Rí na̱jkha̱ inún gálatas 4:1-31
4 Rí xúgi̱ na̱tala, á mu mbáa ada̱ chíʼgíiʼ kaʼyoo magruigúu rí makhánáá,* na̱nguá nindxu̱u̱ mixtiʼkuii xóo mbáa ñumbáá, maski ajndu nindxu̱u̱ bi̱ kaʼyoo náa xúgíʼ dí rígá,
2 mú kúwá xa̱bu̱ bi̱ nuñewa̱a̱n ikhaa ga̱jma̱a̱ i̱ʼwáʼ dí rígá asndu mbiʼi rí anu̱u̱ gáʼthí.
3 Xúʼko̱ má mangáánʼ, nákha nini̱ndxu̱lú e̱ji̱n, mangáánʼ nini̱ndxu̱lú ñumbáá náa ku̱ma̱ ndrígu̱ún xa̱bu̱ numbaaʼ.
4 Mú índo̱ ni̱jkha̱nú mbiʼi rí kaʼyoo, Dios nikuʼmaa A̱ʼdióo bi̱ nigumaa náa mbáa a̱ʼgu̱ ga̱jma̱a̱ nigumaa náa majñu̱u̱ʼ xtángoo,
5 mu maʼtsiwíin ga̱jma̱a̱ maʼnikáwíin bi̱ kúwíin náa majñu̱u̱ʼ xtángoo, ga̱jma̱a̱ xúʼko̱ ikháanʼ ma̱ndoo maguaʼnú manindxu̱lú xóo e̱ji̱i̱n.
6 Numuu rí ikháanʼ nindxa̱la e̱ji̱i̱n, ikha jngóo Dios nikuʼma náa a̱jkiu̱lú espíritu ndrígóo A̱ʼdióo ga̱jma̱a̱ espíritu rígi̱ naʼthí: “¡Abba,* Anu̱ʼ!”.
7 Ikha jngóo nánguá ni̱ndxu̱lú ñumbáá, ni̱ndxu̱lú e̱ji̱i̱n. Ga̱jma̱a̱ á mu ni̱ndxu̱lú e̱ji̱i̱n, Dios niʼni rí mangáanʼ mudrígúu rí makhánulúʼ.
8 Numuu rí nákha ikháanʼ xóó tséninúwiinʼla Dios, nini̱ndxa̱la ñumbáá ndrígu̱ún bi̱ na̱nguá ni̱ndxu̱ún dioses.
9 Mú xúgi̱ rí nuninúwiinʼla Dios o xóo muʼthá xúgi̱ rí Dios naniniáanʼla ikháanʼ, náá numuu rí natangáanʼla náa ku̱ma̱ ndrígu̱ún xa̱bu̱ numbaaʼ dí ragíʼdoo tsiakii ga̱jma̱a̱ tséjmaa ma̱ngaa nandala mani̱ndxa̱la ñumbáá ndrígu̱ún mbu̱júu̱ xá.
10 Kuwáanʼ runiriya̱a̱ʼ mbiʼi rí kiejunʼ, gu̱nʼ kiejunʼ, tiempo rí kiejunʼ, tsiguʼ rí kiejunʼ.
11 Naxmiéjunʼ ka̱ya̱la, numuu rí naku̱mu̱ʼ rí ninindxu̱u̱ ndíí tsiakii rí ni̱ni̱ náa ikháanʼla.
12 A̱ngui̱nʼ natakháñala rí mani̱ndxa̱la xóo ikhúúnʼ, numuu rí mangúún ninindxu̱ʼ xó má ikháanʼla. Ikháanʼla na̱nguá niniuʼla dí raʼkhí.
13 Mú ndu̱ya̱a̱la rí ga̱jma̱a̱ numuu mbá nandii, ikha jngóo nindoo nitaráʼala ajngáa rí májánʼ timbá miʼtsu.
14 Maski má ga̱jma̱a̱ numuu nandii rí nigúʼdoo ninindxu̱u̱ mbá tsáʼkhá náa ikháanʼla, mú táwiyala kuyoʼ ga̱jma̱a̱ túphú ndujthúnʼla. Rí phú ni̱ni̱, nindrígiún xóo mbáa ángel ndrígóo Dios, xóo Cristo Jesús.
15 Náá ni̱jkha̱ gagi rí niguáʼdáála rá. Numuu rí nda̱yo̱o̱ gajkhun rí á mu nindoo, nirawíi idala mu mu̱xnu̱ʼ.
16 Lá xúgi̱ ni̱ndxu̱ʼ xa̱bu̱ sia̱nʼ ndrígála numuu rí na̱tala dí gajkhun ráʼ.
17 Ikhiin nandún rí muni̱wájimíjnala náa ikhúúnʼ, mú raʼkháa dí májánʼ rí nandún muni̱. Nandún rí muni̱wájimíjnala náa ikhúúnʼ mu xúʼko̱ ikháanʼ muʼguala kidxu̱únʼ.
