Raga̱jma̱ i̱yi̱i̱ʼ rí na̱jkha̱ inún Tesalonicenses 1:1-12
1 I̱yi̱i̱ʼ rígi̱ niʼnirámáʼ Pablo, Silvano* ga̱jma̱a̱ Timoteo mu maʼga inún bi̱ nagimbíi̱n* náa Tesalónica bi̱ kúwíin mbóó gajmiún Anu̱lú Dios ga̱jma̱a̱ Tátá Jesucristo:
2 Garigá rí májánʼ wéñuuʼ a̱jkiu̱u̱n Dios náa ikháanʼla ga̱jma̱a̱ rí tsímáá ndrígóo Anu̱lú Dios ma̱ngaa ndrígóo Tátá Jesucristo.
3 Nakumuxu̱ rí katsudáanʼ má xúʼko̱ mu muxna̱a̱ núma̱aʼ Dios ga̱jma̱a̱ numala a̱ngui̱nʼ, nindxu̱u̱ májánʼ rí munixu̱, numuu rí fe ndrígála naʼni gújkhúʼ má xúʼko̱ ga̱jma̱a̱ rí nanda̱la kuyamíjna̱ ndajoo itháan.
4 Ikháanʼxu asndu nu̱ni̱ mbaʼumíjna̱xu̱ índo̱ nu̱ta̱ ga̱jma̱a̱ numala náa nagimbíi̱n bi̱ nuni̱ ñajuunʼ Dios, numuu rí naʼngala náa naguma gináanʼ ma̱ngaa rí nusngajmála fe náa ga̱ʼkhu̱ rí kuwáanʼ ruraʼníí.
5 Xúgíʼ rígi̱ nasngájma rí nindxu̱u̱ jmbu rí xóo Dios na̱nda̱ʼa̱a̱ cuenta ga̱jma̱a̱ nasngájma rí ikháanʼ kaʼyala mundrígu̱u̱ rí naʼtáñajunʼ Xa̱bu̱ Ñajunʼ ndrígóo Dios* ga̱jma̱a̱ numuu rí ikháanʼ kúwáanʼ rumíniiʼ.
6 Májánʼ má rí Dios ma’ni numi̱ín ga̱jma̱a̱ ga̱ʼkhu̱ bi̱ kúwá runi̱ gínáanʼla.*
7 Mú ikháanʼ bi̱ kúwáanʼla rumíníiʼ* maʼni̱i̱ a̱jkia̱la, xó má ikháanʼxu, índo̱ gákujmaa Tátá Jesús náa mekhuíí gajmíi̱n ángeles ndrígióo bi̱ guáʼdáá tsiakii,
8 náa majñu̱u̱ʼ riʼyu̱u̱ aguʼ, índo̱ gáʼni mumíníiʼ xa̱bu̱ bi̱ tséniʼniiʼ Dios ga̱jma̱a̱ bi̱ tsénimbu̱ún ajngáa rí májánʼ ga̱jma̱a̱ numuu Jesús bi̱ nindxu̱u̱ Tátá ndrígúlú.
9 Xígi̱ kaʼnii Tátá gándi̱ʼi̱i̱n cuenta xa̱bu̱ bugi̱, mumíníiʼ rí asndu mambíin kámuu mbiʼi, xúʼko̱ gáguma gámbíin náa inuu Tátá ga̱jma̱a̱ náa mba̱a̱ tsiakii rí gíʼdoo,
10 índo̱ gáʼkha̱a̱ Tátá ndrígúlú mu maguma mba̱a̱ gajmíi̱n a̱ngui̱i̱n bi̱ mikaʼwiin, xúgíinʼ bi̱ guáʼdáá fe náa ikhaa maʼniún tsiánguá, mangáanʼla makuwáanʼla ikhí numuu rí ninimbala ajngáa rí ikháanʼxu ni̱tala.
11 Ga̱jma̱a̱ numuu rígi̱ rí nutajkháanxu* má xúʼko̱ ga̱jma̱á numala, mu Dios ndrígúlú mbaʼyoo rí kaʼyala mundrígúu náa rí niwatsaʼwála ga̱jma̱a̱ rí tsiakii ndrígóo mambáyala mu̱ni̱ xúgíʼ rí májánʼ rí ikhaa nanigu̱u̱ʼ ga̱jma̱a̱ xúgíʼ rí nuni̱la ga̱jma̱a̱ numuu fe.
12 Mu xúʼko̱ maguma mba̱a̱ mbiʼyuu Jesús bi̱ nindxu̱u̱ Tátá ndrígúlú náa ikháanʼ ga̱jma̱a̱ ikháanʼla maguma mbaʼwáanʼ gajmiála ikhaa, xó má rí májánʼ wéñuuʼ a̱jkiu̱u̱n Dios ga̱jma̱a̱ Tátá Jesucristo.
Mbaʼa nota
^ Ma̱ngaa nutháán Silas.
^ Náa ajngáa griego naʼthí, “ga̱ʼkhu̱”.
^ Náa ajngáa griego naʼthí, “ga̱ʼkhu̱”.
^ O “nunixu̱ tsajkuun”.
