Génesis 14:1-24
14 Nákhá mbiʼi rí nixtáa Amrafel rey ndrígóo Sinar, Arioc rey ndrígóo Elasar, Kedorlaomer rey ndrígóo Elam ga̱jma̱a̱ Tidal rey ndrígóo Goyim,
2 nigiʼdu̱u̱n gajmiún reyes bugi̱, Bera rey ndrígóo Sodoma, Birsá rey ndrígóo Gomorra, Sinab rey ndrígóo Admá, Seméber rey ndrígóo Zeboyim ga̱jma̱a̱ rey ndrígóo Bela, xóo muʼthá, Zóar.
3 Xúgíinʼ ikhiin nigimbíin gajmiún soldado ndrígu̱ún náa mata ndrígóo Sidim,* xóo muʼthá náa lamáa Miríná.*
4 Ikhiin nuñegún má 12 tsiguʼ rí Kedorlaomer nindxu̱u̱ bi̱ naʼtáñajúúnʼ, mú índo̱ niʼni tsiguʼ 13 nánguá nindúún itháan rí majuiʼthá ñajúúnʼ.
5 Índo̱ niʼni tsiguʼ 14, Kedorlaomer gajmíi̱n reyes bi̱ xtáa gajmíi̱n nigún ga̱jma̱a̱ niʼngu̱u̱n niʼni gajmiún xa̱bu̱ refaím náa Asterot-Carnaim, ma̱ngaa xa̱bu̱ zuzim náa Cam, ma̱ngaa xa̱bu̱ emim náa Savé-Quiryataim,
6 ga̱jma̱a̱ xa̱bu̱ horeos náa kúbá ndrígóo Seír asndu náa El-Parán dí mbóó kajua̱a̱ ga̱jma̱a̱ ku̱ba̱ʼ mijxooʼ.*
7 Nda̱wa̱á nitangiín, niguáʼnu náa En-Mispat, xó muʼthá náa Cadés. Nindrigú xúgíʼ mbañúúnʼ xa̱bu̱ amalequitas ga̱jma̱a̱ niʼngu̱u̱n nini gajmiún xa̱bu̱ amorreos bi̱ kúwá náa Hazazón-Tamar.
8 Ikhú rey ndrígóo Sodoma nigájnuu ni̱jkha̱ náa mata* ndrígóo Sidim ga̱jma̱a̱ rey ndrígóo Gomorra, rey ndrígóo Admá, rey ndrígóo Zeboyim ma̱ngaa rey ndrígóo Bela, xóo muʼthá, rey ndrígóo Zóar. Ikhí niniratamijná mu muxmijná gajmiún,
9 Kedorlaomer rey drígóo Elam, Tidal rey ndrígóo Goyim, Amrafel rey ndrígóo Sinar ga̱jma̱a̱ Arioc rey ndrígóo Elasar. A̱jkhui̱i̱n reyes muxmijná gajmiún witsiin.
10 Mú náa mata ndrígóo Sidim rígá wéñuuʼ puzu dí ka̱jnu̱ʼ alquitrán.* Índo̱ rey ndrígóo Sodoma ga̱jma̱a̱ Gomorra nigímijna̱ magañún, nijnguíʼíin náa puzu, bi̱ xóó niguanún nigañún nigún kúbá.
11 Bi̱ niʼngu̱u̱n, niguanún ga̱jma̱a̱ xúgíʼ dí rígá ma̱ngaa ganitsu ndrígóo Sodoma ga̱jma̱a̱ Gomorra, nda̱wa̱á nirajtuun kamba̱a̱ nigún.
12 Numuu dí Lot, a̱ʼdióo ndxájuu Abrán xtáa náa Sodoma, ikha jngóo ma̱ngaa nigún kuya̱a̱ ga̱jma̱a̱ xúgíʼ dí gíʼdoo.
13 Nda̱wa̱á dí nirígá rígi̱, mbáa xa̱bu̱ bi̱ niʼngo̱o̱ nikríya̱a̱ʼ ni̱jkha̱ náa xtáa Abrán bi̱ nindxu̱u̱ hebreo, niʼthúu̱n xúgíʼ dí nirígá. Nákhá ikhú, Abrán xtáa* náa rígá ixi̱ mba̱ʼu̱ ndrígóo Mamré bi̱ nindxu̱u̱ xa̱bu̱ amorreo. Escol ga̱jma̱a̱ Aner nindxu̱ún a̱ngui̱i̱n xa̱bu̱ bugi̱. Ikhiin nambájxu̱u̱n gajmíi̱n Abrán.
