Raga̱jma̱ i̱yi̱i̱ʼ rí na̱jkha̱ inún Tesalonicenses 3:1-18
3 Iwáá kayuuʼ a̱ngui̱nʼ, gutajkáan* má xúʼko̱ ga̱jma̱á numuxu, mu ajngá rawuunʼ Jeobá* mawán ri̱go̱o̱ nacha̱ ga̱jma̱a̱ maguma mba̱a̱, xó má narígá náa ikháanʼla,
2 mu xúʼko̱ makáwáanʼxu náa xa̱bu̱ bi̱ ra̱ʼkhá tháán mixkawi̱i̱nʼ, numuu dí raʼkháa xúgíinʼ guáʼdáá fe.
3 Mú Tátá nindxu̱u̱ jmbii, ikhaa maxnála tsiakii ga̱jma̱a̱ mañewanla náa Gixa̱a̱.
4 Ga̱jma̱a̱ numuu Tátá ndu̱ya̱a̱xu gajkhun rí ikháanʼ nunimbala ga̱jma̱a̱ munimbaníí má xúʼko̱ ikha ndrígúxu̱.
5 Tátá má gámbáyála, maxná ikhoo a̱jkia̱la* mu maʼndala kuya̱a̱ má xúʼko̱ Dios ma̱ngaa rí maʼngala má xúʼko̱ ga̱jma̱a̱ numuu Cristo.
6 Rí xúgi̱ a̱ngui̱nʼ, náa mbiʼyuu Jesucristo bi̱ nindxu̱u̱ Tátá ndrígúlú, nuxnalaxu̱ ikha rígi̱, rí gunitsíngumijnála náa xúgíinʼ a̱ngiu̱lú bi̱ tséjngrui̱gu̱u̱n májánʼ ga̱jma̱a̱ tsénimbáníí ikha rí nindrígula náa ikháanʼxu.
7 Ikháanʼ má ndu̱ya̱a̱ xú kaʼnii gíʼmaa mbu̱yariduxu̱, numuu rí ikháanʼxu na̱nguá ninialaxu̱ dí ra̱májánʼ,
8 na̱nguá niphúxu̱ xúʼkhiín ganitsu ndrígóo mbáa. Rí ninixu̱, niñejunʼ mbiʼíí mbruʼun rí asndu na̱nguá ndiya̱a̱xujxu̱ ma̱ngaa ninixu̱ tsiakimijna mu xúʼko̱ xúnda̱ʼa̱a̱ nimbáa rí maʼni numuu rí gáʼyuxu̱.
9 Raʼkháa ga̱jma̱a̱ numuu rí xándoo munda̱ʼa̱, ninduxu̱ muʼgíʼ mbá xkri̱da rí ikháanʼla mbuyaridáá.
10 Ma̱ngaa nákhá nikúwáanʼxu ga̱jma̱á nindxa̱la, nixna̱laxu̱ kiʼtáñajunʼ rígi̱: “Á mu mbáa tsíyoo gáñajunʼ, xákuiʼtsu má ma̱ngaa”.
11 Numuu rí nidxáwíínxu̱ dí tikhuun tséjngruigu̱u̱n májánʼ náa ikháanʼla, tséñajunʼ ga̱jma̱a̱ nuxudamíjna̱ náa dí ra̱káʼñún.
12 Ga̱jma̱a̱ numuu Tátá Jesucristo nutunxu̱ ga̱jma̱a̱ nutakáñúnxu̱ xa̱bu̱ buʼko̱ rí muñejunʼ ga̱jma̱a̱ mu̱phu̱ ganitsu rí ikhiin má nduyáʼ.
13 Mú ikháanʼla a̱ngui̱nʼ xúniʼñáánʼ ru̱ni̱ dí májánʼ.
14 Mú, á mu mbáa tséʼnimbo̱o̱ rí nutaxu náa i̱yi̱i̱ʼ rígi̱, gusngajmáan* tsáa nindxu̱u̱ ga̱jma̱a̱ guniʼñááʼ rambáxa gajmiánla mu xúʼko̱ mati̱yu̱u̱ʼ.
15 Mú xúya̱a̱la xóo mbáa bi̱ sia̱nʼ gajmiála, rí gíʼmaa mu̱ni̱, guxna̱a̱la consejo xóo mbáa ndxájulú.
16 Mínáaʼ má Tátá bi̱ gíʼdoo rí tsímáá, gáxnala tsímáá náa xúgíʼ. Tátá gáxtáa má xúʼko̱ ga̱jma̱á nindxa̱la.
17 Ikhúúnʼ Pablo, nanirámáʼ i̱yi̱i̱ʼ rígi̱ ga̱jma̱a̱ ñawúnʼ mu marajxáanʼla. Rígi̱ nasngájma xóo nindxu̱u̱ i̱yi̱i̱ʼ ndrígóʼ, xúgi̱ kaʼnii eniraʼmáʼ.
18 Rí májánʼ wéñuuʼ a̱jkiu̱u̱n Jesucristo bi̱ ni̱ndxu̱u̱ Tátá ndrígúlú garigá náa xúgiáanʼ ikháanʼla.
