Eclesiastés 3:1-22
-
Rígá tiempo mu maguma xúgíʼ (1-8)
-
Dí makuwáanʼ gagi nindxu̱u̱ regalo dí nixnúlú Dios (9-15)
-
“Nigíwánʼ náa a̱jkiu̱ún xa̱bu̱ numbaaʼ rí maʼndún makuwá kámuu mbiʼi” (11)
-
-
Dios naʼni dí májánʼ índo̱ nandi̱ʼi̱ín cuenta xa̱bu̱ (16, 17)
-
“Dí naguáʼníí xa̱bu̱ numbaaʼ ikháá má eguáʼníí xujkhúʼ ma̱ngaa” (18-22)
-
Xúgíinʼ natangiín náa yujndaʼ (20)
-
3 Rígá tiempo mu maguma mbá xúgíʼ,rígá mbá tiempo mu matani̱ mámbá ñajunʼ náa agoo mekhu:
2 Mbá tiempo magumán ga̱jma̱a̱ mbá tiempo makañáaʼ,mbá tiempo matadu ga̱jma̱a̱ mbá tiempo matrubu rí nijuiʼdu.
3 Mbá tiempo mataxíyáa mbáa ga̱jma̱a̱ mbá tiempo rí matani̱ maʼni̱i̱ a̱jkiu̱u̱n,mbá tiempo matani̱ gámbáa ga̱jma̱a̱ mbá tiempo rí matani̱ guʼwá.
4 Mbá tiempo rí matambi̱ya̱ʼ ga̱jma̱a̱ mbá tiempo rí matandu̱ʼwa̱,mbá tiempo maraxtaa ngíná ga̱jma̱a̱ mbá tiempo rí maratsiá.*
5 Mbá tiempo matada̱ʼ itsí ga̱jma̱a̱ mbá tiempo matagímbóó itsí,mbá tiempo mbiyaráʼaa mbáa ga̱jma̱a̱ mbá tiempo dí xáyaraʼaa.
6 Mbá tiempo rí mataʼyáaʼ* ga̱jma̱a̱ mbá tiempo rí matatsiʼñááʼ ratayáaʼ,mbá tiempo rí matiejxíi ga̱jma̱a̱ mbá tiempo rí mataxiyáa.
7 Mbá tiempo rí mataxkuʼtu* ga̱jma̱a̱ mbá tiempo rí maraxmíi,mbá tiempo dí xárata̱ ga̱jma̱a̱ mbá tiempo dí marata̱.
8 Mbá tiempo rí maʼndaaʼ xtayáá mbá* ga̱jma̱a̱ mbá tiempo rí xáʼndaaʼ xtayáá,mbá tiempo dí marigá guerra ga̱jma̱a̱ mbá tiempo dí marigá tsímáá.
9 Ndiéjunʼ edaaʼ xa̱bu̱ bi̱ nañajunʼ ga̱jma̱a̱ xúgíʼ tsiaki̱i̱ rí naʼni rá.
10 Ndi̱yo̱o̱ ñajunʼ rí Dios nixnún e̱jñu̱ún xa̱bu̱ numbaaʼ mu muguáʼdáá rí muni̱.
11 Dios niʼni mbá xúgíʼ náa mbiʼi rí ndiyóoʼ maguma ga̱jma̱a̱ ra̱ʼkhá tháán mitsaanʼ* rí niʼni. Asndu nigíwánʼ náa a̱jkiu̱ún xa̱bu̱ numbaaʼ rí maʼndún makuwá kámuu mbiʼi, mú xa̱bu̱ numbaaʼ nditháan xáʼngu̱u̱n gákru̱ʼu̱u̱n kájxi̱* ñajunʼ rí Dios bi̱ gajkhun niʼni.
12 Ni̱jkhánú ndi̱yo̱o̱ rí nda̱a̱ nimbá dí itháan májánʼ dí ma̱ndoo muni̱ ikhiin, ki xóo rí makuwá gagi ga̱jma̱a̱ dí muni̱ rí májánʼ náa mbiʼi rí kúwá.
13 Ma̱ngaa rí xúgíinʼ gúpiʼtsu ga̱jma̱a̱ gu̱wa̱a̱n ma̱ngaa gakuwá gagi ga̱jma̱a̱ numuu ñajunʼ gakhi̱i̱ rí nuni̱. Rúʼko̱ nindxu̱u̱ mbá regalo dí na̱ʼkha̱ náa Dios.