14 Índo̱ Abrán nidxawuun dí ni̱jkha̱ kiʼyáa a̱ʼdióo ndxájuu, ikhú nigímbíin xa̱bu̱ bi̱ kijmaratiin muxmijná, 318 xa̱bu̱ bi̱ nikúwá náa goʼwóo, ni̱jkha̱ raxkhúún xa̱bu̱ bugi̱ asndu náa Dan.
15 Índo̱ niʼni mbruʼun, Abrán nirui̱ʼthi̱i̱n xa̱bi̱i̱ mámbá nguéjmi̱i̱n, ikhú nitu̱ʼu̱u̱n niradíin ga̱jma̱a̱ niʼngu̱u̱n. Nigún ruxkúún asndu náa Hobá, dí gíʼ mijngii náa norte ndrígóo Damasco.
16 Xúʼko̱ kaʼnii Abrán niʼngo̱o̱ nigruigúu xúgíʼ dí nigún kudúún. Ma̱ngaa niʼni kríyáaʼ Lot bi̱ nindxu̱u̱ a̱ʼdióo ndxájuu ga̱jma̱a̱ xúgíʼ dí gíʼdoo, xúʼko̱ má gu̱ʼu̱ ga̱jma̱a̱ xúgíinʼ bi̱ ni̱jkha̱ kiʼdiin.
17 Nda̱wa̱á dí Abrán nitanga̱a̱ náa niʼngo̱o̱ rí ni̱jkha̱ gáxminaʼ ga̱jma̱a̱ Kedorlaomer ma̱ngaa reyes bi̱ xtáa gajmíi̱n, rey ndrígóo Sodoma nigájnuu gáxkamaminaʼ ga̱jma̱a̱ Abrán náa mata ndrígóo Savé, xóo muʼthá, náa mata ndrígóo Rey.
18 Ikhú Melquisedec bi̱ nindxu̱u̱ rey náa Salem, nigúwíi pan ga̱jma̱a̱ vino. Ikhaa nindxu̱u̱ ndxajkun ndrígóo Dios bi̱ phú Mba̱a̱.
19 Ikhú niʼni tsajkurámáanʼ Abrán ga̱jma̱a̱ niʼthí:
“¡Dios bi̱ phú Mba̱a̱, bi̱ niʼni mekhu ga̱jma̱a̱ ku̱ba̱ʼ,gaʼni tsajkurámáanʼ Abrán!
20 ¡Gaguma mba̱a̱ Dios bi̱ phú mba̱a̱,Numuu rí nixnájxi̱i̱n náa ñawáanʼ xa̱bu̱ sia̱nʼ ndrígáaʼ!”.
Ga̱jma̱a̱ Abrán nixnúu mbá nguéjma̱* xúgíʼ rí nigruigúu.
21 Nda̱wa̱á dí nirígá rígi̱, rey ndrígóo Sodoma niʼthúu̱n Abrán: “I̱ndó xa̱bu̱ gáraxniááʼ, gaguanáaʼ ga̱jma̱a̱ xúgíʼ dí nitandri̱gúu̱”.
22 Mú Abrán niʼthúu̱n rey ndrígóo Sodoma: “Nakujxí ñawúnʼ ga̱jma̱a̱ naxna ajngóʼ náa Jeobá, Dios bi̱ phú mba̱a̱, bi̱ niʼni mekhu ga̱jma̱a̱ ku̱ba̱ʼ,
23 rí xágruígú nimbá dí ikháán gáraxnu̱ʼ, ni mbá gúmá, ni mbá kuréyu̱u̱ raxtá,* mu nda̱wa̱á xárata, ‹Núma̱aʼ má ga̱jma̱a̱ numuʼ ikhúún dí Abrán ni̱jkha̱nú nigiʼdoo›.
24 I̱ndó dí magruígú nindxu̱u̱ dí ni̱ʼphu̱ má xa̱bi̱ʼ. Mú atatsiñááʼ dí Aner, Escol ga̱jma̱a̱ Mamré, xa̱bu̱ bi̱ nigún ga̱jma̱á nindxu̱ʼ, maguanún ga̱jma̱a̱ dí kaʼñún”.
Mbaʼa nota
^ O “náa bóo ndrígóo Sidim”.
^ O “mar Salado”. Xóo muʼthá, mar Muerto.
^ O “desierto”.
^ O “bóo”.
^ Náa ajngáa hebreo naʼthí, “rígi̱ nindxu̱u̱ wabooʼ ga̱jma̱a̱ nañambáá mu xánujngoo iyaʼ”.
^ O “gíʼ guʼwá xtíin ndrígóo”.
^ O “cháda”.
