Génesis 13:1-18
13 Ikhú Abrán nigájnáa náa Egipto nitsima̱a̱ ni̱jkha̱a̱ náa Négueb. Ni̱jkha̱a̱ ga̱jma̱a̱ a̱ʼgiu̱u̱ ma̱ngaa Lot ga̱jma̱a̱ ni̱jkha̱a̱ kagu̱u̱ xúgíʼ rí gíʼdoo.
2 Abrán ra̱ʼkhá tháán nigiʼdiin xujkhúʼ xúʼko̱ má plata ga̱jma̱a̱ oro.
3 Náa Négueb mámbá náa ni̱jkha̱ ragi̱wa̱nʼ raxtáa asndu náa Betel. Asndu ni̱jkha̱núu náa mbaaʼ dí gíwánʼ náa majñu̱u̱ʼ Betel ga̱jma̱a̱ Hai, náa nixtáa* má nákhá ginii,
4 Náa niʼni mújúunʼ má náa maxnájxi̱ tsigijñaʼ gamajkhu. Ikhí nigríga̱a̱* mbiʼyuu Jeobá.
5 Lot bi̱ na̱jkha̱ ga̱jma̱a̱ Abrán, ma̱ngaa nigiʼdiin mugu̱, xedi̱, ga̱jma̱a̱ guʼwá xtíin.
6 Numuu dí ra̱ʼkhá tháán mbaʼin xujkhúʼ guáʼdiin,* nánguá eʼngo̱o̱ ku̱ba̱ʼ muphiʼtsu ga̱jma̱a̱ nánguá eʼngo̱o̱ makuwá mbá jnduʼ.
7 Ikhaa rúʼko̱ numuu dí baxtiúu Abrán ga̱jma̱a̱ baxtiúu Lot nigiʼdu̱u̱n. (Nákha ikhú xa̱bu̱ cananeos ga̱jma̱a̱ perizitas kúwá náa ku̱ba̱ʼ rúʼko̱).
8 Ikhú Abrán niʼthúu̱n Lot: “Kuʼyamijnálú, mbá péñu* xáʼyóoʼ magi̱ʼdu̱lú* ni má baxtiúlu xáʼyoo magi̱ʼdu̱u̱n.
9 Ikháán ma̱ndoo matraʼwíí mi̱dxu̱ʼ asndu náá má eyaaʼ náa ku̱ba̱ʼ rígi̱, mbá péñu, gu̱ʼni̱ wájímijnálú. Á mu ikháán nadxu̱ʼ xígií náa ñawún xti̱ʼ, ikhúún maʼgá xígií náa ñawún mújúnʼ. Mú, á mu nadxu̱ʼ xígií náa ñawún mújúnʼ, ikhúún maʼgá xígií náa ñawún xti̱ʼ”.
10 Ikhú Lot niyejxi̱ ga̱jma̱a̱ ndiʼyoo xúgíʼ mbaaʼ ndrígóo Jordán asndu Zóar. Ndiʼyoo dí mbaaʼ rúʼko̱ rígá wéñuuʼ iyaʼ, xó má náa jardín* ndrígóo Jeobá ga̱jma̱a̱ xó má náa ku̱ba̱ʼ ndrígóo Egipto. Xúʼko̱ ninindxu̱u̱ nákhá Jeobá xóó tséʼni gámbóo Sodoma ga̱jma̱a̱ Gomorra.
11 Lot niraʼwíí maʼga náa mbaaʼ ndrígóo Jordán ga̱jma̱a̱ ni̱jkha̱ kagu̱u̱ xúgíʼ dí gíʼdoo xígií náa nagájnuu a̱jkha̱ʼ.* Xúʼko̱ nini̱ wájímíjná.
12 Abrán ni̱jkha̱ gáxtáa náa ku̱ba̱ʼ ndrígóo Canaán. Lot ni̱jkha̱ gáxtáa náa xuajin dí rígá náa xkua̱ ndrígóo Jordán nda̱wa̱á nigíʼ guʼwá xtíin ndrígóo náa mijngii Sodoma.
13 Mú xa̱bu̱ Sodoma nindxu̱ún ra̱míjíinʼ ga̱jma̱a̱ nuni̱ aʼkhá mbi̱i̱ʼ náa inuu Jeobá.
14 Nda̱wa̱á dí Lot ga̱jma̱a̱ Abrán nini̱ wájímíjná, Jeobá niʼthúu̱n Abrán: “Mbá péñu, atiejxi̱. Asndu náa xtáa, atiejxi̱ xígií náa norte ga̱jma̱a̱ sur, náa nagájnuu a̱jkha̱ʼ ga̱jma̱a̱ náa narámáaʼ a̱jkha̱ʼ.*
15 Xúgíʼ ku̱ba̱ʼ rí xtaa ratayáá, maxna̱a̱ʼ ikháán ga̱jma̱a̱ e̱jña̱a̱ʼ, mani̱ndxu̱u̱ ndrígala ikháanʼ asndu kámuu.
16 Ma̱ni̱ rí e̱jña̱a̱ʼ maʼni mbaʼin wéñuuʼ xóo jui̱ʼi̱ dí rígá náa tsu̱du̱u̱ ku̱ba̱ʼ. I̱ndó bi̱ maʼngo̱o̱ maguxnuu jui̱ʼi̱ dí rígá náa tsu̱du̱u̱ ku̱ba̱ʼ maʼngo̱o̱ maguxnii e̱jña̱a̱ʼ.
17 Atujxa̱a̱ʼ, ayuʼ rawa̱nʼ náa xúgíʼ ku̱ba̱ʼ rígi̱, numuu rí maxna̱a̱ ikháán”.
18 Ikha jngóo Abrán nigájnuu ni̱jkha̱, ni̱jkha̱ raxtáa náa guʼwá xtíin. Nda̱wa̱á ni̱jkha̱nú náa rígá ixi̱ mba̱ʼu̱ ndrígóo Mamré, náa Hebrón. Ikhí niguanúu maxtáa ga̱jma̱a̱ niʼni mújúunʼ náa maxnájxi̱ tsigijñaʼ gamajkhu náa inuu Jeobá.
Mbaʼa nota
^ O “náa nigíʼ má guʼwá xtíin ndrígóo”.
^ O “nijmúú”.
^ Náa ajngáa hebreo naʼthí, “mbaʼa dí niguáʼdáá”.
^ O “atani̱ mbá rí májánʼ”.
^ O “matsañalo”.
^ O “ixi̱ ri̱ʼi̱”.
^ O “este”.
^ O “oeste”.
