Rí na̱jkha̱ inún gálatas 2:1-21
2 Nda̱wa̱á rí ninújngoo 14 tsiguʼ nitanga̱án mbu̱júu̱ náa Jerusalén ga̱jmu̱ʼ Bernabé, ma̱ngaa ni̱jkhá ga̱jmu̱ʼ Tito.
2 Nitsimuʼ numuu dí rígá mbá rí niwasngájmuʼ ga̱jma̱a̱ ni̱thu̱u̱n a̱ngiu̱lú ajngáa rí májánʼ dí xtáá rataráʼa náa bi̱ raʼkhíin judíos. Mú ngu̱ʼwa̱á ni̱thu̱u̱n rígi̱ xa̱bu̱ bi̱ guáʼdáá numún, numuu rí nindoʼ mba̱yo̱o̱ á mu ñajunʼ rí ni̱ni̱ náa Dios nindxu̱u̱ májánʼ o na̱nguá, á mu na̱nguá, mani̱ndxu̱u̱ ndíí rí ni̱ni̱.
3 Ni má Tito, bi̱ xtáa ga̱jma̱á ni̱ndxu̱ʼ, na̱nguá nitsudaa marujtu xtóo xuyuuʼ tsáʼkhúun maski ajndu ikhaa nindxu̱u̱ griego.
4 Xkujndu nigi̱ʼdu̱u̱ náa bi̱ nithíí rí ni̱ndxu̱ún a̱ngiu̱lú, bi̱ ngu̱ʼwa̱á nitu̱ʼu̱u̱n, nda̱a̱ tsu̱ma̱ nitu̱ʼu̱u̱n mu muni̱ gachíí rí nikáwáánʼlú ga̱jma̱a̱ numuu Cristo Jesús, mu xúʼko̱ muni̱ dí manindxu̱lú ñumbáá ndrígóo xtángoo.
5 Mú ikháanʼxu, ni mbá xngaa* túniʼñámíjnáxu̱ ga̱jma̱a̱ túxruígúmijnáxu̱ náa ikhiin, mu xúʼko̱ ajngáa rí májánʼ dí nindxu̱u̱ gajkhun marigá má xúʼko̱ náa ikháanʼla.
6 Ga̱jma̱a̱ numún xa̱bu̱ bi̱ najmaʼniúúnʼ rí guáʼdáá numún, xa̱bu̱ buʼko̱ bi̱ ra̱ʼkhá tháán eyamajkhúún na̱nguá nithunʼ nimbá rí nuxi̱ʼ. Tséʼniuʼ má xú káʼnii ninindxu̱ún numuu rí Dios tséʼyoo xóo kiejxu̱u̱n xa̱bu̱.
7 Ndiyáá rí nixna ngawuʼ dí mataruʼúún ajngáa rí májánʼ bi̱ na̱nguá nithu xtóo xuyuuʼ tsáʼkhún xó má Pedro nixna ngawíí rí maʼtáruʼwúún bi̱ nithu xtóo xuyuuʼ tsáʼkhún.
8 Numuu rí bi̱ nixnúu tsiakii Pedro mu mani̱ndxu̱u̱ apóstol náa majñúúnʼ bi̱ nithu xtóo xuyuuʼ tsáʼkhún, ikhaa má nixnúʼ tsiakii mangúún mu mani̱ndxu̱ʼ apóstol náa majñúnʼ xa̱bu̱ bi̱ na̱nguá ni̱ndxu̱ún judíos.
9 Ikhiin ndiyáá rí nigruigú dí májánʼ wéñuuʼ a̱jkiu̱u̱n Dios maski ajndu rakáʼyoʼ. Ikhú Santiago, Cefas* ga̱jma̱a̱ Juan bi̱ kuya̱ edxu̱u̱* nixruiya̱ʼ ñawún mújúúnʼ náa ikhúún’ ga̱jma̱a̱ náa Bernabé xóo mbá rí nasngájma dí kuwáanʼ mbá kambáxuxu̱, mu ikháanʼxu muʼguá gúñúun bi̱ raʼkhíin judíos ga̱jma̱a̱ ikhiin magún gúñún bi̱ nithu xtóo xuyuuʼ tsáʼkhún.
10 I̱ndó rí nindu̱ʼu̱xu̱ dí marmáʼáan a̱jkiu̱xu̱ ku̱ñu̱u̱n bi̱ mingíníi, mbá rí ni̱ni̱ tsiakimínáʼ manimbánuu.
11 Índo̱ Cefas ni̱ʼkha̱ náa Antioquía ni̱jkhá mínuuʼ gátamíjná ga̱jmu̱ʼ numuu dí raʼkhí dí xtáa raʼni.
