Raga̱jma̱ i̱yi̱i̱ʼ rí na̱jkha̱ inuu Timoteo 3:1-17
3 Gíʼmaa ma̱ta̱ya̱a̱ rí índo̱ gáʼni iwáá mbiʼi, maʼni gakhi̱i̱ ga̱jma̱a̱ maʼni mingíjyúuʼ rí maʼngulú.
2 Numuu rí xa̱bu̱ maʼndún kuyamíjna̱ i̱ndó ikhiin, maʼndún kuyáá wéñuuʼ mbújkha̱a̱, majñekún, muxujximíjna̱, mutha tsrigú, xúnimbu̱ún kuñún anu̱ún, xúxnáa núma̱aʼ ga̱jma̱a̱ muniñu̱u̱nʼ eʼwíinʼ,*
3 xáʼndúún kuñún a̱ngiu̱ún, xámbánún mu makuwá tsímáá, muni̱ nduwaʼ, xúñewa̱a̱n rí muni̱, mani̱ndxu̱u̱n xóo xujkhú xáná bi̱ najmangu̱u̱nʼ, xáʼndúún kuyáá rí májánʼ,
4 muniu̱u̱n dí ra̱májánʼ bi̱ nambájxu̱u̱n gajmiún, xúdxun dí marathu̱u̱n, ra̱ʼkhá tháán gúni̱ mbaʼumíjna̱, i̱ndó maʼndún muni̱ rí nanigu̱u̱nʼ ikhiin ki xóo rí maʼndún kuyáá Dios
5 ga̱jma̱a̱ musngajma̱án rí nduyamajkuíí Dios, mú rí xóo kúwá tsésngajma dí nduyamajkuíí ikhaa. Atanitsínguminaʼ náa ikhiin.
6 Náa majñu̱únʼ xa̱bu̱ bugi̱ nagájnún xa̱bekha ra̱míjíinʼ bi̱ natu̱ʼu̱u̱n náa guʼwá, ga̱jma̱a̱ nagún kudiin gu̱ʼu̱ bi̱ guabiinʼ, bi̱ nuxudamíjna̱ wéñuuʼ aʼkhá. Ga̱jma̱a̱ nuniñamíjna̱ rí magumanduwiinʼ ga̱jma̱a̱ mbaʼa enii rí nagua̱ʼa̱ muni̱,
7 ikhiin kúwá rajmañún má xúʼko̱, mú tséʼngu̱u̱n gáguánú makru̱ʼu̱u̱n kájxi̱ ku̱ma̱ rí gajkhun.
8 Xó má Janes ga̱jma̱a̱ Jambres niwiñu̱u̱ʼ kuyáá Moisés, ikhiin mangiin nawiñu̱u̱ʼ kuyáá má xúʼko̱ rí gajkhun. Ni̱ndxu̱ún xa̱bu̱ bi̱ tséndxa̱ʼwa̱a̱ májánʼ edxu̱ún, ikha jngóo Dios tségruiguíin, numuu rí tséni̱ rí kuajtuminaʼ ga̱jma̱a̱ fe.
9 Ikha jngóo xáguánú má mitsínguánʼ wéñuuʼ, numuu rí xúgíinʼ maguánú mbuyáá rí ni̱ndxu̱ún skagu̱nʼ, xó má nigíʼníí a̱jmi̱i̱n xa̱bekha bugi̱.
10 Mú ikháán natanimbaníí tsu̱ma̱á kiʼsngáa ndrígóʼ, ga̱jma̱a̱ nitayaridáá rí xóo xtáá, rí nandoʼ ma̱ni̱, fe ndrígóʼ, rí naʼngo̱o̱ a̱jkiu̱nʼ, ngajua ndrígóʼ ga̱jma̱a̱ rí naʼngo̱ʼ,
11 ga̱jma̱a̱ natayáá májánʼ xóo niguma gínún, ma̱ngaa ga̱ʼkhu̱ dí niraʼnuu, dí xóo nigíʼnuʼ náa Antioquía, Iconio ga̱jma̱a̱ Listra. Niʼngo̱ʼ náa xúgíʼ dí nimínuuʼ rígi̱ ga̱jma̱a̱ Tátá má niʼni kríñu̱u̱nʼ náa xúgíʼ.
12 Xúʼko̱ má xúgíinʼ bi̱ nandún makuwá ruyamajkuíí Dios gajmiún Cristo Jesús, mangiin mumíniiʼ.
13 Mú xa̱bu̱ bi̱ ra̱míjíinʼ ga̱jma̱a̱ bi̱ nuninduwaʼ muni̱ itháan dí ra̱májánʼ, muni̱ nduwiinʼ eʼwíinʼ ga̱jma̱a̱ maguma nduwiinʼ.
14 Mú ikháán atagíʼ matani̱ rí nijmañaaʼ ga̱jma̱a̱ rí nimbáyaaʼ mu matanimbaaʼ, numuu rí natayáá má tsíin nisngáaʼ
15 ga̱jma̱a̱ asndu nákha chíʼgíinʼ nitatsiʼnuuʼ ajngá rawuunʼ Dios, rí ma̱ndoo mambáyáaʼ maraʼdáá ku̱ma̱ rí gáʼyóoʼ mu makríñanʼ ga̱jma̱a̱ numuu fe rí xtaʼdáá náa Cristo Jesús.
16 Xúgíʼ rí Kiʼniraʼmáʼ náa i̱yi̱i̱ʼ mitsúʼkháan na̱ʼkha̱ náa Dios, nayambáá mu miʼsngáa, mu maxprígúlú, mu mu̱ʼni̱ jmbi̱i̱ rí nu̱ʼni̱ ga̱jma̱a̱ mu maʼsngúlú mu̱ʼni̱ rí májánʼ,
17 mu xúʼko̱ xa̱bi̱i̱ Dios maxtáa xawii ga̱jma̱a̱ majmañuu maʼni kájxi̱ xúgíʼ enii ñajunʼ rí májánʼ.
Mbaʼa nota
^ O “muniña̱a̱ʼ Dios”.
