Raga̱jma̱ libro rí niʼnirámáʼ Samuel 8:1-18
8 Nda̱wa̱á, David nixmínaʼ gajmíi̱n filisteos ga̱jma̱a̱ niʼngo̱o̱ niʼni gajmíi̱n. Nirígú káʼñúúnʼ xuajin Meteg-Amá.
2 Ma̱ngaa niʼngo̱o̱ niʼni gajmíi̱n moabitas. Nisnguti̱gi̱i̱n mbayííʼ ga̱jma̱a̱ nigiéwiin ga̱jma̱a̱ mbá cuerda, bi̱ nigiéwiin ga̱jma̱a̱ rí maʼni a̱jma̱ cuerda nagudíin, mú bi̱ nigiéwiin ga̱jma̱a̱ mbóó cuerda naniñúúnʼ rí makuwá. Xúʼko̱ niʼni rí moabitas niguánú ninindxu̱ún xa̱bi̱i̱ David ga̱jma̱a̱ nini̱ numáá.
3 David niʼngo̱o̱ niʼni ga̱jma̱a̱ Hadadézer a̱ʼdióo Rehod, rey bi̱ na̱ʼkha̱ náa Zobá, índo̱ ikhaa xtáa rayáʼ xóo magruigúu mbayuuʼ náa mañu Éufrates.
4 David nigrui̱gú káyúuʼ mbá 1,700 soldado bi̱ nudrúwíin wáyú ga̱jma̱a̱ mbá 20,000 soldado bi̱ nagún ga̱jma̱a̱ rajkúún. Nda̱wa̱á niniñúúnʼ gúʼxíinʼ xúgíinʼ wáyú bi̱ nagún kudúún carros, mú káaʼ 100 bi̱ nda̱a̱ rí niʼniún.
5 Índo̱ Sirios bi̱ kúwá náa Damasco niguwáʼ gúmbayíí rey Hadadézer bi̱ xtáa náa Zobá, David nigudíin mbá 22,000 dí ikhiin.
6 Ikhú David niniñúúnʼ rí makuwá soldado náa Siria náa naʼtáñajuunʼ Damasco, xúʼko̱ niʼni rí xa̱bu̱ sirios niguánú ninindxu̱ún xa̱bi̱i̱ ga̱jma̱a̱ nini̱ numáá. Jeobá naʼni rí maʼngo̱o̱* David asndu náá má e̱jkha̱.
7 Ma̱ngaa David nigruigú káʼñúúnʼ xa̱bi̱i̱ Hadadézer escudo dijndi dí niguma ga̱jma̱a̱ oro rí guáʼdáá ga̱jma̱a̱ ni̱jkha̱a̱ kagu̱u̱ náa Jerusalén.
8 Rey David ni̱jkha̱a̱ kagu̱u̱ mbaʼa cobre dí rígá náa Bétah ga̱jma̱a̱ náa Berotái, xuajin náa naʼtáñajunʼ Hadadézer.
9 Rey Toi bi̱ na̱ʼkha̱ náa Hamat niʼdxawuun rí David niʼngo̱o̱ niʼni gajmíi̱n mbá xúgíinʼ soldado ndrígóo Hadadézer.
10 Ikha jngóo Toi nikuʼmaa Joram bi̱ nindxu̱u̱ a̱ʼdióo, náa rey David mu marajxu̱u̱ xú káʼnii xtáa ga̱jma̱a̱ maʼthúu̱n rí májánʼ niʼni, rí niʼngo̱o̱ nixmínaʼ ga̱jma̱a̱ Hadadézer (numuu rí Hadadézer mbaʼa nuthu nixmínaʼ ga̱jma̱a̱ Toi). Joram ni̱jkha̱ kagu̱u̱ plata, oro ga̱jma̱a̱ cobre náa David.
11 Rey David nigujxi̱i̱ mu maxnúu Jeobá, xó má niʼni wájííʼ plata ga̱jma̱a̱ oro rí guáʼdáá náa xúgíʼ xuajin bi̱ niʼngo̱o̱ niʼni gajmíi̱n:
12 Xó má Siria, Moab, ammonitas, filisteos ga̱jma̱a̱ amalequitas, ma̱ngaa rí niguanáa niʼni Hadadézer a̱ʼdióo Rehob rey bi̱ xtáa náa Zobá.
13 David ma̱ngaa niguma mba̱a̱ mbiʼyuu índo̱ nitanga̱a̱ náa nigudíin mbá 18,000 edomitas náa mata* rí mbiʼyuu Idú.*
14 Nigruigi̱i̱n soldado náa Edom. Náa mbá xúgíʼ mbayuuʼ Edom nigruigi̱i̱n soldado ga̱jma̱a̱ mbá xúgíinʼ edomitas niguánú ninindxu̱ún xa̱bi̱i̱ David. Jeobá naʼni rí maʼngo̱o̱ David asndu náá má e̱jkha̱.
15 David niʼtáñajunʼ má xúʼko̱ náa xúgíʼ Israel ga̱jma̱a̱ niʼnimbánuu má xúʼko̱ numún xúgíinʼ xa̱bu̱ xó má kaʼyoo.
16 Joab a̱ʼdióo Zeruyá ikhaa naʼtáñajúúnʼ soldado ga̱jma̱a̱ Jehosafat a̱ʼdióo Ahilud ikhaa naʼnirámáʼ dí naʼni rey.
17 Sadoc a̱ʼdióo Ahitub ga̱jma̱a̱ Ahimélec a̱ʼdióo Abiatar nindxu̱ún ndxajkun ga̱jma̱a̱ Seraya nindxu̱u̱ secretario.
18 Benaya a̱ʼdióo Jehoiadá naʼtáñajúúnʼ keretitas ga̱jma̱a̱ peletitas, ga̱jma̱a̱ e̱ji̱i̱n David niguánú ninindxu̱ún bi̱ ndiya̱ edxu̱u̱.*
