Génesis 10:1-32
10 Rígi̱ ni̱ndxu̱u̱ historia ndrígu̱ún e̱ji̱i̱n Noé, Sem, Cam, ga̱jma̱a̱ Jafet.
Nda̱wa̱á rí nixnúu ruʼwambiʼ niguáʼdiin e̱jñu̱ún.
2 E̱ji̱i̱n Jafet ninindxu̱u̱, Gómer, Magog, Madái, Javán, Tubal, Mesec ga̱jma̱a̱ Tirás.
3 E̱ji̱i̱n Gómer ninindxu̱u̱, Askenaz, Rifat ga̱jma̱a̱ Togarmá.
4 E̱ji̱i̱n Javán ninindxu̱u̱, Elisá, Tarsis, Kitim ga̱jma̱a̱ Dodanim.
5 E̱jñu̱ún xa̱bu̱ bugi̱ nigún gákúwá náa islas* nikúwá mbá nduʼ xó má ajngáa rí nuthi ga̱jma̱a̱ xó má bi̱ kuñún ma̱ngaa xó má xuajñún.
6 E̱ji̱i̱n Cam ninindxu̱u̱, Cus, Mizraim, Put ga̱jma̱a̱ Canaán.
7 E̱ji̱i̱n Cus ninindxu̱u̱, Sebá, Havilá, Sabtá, Raamá ga̱jma̱a̱ Sabtecá.
E̱ji̱i̱n Raamá ninindxu̱u̱, Seba ga̱jma̱a̱ Dedán.
8 Cus ma̱ngaa ninindxu̱u̱ anu̱u̱* Nemrod, timbáa xa̱bu̱ bi̱ nigiʼdoo itháan numuu* náa tsu̱du̱u̱ ku̱ba̱ʼ.
9 Nemrod ninindxu̱u̱ mbáa xa̱bu̱ bi̱ giʼdoo tsiaki̱i̱, bi̱ nagudíin xujkhúʼ,* bi̱ tsíyoo gáʼyoo Jeobá. Ikha jngóo, rígá ajngáa rígi̱ “ikhaa nindxu̱u̱ xóo Nemrod bi̱ nigiʼdoo tsiaki̱i̱ bi̱ nagudíin xujkhúʼ bi̱ tsíyoo gáʼyoo Jeobá”.
10 Náa nigíʼdu̱u̱ niʼtáñajunʼ, nindxu̱u̱ Babel, Erec, Akkad ga̱jma̱a̱ Calné, náa ku̱ba̱ʼ ndrígóo Sinar.
11 Náa ku̱ba̱ʼ rúʼko̱ nigájnuu ni̱jkha̱ náa Asiria, ikhí nigíʼ Nínive, Rehobot-Ir, Cálah
12 ga̱jma̱a̱ Resen, dí rígá náa majñu̱u̱ʼ Nínive ga̱jma̱a̱ Cálah. Xuajin rígi̱ ninindxu̱u̱ itháan mba̱a̱.*
13 Mizraim ninindxu̱u̱ anu̱u̱ Ludim, Anamim, Lehabim, Naftuhim,
14 Patrusim, Casluhim bi̱ náa niguwáʼ filisteos ga̱jma̱a̱ Caftorim.
15 Canaán ninindxu̱u̱ anu̱u̱ Sidón, ikhaa ninindxu̱u̱ a̱ʼdá giʼniuu. Ma̱ngaa ninindxu̱u̱ anu̱u̱ Het,
16 xó má jebuseos, amorreos, guirgaseos,
17 heveos, arqueos, sineos,
18 arvadeos, zemareos ga̱jma̱a̱ hamateos. Nda̱wa̱á xa̱bu̱ cananeos mbaʼa náa nigún gákuwá.
19 Ikha jngóo náa kri̱ga̱ mbañúúnʼ cananeos, nindxu̱u̱ náa Sidón asndu náa Guerar dí gíʼ mijngii náa Gaza, asndu náa Sodoma, Gomorra, Admá ga̱jma̱a̱ Zeboyim, mijngii náa Lasa.
20 Bigi̱ ninindxu̱ún e̱ji̱i̱n Cam. Bi̱ nikúwá mbá jnduʼ gajmiún bi̱ kuñún, xó má ajngáa rí nuthi ma̱ngaa xó má ku̱bu̱únʼ ga̱jma̱a̱ xuajñún.
21 Sem bi̱ nindxu̱u̱ giʼtio̱o̱* Jafet ma̱ngaa nigiʼdiin e̱ji̱i̱n. Ikhaa ninindxu̱u̱ wajin xiʼñúúnʼ xúgíinʼ e̱ji̱i̱n Éber.
22 Bigi̱ ninindxu̱ún e̱ji̱i̱n Sem, Elam, Asur, Arpaksad, Lud ga̱jma̱a̱ Aram.
23 E̱ji̱i̱n Aram nindxu̱ún Uz, Hul, Guéter ga̱jma̱a̱ Mas.
24 Arpaksad ninindxu̱u̱ anu̱u̱ Selá, ga̱jma̱a̱ Selá ninindxu̱u̱ anu̱u̱ Éber.
25 Éber nigiʼdiin a̱jmi̱i̱n e̱ji̱i̱n. Bi̱ a̱ʼdá giʼniuu nigumbiʼyuu Péleg,* numuu rí mbiʼi rúʼko̱ xa̱bu̱ niruiʼtami̱jna̱ náa numbaaʼ* ga̱jma̱a̱ giʼtio̱o̱ nigumbiʼyuu Joctán.
26 Joctán ninindxu̱u̱ anu̱u̱ Almodad, Sélef, Hazarmávet, Jérah,
27 Hadoram, Uzal, Diclá,
28 Obal, Abimael, Seba,
29 Ofir, Havilá ga̱jma̱a̱ Jobab. Xúgíinʼ bugi̱ ninindxu̱ún e̱ji̱i̱n Joctán.
30 Ikhiin nikúwá náa mbaaʼ dí rígá náa Mesá asndu náa Sefar, náa kúbá ndrígóo Oriente.
31 Bigi̱ ninindxu̱ún e̱ji̱i̱n Sem. Bi̱ nikúwá mbá jnduʼ gajmiún bi̱ kuñún xó má ajngáa rí nuʼthí, ma̱ngaa xó má ku̱bu̱únʼ ga̱jma̱a̱ xuajñún.
32 Bigi̱ ninindxu̱ún e̱jñu̱ún e̱ji̱i̱n Noé, xó má niguwáʼ rakúwá náa mambá guʼwíin ga̱jma̱a̱ xuajñún. Náa xa̱bu̱ bugi̱ niguwáʼ xúgíinʼ xa̱bu̱ bi̱ nikúwá náa ku̱ba̱ʼ nda̱wa̱á rí nixnúu ruʼwambiʼ.
Mbaʼa nota
^ O “ku̱ba̱ʼ rí tuáʼán náa tapo̱o̱ iyaʼ”.
^ O “tátée”.
^ O “nigiʼdoo tsiaki̱i̱”.
^ O “nagudíin xa̱bu̱”.
^ O mbáa “ajtsú xuajin rígi̱ naʼni rí maʼni itháan mba̱a̱ xuajin”.
^ O mbáa “ninindxu̱u̱ ndxájuu Jafet”.
^ Nandoo gáʼthúu̱n “niwiʼtháa”.
^ Náa ajngáa hebreo naʼthí, “niwiʼtáa ku̱ba̱ʼ”.
