Génesis 11:1-32
11 Xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ nuthi ikháá má ajngáa ga̱jma̱a̱ mbáníí xóo ethi.
2 Índo̱ xa̱bu̱ nigún xígií náa nagájnuu a̱jkha̱ʼ* ndiyáá mbá xkua̱ dí rígá náa ku̱ba̱ʼ ndrígóo Sinar, ikha jngóo niguanún ikhí mu makuwá.
3 Ikhú nitamijná: “Gu̱ʼni̱ tabique ga̱jma̱a̱ guxuʼmbúʼ náa aguʼ”. Ikha jngóo nijmún tabique, niniña̱a̱ʼ rajmún itsí ma̱ngaa nijmún alquitrán* mu muxnáá ga̱jma̱a̱.
4 Ikhú nitamijná: “Guʼnilú mbá xuajin ga̱jma̱a̱ mbá guʼwá mitsídánʼ* dí martoʼoo asndu mekhuíí, mu xúʼko̱ majmaʼniááʼlú ga̱jma̱a̱ xúʼko̱ xúʼgua̱ gákuwáanʼ náa xúgíʼ tsu̱du̱u̱ ku̱ba̱ʼ”.
5 Ikhú Jeobá nigajtaa mu mbaʼyoo xuajin ga̱jma̱a̱ guʼwá mitsídánʼ dí xa̱bu̱ nigíʼdi̱i̱ nini̱.
6 Ga̱jma̱a̱ Jeobá niʼthí: “Numuu rí nindxu̱ún mbóó xuajin ga̱jma̱a̱ mbóó ajngáa rí nuthi, tiáá rí nigíʼdi̱i̱ nini̱. Rí xúgi̱ ma̱ʼngu̱u̱n muni̱ asndu ndiéjunʼ má rí gáʼndún.
7 Guʼgualú ikhí, guriʼkuíí ajngún mu xúʼko̱ xákru̱ʼu̱u̱n dí gútamíjná”.
8 Asndu ikhí Jeobá niʼni dí magún gákuwá náa xúgíʼ tsu̱du̱u̱ ku̱ba̱ʼ ga̱jma̱a̱ mañu mañúú nigún runi̱ña̱a̱ʼ runi xuajin.
9 Ikha rúʼko̱ numuu rí xuajin nigumbiʼyuu Babel,* numuu dí ikhí, Jeobá niriʼkhu̱u̱ ajngáa rí nuthi xúgíinʼ xa̱bu̱ bi̱ kúwá náa numbaaʼ, asndu ikhí Jeobá niʼni rí xa̱bu̱ magún gákuwá náa xúgíʼ tsu̱du̱u̱ ku̱ba̱ʼ.
10 Rígi̱ nindxu̱u̱ historia ndrígóo Sem.
Índo̱ Sem gíʼdoo 100 tsiguuʼ, a̱jma̱ tsiguʼ nda̱wa̱á rí nixnúu ruʼwambiʼ, ikhaa ninindxu̱u̱ anu̱u̱* Arpaksad.
11 Nda̱wa̱á rí nigiʼdaa Arpaksad, Sem xóó nixtáa i̱mbá 500 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.*
12 Índo̱ Arpaksad nigiʼdoo 35 tsiguuʼ, ninindxu̱u̱ anu̱u̱ Selá.
13 Nda̱wa̱á rí nigiʼdaa Selá, Arpaksad nixtáa xóó i̱mbá 403 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
14 Índo̱ Selá nigiʼdoo 30 tsiguuʼ ninindxu̱u̱ anu̱u̱ Éber.
15 Nda̱wa̱á rí nigiʼdaa Éber, Selá xóó nixtáa i̱mbá 403 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
16 Índo̱ Éber nigiʼdoo 34 tsiguuʼ ninindxu̱u̱ anu̱u̱ Péleg.
