Raga̱jma̱ libro rí niʼnirámáʼ Samuel 9:1-13
-
David naʼniuu rí májánʼ Mefibóset (1-13)
9 David niʼthí: “Lá xtáa xóó mbáa náa goʼwóo Saúl bi̱ ga̱jma̱a̱ numuu Jonatán ma̱ndoo maniu̱u̱ dí májánʼ* ráʼ.”
2 Náa goʼwóo Saúl xtáa mbáa xa̱bu̱ bi̱ mbiʼyuu Zibá, ikha jngóo nindxa̱ʼwa̱a̱ ma̱ʼkha̱. Rey David nirajxu̱u̱: “Nindxa̱a̱ʼ Zibá ráʼ.” Ikhaa niriʼñuu. “Aan ni̱ndxu̱ʼ xa̱bia̱a̱ʼ”.
3 Rey David nirajxu̱u̱ xóó: “Lá xtáa xóó mbáa náa goʼwóo Saúl bi̱ ikhúún ma̱ndoo masngajmúu dí májáanʼ a̱jkiu̱u̱n Dios ráʼ.” Zibá niriʼñuu: “Xtáa xóó mbáa a̱ʼdióo Jonatán bi̱ tsíyoo gáʼga”.*
4 Rey nirajxu̱u̱: “Náá mina̱a̱ʼ xtáa xá.” Zibá niriʼñuu: “Xtáa náa goʼwóo Makir a̱ʼdióo Amiel, náa Lo-Debar”.
5 Ikhú mbá nacha̱ rey David nikuʼma dí magún gúyáaʼ náa goʼwóo Makir a̱ʼdióo Amiel, náa Lo-Debar.
6 Ikhú Mefibóset, a̱ʼdióo Jonatán, a̱ʼdióo Saúl, nito̱ʼo̱o̱ náa xtáa David. Mbá nacha̱ nigiʼnduti̱ga̱* ga̱jma̱a̱ nismbáti̱go̱o̱ mbayííʼ. David niʼthúu̱n: “¡Mefibóset!”, ikhaa niriʼñuu: “Gi̱i̱ xtáa xa̱bia̱a̱ʼ”.
7 “David niʼthúu̱n, xámíñáaʼ, numuu dí masngajmáaʼ dí májáanʼ a̱jkiu̱nʼ ga̱jma̱a̱ numuu ana̱a̱ʼ* Jonatán. Maxna̱a̱ʼ mida̱a̱ mbá xúgíʼ mbayuuʼ xiʼñáaʼ Saúl ga̱jma̱a̱ matatsiʼtsu* má xúʼko̱ náa mésoʼ”.
8 Ikhú Mefibóset nitanga̱a̱ nismbáti̱go̱o̱ ga̱jma̱a̱ niʼthúu̱n: “Tsáa lá ni̱ndxu̱ʼ ikhúún mu marmáʼáan a̱jkia̱a̱nʼ xtayoʼ, dí ni̱ndxu̱ʼ xóo mbáa xu̱wánʼ bi̱ nikháñúu rá.”
9 Ikhú rey nikuʼma dí maguwáʼ kuya̱a̱ Zibá, bi̱ nambáyúu Saúl, niʼthúu̱n: “Xúgíʼ dí kaʼyoo Saúl ga̱jma̱a̱ dí rígá náa goʼwóo maxna̱a̱ a̱ʼdá xíñiiʼ patriáanʼ Saúl.
10 Ikháán gajmiáanʼ e̱jña̱a̱ʼ, mangiin xa̱bia̱a̱ʼ mudu náa ku̱ba̱ʼ ga̱jma̱a̱ murajxi̱i̱ dí gájma̱a̱, mu xúʼko̱ bi̱ kúwá náa goʼwóo a̱ʼdá xíñiiʼ patriáanʼ muguáʼdáá ganitsu. Mú Mefibóset, a̱ʼdá xíñiiʼ patriáanʼ makuiʼtsu má xúʼko̱ náa mésoʼ”.
Numuu dí Zibá gíʼdiin mbá 15 e̱ji̱i̱n ga̱jma̱a̱ mbá 20 xa̱bi̱i̱.
11 Ikhú Zibá niʼthúu̱n rey: “Xa̱bia̱a̱ʼ maʼni xúgíʼ dí tátioʼ rey niʼtáñajuunʼ”. Asndu má nákha ikhú Mefibóset nigíʼdúu nikuiʼtsu náa mésóo David xóo mbáa a̱ʼdióo rey.
12 Mefibóset gíʼdaa mbáa a̱ʼdióo chíʼgíiʼ* bi̱ mbiʼyuu Micá. Mbá xúgíinʼ bi̱ kúwá náa goʼwóo Zibá ninindxu̱ún xa̱bi̱i̱ Mefibóset.
13 Mefibóset bi̱ tsíyoo gáʼga, xtáa náa Jerusalén numuu dí nakuiʼtsu má xúʼko̱ náa mésóo rey.
Mbaʼa nota
^ O “gúʼxíiʼ”.
^ O “nixngutigamínáʼ”.
^ O “tátiáaʼ”.
^ Náa ajngáa hebreo naʼthí, “miʼtsu pan”.
^ O “lajuíin”.