12 Numuu rí nákhá xóó tséguáʼnú xa̱bu̱ bi̱ nikuʼmiin Santiago, ikhaa nakuiʼtsu gajmíi̱n xa̱bu̱ bi̱ na̱nguá ni̱ndxu̱ún judíos, mú índo̱ ikhiin niguáʼnú ikhaa niniñuuʼ raʼni, ga̱jma̱a̱ niʼni wájiminaʼ náa ikhiin numuu rí nimíñuu kaʼñún bi̱ nithu xtóo xuyuuʼ tsáʼkhún.
13 Ga̱jma̱a̱ eʼwíinʼ judíos ndiyaridáá rí a̱jma̱ inuu ga̱jma̱a̱ asndu Bernabé niniñaminaʼ maʼni a̱jma̱ inuu xó má ikhiin.
14 Ikha jngóo índo̱ ndi̱yo̱o̱ rí na̱nguá kúwá runimbáníí dí gajkhun xó má naʼthí náa ajngáa rí májánʼ, ni̱thu̱u̱n Cefas náa inún xúgíinʼ: “Ikháán rí nindxa̱a̱ʼ judío natani̱ xóo nuni̱ xa̱bu̱ numbaaʼ raʼkháa xóo nuni̱ bi̱ judíos, náá numuu rí natatsudiin xa̱bu̱ bi̱ raʼkhíin judíos muni̱ rí naguʼwún nuni̱ judíos rá.”
15 Ikháanʼ bi̱ nindxuxu̱ judíos asndu nákha nigumáanʼxu raʼkháa xóo xa̱bu̱ aʼkhá xóo bi̱ na̱nguá ni̱ndxu̱ún judíos,
16 ndu̱ya̱a̱xu̱ rí xa̱bu̱ bi̱ naʼnimbánuu xtángoo tséjmaʼniiʼ rí nindxu̱u̱ jmbii, i̱ndó á mu nagiʼdoo fe náa Jesucristo, ikha jngóo niguaʼdáálú fe náa Cristo Jesús, mu xúʼko̱ majuiʼthá rí ni̱ndxu̱lú xa̱bu̱ jmbii ga̱jma̱a̱ numuu fe rí guaʼdáálu náa Cristo, raʼkháa ga̱jma̱a̱ numuu rí nuʼnimbáníí xtángoo, numuu rí nimbáa xájuiʼthán rí nindxu̱u̱ jmbii ga̱jma̱a̱ numuu rí naʼnimbánuu xtángoo.
17 Ikha jngóo á mu ikháanʼ kúwáanʼ ru̱ʼni̱ tsiakimíjna rí majmaʼniánʼlú rí ni̱ndxu̱lú mbáa xa̱bu̱ jmbii ga̱jma̱a̱ numuu Cristo, maski ajndu xúʼko̱ ni̱ndxu̱lú xa̱bu̱ aʼkhá, lá rúʼko̱ eyoo gáʼthúu̱n rí Cristo niʼniulú tsiakii mu̱ʼni̱ aʼkhá ráʼ. ¡Na̱nguá!
18 Ikha jngóo á mu natangu̱ún na̱ni̱ mbu̱júu̱ʼ rí nákha ginii ni̱ni̱ gámbáa nasngajmá rí xtáá ranújngurámúʼ xtángoo.
19 Mú ikhúún náa majñu̱u̱ʼ xtángoo asndu xóo nikháñuʼ náa xtángoo, mu xúʼko̱ ma̱ndoo maxtáá ga̱jma̱a̱ numuu Dios.
20 Ikhúún kiʼdujmúún náa ixi̱ ga̱jmu̱ʼ Cristo, bi̱ xtáa xúgi̱ nánguá ni̱ndxu̱ʼ ikhúún’, nindxu̱u̱ Cristo bi̱ xtáa ga̱jma̱á ni̱ndxu̱ʼ, rí xóo xtáá nda̱ya náa majñu̱u̱ʼ xuwiʼ rígi̱, xtáá ga̱jma̱a̱ numuu fe náa A̱ʼdióo Dios, bi̱ nindoo kaʼyoʼ ga̱jma̱a̱ nixnáximinaʼ ga̱jma̱á numuʼ.
21 Ikhúún’ tséni gaʼduunʼ rí májánʼ wéñuuʼ a̱jkiu̱u̱n Dios maski ajndu rakáʼyoʼ, á mu ga̱jma̱a̱ numuu xtángoo ma̱ndoo manindxu̱lú mbáa xa̱bu̱ jmbii, nda̱a̱ má numuu rí nikháñuu Cristo.
Mbaʼa nota
^ Náa ajngáa griego naʼthí, “mbá hora”.
^ Ma̱ngaa nutháán Pedro.
^ O “bi̱ nindxu̱ún xóo columnas náa nagimbáánʼ”.