17 Nda̱wa̱á rí nigiʼdaa Péleg, Éber xóó nixtáa i̱mbá 430 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
18 Índo̱ Péleg nigiʼdoo 30 tsiguuʼ ninindxu̱u̱ anu̱u̱ Reú.
19 Nda̱wa̱á rí nigiʼdaa Reú, Péleg xóó nixtáa i̱mbá 209 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
20 Índo̱ Reú nigiʼdoo 32 tsiguʼ ninindxu̱u̱ anu̱u̱ Serug.
21 Nda̱wa̱á rí nigiʼdaa Serug, Reú xóó nixtáa i̱mbá 207 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
22 Índo̱ Serug nigiʼdoo 30 tsiguuʼ ninindxu̱u̱ anu̱u̱ Nacor.
23 Nda̱wa̱á rí nigiʼdaa Nacor, Serug xóó nixtáa i̱mbá 200 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
24 Índo̱ Nacor nigiʼdoo 29 tsiguuʼ ninindxu̱u̱ anu̱u̱ Taré.
25 Nda̱wa̱á rí nigiʼdaa Taré, Nacor xóó nixtáa i̱mbá 119 tsiguʼ. Nigiʼdiin mbaʼiin jiámá ga̱jma̱a̱ wa̱ʼxa̱ʼ.
26 Nda̱wa̱á rí Taré nirámúuʼ 70 tsiguuʼ, nigiʼdaa Abrán, Nacor ga̱jma̱a̱ Harán.
27 Rígi̱ nindxu̱u̱ historia ndrígóo Taré.
Taré ninindxu̱u̱ anu̱u̱ Abrán, Nacor ga̱jma̱a̱ Harán. Harán ninindxu̱u̱ anu̱u̱ Lot.
28 Índo̱ Taré bi̱ nindxu̱u̱ anu̱u̱ xóó kaʼníí xtáa, a̱ʼdióo bi̱ mbiʼyuu Harán nikháñuu náa ku̱ba̱ʼ dí ikhaa nigumaa, Ur náa kúwá xa̱bu̱ caldeos.
29 Abrán ga̱jma̱a̱ Nacor ninigu̱nʼ. A̱ʼgiu̱u̱ Abrán nigumbiʼyuu Sarái ga̱jma̱a̱ a̱ʼgiu̱u̱ Nacor nigumbiʼyuu Milcá, wáxióo Harán. Harán ninindxu̱u̱ anu̱u̱ Milcá ga̱jma̱a̱ Iscá.
30 Sarái na̱nguá gíʼdiin e̱ji̱n, numuu rí tséndoo magiʼdiin.*
31 Taré nigájnuu náa Ur náa kúwá xa̱bu̱ caldeos, ni̱jkha̱ kayáa Abrán bi̱ nindxu̱u̱ a̱ʼdióo ma̱ngaa Sarái bi̱ nindxu̱u̱ guʼgiúunʼ, a̱ʼgiu̱u̱ Abrán, ma̱ngaa Lot bi̱ nindxu̱u̱ a̱ʼdá xíñíiʼ a̱ʼdióo Harán. Nigún gajmiún ikhaa náa ku̱ba̱ʼ ndrígóo Canaán, índo̱ niguáʼnú náa Harán niguanúú nikúwá ikhí.
32 Náa mbá xúgíʼ tsiguʼ rí nixtáa Taré ninindxu̱u̱ 205 tsiguʼ. Nda̱wa̱á nikháñuu náa Harán.
Mbaʼa nota
^ O “este”.
^ Náa ajngáa hebreo naʼthí, “rígi̱ nindxu̱u̱ wabooʼ ga̱jma̱a̱ nañambáá mu xánujngoo iyaʼ”.
^ O “torre”.
^ Rí nandoo gáʼthúu̱n ‹ningawi̱i̱n›.
^ O “tátée”.
^ O “i̱jín go̱ʼo̱”.
^ O “nindxu̱u̱ estéril”.
