Raga̱jma̱ i̱yi̱i̱ʼ rí na̱jkha̱ inuu Timoteo 2:1-26
2 A̱ʼdióʼ nindxa̱a̱ʼ, ayáa tsiakii ga̱jma̱a̱ numuu rí májánʼ wéñuuʼ a̱jkiu̱u̱n Cristo Jesús.
2 Xúgíʼ rí nitadxawíín náa ikhúúnʼ ga̱jma̱a̱ rí mbaʼin ndiyáá, araxnángawún xa̱bu̱ jmbiin mu xúʼko̱ ikhiin majmañún musngúún eʼwíinʼ.
3 Xóo mbáa májáanʼ soldado ndrígio̱o̱ Cristo Jesús, gaʼnga̱a̱ʼ náa rí ndayóoʼ matamíniiʼ.
4 Nimbáa soldado tsékudamina’* náa i̱ʼwáʼ ñajunʼ náa madaaʼ mbújkha̱a̱ rí maxtáa ga̱jma̱a̱ á mu nandoo maʼni gagi̱i̱ a̱jkiu̱u̱n bi̱ ndiyáaʼ.
5 Xúʼko̱ má náa gitsíin, i̱ndó madaaʼ* mbáa á mu naʼtsíin xó má awan dí rígá.
6 Xa̱bu̱ bi̱ naʼdu bi̱ nañajunʼ gakhi̱i̱, ikhaa gíʼmaa mi̱khu̱ ginii dí najma̱a̱.
7 Atatsaʼwáminaʼ má xúʼko̱ náa rí xtáá ratha̱nʼ, Tátá gáʼni makrua̱ʼa̱a̱ʼ náa mbá xúgíʼ.
8 Garmáʼáan a̱jkia̱a̱nʼ rí Jesucristo nitujxi̱i̱* náa majñúnʼ wajinʼ, ga̱jma̱a̱ ikhaa na̱ʼkha̱ náa e̱ji̱i̱n David, xó má ajngáa májánʼ rí ikhúúnʼ nataráʼa,
9 dí xtáá ramínuuʼ ga̱jma̱a̱ numuu, ma̱ngaa dí kruʼúún náa guʼwá e̱jua̱nʼ xóo mbáa xa̱bu̱ ra̱májáanʼ. Mú ajngá rawuunʼ Dios na̱nguá kaxtuʼwájma ga̱jma̱a̱ cadena.
10 Ikhaa numuu rúʼko̱ rí naʼngo̱ʼ náa xúgíʼ, na̱ni̱ ga̱jma̱a̱ numún bi̱ kaxtaʼwíin, mu xúʼko̱ ikhiin raʼkháa i̱ndó makáwíin ga̱jma̱a̱ numuu Cristo Jesús, ma̱ngaa rí mudrigú gamajkhu asndu kámuu.
11 Rí na̱tha̱ nindxu̱u̱ gajkhun: Á mu nakháñulú gajmiúlú ikhaa, gajkhun rí makuwáánʼ mbu̱júu̱ʼ gajmiúlú ikhaa,
12 á mu naʼngulú má xúʼko̱, xúʼko̱ má gúʼtañájunʼ gajmiúlú ma̱ngaa, á mu nuʼthá rí tséniʼniiʼ, xúʼko̱ má ikhaa maʼthí rí tséʼniniáanʼlú,
13 á mu ikháanʼlú nuniʼñáánʼ raguajún jmbu, ikhaa mani̱ndxu̱u̱ má xúʼko̱ jmbii, numuu rí ikhaa xándoo maʼthí rí tséʼninuminaʼ.
14 Atani̱ dí marmáʼáan má xúʼko̱ a̱jkiu̱ún rígi̱, ga̱jma̱a̱ araxnún ikha náa inuu Dios dí xágiʼdu̱u̱n ga̱jma̱a̱ numuu rígi̱,* numuu rí tséyambáá nditháan, i̱ndó naʼni magawúúnʼ bi̱ nudxawíín.
15 Atani̱ asndu xó má eʼnga̱a̱ʼ mu maraxnaxíminaʼ náa Dios, xóo mbáa bi̱ naxtriguíi, mbáa bi̱ nañajunʼ bi̱ nda̱a̱ nimbá rí maʼni mati̱yu̱u̱ʼ, bi̱ najmuu ajngá rawuunʼ Dios* xó má gíʼmaa.
16 Mú, atani gaʼduunʼ ajngáa tséjmaa, rí nawi̱yu̱u̱ʼ kaʼyoo dí kaʼwu, rí naʼni dí xíʼyamajkuíí itháan Dios,
17 ga̱jma̱a̱ ajngáa rúʼko̱ nindxu̱u̱ xóo ska rí naʼgaroʼoo.* Himeneo ga̱jma̱a̱ Fileto ni̱ndxu̱ún mangiin bi̱ nuni̱ migaroʼoo ajngáa rígi̱.
