Rí na̱jkha̱ inún gálatas 5:1-26
5 Cristo niʼni káwáánʼlú mu ní xánindxu̱lú ñumbáá, ikha jngóo gaguajúnla gújkhúʼ ga̱jma̱a̱ xúniʼñámíjná rí matangáanʼ mani̱ndxa̱la ñumbáá mbu̱júu̱.
2 Ikhúúnʼ mínuuʼ Pablo na̱tala rígi̱, á mu nurujtula xtóo xuyuuʼ tsáʼkhánla nda̱a̱ rí gámbáyála rí niʼni Cristo.
3 Mbu̱júu̱ na̱thu̱u̱n asndu tsáa bi̱ gárujthu xtóo xuyuuʼ tsáʼkhúun gíʼmaa rí maʼnimbo̱o̱ xúgíʼ Xtángoo.
4 Ikháanʼ bi̱ nunimíjna̱ rí majmaʼniáanʼ dí nindxa̱la xa̱bu̱ jmbii náa majñu̱u̱ʼ xtángoo na̱nguá kuwáanʼ mbóó gajmiála Cristo, ni̱ni̱ wájímijnála náa rí májánʼ wéñuuʼ a̱jkiu̱u̱n maski ajndu rakáʼyala.
5 Ikháanʼxu ga̱jma̱a̱ numuu espíritu santo* kuáʼthi̱i̱nxu rí muxkamaa rí jmbu dí na̱ʼkha̱ náa fe.
6 Numuu rí makuwáánʼ mbóó jnduʼ gajmiúlú Cristo Jesús, nda̱a̱ rí ejmaa rí matrujtu o xátrujtu xtóo xuyuuʼ tsáʼkháanʼ, dí najmaa nindxu̱u̱ fe dí rígá náa majñu̱u̱ʼ ngajua.
7 Ikháanʼla nikuwáanʼ ragayála májánʼ, tsáá nigíʼ rí maʼni majngrádáanʼla mu ní xúnimbala dí gajkhun rá.
8 Numuu dí ku̱ma̱ rúʼko̱ tséʼkha̱ náa bi̱ xtáa randxaʼwála.
9 Mbá chíʼgíiʼ levadura naʼni makájxi̱i̱ xúgíʼ xúwáʼ.*
10 Naku̱mu̱ʼ ka̱ya̱la ikháanʼ bi̱ kuwáanʼ mbóó gajmiála Tátá, rí xúndxaʼwamíjnala i̱mba̱ nuthu. Asndu tsáá bi̱ naʼni rí muguaʼdáála xkujndu, ikhaa má gágruigúu dí xtáa rayáʼ.
11 A̱ngui̱nʼ, á mu xtáá xóó rasngáa ga̱jma̱a̱ numuu rí muthu xtóo xuyuuʼ tsáʼkhún, xa̱bu̱ xúni̱ gínúún, ga̱jma̱a̱ dí nasngáa numuu Jesús dí nikháñuu náa mbá ixi̱* xáʼningawi̱i̱n xa̱bu̱.
12 Wáá lá gáʼni dí magajnúu xndúún* xa̱bu̱ bi̱ nunimíjna̱ muni̱jngawáanʼla.
13 Ikháanʼla a̱ngui̱nʼ nijuatsaʼwála mu ní xánindxala ñumbáá. Mú xúya̱a̱la rígi̱ mbá rí xóo ma̱ndoo mu̱ni̱ dí nagua̱ʼa̱ xuwiʼ, ga̱jma̱a̱ numuu ngajua rí kuaʼdáá ganindxa̱la ñumbáá náa eʼwíinʼ.
14 Numuu rí xúgíʼ Xtángoo naʼnimbánuu* kiʼtáñajunʼ rígi̱: “Gaʼndaaʼ xtayáá xa̱bu̱ numba ga̱jma̱a̱ʼ xó má eyaaʼ xtayaminaʼ ikháán”.
15 Mú maski ajndu xúʼko̱ kuwáanʼ raphumijnála ga̱jma̱a̱ nu̱ni̱ gawumijnála, guñewumíjna̱ mu xúni̱ gámbámíjnála.
16 Ikha jngóo na̱tala rígi̱: Gajngruigala má xúʼko̱ xóo nandoo espíritu santo mu xúʼko̱ xúni̱ nimbá rí nandoo xuwiʼ.
17 Numuu rí nagua̱ʼa̱ maʼni xuwiʼ nawiji̱jthu̱u̱nʼ espíritu santo ga̱jma̱a̱ espíritu santo nawiji̱jthu̱u̱nʼ xuwiʼ, ikha jngóo ikháanʼla tséni̱ rí nandala mu̱ni̱.
18 Á mu espíritu naxná ikhala, na̱nguá kuwáanʼ náa majñu̱u̱ʼ xtángoo.
19 Nakujmaa kaʼwu rí naʼni xuwiʼ, ikhaa nindxu̱u̱ dí nagua̱ʼa̱ mataba̱a̱ʼ xkawiʼ kayuuʼ ga̱jma̱a̱ʼ mbáa,* rí mitsaga, xúgíʼ enii dí xkawiʼ,*
20 rí matayamajkhún xándú, matani̱ xawan,* maraʼdáá sia̱nʼ, mataxmínaʼ, maxiʼyáaʼ, makásngaña̱a̱ʼ,* xámbánaaʼ, matani̱ wájíinʼ xa̱bu̱, mi̱dxu̱ʼ kidxúúnʼ xa̱bu̱,
21 maxiʼguáaʼ, majnga̱a̱n, manigua̱a̱ʼ ndxa̱a̱ náa rí tsíñewa̱a̱n rí eni̱ ga̱jma̱a̱ xúgíʼ xóo rígi̱. Na̱tala mbu̱júu̱ xó má ni̱tala nákha ginii, xúgíinʼ bi̱ nuni̱ rígi̱ xátaʼa̱án náa naʼtáñajunʼ Xa̱bu̱ Ñajunʼ ndrígóo Dios.*
22 Mú rí naxná espíritu santo nindxu̱u̱ ngajua,* gagi, tsímáá, rí maʼngo̱o̱ a̱jkiu̱lú, mu̱ʼni̱ rí májánʼ, manindxu̱lú xa̱bu̱ májáanʼ a̱jkiu̱u̱n, fe,
23 xákiʼnán, matiewa̱a̱n rí matani̱. Nda̱a̱ mbá xtángoo dí marikhoo xúgíʼ rígi̱.
24 Bi̱ kaʼñún náa Cristo Jesús asndu xóo waʼdujma xuñúnʼ náa ixi̱ ga̱jma̱a̱ rí nakumu̱ún ma̱ngaa rí nagua̱ʼa̱ muni̱ dí ra̱májánʼ.
25 Á mu kuwáánʼ xó má nandoo espíritu santo, ma̱ngaa gajngruigulú má xúʼko̱ xóo rí nandoo espíritu santo.
26 Xúʼni mbaʼumíjna̱, xúʼni mbrígumijná gajmiúlú eʼwíinʼ ga̱jma̱a̱ xáxígulúʼ kuʼyamijná.
Mbaʼa nota
^ O “ñu̱u̱”.
^ Mu xúgi̱ xájmiin gúnimbaníí xtángoo rí nandún wéñuuʼ mambanúu.
^ O mbáa “nagájnuriyo̱o̱ʼ”.
^ O “makiʼnáán mendaʼko”.
^ O “sniguʼ”.