14 Nijmañuʼ rí xúgíʼ dí naʼni Dios bi̱ gajkhun ndajyúuʼ asndu kámuu. Nda̱a̱ nimbá rí mbaʼyóoʼ magrigu̱u̱, ni má nda̱a̱ nimbá rí mbaʼyóoʼ magajta̱a̱. Xígi̱ kaʼnii niʼni Dios bi̱ gajkhun mu xúʼko̱ xa̱bu̱ mamiñún kuyáá.
15 Dí xtáa rarígá, nirígá má, ga̱jma̱a̱ dí marigá, nirígá má. Ga̱jma̱a̱ Dios bi̱ gajkhun maʼngo̱o̱ maʼni rí xa̱bu̱ numbaaʼ nandún ga̱jma̱a̱ rí nduyáʼ.*
16 Ma̱ngaa ndi̱yo̱o̱ rígi̱ náa tsu̱du̱u̱ ku̱ba̱ʼ,* ikhaa dí marigá dí májánʼ, narígá dí ra̱májánʼ, ga̱jma̱a̱ ikhaa dí marigá dí jmbu narígá dí ra̱májánʼ.
17 Ikha jngóo ni̱thu̱u̱n a̱jkiu̱nʼ: “Dios bi̱ gajkhun gánda̱ʼa̱a̱ cuenta xa̱bu̱ májáanʼ ga̱jma̱a̱ xúʼko̱ má xa̱bu̱ ra̱májáanʼ, numuu dí rígá mbá tiempo dí maguma mámbá ñajunʼ ga̱jma̱a̱ rígá mbá tiempo dí maguma rí ndayóoʼ maguma”.
18 Ma̱ngaa ni̱thu̱u̱n a̱jkiu̱nʼ rí Dios bi̱ gajkhun maniñúúnʼ e̱jñu̱ún xa̱bu̱ numbaaʼ dí muraʼníí ga̱ʼkhu̱ mu xúʼko̱ makujmaa xóo nindxu̱ún ga̱jma̱a̱ masngájmúún rí nindxu̱ún xóo xujkhúʼ,
19 numuu dí naguáʼníí xa̱bu̱ numbaaʼ ikháá má eguáʼníí xujkhúʼ ma̱ngaa. Xúgíinʼ ikhiin mbóó má náa egúun. Xó má ekáñuu mbáa xúʼko̱ má ekáñuu i̱mba̱a̱, mbá xúgíinʼ ikhiin mbrígúú xóo eya̱ xi̱ʼ.* Ikha jngóo xa̱biya̱ na̱nguá gíʼdoo itháan numuu ki xóo xujkhúʼ, numuu dí xúgíʼ nindxu̱u̱ ndíí.
20 Mbóó má náa egúun mbá xúgíinʼ. Xúgíinʼ naguwáʼ náa yujndaʼ ga̱jma̱a̱ xúgíinʼ nagúun náa yujndaʼ.
21 Tsiánguá á mu dí xi̱ʼ ndrígu̱ún xa̱bu̱ numbaaʼ natsima̱a̱ rijma̱a̱, ga̱jma̱a̱ á mu xi̱ʼ ndrígu̱ún xujkhúʼ nagajta̱a̱ mbayííʼ náa ku̱ba̱ʼ.
22 Nijkhánú ndi̱yo̱o̱ rí nda̱a̱ nimbá rí itháan májánʼ rí xa̱bu̱ maʼni ki xóo rí maxtáa gagi ga̱jma̱a̱ numuu ñajunʼ rí naʼni, numuu dí rúʼko̱ nindxu̱u̱ rí nadaaʼ. Numuu dí, tsáá lá gándoo maʼniuu mbaʼyoo dí gárigá nda̱wa̱á índo̱ ikhaa ni ndáwa̱a̱ xá.
Mbaʼa nota
^ Náa ajngáa hebreo naʼthí, “makijxi̱i̱n”.
^ O “mataʼyáʼ”.
^ O “mataxkuixi”.
^ O “mbáa”.
^ O “nagui̱i̱”.
^ Náa ajngáa hebreo naʼthí, “náa nagiʼdu̱u̱ ga̱jma̱a̱ náa naguámbá”.
^ O mbáa “rí nindátiga̱”.
^ Náa ajngáa hebreo naʼthí, “náa agoo a̱jkha̱ʼ”.