18 Xa̱bu̱ bugi̱ ninitsíngumijna̱ náa rí gajkhun, nuthi rí nigabi̱ín* xa̱bu̱ nirígá má, ga̱jma̱a̱ nuni̱ rí tikhuun mambáa fe ndrígu̱ún.
19 Maski ajndu xúʼko̱, rí nigíʼ Dios wíji̱ gújkhúʼ ga̱jma̱a̱ kiʼnirámáʼ ajngáa rígi̱ xóo mbá sello: “Jeobá* naʼniniúúnʼ bi̱ kaʼñún”, ga̱jma̱a̱ “asndu tsáá bi̱ gáʼthí mbiʼyuu Jeobá* ganiñuuʼ dí ra̱májánʼ”.
20 Xó má ikháán tayáá, náa mbá guʼwá mba̱a̱ raʼkháa i̱ndó rígá rayaʼ dí oro ga̱jma̱a̱ plata. Ma̱ngaa rígá rí ki̱ʼni̱ ga̱jma̱a̱ ixi̱, ga̱jma̱a̱ ku̱ba̱ʼ, tikhuu najmaa mbiʼi rí gíʼdoo numuu* ga̱jma̱a̱ i̱ʼwáʼ najmaa xúgíʼ mbiʼi.*
21 Ikha jngóo bi̱ natsíngúun’ náa rayaʼ dí najmaa xúgíʼ mbiʼi, mani̱ndxu̱u̱ xóo mbá rayaʼ dí najmaa náa mbiʼi rí gíʼdoo numuu, nindxu̱u̱ mbá rayaʼ kaʼwu rí najmuu bi̱ goʼwóo ga̱jma̱a̱ rígá xawii mu majmaa náa xúgíʼ enii ñajunʼ rí májánʼ.
22 Ikha jngóo atani̱ gaʼduunʼ rí nagua̱ʼa̱ muni̱ jiámá ga̱jma̱a̱ wa̱ʼxa̱ʼ, atayáʼ rí jmbu, araʼdáá fe, ngajua ga̱jma̱a̱ rí tsímáá, mbóó gátani̱ rígi̱ gajmiáanʼ bi̱ nugri̱ga̱a̱ Tátá ga̱jma̱a̱ mbá a̱jkiu̱ún kaʼwu.
23 Ma̱ngaa atani̱ gaʼduunʼ ajngáa tséjmaa dí ragíʼdoo numuu, numuu rí ikháán má natayáá dí rígi̱ naʼni rí magi̱ʼdu̱u̱n.
24 Ñumbáá ndrígóo Tátá tséyóoʼ má maʼni xkujndu, gíʼmaa mani̱ndxu̱u̱ májáanʼ xa̱bu̱ náa xúgíinʼ, majmañuu maʼsngáa, ma̱ngaa rí maʼngo̱o̱ a̱jkiu̱u̱n índo̱ gúni̱i̱ dí ra̱májánʼ
25 ga̱jma̱a̱ rí xákiʼnáa índo̱ gáʼsngún bi̱ tséni̱ rí májánʼ. Mbáa Dios gáʼni rí mata̱nga̱a̱ a̱jkiu̱ún* ga̱jma̱a̱ maʼga kagu̱u̱n muguaʼdáá mbá ku̱ma̱ kájxi̱ rí nindxu̱u̱ gajkhun,
26 mu xúʼko̱ matangi̱ín mundxa̱ʼwa̱a̱ májánʼ edxu̱ún ga̱jma̱a̱ makáwíin náa tsáʼkhá ndrígóo Gixa̱a̱, numuu rí nduya niguguiin mu muni̱ rí ikhaa nandoo.
Mbaʼa nota
^ Náa ajngáa griego naʼthí, “tsémbráʼaminaʼ”.
^ Náa ajngáa griego naʼthí, “corona”.
^ O “nigabi̱i̱”, “ndiʼya̱a̱”.
^ Náa ajngáa griego naʼthí, “ga̱jma̱a̱ numuu ajngáa”.
^ Náa ajngáa griego naʼthí, “ajngáa rí gajkhun”.
^ O “gangrena”.
^ O “nitujxi̱ín”, “ndiya̱a̱”.
^ Náa ajngáa griego naʼthí, “nagui̱i̱”.
^ Náa ajngáa griego naʼthí, “tséguíi”.
^ O “mariʼkhu̱u̱ xóo eni̱”.
