Raga̱jma̱ i̱yi̱i̱ʼ rí na̱jkha̱ inún Tesalonicenses 2:1-17
2 A̱ngui̱nʼ, ga̱jma̱a̱ numuu rí ma̱ʼkha̱a̱* Jesucristo bi̱ nindxu̱u̱ Tátá ndrígúlú ga̱jma̱a̱ rí ikháanʼ mu̱wáanʼ gajmiúlú ikhaa, nunda̱ʼa̱la
2 rí xúniʼñámíjná rí muni̱ nduwáanʼla, ni má xámiñala ga̱jma̱a̱ numuu mbá ajngáa rí nakujma̱á rí na̱ʼkha̱* náa Dios o mbá ajngáa rí najuiʼthá o mbá i̱yi̱i̱ʼ náa nakujmaa rí ikháanʼ ninixu̱ náa naʼthí rí mbiʼi ndrígóo Jeobá* ni̱ʼkha̱nú má.
3 Xúniʼñámíjná rí nimbáa ma’ni nduwáanʼla, numuu rí mbiʼi rúʼko̱ xóó xáʼkha̱nú, asndu índo̱ gákujmiin bi̱ tsíñún gúyáá* Dios ga̱jma̱a̱ índo̱ gákujmaa xa̱bu̱ ra̱májáanʼ, xa̱bu̱ buʼko̱ maguma gámbáa.
4 Ikhaa nindxu̱u̱ xa̱bu̱ sia̱nʼ ga̱jma̱a̱ bi̱ nakujximínáʼ náa xúgíinʼ bi̱ nunimíjna̱ rí ni̱ndxu̱ún dios o nindxu̱u̱ bi̱ nagruigú gamajkhu, ikha jngóo nagi̱ʼi̱ náa guʼwá rí nduyamajkuíí Dios, ma̱ngaa nasngájmaminaʼ pa̱jnu náa inún xa̱bu̱ xóo mbáa dios.
5 Lá tsérmáʼáan a̱jkia̱la rí ikhúúnʼ ni̱tala rígi̱ nákha nixtáá ga̱jma̱á nindxa̱la ráʼ.
6 Mú rí xúgi̱ ndu̱ya̱a̱ ndiéjunʼ rí nawi̱ji̱jtu̱u̱n, mu xúʼko̱ ikhaa makujmaa índo̱ gáʼganú mbiʼi rí phú kaʼyoo.
7 Gajkhun má rí na̱jkha̱ rakujmaa dí rígá ngu̱ʼwa̱ dí nindxu̱u̱ ra̱májánʼ, mú marigá ngu̱ʼwa̱ má xúʼko̱ asndu índo̱ gándati̱ga̱a̱ bi̱ xúgi̱ xtáa rawi̱ji̱jtu̱u̱n.
8 Ikhú makujmaa xa̱bu̱ bi̱ ra̱májáanʼ, bi̱ Tátá Jesús maʼni gámbáa ga̱jma̱a̱ ajngáa rí gíʼdoo tsiakii rí nagájnuu náa rawuunʼ,* rí xóo makujmaa índo̱ gáʼkha̱a̱,* rúʼko̱ gáʼni gámbáa.
9 Numuu rí Gixa̱a̱* nindxu̱u̱ bi̱ nambáyúu ma̱ʼkha̱* xa̱bu̱ ra̱májáanʼ bugi̱ mu maʼni xúgíʼ enii ñajunʼ rí nasngájma tsiakii ga̱jma̱a̱ xúgíʼ enii milagros* dí itháan mba̱ʼu̱ rí nindxu̱u̱ nduwaʼ
10 ga̱jma̱a̱ majmuu xúgíʼ enii rí minduwaʼ mu maʼninduwiinʼ bi̱ nagún náa makhañún, nindxu̱u̱ rí muda̱a̱ʼ numuu rí táʼndún gúndrigú rí maʼndún kuyáá rí gajkhun mu ma̱ndoo makáwíin.
11 Ikha jngóo Dios naniñuuʼ rí maguma nduwiinʼ ga̱jma̱a̱ nduwaʼ rúʼko̱,
12 mu xúʼko̱ xúgíinʼ ikhiin mixtandi̱ʼi̱i̱n cuenta, numuu rí túnimbu̱u̱n náa rí gajkhun, ninigu̱u̱nʼ itháan dí ra̱májánʼ.
13 Nakumuxu̱ rí gíʼmáanʼxu̱ muxna̱a̱ má xúʼko̱ núma̱aʼ Dios ga̱jma̱a̱ numala, a̱ngui̱nʼ bi̱ nandoo kaʼyala Jeobá,* numuu rí asndu nákha ginii Dios niraʼwáanʼla mu makáwáanʼ índo̱ niʼni kaʼwáanʼla ga̱jma̱a̱ espíritu* ndrígóo, ma̱ngaa ga̱jma̱a̱ numuu fe rí kuaʼdáála náa rí gajkhun.
14 Ikhaa numuu rígi̱ rí ikhaa nindxa̱ʼwála náa majñu̱u̱ʼ ajngáa májánʼ rí ikháanʼxu nitaráʼala, mu xúʼko̱ mangáanʼ ma̱ndoo mundrígú gamajkhu rí magruigú Jesucristo bi̱ nindxu̱u̱ Tátá ndrígúlú.
15 Ikha jngóo a̱ngui̱nʼ, guguajúnla jmbu, gurajthunla jxa̱ʼ kiʼsngáa rí ikháanʼxu nisngála, tséʼniuu á mu nindxu̱u̱ ajngáa o mbá i̱yi̱i̱ʼ ndrígúxu̱.
16 Ma̱ngaa Jesucristo bi̱ nindxu̱u̱ Tátá ndrígúlú ga̱jma̱a̱ Anu̱lú Dios bi̱ nandoo kaʼyulú, bi̱ nixnúlú rí maʼni̱i̱ a̱jkiu̱lú kámuu ga̱jma̱a̱ mbá rí mitsaanʼ kua̱ʼthi̱i̱n maski ajndu rakáʼyulú,
17 muni̱i̱ a̱jkia̱la ga̱jma̱a̱ rí maguajún jmbu, náa xúgíʼ ajngáa ga̱jma̱a̱ náa xúgíʼ ñajunʼ májánʼ rí nu̱nila.
Mbaʼa nota
^ O “apostasía”.
^ Náa ajngáa griego naʼthí, “espíritu rí nagájnuu náa rawuunʼ”.
^ Náa ajngáa griego naʼthí, “tsinaʼ”.
^ O “xi̱ʼ”.
