Rí na̱jkha̱ inún gálatas 6:1-18
6 A̱ngui̱nʼ, á mu mbáa xa̱bu̱ na̱jkha̱ náa kamba̱a̱ dí raʼkhí maski ajndu ikhaa tséʼyoo, ikháanʼla bi̱ kuaʼdáá espíritu santo* gunimíjna̱ rí mumbáyíí xa̱bu̱ buʼko̱. Mú gu̱ni̱ rígi̱ ga̱jma̱a̱ májánʼ ma̱ngaa guñewamíjna̱la numuu rí mangáanʼ migamíi majngutíguáanʼ náa tsáʼkhá.
2 Gumbáyumíjnála má xúʼko̱ ga̱jma̱a̱ rí ku̱da mu xúʼko̱ munimbáníí xtángoo ndrígóo Cristo.
3 Á mu mbáa naku̱mu̱u̱ rí gíʼdoo numuu mú nda̱a̱ rí nindxu̱u̱, xtáa raʼni nduwaminaʼ má ikhaa.
4 Mú mámbáa gíʼmaa mbaʼyoo rí naʼni mu xúʼko̱ magiʼdoo mbá numuu rí maʼdxuu dí ikhaa niʼni, ma̱ngaa rí xáʼni mbríguminaʼ ga̱jma̱a̱ i̱mba̱a̱ xa̱bu̱.
5 Numuu rí mámbáa gíʼmaa maʼni* ñajunʼ rí kaʼyoo maʼni.
6 Ma̱ngaa asndu tsáá bi̱ xtáa rajuiʼsngáá* ajngá rawuunʼ Dios, gaxnúu xúgíʼ enii rí májánʼ bi̱ naʼsngóo.*
7 Xúni̱ nduwamijnála: Nimbáa xándoo matsíjmaa Dios. Rí xtáa raʼdu mbáa, rúʼko̱ má gágujxi̱i̱.
8 Numuu rí á mu natadu náa ikháán rí nandoo xuwiʼ matadrígúu rí xuyaaʼ maʼchúu, mú á mu natadu náa ikháán rí nandoo espíritu santo matandrígúu náa espíritu santo rí maraxtaa kámuu mbiʼi.
9 Ikha jngóo xúniʼñáánʼlú ru̱ʼni̱ rí májánʼ numuu dí maʼga̱nú mbiʼi rí muʼda̱a̱ʼ á mu tségáanʼlú.*
10 Ikha jngóo, xúgi̱ rí nandoo* guʼniu̱u̱n rí májánʼ eʼwíinʼ, mú itháan náa a̱ngiu̱lú bi̱ guáʼdáá ikháá má fe xóo ikháanʼlú.
11 Gu̱ya̱a̱la xú káʼnii mba̱ʼu̱ letra enirámáʼ ga̱jma̱a̱ ñawúnʼ náa ikháanʼla.
12 Bi̱ nunimíjna̱ mutsudáanʼla mu murujtu xtóo xuyuuʼ tsáʼkhánla nandún rí maguanún májánʼ gajmiún xa̱bu̱.* Nuni̱ rígi̱ numuu rí tsíñún maguma gíníin ga̱jma̱a̱ numuu rí Cristo nikháñuu náa ixi̱.*
13 Numuu rí asndu bi̱ nurujthu xtóo xuyuuʼ tsáʼkhún na̱nguá enimbáníí Xtángoo, mú nandún rí ikháanʼ murujthu xtóo xuyuuʼ tsáʼkhánla mu muni̱ mbaʼumíjna̱ ga̱jma̱a̱ rí niguma náa xuyala.
14 Mú ikhúúnʼ nagúʼthu̱u̱n rí xánimbamínaʼ ga̱jma̱a̱ numuu nimbá, i̱ndó ga̱jma̱a̱ numuu rí nikháñuu náa ixi̱ Jesucristo bi̱ nindxu̱u̱ Tátá ndrígúlú, ikhúúnʼ nda̱yo̱o̱ rí numbaaʼ kaʼyoo makhañúu ga̱jma̱a̱ numuu ikhaa, mú numbaaʼ ndaʼyoo rí ikhúúnʼ kaʼyoʼ makhañúʼ ga̱jma̱a̱ numuu ikhaa.
15 Rí matrujtu xtóo xuyuuʼ tsáʼkháanʼ o xátrujtu na̱nguá má gíʼdoo numuu, rí itháán gíʼdoo numuu rí mani̱ndxa̱a̱ʼ i̱mba̱a̱ nuxi̱i̱ʼ xa̱bu̱ bi̱ Dios niʼnii.
16 Garigá rí tsímáá ga̱jma̱a̱ dí nigáwíinʼ a̱jkiu̱u̱n Dios náa xúgíinʼ bi̱ nunimbaníí ikha rígi̱, xúʼko̱, náa Israel ndrígóo Dios.
17 Dí xúgi̱ ga̱jma̱a̱ nda̱wa̱á, nimbáa xáʼni rí magúʼdoʼ xkujndu, numuu rí náa xuyuʼ ka̱ya̱ tsinuuʼ rí ni̱ndxu̱ʼ xóo mbáa ñumbáá ndrígóo Jesús.
18 A̱ngui̱nʼ, garigá náa a̱jkia̱la rí májánʼ wéñuuʼ a̱jkiu̱u̱n Tátá Jesucristo. Xúʼko̱ gáʼni.*
Mbaʼa nota
^ Náa ajngáa griego naʼthí, “rí mámbáa magu̱ rí kaʼyoo magu̱”.
^ O “rajuiʼtháán”.
^ O “naʼthúu̱n”.
^ O “tsékanájkulú”.
^ Náa ajngáa griego naʼthí, “mbiʼi rí kaʼyoo”.
^ Náa ajngáa griego naʼthí, “musngajma rí májánʼ kiejxu̱u̱n náa xuwiʼ”.
^ O “Amén”.
