ naʼthí dí marigá”.
^ O “E̱jna̱”.
^ Rí nandoo gáʼthúu̱n guʼwá náa nduyamajkuíí Dios.
^ Náa ajngáa hebreo naʼthí, “e̱ji̱i̱n Israel”.
^ O “tribu”.
^ O “xáʼni gajmúún”.
^ O “bi̱ gáguwáʼ náa ikháán mutañajunʼ”.
^ O “tátée”.
^ O mbáa “Adán”.
^ O “visión”.
^ O “nagui̱i̱”.
^ O “bi̱ gáguwáʼ náa ikháán mutañajunʼ”.
^ Náa ajngáa hebreo naʼthí, “ni̱ʼkha̱ a̱jkiu̱u̱n”.
^ O “ataniu̱ʼ mbá rí májánʼ”.
