Eclesiastés 1:1-18
1 Ajngáa rígi̱ niʼthí bi̱ nagímbíin xa̱bu̱, a̱ʼdióo David bi̱ nindxu̱u̱ rey náa Jerusalén.
2 “¡Rí nda̱a̱ numuu mbá kayuuʼ!, eʼthí bi̱ nagímbíin xa̱bu̱,¡rí nda̱a̱ numuu mbá kayuuʼ! ¡Xúgíʼ nindxu̱u̱ ndíí!”.
3 Ndiéjunʼ gáda̱a̱ʼ mbáa xa̱bu̱ dí nañajunʼ gakhi̱i̱ náa tsu̱du̱u̱ ku̱ba̱ʼ* rá.
4 Tikhuun naguwáʼ ga̱jma̱a̱ eʼwíinʼ nagúun,mú ku̱ba̱ʼ marigá má xúʼko̱ asndu kámuu.
5 Nagájnuu a̱jkha̱ʼ ga̱jma̱a̱ narámaaʼ,ikhú mbá nacha̱ natanga̱a̱ má mbu̱júu̱ náa nagájnuu.
6 Giñánʼ na̱jkha̱ xígií náa sur ga̱jma̱a̱ nda̱wa̱á na̱jkha̱ xígií náa norte.
Najngutuáʼáan, tséwi̱ji̱i̱ rajngutuáʼáan... Giñánʼ najngutuáʼáan má xúʼko̱.
7 Xúgíʼ mañu najkha̱a̱ náa lamáa,* mú lamáa tséjnííʼ.
Mañu natanga̱a̱ má náa nigájnuu mu xúʼko̱ mata̱nga̱a̱ magajnúu mbu̱júu̱.
8 Xúgíʼ dí rígá naʼni dí maʼni néʼngu̱u̱nrí asndu xáʼngo̱o̱ gáʼthí mbáa.
Iduu xa̱bu̱ tségiʼmuu rí ndaʼyoo,ni má tséjnííʼ náa cháʼwuun rí naʼdxawuun.
9 Dí nirígá nákha ginii, rúʼko̱ má gátanga̱a̱ marigá mbu̱júu̱,ga̱jma̱a̱ dí niguma má mata̱nga̱a̱ maguma mbu̱júu̱,nda̱a̱ nimbá rí nuxi̱ʼ náa tsu̱du̱u̱ ku̱ba̱ʼ.
10 Lá rígá mbá dí ma̱ndoo muʼthá “Rígi̱ dí nuxi̱ʼ ráʼ.”
Rúʼko̱ rígá má asndu nákha wajyúuʼ.
Rígá má asndu nákha xóó tségumáánʼ ikháánʼlú.
11 Nimbáa tsérmáʼáan a̱jkiu̱u̱n eni̱ xa̱bu̱ bi̱ nikúwá nákha wajyúuʼ,ni má xármáʼáan a̱jkiu̱u̱n nimbáa gúni̱ bi̱ gáguwáʼ nda̱wa̱á,ni má ikhiin xármáʼáan a̱jkiu̱ún gúni̱ bi̱ gáguwáʼ itháán nda̱wa̱á.
12 Ikhúún bi̱ nagímbíin xa̱bu̱, ninindxu̱ʼ rey ndrígóo Israel náa Jerusalén.
13 Niraʼwi̱i̱ majmuʼ ku̱ma̱ ndrígóʼ mu manigajma̱a̱ xúgíʼ rí niguma náa agoo mekhu..., ndiʼyáʼ mba̱yo̱o̱ ga̱jma̱a̱ numuu ñajunʼ dí naʼni majmáa a̱jkiu̱ún xa̱bu̱, rí Dios nixnúún ikhiin mu xúʼko̱ maguaʼdáá rí muni̱.
14 Ndi̱yo̱o̱ mbá xúgíʼ ñajunʼ dí naguma náa tsu̱du̱u̱ ku̱ba̱ʼ,rígi̱ nindxu̱u̱ dí ni̱jkhánú ndi̱yo̱o̱: Xúgíʼ nindxu̱u̱ ndíí, nindxu̱u̱ xóo dí maraxkháá giñánʼ.
15 Rí niguningaa, xándoo maguma jmbi̱i̱,ga̱jma̱a̱ rí nda̱a̱, xándoo magixnuu.
16 Ikhú ni̱thu̱u̱n a̱jkiu̱nʼ: “Atayáá, ni̱jkhánú nigúʼdoo wéñuuʼ ku̱ma̱, itháán ki xóo mbá xúgíinʼ bi̱ nikúwíin nákha ginii náa Jerusalén, a̱jkiu̱nʼ ni̱jkha̱nú nijmañuu ga̱jma̱a̱ nigiʼdoo ku̱ma̱”.
17 Ndiʼyáʼ majmañuʼ itháán ga̱jma̱a̱ xúʼko̱ má ma̱ngaa ndiʼyáʼ mba̱yo̱o̱ mbá xúgíʼ dí xóo eni̱ xa̱bu̱ skágunʼ, rúʼko̱ ma̱ngaa nindxu̱u̱ xóo dí maraxkháá giñánʼ.
18 Numuu rí majmañaaʼ wéñuuʼ naʼni rí majmáa a̱jkia̱a̱nʼ,ikha jngóo bi̱ ndayáʼ magiʼdoo itháan ku̱ma̱ naʼni dí ga̱ʼkhu̱ ndrígóo maʼni mbaʼa.