18 Gajkhun má rí májánʼ nindxu̱u̱ rí maxtáa mbáa bi̱ nandoo maʼni rí májánʼ, rí maxmiéjuunʼ kaʼyala, raʼkháa i̱ndó índo̱ ikhúúnʼ xtáá ga̱jma̱á nindxa̱la,
19 e̱ji̱nʼ nindxa̱la, nu̱ni̱ rí mamínuuʼ ga̱jma̱a̱ mbá ga̱ʼkhu̱ rí xóo naraʼnuu mbáa a̱ʼgu̱ índo̱ naʼnii a̱ʼdióo, ga̱jma̱a̱ ga̱ʼkhu̱ rígi̱ mbajyúuʼ asndu índo̱ ikháanʼ gúyaridáá rí xóo kaʼnii nindxu̱u̱ Cristo.
20 Manigu̱ʼ wéñuuʼ rí xúgi̱ maxtáá ga̱jma̱á nindxa̱la mu mariʼkhu̱u̱ rí xóo ma̱tala, numuu rí tsékro̱ʼo̱ʼ náá numuu rí xúʼko̱ kuwáanʼ ruguaʼníí.
21 Guthunʼla ikháanʼ bi̱ nandala makuwáanʼ náa majñu̱u̱ʼ xtángoo, lá tsédxawíín rí naʼthí Xtángoo ráʼ.
22 Mbá xkri̱da, náa kiʼnirámáʼ naʼthí rí Abrahán nigiʼdiin a̱jmi̱i̱n e̱ji̱i̱n: Mbáa ninindxu̱u̱ a̱ʼdióo a̱ʼgú ñumbáá* ga̱jma̱a̱ i̱mba̱a̱ ninindxu̱u̱ a̱ʼdióo a̱ʼgu̱ bi̱ na̱nguá nindxu̱u̱ ñumbáá.
23 A̱ʼdióo a̱ʼgú ñumbáá nixtáa xó má mbáa xa̱bu̱ numbaaʼ,* mú a̱ʼdióo a̱ʼgu̱ bi̱ na̱nguá nindxu̱u̱ ñumbáá nixtáa ga̱jma̱a̱ numuu mbá rí Dios nikudaminaʼ maxná.
24 Rí xóo nirígá rígi̱, nakujmaa dí rígá mbá rí nandoo gáʼthúu̱n, numuu rí a̱jmi̱i̱n gu̱ʼu̱ bugi̱ nandoo gáʼthúu̱n a̱jma̱ rí nimbánúún. Mbá rí nimbánuu náa kúbá Sinaí, rí naʼni makuwá ñumbáá ga̱jma̱a̱ nindxu̱u̱ xóo Agar.
25 Agar nandoo gáʼthúu̱n Sinaí, mbá kúbá ndrígóo Arabia, rí nindxu̱u̱ Jerusalén dí rígá xúgi̱, numuu rí ikhaa nindxu̱u̱ ñumbáá gajmíi̱n e̱ji̱i̱n.
26 Mú Jerusalén dí rígá rijma̱a̱, ikhaa na̱nguá nindxu̱u̱ ñumbáá ga̱jma̱a̱ ikhaa nindxu̱u̱ rudulú.
27 Numuu rí kiʼnirámáʼ: “Gaʼdxaaʼ a̱ʼgu̱ bi̱ tséʼnii e̱ji̱n. Atatsaʼwá ga̱jma̱a̱ gagi, a̱ʼgu̱ bi̱ tségiʼdoo gaʼkhiu̱u̱ ada̱. Numuu rí e̱ji̱i̱n a̱ʼgu̱ bi̱ naguanáa ni̱ndxu̱ún itháán mbaʼin ki xóo e̱ji̱i̱n a̱ʼgu̱ bi̱ gíʼdaa ajmbio̱o̱”.
28 Ikha jngóo a̱ngui̱nʼ, ikháanʼ nindxa̱la e̱ji̱n bi̱ niguwáʼ náa mbá rí nijuiʼthá marigá, xó má Isaac.
29 Numuu rí xó má nirígá nákha ikhú, ada̱ bi̱ nigumaa xó má mbáa xa̱bu̱ numbaaʼ* nigíʼdu̱u̱ niʼni gínáa bi̱ nixtáa ga̱jma̱a̱ numuu espíritu santo,* xúʼko̱ má xtáa rarígá xúgi̱ ma̱ngaa.
30 Mú, ndiéjunʼ eʼthí náa Kiʼniraʼmáʼ rá. “Ataxkriya̱a̱ʼ gi̱i̱ a̱ʼgú ñumbáá ga̱jma̱a̱ a̱ʼdióo. Numuu rí a̱ʼdióo a̱ʼgu̱ bi̱ na̱nguá nindxu̱u̱ ñumbáá xáxnúu a̱ʼdióo a̱ʼgú ñumbáá rí makánúu”.
31 Ikha jngóo a̱ngui̱nʼ, na̱nguá ni̱ndxu̱lú e̱ji̱i̱n a̱ʼgú ñumbáá, ni̱ndxu̱lú e̱ji̱i̱n a̱ʼgu̱ bi̱ na̱nguá nindxu̱u̱ ñumbáá.
Mbaʼa nota
^ O “herencia”.
^ Náa ajngáa hebreo o arameo nandoo gáʼthúu̱n ‹¡oh, anu̱ʼ!›.
^ O “a̱ʼgu̱ bi̱ nañajun mbáá”.
^ Náa ajngáa griego naʼthí, “xó má xuwiʼ”.
^ Náa ajngáa griego naʼthí, “xó má xuwiʼ”.
