Rí na̱jkha̱ inún gálatas 1:1-24
1 I̱yi̱i̱ʼ rígi̱ niʼnirámáʼ Pablo, bi̱ Jesucristo ga̱jma̱a̱ Dios bi̱ nindxu̱u̱ Anu̱u̱ bi̱ nikujxi̱i̱* náa majñúnʼ bi̱ nikháñún niríyáaʼ mu mani̱ndxu̱u̱ apóstol, raʼkháa xa̱bu̱ú niri̱ya̱a̱ʼ.
2 Ikhúúnʼ Pablo ga̱jma̱a̱ xúgíinʼ a̱ngiu̱lú bi̱ kúwá ga̱jma̱á ni̱ndxu̱ʼ nunirámáʼxu mu maʼga náa inala ikháanʼ bi̱ nagimbáanʼla náa Galacia:
3 Garigá rí májánʼ wéñuuʼ a̱jkiu̱u̱n Dios* náa ikháanʼla ga̱jma̱a̱ dí tsímáá ndrígóo Anu̱lú Dios ma̱ngaa ndrígóo Tátá Jesucristo.
4 Ikhaa nixnájximinaʼ ga̱jma̱a̱ numuu aʼkhúlú mu maʼni káwáánʼ náa numbaaʼ xkawiʼ rígi̱* xó má nindoo Anu̱lú Dios,
5 náa ikhaa ga̱ʼga̱ gamajkhu asndu kámuu mbiʼi. Xúʼko̱ gáʼni.*
6 Naʼniuʼ tsiánguá rí nacha̱ wéñuuʼ e̱ni̱ tsíngumijnálá náa bi̱ nindxa̱ʼwálá ga̱jma̱a̱ numuu rí májánʼ wéñuuʼ a̱jkiu̱u̱n Cristo maski ajndu raʼkáyala ga̱jma̱a̱ rí kuwáanʼ rajkuala tsu̱du̱u̱ i̱mba̱ ajngáa rí májánʼ.
7 Raʼkháa numuu dí rígá i̱ʼwáʼ ajngáa rí májánʼ, numuu dí tikhuun nuni̱ dí maguaʼdáálá xkujndu ga̱jma̱a̱ nandún muni gachíí ajngáa rí májánʼ ga̱jma̱a̱ numuu Cristo.
8 Á mu mbáa rí ikháanʼxu, o mbáa ángel mekhuíí, gáʼtáráʼala mbá ajngáa rí májánʼ mixtiʼkhu xóo rí ikháanʼxu nitaráʼala, kaʼyoo rí mamínu̱u̱nʼ.
9 Na̱tala mbúju̱úʼ xó má ni̱tala nákha ginii: Tséʼniuu má asndu tsáá bi̱ gáʼtaraʼala mixtiʼkhu ga̱jma̱a̱ numuu ajngáa rí májánʼ dí nindrígúla, kaʼyoo rí mamínu̱u̱nʼ.
10 Lá rí na̱ni̱ nindxu̱u̱ mu manigu̱u̱nʼ xa̱bu̱ o Dios dxe̱ʼ. Lá xtáá rani̱ mu manigu̱u̱nʼ xa̱bu̱ ráʼ. Á mu káʼníí xtáá rani̱ mu manigu̱u̱nʼ xa̱bu̱, xándoo mani̱ndxu̱ʼ ñumbáá ndrígóo Cristo.
11 Numuu rí nandoʼ dí mbu̱ya̱la a̱ngui̱nʼ, ajngáa májánʼ rí nitaráʼala na̱nguá ni̱ʼkha̱ náa mbáa xa̱bu̱ numbaaʼ,
12 numuu dí tágruígú náa mbáa xa̱bu̱ú ni má tájuiʼsngóʼ, Jesucristo nindxu̱u̱ bi̱ nisngájmuʼ.
13 Gajkhun má rí ikháanʼ nidxawíínla dí najuiʼthá xóo ni̱ndxu̱ʼ ga̱jma̱a̱ nákha nixtáá ra̱ni̱ rí xóo nusngáa bi̱ judíos. Nidxawíínla dí tániʼñúuʼ ra̱ni̱ gíníin bi̱ nuni̱ ñajuunʼ* Dios ga̱jma̱a̱ niʼgíminaʼ rí manigámbíin.
14 Ma̱ngaa ni̱jkhá ragúʼdoo itháan numuʼ náa kiʼsngáa ndrígu̱ún bi̱ judíos ki xóo eʼwíinʼ bi̱ guáʼdáá ikha̱á má tsiguúnʼ xóo ikhúún’ bi̱ kúwá náa xuajñunʼ, numuu dí ni̱ni̱ ga̱jma̱a̱ xúgíʼ a̱jkiu̱nʼ rí naguʼwún nuni̱ wajinʼ xiʼñúnʼ.
15 Mú índo̱ Dios, bi̱ niʼni rí maxtáá* nindxaʼwóʼ numuu rí májánʼ wéñuuʼ a̱jkiu̱u̱n maski ajndu rakáʼyoʼ, ndiʼyoo rí májánʼ
16 majmiuu ikhúúnʼ mu matarúʼún ajngáa rí májánʼ xa̱bu̱ bi̱ kúwá náa i̱ʼwáʼ xuajen mu muninuwiinʼ A̱ʼdióo, índo̱ niríñúuʼ ikhúúnʼ mu ma̱ni̱ rígi̱, na̱nguá nindo̱ʼo̱o̱ consejo nimbáa xa̱bu̱ numbaaʼ.*
17 Ma̱ngaa táʼgá náa Jerusalén gáñúu̱n bi̱ ni̱ndxu̱ún apóstoles nákha ginii ki xóo ikhúúnʼ. Rí ni̱ni̱, ni̱jkhá Arabia ga̱jma̱a̱ nda̱wa̱á nitangu̱ún náa Damasco.
18 Ajtsú tsiguʼ nda̱wa̱á, nitsimuʼ Jerusalén gáyóo Cefas* ga̱jma̱a̱ niguanúʼ ga̱jmu̱ʼ mbá 15 mbiʼi.
19 Mú na̱nguá ndi̱yo̱o̱ i̱mba̱a̱ apóstol, i̱ndó Santiago, giʼtio̱o̱ Tátá.
20 Na̱tala gajkhun rí ndaʼyoo Dios dí naniraʼmáʼ rígi̱ na̱nguá nindxu̱u̱ minduwaʼ.
21 Nda̱wa̱á ni̱jkhá náa mbayuuʼ Siria ga̱jma̱a̱ Cilicia.
22 Mú a̱ngiu̱lú bi̱ nagimbíi̱n bi̱ kúwá náa Judea bi̱ kúwá mbóó jnduʼ gajmiún Cristo xóó túniʼniún mbá kayuuʼ.
23 I̱ndó nidxawíín rí nithi: “Xa̱bu̱ bi̱ nákha ginii ni’ni ngínáanʼlú rí xúgi̱ xtáa raʼtáraʼa ajngáa rí májánʼ ga̱jma̱a̱ numuu fe dí nákha ginii nindoo maʼnigámbáa”.
24 Ikha jngóo nigíʼdi̱i̱ nixnáá gamajkhu Dios ga̱jma̱a̱ numuʼ.
Mbaʼa nota
^ O “niʼnigabi̱i̱”, “niʼni mbaʼya̱a̱”.
^ O “Amén”.
^ Náa ajngáa griego naʼthí, “nirkuajiúnʼ náa xtíjyuu rudúʼ”.
^ Náa ajngáa griego naʼthí, “xuwiʼ ga̱jma̱a̱ eʼdi”.
^ Ma̱ngaa nutháán Pedro.
